Akolosai
1 Nĩ niĩ Paulo, mũtũmwo wa Kristo Jesu kũgerera wendi wa Ngai, tũrĩ na Timotheo mũrũ wa Ithe witũ, 2 ndĩramwandĩkĩra inyuĩ arĩa aamũre, ariũ a Ithe witũ ehokeku thĩinĩ wa Kristo kũu Kolosai:
Mũrogĩa na ũtugi mũnene na thayũ kuuma kũrĩ Ngai Ithe witũ.
3 Hĩndĩ ĩrĩa tũkũhoya nĩ ũndũ wanyu, hingo ciothe nĩ tũcokagĩria Ngai ngatho, o we Ithe wa Mwathani witũ Jesu Kristo, 4 nĩ gũkorũo nĩ twaiguire ũhoro wa wĩtĩkio wanyu harĩ Kristo Jesu na wendo ũrĩa mũkoragwo naguo harĩ arĩa othe aamũre 5 nĩ ũndũ wa kĩĩrĩgĩrĩro kĩrĩa mũigĩirũo kũũrĩa igũrũ. Nĩ mwaiguĩte o mbere ũhoro wa kĩĩrĩgĩrĩro kĩu kũgerera ndũmĩrĩri ya ma ya ũhoro ũrĩa mwega 6 ũrĩa ũmũkinyĩire. O ta ũrĩa ũhoro ũrĩa mwega ũragĩa na maciaro na ũkongerereka thĩinĩ wa thĩ yothe-rĩ, noguo ũhoro ũcio mwega ũragĩa na maciaro thĩinĩ wanyu kuuma o mũthenya ũrĩa mwaiguire na mũkĩmenya wega ma ĩgiĩ ũtugi mũnene wa Ngai. 7 Ũndũ ũcio mũũmenyete kuuma kũrĩ Epafara, ũrĩa twendete na tũtungataga nake, ndungata njĩhokeku ya Kristo handũ-inĩ haitũ. 8 Ningĩ nĩ aatũmenyithirie wendo ũrĩa mũgĩte naguo kũgerera ũteithio wa roho wa Ngai.
9 Kĩu ningĩ nĩkĩo gĩtũmĩte atĩ kuuma o mũthenya ũrĩa twaiguire ũguo, tũtirĩ twatiga kũhoya nĩ ũndũ wanyu na gũthaithana atĩ mũiyũrũo nĩ ũmenyo ũrĩa wa ma wĩgiĩ wendi wake mũrĩ na ũũgĩ wothe na ũtaũku wa kĩĩroho, 10 nĩ getha mũthiage na mĩthiĩre ĩrĩa ĩratwarana na wendi wa Jehova* nĩguo mũmũkenagie maũndũ-inĩ mothe o mũgĩthiaga na mbere kũgĩa na maciaro wĩra-inĩ wothe mwega na mũkĩongagĩrĩra ũmenyo ũrĩa wa ma wa Ngai; 11 o mũkĩongagĩrĩrũo hinya kũgerera ũhoti wothe kũringana na ũhoti wake mũtũũgĩru nĩguo mũmĩrĩrie maũndũ-inĩ mothe mũkirĩrĩirie na mũrĩ na gĩkeno, 12 mũgĩcokagĩria Ithe witũ ngatho, ũrĩa watũmire mwagĩrĩre kũgaya igai rĩa arĩa aamũre arĩa makoragwo ũtheri-inĩ.
