2 Akorintho
12 No mũhaka ndĩĩrahe. Rĩu ngwaria ũhoro wa cioneki na maũndũ marĩa nguũrĩirio nĩ Mwathani, o na gũtuĩka ũndũ ũcio ndũrĩ na ũguni harĩ niĩ. 2 Nĩ njũĩ mũndũ ũmwe thĩinĩ wa Kristo, woirũo agĩtwarũo igũrũ rĩa gatatũ mĩaka ikũmi na ĩna mĩhĩtũku—okorũo aarĩ thĩinĩ wa mwĩrĩ kana ndaarĩ thĩinĩ wa mwĩrĩ niĩ ndiũĩ; Ngai nĩwe ũĩ. 3 Ĩĩ, nĩ njũĩ mũndũ ta ũcio—okorũo aarĩ thĩinĩ wa mwĩrĩ kana ndaarĩ thĩinĩ wa mwĩrĩ-rĩ, niĩ ndiũĩ; Ngai nĩwe ũĩ— 4 ũrĩa woirũo agĩtwarũo paradiso na akĩigua ciugo itangĩario na itetĩkĩrĩtio kũgwetwo nĩ mũndũ. 5 Nĩ ngwĩraha nĩ ũndũ wa mũndũ ta ũcio, no ndikwĩraha igũrũ rĩakwa mwene o tiga igũrũ rĩa maũndũ marĩa itarĩ na hinya. 6 Tondũ o na ingĩenda kwĩraha-rĩ, ndingĩkorũo ndĩ kĩrimũ, nĩ gũkorũo ingiuga ũhoro wa ma. No ndĩĩgiragĩrĩria gwĩka ũguo, nĩguo gũtikagĩe mũndũ o na ũrĩkũ ũkũngaathĩrĩria na ũndũ ũkĩrĩte maũndũ marĩa onaga na akaigua kuuma harĩ niĩ, 7 o tondũ wa kũguũrĩrio maũndũ macio ma magegania.
Nĩguo ndikae gwĩtũũgĩria mũno, ndaaheirũo mũigua thĩinĩ wa mwĩrĩ, mũraika wa Shaitani aikarage akĩningaga, nĩ getha ndigetũũgĩrie mũno. 8 Ngĩthaitha Mwathani maita matatũ atĩ mũigua ũcio ũnjeherere. 9 No akĩnjĩra atĩrĩ: “Ũtugi wakwa mũnene nĩ ũkũiganĩte, nĩ gũkorũo hinya wakwa ũtuĩkaga mũkinyanĩru harĩa hatarĩ na hinya.” Nĩ ũndũ ũcio-rĩ, ngwĩrahĩra maũndũ marĩa itarĩ na hinya ngenete, nĩguo hinya wa Kristo ũtũũre igũrũ rĩakwa o ta hema. 10 Kwoguo-rĩ, nĩ ngenagĩra kwaga hinya, kũrumwo, kũgĩa na mabataro, kũnyarirũo, na gũcemania na moritũ, nĩ ũndũ wa Kristo. Tondũ hĩndĩ ĩrĩa itarĩ na hinya, nĩrĩo ngĩaga na hinya.
11 Nduĩkĩte kĩrimũ. Na nĩ inyuĩ mũtũmĩte nduĩke ũguo, tondũ nĩ mwaagĩrĩirũo kũngaathĩrĩria. Nĩ gũkorũo atũmwo acio anyu ega mũno matingĩrĩte na njĩra o na ĩrĩkũ, o na gũtuĩka ndĩ wa tũhũ. 12 Atĩrĩrĩ, nĩ ndaamuonirie na ũkirĩrĩria maũndũ marĩa monanagia atĩ mũndũ nĩ mũtũmwo, na ngĩringa ciama o na morirũ na mawĩra ma hinya. 13 Tondũ rĩrĩ, nĩ maũndũ-inĩ marĩkũ mwanyihĩirũo kũrĩ ciũngano iria ingĩ o tiga atĩ niĩ mwene ndiatuĩkire mũrigo harĩ inyuĩ? Ndamũthaitha mũnjohere ũũru ũcio.
14 Atĩrĩrĩ, rĩrĩ nĩ riita rĩa gatatũ ndĩĩhaarĩirie gũka kũrĩ inyuĩ, na o narĩo ndigaatuĩka mũrigo. Nĩ gũkorũo ti indo cianyu ndĩrakinyĩra, no nĩ inyuĩ; tondũ ciana itiĩrĩgagĩrĩrũo kũigĩra aciari a cio mũthithũ, no aciari nĩo merĩgagĩrĩrũo maigĩre ciana ciao. 15 Niĩ-rĩ, ngũhũthĩra indo ciothe iria ndĩ nacio ngenete na ndĩĩheane biũ nĩ ũndũ wanyu. Angĩkorũo nĩ ndĩmwendete ũguo wothe-rĩ, kaĩ niĩ itagĩrĩire kwendwo o ta ũguo? 16 O na kũrĩ ũguo-rĩ, ndiatuĩkire mũrigo harĩ inyuĩ. No rĩrĩ, inyuĩ mugaga atĩ ndaarĩ na “wara” na atĩ ndaahũthĩrire “maheeni” kũmũnyita. 17 No anga kũrĩ mũndũ o na ũmwe ndaahenirie kũgerera arĩa othe ndaatũmire kũrĩ inyuĩ atĩ nĩguo niĩ mwene ngʼunĩke? 18 Ndaathaithire Tito na ngĩmũtũma arĩ hamwe na mũrũ ũmwe wa Ithe witũ. Hihi Tito nĩ aamũheenirie nĩguo egune we mwene? Ndaamũheenirie o na hanini. Twathiaga tũrĩ na roho o ũmwe, kana tiguo? Twekaga maũndũ o ũndũ ũmwe, kana tiguo?
19 Hihi ihinda rĩrĩ rĩothe mũtũũrĩte mwĩcirĩtie atĩ tũkoretwo tũgĩĩtetera harĩ inyuĩ? Tũraria ma mbere ya Ngai tũrĩ thĩinĩ wa Kristo. No rĩrĩ, endwa aitũ, maũndũ mothe marĩa twĩkaga, tũmekaga nĩguo tũmwĩkĩre hinya. 20 Nĩ gũkorũo ndĩ na guoya atĩ, hĩndĩ ĩrĩa ngaakinya, ndaahota gũgaakora mũgĩka maũndũ mũgarũ na ũrĩa ingĩenda, na hihi niĩ njĩke mũgarũ na ũrĩa mũngĩenda, hihi ngore mũrĩ na ngũĩ, ũiru, marakara maingĩ, ngarari, njukũ, mũcene, mwĩtĩo, o na kwaga kĩhaarĩro. 21 No kũhoteke hĩndĩ ĩrĩa ngoka rĩngĩ, Ngai wakwa ahota gũkaanjonorithia mbere yanyu, na njakaĩre andũ aingĩ arĩa meehĩtie mbere ĩyo no makaga kwĩrira mĩtugo yao ĩtarĩ mĩtheru, ngomanio itagĩrĩire,* na mĩtugo ya rũtũrĩko* ĩrĩa meekĩte.