1 Akorintho
14 Thingatagai wendo, ĩndĩ thiĩi na mbere kwĩrutanĩria nĩguo mũgĩe na iheo cia roho, na makĩria kĩheo gĩa kũratha mohoro. 2 Nĩ gũkorũo mũndũ ũrĩa waragia na thiomi ndakoragwo akĩaria na andũ, no akoragwo akĩaria na Ngai, tondũ gũtirĩ mũndũ ũtaũkagĩrũo, no aragia hitho cia Ngai kũgerera roho. 3 No rĩrĩ, mũndũ ũrĩa ũrathaga mohoro, nĩ ekagĩra andũ hinya, akamateithia na akamomĩrĩria kũgerera mĩario yake. 4 Mũndũ ũrĩa waragia na thiomi nĩwe wĩĩkagĩra hinya, no ũrĩa ũrathaga mohoro nĩ kĩũngano ekagĩra hinya. 5 Rĩu-rĩ, no nyende inyuothe mwaragie na thiomi, no mũno ingĩenda mũrathage mohoro. Mũndũ ũrĩa ũrathaga mohoro nĩ akĩrĩte ũrĩa waragia na thiomi, o tiga akorirũo nĩ egũtaũra, nĩ getha kĩũngano gĩĩkĩrũo hinya. 6 No rĩrĩ ariũ a Ithe witũ, ingĩũka kũrĩ inyuĩ rĩu ngĩaragia na thiomi-rĩ, ingĩmũguna atĩa ingĩaga kũmũhe maũndũ marĩa nguũrĩirio nĩ Ngai kana ũmenyo kana ũrathi o na kana ũrutani?
7 Ũguo noguo gũkoragwo harĩ indo iria itarĩ muoyo iria irutaga mũgambo, ta mũtũrirũ kana kĩnanda. Tiga hakorirũo na ngũrani harĩ mĩgambo ĩrĩa ĩrarutwo-rĩ, kũngĩmenyeka atĩa rwĩmbo rũrĩa rũrainwo na mũtũrirũ ũcio kana kĩnanda kĩu? 8 Tondũ karumbeta kangĩruta mũgambo ũtaramenyeka wega-rĩ, nũ ũngĩĩhaarĩria nĩ ũndũ wa mbaara? 9 Ũndũ ũmwe na ũcio, mũngĩaga kũhũthĩra ciugo andũ megũtaũkĩrũo wega-rĩ, mũndũ angĩkĩmenya atĩa ũrĩa mũroiga? Mũngĩkorũo mũkĩarĩria rũhuho. 10 Thĩinĩ wa thĩ no gũkorũo nĩ kũrĩ thiomi mĩthemba mĩingĩ, ĩndĩ ciothe nĩ irĩ ũrĩa ciugaga. 11 Tondũ ingĩaga gũtaũkĩrũo nĩ rũthiomi, ingĩkorũo ndĩ mũgeni harĩ ũrĩa ũraria rũthiomi rũu, nake ũcio ũraria angĩkorũo arĩ mũgeni harĩ niĩ. 12 Nĩ ũndũ ũcio o na inyuĩ, tondũ nĩ mwĩriragĩria mũno iheo cia roho, mwĩrutanĩriei kũingĩhĩrũo nĩ iheo iria irĩakaga kĩũngano.
13 Gũkĩrĩ ũguo-rĩ, ũrĩa ũkwaria na thiomi nĩ ahoyage nĩ getha akahota gũtaũra. 14 Tondũ angĩkorũo ndĩrahoya ngĩaragia na thiomi, ndĩrahoya nĩ ũndũ wa kĩheo kĩa roho mũtheru, no meciria makwa matirĩ ũndũ mareka. 15 Gũgũgĩkwo atĩa rĩu? Ngũhoya na kĩheo kĩa roho, no ningĩ nĩ ngũhoya na meciria makwa. Ngũina na kĩheo kĩa roho, no ningĩ nĩ ngũina na meciria makwa. 16 Mũngĩcokia ngatho na kĩheo kĩa roho-rĩ, mũndũ ũrĩa ũrĩ kũu gatagatĩ-inĩ kanyu ũtarĩ ũmenyo mũingĩ angĩkiuga “Ameni” atĩa harĩ ngatho cianyu atekũmenya ũrĩa mũroiga? 17 Nĩ ma, mũracokia ngatho na njĩra ĩrĩa yagĩrĩire, ĩndĩ mũndũ ũcio ũngĩ ndarekĩrũo hinya. 18 Ndĩracokeria Ngai ngatho tondũ njaragia na thiomi nyingĩ kũmũkĩra inyuothe. 19 O na kũrĩ ũguo, thĩinĩ wa kĩũngano nĩ kaba njarie ciugo ithano igũtaũkĩka, nĩ getha arĩa angĩ magunĩke, gũkĩra kwaria na thiomi ciugo ngiri ikũmi mage gũtaũkĩrũo.