13 We nĩ aatũhonokirie kuuma wathani-inĩ wa nduma na agĩtũingĩria ũthamaki-inĩ wa Mũrũwe ũrĩa endete, 14 ũrĩa kũgerera harĩ we twohorirũo na ũkũũri, tũkĩoherũo mehia maitũ. 15 Ũcio nĩwe mũhianĩre wa Ngai ũrĩa ũtonekaga, nĩwe irigithathi harĩ ũũmbi wothe; 16 tondũ indo iria ingĩ ciothe, iria irĩ igũrũ na iria irĩ thĩ, iria cionekaga na iria itonekaga, o na angĩkorũo nĩ itĩ cia ũnene, kana ũtongoria, kana thirikari, kana wathani, ciothe ciombirũo kũgerera harĩ we. Indo iria ingĩ ciothe ciũmbĩtwo kũgerera harĩ we na nĩ ũndũ wake. 17 Ningĩ, aarĩ kuo mbere ya indo iria ingĩ ciothe, na kũgerera harĩ we indo iria ingĩ ciothe nĩ ciombirũo, 18 na nĩwe mũtwe wa mwĩrĩ, na nĩguo kĩũngano. Nĩwe kĩambĩrĩria, irigithathi kuuma kũrĩ arĩa akuũ, nĩguo atuĩke wa mbere maũndũ-inĩ mothe; 19 nĩ gũkorũo Ngai nĩ onire arĩ wega atĩ ũcio akinyanĩre maũndũ-inĩ mothe, 20 na kũgerera harĩ we aiguithanie indo iria ingĩ ciothe harĩ we mwene na njĩra ya thayũ kũgerera thakame ĩrĩa aaitire mũtĩ-inĩ wa kũnyarirĩrũo,* indo iria irĩ thĩ o na iria irĩ igũrũ.
21 Atĩrĩrĩ, inyuĩ arĩa hĩndĩ ĩmwe mwarĩ thũ cia Ngai na mwaraihanĩrĩirie nake nĩ gũkorũo meciria manyu meendaga gwĩka maũndũ moru-rĩ, 22 rĩu inyuĩ nĩ amũiguithanĩtie nake we mwene kũgerera mwĩrĩ wa ũcio wakuire, nĩguo ũcio amũneane mũrĩ atheru na mũtarĩ na kameni, na mũtarĩ ũcuke o na mũnini mbere yake— 23 mwathiĩ na mbere thĩinĩ wa wĩtĩkio, mwakĩtwo mũthingi-inĩ ũrĩa mũrũmu, mũtekwenyenyio kuuma harĩ kĩĩrĩgĩrĩro kĩa ũhoro mwega ũrĩa mwaiguire na ũrĩa wahunjirio kũndũ guothe thĩinĩ wa thĩ. Niĩ Paulo, ndaatuĩkire ndungata ya ũhoro ũcio mwega.
24 Rĩu nĩ gũkena ndĩrakena ngĩthĩnĩka handũ-inĩ hanyu na ndĩrona atĩ no mũhaka thiĩ na mbere gũthĩnĩka ndĩ kĩĩga kĩa mwĩrĩ wa Kristo. Thĩna ũcio nĩ ũkũguna mwĩrĩ wake, na nĩguo kĩũngano. 25 Ndaatuĩkire ndungata ya kĩũngano kĩu kũringana na ũramati ũrĩa ndaheirũo nĩ Ngai nĩ ũndũ wanyu nĩguo hunjie biũ kiugo kĩa Ngai, 26 hitho ya Ngai ĩrĩa yahithĩtwo hĩndĩ ya mĩtabarĩre ya maũndũ* ĩrĩa mĩhĩtũku na hĩndĩ ya njiarũa iria hĩtũku. No rĩu nĩ ĩguũrĩirio arĩa ake aamũre, 27 arĩa Ngai onete kwagĩrĩire mamenyithie andũ a ndũrĩrĩ riri mũnene wa hitho ĩyo yake, nĩyo Kristo arĩ ngwatanĩro hamwe na inyuĩ, kĩĩrĩgĩrĩro gĩa gũkaagaya riri wake. 28 Ũcio nĩwe tũmenyithanagia ũhoro wake, tũgĩtaaraga na tũkĩrutaga andũ othe na ũũgĩ wa ma, nĩguo tũneane o mũndũ arĩ mũkinyanĩru thĩinĩ wa Kristo. 29 Nĩ ũndũ ũcio, nĩ ndĩraruta wĩra na kĩyo, ngĩĩrutanagĩria mũno kũgerera ũteithio wa hinya wake ũrĩa ũrutaga wĩra thĩinĩ wakwa.