1 Petero
5 Nĩ ũndũ ũcio, tondũ niĩ ndĩ mũthuri na mũira wa mĩnyamaro ya Kristo na mũgai wa riri ũrĩa ũkaguũranĩrio-rĩ, ngũtaara athuri* arĩa marĩ gatagatĩ-inĩ kanyu ũũ: 2 Rĩithagiai rũũru rwa Ngai rũrĩa mwĩhokeirũo, mũgĩtungataga mũrĩ arori, mũtekũringĩrĩrio, no mwĩyendeire mũrĩ mbere ya Ngai; ti ũndũ wa kwenda kwĩguna na njĩra ĩtarĩ ya kĩhooto, ĩndĩ na wendo; 3 no ti gwĩtua anene igũrũ rĩa andũ arĩa Ngai atuĩte igai rĩake, ĩndĩ mũtuĩke cionereria harĩ rũũru. 4 Na rĩrĩa mũrĩithi ũrĩa mũnene akaaguũrio, nĩ mũkaaheo thũmbĩ ĩrĩ na riri ĩrĩa ĩtangĩthira.
5 O ta ũguo-rĩ, inyuĩ anake mwĩnyihagĩriei athuri arĩa akũrũ. No inyuothe mwĩhumbei wĩnyihia o mũndũ kwerekera ũrĩa ũngĩ, tondũ Ngai nĩ areganaga na arĩa etĩi, no nĩ aheaga arĩa enyihia ũtugi mũnene.
6 Nĩ ũndũ ũcio mwĩnyihiei harĩ guoko kũrĩ hinya kwa Ngai, nĩguo akaamũtũũgĩria hĩndĩ ĩrĩa yagĩrĩire yakinya, 7 o mũkĩmũikagĩria mĩtangĩko yanyu yothe, nĩ ũndũ nĩ amũrũmbũyagia. 8 Mwĩmenyagĩrĩrei, ikaragai mwĩiguĩte! Thũ yanyu Mũcukani, aikaraga agĩcangacangaga ta mũrũthi ũrararama, agĩetha mũndũ wa kũmeria. 9 No reganai nake, mũrĩ na wĩtĩkio mũrũmu, mũkĩmenyaga atĩ ariũ a Ithe witũ othe nĩ maracemania na mĩnyamaro o ta ĩyo thĩ yothe. 10 No thutha wa kũnyarirĩka kahinda kanini, Ngai mwene ũtugi wothe mũnene, ũrĩa wamwĩtire thĩinĩ wa riri wake wa tene na tene mũrĩ ngwatanĩro na Kristo, we mwene nĩ ekũmũmenyeria biũ. Nĩ ekũmũũmĩrĩria, nĩ ekũmwĩkĩra hinya, na nĩ egũtũma mwĩhande wega. 11 Ũnene nĩ wake tene na tene. Ameni.
12 Ndamwandĩkĩra ciugo nyinyi kũgerera mũrũ wa Ithe witũ mwĩhokeku Silvano,* nĩguo ndĩmwĩkĩre hinya na ndute ũira mũrũmu atĩ ũtugi mũnene ũrĩa Ngai amuonetie nĩ wa ma. Mwĩhandei thĩinĩ waguo. 13 Mũtumia* ũrĩa ũrĩ Babuloni, mũthuure o ta inyuĩ, nĩ amũgeithia, na Mariko mũrũ wakwa o nake nĩ amũgeithia. 14 Geithaniai na ngeithi cia kũmumunyana irĩ na wendo.
Inyuothe arĩa mũgwatanagĩra na Kristo mũrogĩa na thayũ.