Jakubu
2 Ariũ a Ithe witũ, hihi mũrageria kũrũmia wĩtĩkio harĩ Mwathani witũ ũrĩ riri Jesu Kristo o mũrĩ na mũthutũkanio? 2 Nĩ gũkorũo mũndũ wĩkĩrĩte icũhĩ cia thahabu ciara na akehumba nguo cia goro angĩũka mũcemanio-inĩ wanyu, na mũndũ mũthĩni wĩhumbĩte nguo irĩ na gĩko o nake atonye, 3 hihi muonaga ũcio wĩhumbĩte nguo cia goro arĩ wa bata makĩria na mũkamwĩra, “Wee ikara thĩ haha hega,” nake ũcio mũthĩni mũkamwĩra, “Wee ikara ũrũngiĩ” kana, “Ikara thĩ gĩtĩ-inĩ kĩu kĩrĩ hakuhĩ na gaturũa ka magũrũ makwa”? 4 Angĩkorũo nĩguo-rĩ, na githĩ mũtikĩrĩ na mũthutũkanio gatagatĩ-inĩ kanyu, ningĩ githĩ mũtiratuanĩra cira na njĩra njũru?
5 Ariũ a Ithe witũ nyendete, ta thikĩrĩriai. Na githĩ Ngai ndaathuurire andũ arĩa monagwo marĩ athĩni thĩinĩ wa thĩ nĩguo matuĩke itonga ũhoro-inĩ wa wĩtĩkio na agai a Ũthamaki, o ũcio eerĩire arĩa mamwendete? 6 No inyuĩ mũtiheaga athĩni gĩtĩo. Na githĩ itonga ticio imũhinyagĩrĩria na ikamũkururia ikamũtwara magooti-inĩ? 7 Na githĩ itinyararaga rĩĩtwa rĩega rĩrĩa mwaheirũo? 8 Rĩu-rĩ, mũngĩhingagia watho wa mũthamaki kũringana na rĩandĩko rĩrĩ, “No mũhaka wendage mũndũ ũrĩa ũngĩ o ta ũrĩa wĩyendete wee mwene,” mweka wega. 9 No mũngĩthiĩ na mbere gũkoragwo na mũthutũkanio, nĩ kwĩhia mũrehia, na watho nĩ wonanĩtie wega atĩ mũrĩ oini-watho.
10 Nĩ gũkorũo mũndũ angĩathĩkĩra Watho wothe ĩndĩ ahĩtie ũndũ-inĩ ũmwe, nĩ agararĩte Watho wothe. 11 Tondũ ũrĩa woigire, “Ndũkanatharie,” ningĩ nĩ oigire, “Ndũkanoragane.” Rĩu-rĩ, o na ũngĩaga gũtharia ĩndĩ ũũragane, nĩ uunĩte watho. 12 Aragiai na mũgeka maũndũ ta andũ maramenya atĩ magaatuĩrũo nĩ watho wa andũ arĩa marĩ na wĩyathi. 13 Nĩ gũkorũo mũndũ ũrĩa ũtaiguanagĩra tha agaatuĩrũo atekũiguĩrũo tha. Tha nĩ itooragia ituĩro.
14 Harĩ na ũguni ũrĩkũ ariũ a Ithe witũ, angĩkorũo mũndũ arĩ na wĩtĩkio no ndarĩ na ciĩko? Kaĩ wĩtĩkio ũcio ũngĩkĩhota kũmũhonokia? 15 Mũrũ kana mwarĩ wa Ithe witũ angĩkorũo atarĩ na nguo na irio cia kũmũigana mũthenya ũcio, 16 na ũmwe wanyu amwĩre, “Thiĩ na thayũ; wĩhumbe ũigue ũrugarĩ na ũrĩe wega,” no mwage kũmũhe kĩrĩa arabatara nĩ ũndũ wa mwĩrĩ wake-rĩ, ũndũ ũcio ũngĩkorũo na ũguni ũrĩkũ? 17 O ta ũguo-rĩ, wĩtĩkio mũtheri ũtarĩ na ciĩko, nĩ mũkuũ.
18 O na kũrĩ ũguo, mũndũ ahota kuuga atĩrĩ: “Wee ũrĩ na wĩtĩkio, na niĩ ndĩ na ciĩko. Nyonia wĩtĩkio waku ũtarĩ na ciĩko, na niĩ nguonie wĩtĩkio wakwa kũgerera ciĩko ciakwa.” 19 Na githĩ ndwĩtĩkĩtie atĩ kũrĩ Ngai ũmwe? Nĩ wĩkĩte wega. No rĩrĩ, o na ndaimono nĩ ciĩtĩkĩtie na nginya ikainaina. 20 No wee mũndũ ũyũ ũtarĩ kĩene-rĩ, hihi nĩ ũrenda kũmenya atĩ wĩtĩkio ũtarĩ na ciĩko nĩ wa tũhũ? 21 Na githĩ ithe witũ Iburahimu ndaatuirũo mũthingu kũgerera ciĩko thutha wa kũruta mũrũwe Isaaka kĩgongona-inĩ? 22 Nĩ mũĩ atĩ wĩtĩkio wake warutaga wĩra hamwe na ciĩko na ũgĩtuwo mũkinyanĩru nĩ ciĩko ciake, 23 na rĩandĩko rĩkĩhinga rĩrĩa riugaga ũũ: “Iburahimu aagĩire na wĩtĩkio harĩ Jehova,* na ũndũ ũcio ũgĩtũma atuwo mũthingu,” na agĩtwo mũrata wa Jehova.*
24 Nĩ mũĩ atĩ mũndũ agaatuwo mũthingu nĩ ũndũ wa ciĩko no ti ũndũ wa wĩtĩkio wiki. 25 O ta ũguo-rĩ, na githĩ Rahabu ũrĩa warĩ mũmaraya ndaatuirũo mũthingu nĩ ũndũ wa ciĩko thutha wa kũnyita ũgeni andũ arĩa maatũmĩtwo na akĩmoimia nja amagereirie njĩra ĩngĩ? 26 Na ma-rĩ, o ta ũrĩa mwĩrĩ ũtarĩ na roho ũrĩ mũkuũ, no taguo wĩtĩkio ũtarĩ na ciĩko ũrĩ mũkuũ.