Kũguũrĩrio
6 Na rĩrĩa Gatũrũme aahingũrire mũhũũri ũmwe wa ĩyo mũgwanja, ngĩona na ngĩigua kĩmwe gĩa ciũmbe iria inya irĩ muoyo kĩoiga na mũgambo ũhaana marurumĩ: “Ũka!” 2 Na rĩrĩ, ngĩrora ngĩona mbarathi ya rangi mwerũ, na ũrĩa wamĩikarĩire aarĩ na ũta; na akĩheo thũmbĩ, agĩthiĩ akĩhootanaga nĩguo arĩkie ũhootani wake.
3 Rĩrĩa aahingũrire mũhũũri wa kerĩ, ngĩigua kĩũmbe gĩa kerĩ kĩrĩ muoyo kĩoiga: “Ũka!” 4 Mbarathi ĩngĩ ĩkiumĩra, nayo yarĩ ya rangi mũtune, nake ũrĩa wamĩikarĩire akĩheo rũtha rwa kũniina thayũ thĩinĩ wa thĩ nĩguo andũ mathĩnjane, nake akĩheo rũhiũ rũnene rwa njora.
5 Rĩrĩa aahingũrire mũhũũri wa gatatũ, ngĩigua kĩũmbe gĩa gatatũ kĩrĩ muoyo kĩoiga: “Ũka!” Na rĩrĩ, ngĩona mbarathi njirũ, na ũrĩa wamĩikarĩire aarĩ na ratiri ya gũthima guoko-inĩ gwake. 6 Ngĩigua kĩndũ ta mũgambo gatagatĩ-inĩ ga ciũmbe iria inya irĩ muoyo woiga: “Kilo ya ngano yumage dinari* ĩmwe na kilo ithatũ cia cairi ciumage dinari* ĩmwe; na ndũgaitange maguta na ndibei.”
7 Rĩrĩa aahingũrire mũhũũri wa kana, ngĩigua mũgambo wa kĩũmbe gĩa kana kĩrĩ muoyo woiga: “Ũka!” 8 Na rĩrĩ, ngĩona mbarathi ya rangi mũtheũku, na ũrĩa wamĩikarĩire aarĩ na rĩĩtwa Gĩkuũ. Na oimĩtwo thutha nĩ Mbĩrĩra.* Na makĩheo rũtha rwa gwatha gĩcunjĩ kĩa inya gĩa thĩ, morage andũ na rũhiũ rũraihu rwa njora, na ngʼaragu, na mũrimũ mũru, na nyamũ cia gĩthaka cia gũkũ thĩ.
9 Rĩrĩa aahingũrire mũhũũri wa gatano, ngĩona rungu rwa kĩgongona thakame* ya arĩa maathĩnjĩtwo nĩ ũndũ wa kiugo kĩa Ngai na nĩ ũndũ wa kũruta ũira. 10 Makĩanĩrĩra na mũgambo mũnene makiuga: “Wee Mwathani Ũrĩa Mũnene, o wee mũtheru na wa ma, nĩ nginya rĩ ũkwĩgirĩrĩria gũtuanĩra na kũrĩhĩria thakame itũ harĩ arĩa matũũraga thĩinĩ wa thĩ?” 11 Na makĩheo o mũndũ nguo ndaya ya rangi mwerũ, makĩrũo mahurũke ihinda rĩngĩ inyinyi, nginya rĩrĩa mũigana ũkaahinga wa ndungata iria ingĩ na ariũ a Ithe wao arĩa maarĩ hakuhĩ kũũragwo o tao.
12 Ngĩcoka ngĩona rĩrĩa aahingũrire mũhũũri wa gatandatũ, na gũkĩgĩa gĩthingithia kĩnene; narĩo riũa rĩkĩira o ta nguo ya ikũnia ĩthondeketwo na njuĩrĩ;* naguo mweri wothe ũkĩhaana thakame, 13 na njata cia igũrũ ikĩgwa thĩ o ta ũrĩa mũkũyũ ũitaga ngũyũ itarĩ njĩru rĩrĩa wahurutwo nĩ rũhuho rũnene. 14 Narĩo igũrũ rĩkĩehera o ta gĩkũnjo kĩrakũnjwo, na irĩma ciothe na icigĩrĩra ciothe ikĩeherio harĩa ciarĩ. 15 Nao athamaki a thĩ, atongoria, anene a mbũtũ, itonga, arĩa marĩ hinya, ngombo ciothe, na andũ othe arĩa maarĩ na wĩyathi makĩĩhitha ngurunga-inĩ na mahiga-inĩ ma irĩma. 16 Nao meeraga irĩma na mahiga macio ũũ: “Tũgwĩrei mũtũhithe kuumana na Ũrĩa ũikarĩire gĩtĩ kĩa ũnene na kuumana na marakara ma Gatũrũme, 17 nĩ gũkorũo mũthenya ũrĩa mũnene wa marakara mao nĩ mũkinyu, na nũ ũngĩkĩhonoka?”