Jakubu
5 Atĩrĩrĩ inyuĩ andũ arĩa atongu, rĩrai na mũcakae nĩ ũndũ wa mĩnyamaro ĩrĩa ĩkũmũkora. 2 Ũtonga wanyu nĩ ũbuthĩte, na nguo cianyu ikarĩo nĩ memenyi. 3 Thahabu na betha cianyu nĩ ndĩe nĩ gutu, na gutu ũcio nĩ ũgaatuĩka ũira kũmwerekera na nĩ ũkaarĩa nyama cia mĩĩrĩ yanyu. Indo iria mũigĩte igaatuĩka o ta mwaki matukũ-inĩ ma kũrigĩrĩria. 4 Atĩrĩrĩ, mĩcara ĩrĩa mũregete kũrĩha aruti a wĩra arĩa maamũgetheire mĩgũnda yanyu nĩ ĩraanĩrĩra, na kĩrĩro kĩa agethi acio gĩa gũcaria ũteithio nĩ gĩkinyĩire matũ ma Jehova* mũnene wa ita. 5 Mũtũũrĩte na ũtonga mũkĩhingagia merirĩria manyu gũkũ thĩ. Mũnoretie ngoro cianyu nĩ ũndũ wa mũthenya wa gũthĩnjwo. 6 Nĩ mũtuĩrĩire ũrĩa mũthingu, na mũkamũũraga. Githĩ we ndareganĩte na inyuĩ?
7 Ariũ a Ithe witũ, nĩ ũndũ ũcio-rĩ, gĩetererei o nginya hĩndĩ ya gũkorũo kuo kwa Mwathani. Atĩrĩrĩ, mũrĩmi aikaraga etereire maciaro mega ma thĩ, ageterera o nginya mbura ya mbere na ya thutha-inĩ ĩkinye. 8 O na inyuĩ gĩai na wetereri; ĩkĩrai ngoro cianyu hinya, tondũ gũkorũo kuo kwa Mwathani nĩ gũkuhĩrĩirie.
9 Ariũ a Ithe witũ, mũtikanatetanie, nĩguo mũtikanatuĩrũo. Atĩrĩrĩ, Mũtuanĩri Cira arũgamĩte mũrango-inĩ. 10 Ariũ a Ithe witũ, rũmĩrĩrai kĩonereria kĩega gĩa kũnyamario na gũkirĩrĩria kĩa anabii arĩa maaririe thĩinĩ wa rĩĩtwa rĩa Jehova.* 11 Atĩrĩrĩ, andũ arĩa maakirĩrĩirie-rĩ, tuugaga nĩ arathime. Nĩ mũiguĩte ũhoro wa ũkirĩrĩria wa Ayubu na ũrĩa Jehova* aamũrathimire, atĩ Jehova* arĩ wendo mũnene na tha.
12 Makĩria ma ũguo ariũ a Ithe witũ-rĩ, tigagai kwĩhĩta na igũrũ o na kana na thĩ kana na mwĩhĩtwa ũngĩ o wothe. No rekagai “Ĩĩ” yanyu ĩgatuĩka ĩĩ na “Aca” yanyu, ĩgatuĩka aca, nĩ getha mũtigatuĩke a gũgaacirithio.
13 Hihi nĩ harĩ mũndũ ũrĩ na mathĩna gatagatĩ-inĩ kanyu? Nĩ athiĩ na mbere kũhoya. Hihi nĩ harĩ mũndũ mũkenu? Nĩ aine thaburi. 14 Hihi nĩ harĩ mũndũ mũrwaru gatagatĩ-inĩ kanyu? Nĩ ete athuri a kĩũngano, nao mamũhoere makĩmũhakaga maguta thĩinĩ wa rĩĩtwa rĩa Jehova.* 15 Na mahoya macio ma wĩtĩkio nĩ megũtũma mũndũ ũcio mũrwaru ahone, na Jehova* nĩ ekũmwĩkĩra hinya. Ningĩ angĩkorũo nĩ ekĩte mehia, nĩ ekuoherũo.
16 Nĩ ũndũ ũcio-rĩ, umbũranagĩrai mehia manyu na mũhoyanagĩre, nĩguo mũkahonio. Mathaithana ma mũndũ mũthingu nĩ marĩ ũhoti mũnene. 17 Elija aarĩ mũndũ o ta ithuĩ, no hĩndĩ ĩrĩa aahoire mũno mbura ndĩkoire, gũtioirire thĩinĩ wa bũrũri ũcio ihinda rĩa mĩaka ĩtatũ na mĩeri ĩtandatũ. 18 Agĩcoka akĩhoya rĩngĩ, mbura ĩkiura kuuma matu-inĩ, na bũrũri ũcio ũkĩgĩa na maciaro.
19 Ariũ a Ithe witũ, mũndũ o na ũrĩkũ gatagatĩ-inĩ kanyu angĩhĩtithio oime njĩra-inĩ ĩrĩa ya ma nake mũndũ ũngĩ amũgarũre, 20 menyai atĩ mũndũ o wothe ũgarũraga mwĩhia oime mahĩtia-inĩ make, nĩ akaamũhonokia kuuma gĩkuũ-inĩ na nĩ akaahumbĩra mehia maingĩ.