2 Timotheo

1 Nĩ niĩ Paulo, mũtũmwo wa Kristo Jesu nĩ ũndũ wa wendi wa Ngai kũringana na kĩĩranĩro kĩa muoyo kũgerera Kristo Jesu, 2 kũrĩ Timotheo, mwana wakwa nyendete:

Ũrogĩa na ũtugi mũnene, tha, na thayũ kuuma kũrĩ Ngai Ithe witũ, na Mwathani witũ Kristo Jesu.

3 Nĩ njokagĩria Ngai ngatho, o we ndutagĩra ũtungata mũtheru o ta ũrĩa maithe makwa ma tene meekaga, na ndĩ na thamiri ĩtarĩ na ũcuke, ndũũraga ngũririkanaga mũthenya na ũtukũ thĩinĩ wa mathaithana makwa. 4 Na nĩ ndĩriragĩria gũkuona ndaririkana maithori maku, nĩguo njiũrũo nĩ gĩkeno. 5 Nĩ gũkorũo nĩ ndirikanaga wĩtĩkio waku ũtarĩ na ũhinga, o ũrĩa waambĩte gũkorũo na cũcũ wanyu Loisi na maitũguo Eunike, na ndĩ na ma atĩ wĩtĩkio o ro ũcio ũrĩ thĩinĩ waku.

6 Nĩ ũndũ ũcio ndĩrakũririkania ũhurutagĩre o ta mwaki kĩheo kĩa Ngai kĩrĩa kĩrĩ thĩinĩ waku kĩrĩa waamũkĩrire hĩndĩ ĩrĩa ndaakũigĩrĩire moko. 7 Nĩ gũkorũo Ngai ndaatũheire roho wa guoya, no aatũheire roho wa hinya na wa wendo na wa meciria mega. 8 Nĩ ũndũ ũcio, ndũgaconoke kũruta ũira wĩgiĩ Mwathani o na ũnjĩgiĩ, o niĩ njohetwo nĩ ũndũ wake, no nyitanĩra na niĩ harĩ mĩnyamaro nĩ ũndũ wa ũhoro ũrĩa mwega na njĩra ya kwĩhoka hinya wa Ngai. 9 We nĩ aatũhonokirie na agĩtwĩta na rĩĩtana itheru, ti ũndũ wa ciĩko citũ, no nĩ ũndũ wa muoroto wake na ũtugi wake mũnene. Twaheirũo ũndũ ũcio kũgerera Kristo Jesu tene mũno, 10 no rĩu ũndũ ũcio nĩ wonanĩtio wega biũ kũgerera kũguũrio kwa Mũhonokia witũ, Kristo Jesu, ũrĩa ũniinĩte gĩkuũ na akarehe ũtheri wĩgiĩ muoyo na kwaga kũbutha kũgerera ũhoro ũrĩa mwega, 11 ũrĩa ndathuurirũo nduĩke mũhunjia na mũtũmwo na mũrutani waguo.

12 Ningĩ kĩu nokĩo kĩratũma nyamarĩke, no ndiragĩconoka. Nĩ gũkorũo ũcio niĩ njĩtĩkĩtie nĩ ndĩmũĩ, na ndĩ na ma atĩ arĩ na ũhoti wa kũgitĩra kĩrĩa ndĩmwĩhokeire o nginya mũthenya ũrĩa ũtuĩtwo. 13 Thiĩ na mbere kũrũmia maũndũ mega marĩa waiguire kuuma kũrĩ niĩ, ũkĩonanagia wĩtĩkio na wendo ũrĩa umanaga na ũiguano hamwe na Kristo Jesu. 14 Gitĩra ũndũ ũyũ mwega wĩhokeirũo kũgerera roho mũtheru, ũrĩa ũikaraga thĩinĩ witũ.

15 Nĩ ũĩ atĩ andũ othe a mwena wa Asia nĩ mandiganĩirie, o hamwe na Fugelo na Herimogene. 16 Mwathani aroiguĩra nyũmba ya Onesiforo tha, nĩ gũkorũo nĩ aanyũmagĩrĩria kaingĩ, na ndaaconokagĩra cioho ciakwa. 17 No hĩndĩ ĩrĩa aarĩ Roma, aanjaririe na kĩyo o nginya akĩnyona. 18 Mwathani aromũteithia akoonio tha nĩ Jehova* mũthenya ũrĩa ũtuĩtwo. Wee nĩ ũĩ wega ũtungata ũrĩa wothe aarutire Efeso.