Samueli wa Mbere
2 Ningĩ Hana akĩhoya akiuga ũũ:
Kanua gakwa kahingũkĩte biũ kaarĩrie thũ ciakwa,
Nĩ gũkorũo nĩ ngenete nĩ ũndũ wa ciĩko ciaku cia kũhonokania.
2 Gũtirĩ o na ũmwe mũtheru ta Jehova,
Gũtirĩ ũngĩ tiga wee,+
Na gũtirĩ rwaro rwa ihiga rũtariĩ ta Ngai witũ.+
3 Mũtigaikare mũkĩaragia na mwĩtĩo;
Mũtikareke ũndũ o na ũmwe wa mwĩgaatho uume kanua-inĩ kanyu,
Nĩ gũkorũo Jehova nĩ Ngai ũrĩ ũmenyo,+
Na nĩwe ũthuthuragia ciĩko na njĩra ya kĩhooto.
4 Mota ma arũme arĩa marĩ hinya nĩ moinange,
No andũ arĩa matarĩ na hinya nĩ maheetwo hinya.+
5 Arĩa mahũnĩtio wega no mũhaka mandĩkwo wĩra nĩguo mone mũgate,
Ĩndĩ arĩa ahũtu nĩ matigĩte kũhũta.+
7 Jehova nĩ atũmaga mũndũ athĩne, na agatũma mũndũ atonge;+
Nĩ anyihagia mũndũ, na akambararia mũndũ.+
8 Ambararagia ũrĩa ũtarĩ hinya kuuma rũkũngũ-inĩ;
Akoya mũthĩni kuuma hĩba-inĩ ya mũhu,*+
Agatũma maikare hamwe na anene,
Akamahe gĩtĩ gĩa gĩtĩo.
Jehova nĩwe mwene indo iria itiiragĩrĩra thĩ,+
Na aigĩrĩire bũrũri ũrĩa ũrĩ maciaro igũrũ rĩacio.
9 Nĩ agitagĩra makinya ma andũ ake arĩa ehokeku,+
No arĩa aganu nĩ gũkirio magaakirio nduma-inĩ,+
Nĩ gũkorũo mũndũ ndahootanaga nĩ ũndũ wa hinya wake.+
11 Elikana agĩcoka akĩinũka gwake mũciĩ Rama, no kahĩĩ kau gaatungatagĩra Jehova+ karĩ mbere ya Eli mũthĩnjĩri-Ngai.
12 Na rĩrĩ, ariũ a Eli maarĩ andũ aganu;+ matiatĩĩte Jehova. 13 Ũũ nĩguo meekaga ũhoro-inĩ wĩgiĩ indo iria athĩnjĩri-Ngai maagĩrĩire kũheo nĩ andũ:+ Mũndũ o wothe angĩarutire igongona, ndungata ya mũthĩnjĩri-Ngai yokaga ĩnyitĩte hũma ya mĩthece ĩtatũ na guoko rĩrĩa nyama iratherũka, 14 ĩgaikia hũma ĩyo kĩraĩ-inĩ, nyũngũ-inĩ ya nyitĩro igĩrĩ, thaburia-inĩ, kana nyũngũ-inĩ ya nyitĩro ĩmwe. Na kĩrĩa hũma ĩyo ĩkũruta, mũthĩnjĩri-Ngai akeyoera. Ũguo nĩguo meekaga kũu Shilo harĩ Aisiraeli othe arĩa mookaga kuo. 15 Ningĩ, o na mũndũ ũrĩa ũraruta igongona atanacina maguta nĩguo marute ndogo,+ ndungata ya mũthĩnjĩri-Ngai yokaga ĩkamwĩra: “He mũthĩnjĩri-Ngai nyama ahĩhie. Ndegwĩtĩkĩra nyama therũkie kuuma kũrĩ wee, no nyama njĩthĩ tu.” 16 Na mũndũ ũcio angĩamwĩrire ũũ: “Reke maguta mambe macinwo marute ndogo,+ thutha ũcio wĩyoere kĩrĩa gĩothe ũkwenda,” ndungata ĩyo yamwĩraga atĩrĩ: “Aca, nengera o rĩu; kwaga ũguo, nguoya kĩa hinya!” 17 Nĩ ũndũ ũcio mehia ma ndungata icio magĩkorũo marĩ maingĩ mũno mbere ya Jehova,+ nĩ gũkorũo andũ acio matiatĩaga igongona rĩa Jehova.
