Afilipi
2 Mũngĩkorũo nĩ mwĩkĩranaga hinya thĩinĩ wa Kristo, mũkomanĩrĩria nĩ ũndũ wa wendo, mũkarũmbũyania, mũgacayanĩra na mũkendana-rĩ, 2 ĩkagai ũguo nĩguo gĩkeno gĩakwa gĩkinyanĩre, na njĩra ya gũkoragwo na mwĩcirĩrie ũmwe, wendo ũmwe, mũrĩ na ngwatanĩro nũmu na mwĩcirĩrie ũmwe. 3 Mũtikaneke ũndũ o na ũmwe na ngũĩ kana na kwĩĩkĩrĩra, no ikaragai mwĩnyihĩtie mũkĩonaga arĩa angĩ marĩ a bata kũmũkĩra, 4 mũtekũrũmbũiya o maũndũ manyu moiki, no mũkarũmbũyagia nginya maũndũ ma arĩa angĩ.
5 Ikaragai mũrĩ na mwerekera ũyũ wa meciria ta ũrĩa warĩ na Kristo Jesu, 6 ũcio, o na gũtuĩka aatũũraga na mũhianĩre wa Ngai, ndeciririe kwĩhurĩria ũnene, atĩ nĩguo aiganane na Ngai. 7 Handũ ha ũguo-rĩ, aatiganire na kĩrĩa gĩothe aarĩ nakĩo, akĩĩhanania na ngombo, agĩtuĩka mũndũ. 8 Makĩria ma ũguo, hĩndĩ ĩrĩa aatuĩkire mũndũ-rĩ, nĩ eenyihirie na agĩathĩka o nginya agĩkuĩra mũtĩ-inĩ wa kũnyarirĩrũo.* 9 Nĩ ũndũ ũcio, Ngai akĩmũtũũgĩria akĩmũnenehia makĩria, na nĩ ũndũ wa ũtugi akĩmũhe rĩĩtwa rĩkĩrĩte marĩĩtwa marĩa mangĩ mothe, 10 nĩguo thĩinĩ wa rĩĩtwa rĩa Jesu maru mothe magaturio—ma arĩa marĩ igũrũ na arĩa marĩ gũkũ thĩ na arĩa marĩ rungu rwa thĩ— 11 na andũ othe moimbũre atĩ Jesu Kristo nĩ Mwathani nĩguo magoocithie Ngai, o we Ithe.
12 Nĩ ũndũ ũcio endwa akwa-rĩ, o ta ũrĩa mũtũire mwathĩkĩte, to hĩndĩ ĩrĩa ndĩ hamwe na inyuĩ no makĩria rĩrĩa itarĩ hamwe na inyuĩ na mũgeka ũguo mwĩyendeire, thiĩi na mbere kũrutĩra ũhonokio wanyu wĩra mũgĩĩtigagĩra na mũkĩinainaga. 13 Nĩ gũkorũo Ngai, nĩ ũndũ wa wendi wake, nĩwe ũmuongagĩrĩra hinya, akamũhe wendi o hamwe na ũhoti wa gwĩka maũndũ mothe marĩa endaga. 14 Ĩkagai maũndũ mothe mũtekũnuguna na mũtegũkararania, 15 nĩguo mũkorũo mũtarĩ na ũcuke, na mũtuĩke atheru, ciana cia Ngai itarĩ na kameni gatagatĩ-inĩ ka rũciaro ruogomu na rũhĩngĩcanu, mũkĩhenagia ta ũtheri thĩinĩ wa thĩ ĩno, 16 mũrũmĩtie biũ kiugo kĩrĩa kĩa muoyo. Hĩndĩ ĩyo nĩ ngagĩa na gĩtũmi gĩa gũkena mũthenya ũrĩa wa Kristo, ngĩmenyaga atĩ ndiahanyũkire tũhũ na wĩra wakwa wa kĩyo ndwarĩ wa tũhũ. 17 O na kũrĩ ũguo-rĩ, o na angĩkorũo ndĩraitwo ta ũrĩa ndibei ya igongona ĩitagwo kĩgongona-inĩ kũgerera ũtungata mũtheru ũrĩa mũrutaga nĩ ũndũ wa wĩtĩkio wanyu, nĩ ndĩrakena na ngacanjamũka hamwe na inyuĩ inyuothe. 18 O ta ũguo, o na inyuĩ nĩ mwagĩrĩirũo gũkena na gũcanjamũka hamwe na niĩ.
19 Rĩu-rĩ, ndĩ na mwĩhoko harĩ Mwathani Jesu atĩ ica ikuhĩ nĩ ngũtũma Timotheo kũrĩ inyuĩ, nĩguo o na niĩ ngeekĩrũo hinya ndaigua ũhoro wanyu. 20 Nĩ gũkorũo ndirĩ na mũndũ ũngĩ ũrĩ na mwerekera ta wake, ũrĩa ũkũrũmbũiya maũndũ manyu arĩ na wĩhokeku. 21 Tondũ arĩa angĩ othe marũmbũyagia maũndũ mao ene, ti marĩa ma Jesu Kristo. 22 No nĩ mũĩ nĩ onanĩtie atĩ nĩ agĩrĩire, na o ta mwana na ithe, we akoretwo agĩtungata hamwe na niĩ gũtheremia ũhoro ũrĩa mwega. 23 Nĩ ũndũ ũcio, nĩwe ndĩrerĩgĩrĩra gũtũma o narua ndarĩkia kũmenya ũrĩa maũndũ makwa megũikara. 24 Na niĩ mwene-rĩ, ndĩ na ma biũ thĩinĩ wa Mwathani atĩ nĩ ngũũka o narua.
25 No ihinda-inĩ rĩrĩ, ndĩrona kwagĩrĩire gũtũma mũrũ wa Ithe witũ Epafrodito, o we mũrutithania wĩra na mũthigari hamwe na niĩ na nĩwe mwandũmĩire arĩ ndungata ya kũrũmbũyagia mabataro makwa, 26 tondũ nĩ arerirĩria mũno kũmuona inyuothe na nĩ athuthĩkĩte ngoro tondũ nĩ mwaiguire atĩ aarĩ mũrwaru. 27 Ũrĩa kũrĩ nĩ atĩ, aarwarĩte hakuhĩ akue; no Ngai akĩmũiguĩra tha, na to we wiki aaiguĩrĩire tha, no nĩ nginya niĩ, nĩguo ndikagĩe na kĩeha makĩria ma kĩrĩa ndĩ nakĩo. 28 Nĩ ũndũ ũcio, ndĩramũtũma na mĩtũkĩ mũno, nĩguo mwamuona mũgĩe na gĩkeno rĩngĩ, na niĩ nyihĩrũo nĩ mĩtangĩko. 29 Kwoguo-rĩ, mwamũkĩrei ta ũrĩa mwamũkagĩra arĩa marĩ thĩinĩ wa Mwathani mũrĩ na gĩkeno kĩnene, na andũ ta acio mũmatĩage mũno, 30 nĩ gũkorũo aarĩ hakuhĩ gũkua arĩ wĩra-inĩ wa Kristo, ategwĩcaĩra we mwene nĩguo andungatĩre handũ-inĩ hanyu.