Kũguũrĩrio

20 Na ngĩona mũraika agĩikũrũka kuuma igũrũ arĩ na cabi ya irima rĩrĩa rĩtarĩ gĩturi* na guoko-inĩ gwake anyitĩte mũnyororo mũnene. 2 Akĩnyita ndamathia ĩyo, na noyo nyoka ĩrĩa ya tene, o we wĩtagwo Mũcukani na Shaitani, akĩmuoha ihinda rĩa mĩaka ngiri ĩmwe. 3 Akĩmũikia irima rĩrĩa rĩtarĩ gĩturi,* akĩrĩhinga na akĩrĩkĩra mũhũũri, nĩguo ndagacoke kũhĩtithia ndũrĩrĩ rĩngĩ o nginya mĩaka ĩyo ngiri ĩmwe ĩthire. Thutha ũcio no mũhaka ohorũo o kahinda kanini.

4 Ningĩ ngĩona itĩ cia ũnene, na arĩa maacikarĩire makĩheo wathani wa gũtuanĩra. Ngĩona mĩoyo* ya arĩa maanoragwo nĩ kũruta ũira wĩgiĩ Jesu na nĩ ũndũ wa kwaria ũhoro wa Ngai, arĩa mataathathayagia nyamũ ĩyo kana mũhianano wayo na matekĩrirũo rũũri rwayo mathiithi-inĩ na moko-inĩ mao. Magĩcoka muoyo na magĩathana marĩ athamaki hamwe na Kristo ihinda rĩa mĩaka ngiri ĩmwe. 5 (Andũ acio angĩ akuũ matiacokire muoyo o nginya rĩrĩa mĩaka ĩyo ngiri yathirire.) Kũu nĩkuo kũriũka kũrĩa kwa mbere. 6 Gũkena na gũthera nĩ arĩa othe makaamba kũriũkio; acio gĩkuũ kĩrĩa gĩa kerĩ gĩtirĩ na ũhoti igũrũ rĩao, no magaatuĩka athĩnjĩri a Ngai na a Kristo, na magaathana marĩ athamaki hamwe nake ihinda rĩa mĩaka ngiri ĩmwe.

7 Na rĩrĩ, mĩaka ĩyo ngiri ĩmwe yathira o ro ũguo, Shaitani nĩ akoohorũo kuuma kĩoho-inĩ gĩake, 8 nake nĩ agaathiĩ kũhĩtithia ndũrĩrĩ icio irĩ ituri-inĩ iria inya cia thĩ, Gogu na Magogu, acicokanĩrĩrie hamwe nĩ ũndũ wa mbaara. Mũigana wao ũtariĩ ta mũthanga wa iria. 9 Magĩthiĩ kũndũ guothe thĩinĩ wa thĩ na magĩthiũrũrũkĩria gĩikaro kĩa arĩa aamũre o na itũũra rĩrĩa rĩendetwo. No mwaki ũkiuma igũrũ ũkĩmaniina. 10 Nake Mũcukani ũcio wamahĩtithagia agĩikio thĩinĩ wa iria rĩa mwaki na ũbiriti, kũrĩa nyamũ ĩrĩa hamwe na mũnabii ũrĩa wa maheeni maarĩ; na makaaherithio mũthenya na ũtukũ tene na tene.

11 Na ngĩona gĩtĩ kĩnene kĩa rangi mwerũ na Ũrĩa wagĩikarĩire. Nayo thĩ na igũrũ ikĩmũũrĩra, na itiacokire kuonerũo handũ rĩngĩ. 12 Na ngĩona akuũ, arĩa anene na anini, marũgamĩte mbere ya gĩtĩ kĩrĩa kĩa ũnene, na ikũnjo ikĩhingũrũo. No gĩkũnjo kĩngĩ gĩkĩhingũrũo; nĩkĩo gĩkũnjo kĩa muoyo. Arĩa akuũ magĩtuĩrũo kuumana na maũndũ marĩa maandĩkĩtwo ikũnjo-inĩ icio kũringana na ciĩko ciao. 13 Narĩo iria rĩkĩruta akuũ arĩa maarĩ thĩinĩ warĩo, na gĩkuũ na Mbĩrĩra* ikĩruta akuũ arĩa maarĩ thĩinĩ wacio, na o mũndũ agĩtuĩrũo kũringana na ciĩko ciake. 14 Na gĩkuũ na Mbĩrĩra* igĩikio thĩinĩ wa iria rĩu rĩa mwaki. Kĩu nĩkĩo gĩkuũ kĩrĩa gĩa kerĩ, iria rĩa mwaki. 15 Makĩria ma ũguo, mũndũ o wothe ũtaandĩkĩtwo thĩinĩ wa ibuku rĩa muoyo agĩikio iria-inĩ rĩu rĩa mwaki.