20 Ariũ a Ithe witũ, mũtigatuĩke twana tũnini ũhoro-inĩ wa gũtaũkĩrũo, ĩndĩ tuĩkai twana tũnini ũhoro-inĩ wa maũndũ moru; na mũtuĩke andũ agima ũhoro-inĩ wa gũtaũkĩrũo. 21 Thĩinĩ wa Watho nĩ kwandĩke ũũ: “Jehova* oigĩte atĩrĩ, ‘Ngwarĩria andũ aya na thiomi ngʼeni na mwarĩrie wa andũ a kũngĩ, na nginya hĩndĩ ĩyo no mekũrega gũũthikĩrĩria.’” 22 Nĩ ũndũ ũcio, kwaria na thiomi ti rũũri harĩ andũ arĩa metĩkĩtie ĩndĩ nĩ harĩ arĩa matetĩkĩtie, naguo ũrathi ti wa andũ arĩa matetĩkĩtie ĩndĩ nĩ wa arĩa metĩkĩtie. 23 Nĩ ũndũ ũcio kĩũngano gĩothe kĩngĩcemania handũ hamwe na othe marie na thiomi, no andũ arĩa matarĩ ũmenyo mũingĩ kana arĩa matetĩkĩtie makorũo kuo-rĩ, githĩ matikuuga atĩ nĩ mũthũkĩte ciongo? 24 No inyuothe mũngĩkorũo mũkĩratha mohoro, na mũndũ ũtetĩkĩtie kana mũndũ ũtarĩ ũmenyo mũingĩ oke, nĩ ekũrũngwo na athuthurio biũ nĩ arĩa othe megũkorũo kuo. 25 Nacio hitho cia ngoro yake igakĩmenyeka, na nĩ ũndũ ũcio akainamia ũthiũ wake thĩ na agathathaiya Ngai, akiugaga: “Hatarĩ nganja Ngai arĩ gatagatĩ-inĩ kanyu.”
26 Ariũ a Ithe witũ, gũgũgĩkwo atĩa rĩu? Rĩrĩa mwacemania hamwe-rĩ, ũmwe akoragwo na thaburi, ũngĩ ũrutani, ũngĩ ũguũrio, ũngĩ thiomi, nake ũngĩ ũtaũri. Maũndũ mothe nĩ mekĩke na njĩra ya gwaka. 27 Na angĩkorũo nĩ harĩ andũ mekwaria na thiomi, nĩ makorũo marĩ erĩ, na maingĩha mũno makorũo marĩ atatũ, na meke ũguo o mũndũ riita rĩake, na hakorũo na mũtaũri. 28 Ĩndĩ angĩkorũo hatirĩ na mũtaũri, nĩ maikare makirĩte kĩũngano-inĩ, meyarĩrie o ene na marie na Ngai. 29 Anabii erĩ kana atatũ nĩ marie, nao arĩa angĩ mataũkĩrũo nĩ ũrĩa mekũigua. 30 No mũndũ ũngĩ angĩguũrĩrio ũndũ hĩndĩ ĩyo aikarĩte hau thĩ, ũcio ũraria nĩ akire. 31 Tondũ inyuothe no mũrathage mohoro o mũndũ riita rĩake, nĩ getha andũ othe merute na mekĩrũo hinya. 32 Rĩrĩa anabii mekũhũthĩra iheo cia roho nĩ magĩrĩirũo kwĩgirĩrĩria. 33 Nĩ gũkorũo Ngai ti Ngai wa ngũĩ ĩndĩ nĩ wa thayũ.
O ta ũrĩa gũkoragwo ciũngano-inĩ ciothe cia arĩa aamũre, 34 atumia nĩ maikarage makirĩte marĩ thĩinĩ wa kĩũngano, tondũ matiheetwo rũtha rwa kwaria. Ithenya rĩa ũguo-rĩ, nĩ menyihagie o ta ũrĩa Watho o naguo ugaga. 35 Angĩkorũo nĩ harĩ ũndũ marenda kwĩruta-rĩ, nĩ morie athuri ao marĩ kwao mũciĩ, nĩ gũkorũo nĩ ũndũ ũrĩ thoni mũtumia kwaria thĩinĩ wa kĩũngano.
36 Hihi kiugo kĩa Ngai kĩoimanire na inyuĩ, kana hihi no inyuĩ gĩakinyĩire?
37 Mũndũ o wothe angĩĩciria atĩ nĩ mũnabii kana arĩ na kĩheo kĩa roho, no mũhaka etĩkĩre atĩ maũndũ marĩa ndĩramwandĩkĩra inyuĩ nĩ marĩa mathanĩtwo nĩ Mwathani. 38 No mũndũ o wothe angĩregana na maũndũ maya, nĩ akaaregwo. 39 Nĩ ũndũ ũcio ariũ a Ithe witũ-rĩ, mwĩrutanagĩriei kũratha mohoro, no mũtikagirie mũndũ o na ũrĩkũ kwaria na thiomi. 40 No maũndũ mothe nĩ mekĩkage na mũtaratara o na mũbango mwega.