1 Petero
2 Nĩ ũndũ ũcio-rĩ, eheriai thĩinĩ wanyu ũũru wothe na maheeni na ũhinga na ũiru na mĩario yothe mĩũru. 2 O ta tũkenge-rĩ, kũriai wendo mũnene harĩ iria rĩrĩa rĩa kiugo rĩtatukanĩtio na kĩndũ, nĩguo kũgerera harĩ rĩo mũkũre nĩ getha mũkaahonokio, 3 tondũ nĩ mũcamĩte mũkona atĩ Mwathani nĩ mũtugi.
4 O mũgĩũkaga harĩ we, o we ihiga rĩrĩ muoyo rĩrĩa rĩaregirũo nĩ andũ no nĩ rĩthuure na rĩa goro harĩ Ngai, 5 inyuĩ mũtariĩ ta mahiga marĩ muoyo marakwo matuĩke nyũmba ya kĩĩroho mũtuĩke athĩnjĩri-Ngai atheru, nĩguo mũrutage magongona ma kĩĩroho maretĩkĩrĩka harĩ Ngai kũgerera Jesu Kristo. 6 Nĩ gũkorũo Rĩandĩko riugĩte: “Atĩrĩrĩ, nĩ ngũiga ihiga rĩthuure Zayuni, ihiga rĩa goro rĩa mũthingi rĩa kona, na mũndũ wothe ũrĩa wonanagia wĩtĩkio harĩ rĩo ndarĩ hĩndĩ agaaconorithio.”
7 Kwoguo, harĩ inyuĩ we nĩ wa goro tondũ nĩ mwĩtĩkĩtie; no harĩ arĩa matetĩkĩtie, “ihiga rĩrĩa rĩaregirũo nĩ aaki, nĩrĩo rĩtuĩkĩte ihiga rĩrĩa inene rĩa kona” 8 o na rĩgatuĩka “ihiga rĩa kũhĩngithia na rwaro rwa gũtũma andũ magwe.” Andũ acio mahĩngagwo tondũ matiathĩkagĩra kiugo. Acio marigĩrĩrio mao matariĩ ũguo. 9 No inyuĩ mũrĩ “rũrĩrĩ rũthuure, athĩnjĩri-Ngai matuĩtwo athamaki, rũrĩrĩ rũtheru, andũ matuĩkĩte kĩndũ kĩa Ngai kĩa mwanya, nĩguo mũmenyithanagie kũndũ guothe wega” wa Ũrĩa wamwĩtire akĩmũruta nduma-inĩ akĩmũrehe ũtheri-inĩ wake wa magegania. 10 Nĩ ũndũ kũrĩ hĩndĩ mũtaarĩ andũ a Ngai, no rĩu mũrĩ andũ ake; kũrĩ hĩndĩ mũtoonetio tha, no rĩu nĩ mwamũkĩrĩte tha.
11 Endwa akwa, ndĩramũthaitha mũrĩ ageni na aikari a kahinda kanini thĩinĩ wa thĩ, atĩ mwĩthemage merirĩria ma mwĩrĩ, marĩa marũaga na inyuĩ. 12 Ikaragai mũrĩ na mĩthiĩre mĩega gatagatĩ-inĩ ka ndũrĩrĩ, nĩguo hĩndĩ ĩrĩa mekuga atĩ mũrĩ eki ũũru, meyonagĩre ciĩko cianyu njega nĩ getha makaagooca Ngai mũthenya wake ũrĩa agaathuthuria andũ.
13 Nĩ ũndũ wa Mwathani athĩkagĩrai wathani o wothe ũthondeketwo nĩ andũ, kana nĩ mũthamaki arĩ mũnene 14 kana nĩ mangavana arĩ o matũmĩtwo nĩwe nĩguo maherithie arĩa mekaga ũũru no magaathĩrĩrie arĩa mekaga wega. 15 Nĩ gũkorũo nĩ wendi wa Ngai atĩ kũgerera ciĩko cianyu njega mũkirie mĩario ya ũrimũ ĩrĩa yaragio nĩ andũ matarĩ ogĩ. 16 Ikaragai mũrĩ andũ marĩ na wĩyathi, no mũtikahũthagĩre wĩyathi wanyu kũhithĩrĩra mehia, ĩndĩ ũhũthagĩrei ta ngombo cia Ngai. 17 Tĩagai andũ a mĩthemba yothe, endagai thiritũ yothe ya ariũ a Ithe witũ, mwĩtigagĩrei Ngai, tĩagai mũthamaki.
18 Ndungata nĩ ciĩnyihagĩrie athani a cio irĩ na gĩtĩo kĩnene, na to arĩa ega na arĩa acayanĩri ĩndĩ nĩ nginya arĩa aritũ gũkenia. 19 Nĩ gũkorũo mũndũ angĩkirĩrĩria moritũ na gwĩkwo maũndũ matarĩ ma kĩhooto tondũ wa thamiri yake mbere ya Ngai, nĩ ũndũ mwĩtĩkĩrĩku. 20 Nĩ ũndũ rĩrĩ, harĩ bata ũrĩkũ mũngĩhũũrũo nĩ ũndũ wa kwĩhia na mũgakirĩrĩria? No angĩkorũo mũrakirĩrĩria kũnyarirũo nĩ ũndũ wa gwĩka wega, ũndũ ũcio nĩ mwĩtĩkĩrĩku harĩ Ngai.
21 Ti itherũ ũndũ ũcio nĩguo mwetĩirũo, tondũ Kristo o nake nĩ aanyarirĩkire nĩ ũndũ wanyu, akĩmũtigĩra kĩonereria nĩguo mũrũmagĩrĩre makinya make mũrĩ na wĩhokeku. 22 Ndaigana kwĩhia, kana akĩaria maheeni na kanua gake. 23 Rĩrĩa aarumagwo ndaarumanire. Rĩrĩa aanyariragwo, ndeehĩtagĩra arĩa maamũnyariraga, ĩndĩ eeneanire kũrĩ Ũrĩa ũtuaga cira na kĩhooto. 24 We mwene nĩ aakuuire mehia maitũ na mwĩrĩ wake rĩrĩa aacuuririo mũtĩ-inĩ, nĩguo tũkũũrũo harĩ mehia tũtũũre na ũthingu. Na “kũgerera ironda ciake nĩ mwahonirio.” 25 Nĩ gũkorũo mwahaanaga ta ngʼondu irora njĩra, no rĩu nĩ mũcokete harĩ mũrĩithi na mũrori wa mĩoyo yanyu.