18 Na rĩrĩ, Samueli aatungataga+ mbere ya Jehova, ehumbĩte* ebodi ya gatani,+ o na gũtuĩka aarĩ o kamwana. 19 Ningĩ nyina nĩ aamũtumagĩra kagooti gatarĩ moko, na akamũtwarĩra o mwaka o mwaka rĩrĩa maathiaga na mũthuriwe kũruta igongona rĩa o mwaka.+ 20 Nake Eli akĩrathima Elikana na mũtumia wake akiuga ũũ: “Jehova arokũhe mwana kũgerera mũtumia ũyũ waku ithenya-inĩ rĩa mwana ũcio mũheete* Jehova.”+ Nao magĩcoka mũciĩ. 21 Jehova akĩririkana Hana, nake akĩoha nda;+ na agĩciara anake angĩ atatũ na airĩtu erĩ. Nako kamwana kau ti Samueli gagĩthiĩ na mbere gũkũra karĩ mbere ya Jehova.+
22 Na rĩrĩ, Eli aarĩ mũkũrũ mũno, no nĩ aaiguĩte ũrĩa wothe ariũ ake meekaga+ andũ othe a Isiraeli na ũrĩa maakomaga na atumia arĩa maatungataga mũromo-inĩ wa hema ya gũtũnganwo.+ 23 Aameeraga ũũ: “Nĩ kĩĩ kĩratũma mwĩke maũndũ na njĩra ĩno? Tondũ maũndũ marĩa ndĩraigua mamwĩgiĩ kuuma kũrĩ andũ othe nĩ moru. 24 Aca ariũ akwa, ũhoro ũrĩa ndĩraigua ũgĩtheremio gatagatĩ-inĩ ka andũ a Jehova ti mwega. 25 Mũndũ angĩhĩria mũndũ ũrĩa ũngĩ, mũndũ no amũthaithanĩrĩre harĩ Jehova;* no mũndũ angĩĩhĩria Jehova-rĩ,+ nũũ ũngĩmũhoera?” Ĩndĩ nĩ maaregire gũthikĩrĩria ithe, nĩ gũkorũo Jehova nĩ aatuĩte atĩ nĩ ekũmoraga.+ 26 Nako kamwana kau ti Samueli gagĩthiĩ o na mbere kũneneha gagĩtĩkĩrĩkaga nĩ Jehova o na andũ.+
27 Mũndũ ũmwe wa Ngai agĩũka kũrĩ Eli akĩmwĩra atĩrĩ: “Ũũ nĩguo Jehova oigĩte: ‘Na githĩ ndieguũririe harĩ nyũmba ya thoguo rĩrĩa maarĩ Misiri marĩ ngombo nyũmba-inĩ ya Firauni?+ 28 Na agĩthuurũo kuuma harĩ mĩhĩrĩga yothe ya Isiraeli+ atungatage arĩ mũthĩnjĩri-Ngai wakwa na athiage kĩgongona-inĩ gĩakwa+ kũruta magongona na gũcina ũbumba,* na ehumbage ebodi arĩ mbere yakwa; na ngĩhe nyũmba ya thoguo magongona mothe ma gũcinwo na mwaki ma Aisiraeli.*+ 29 Nĩ kĩĩ kĩratũma mũnyarare* igongona rĩakwa na iruta rĩakwa rĩrĩa njathanĩte rĩrutagwo gĩikaro-inĩ gĩakwa?+ Nĩ kĩĩ kĩratũma ũtĩe ariũ aku kũngĩra, mũkenoria na icunjĩ iria njega mũno cia igongona rĩothe rĩa andũ akwa Isiraeli?+
30 “‘Nĩkĩo uuge wa Jehova Ngai wa Isiraeli arĩ ũyũ: “Niĩ mwene nĩ ndoigire atĩ nyũmba yaku na nyũmba ya ithe wanyu wa tene ĩgũtũũra ĩthiaga mbere yakwa.”+ No rĩu Jehova oigĩte ũũ: “Ndingĩtĩkĩria ũndũ ũcio, nĩ gũkorũo arĩa mandĩĩte nĩ ndĩmatĩaga,+ ĩndĩ arĩa manyararaga nĩ marĩnyararagwo.” 31 Atĩrĩrĩ, matukũ nĩ maroka rĩrĩa ngaaniina hinya waku* na wa andũ a nyũmba ya thoguo, ũũ atĩ gũtirĩ mũndũ o na ũmwe wa nyũmba yaku ũgaakinyia mĩaka ya ũkũrũ.+ 32 Na nĩ ũkoona thũ gĩikaro-inĩ gĩakwa gatagatĩ-inĩ ka maũndũ mothe mega marĩa mekĩirũo andũ a Isiraeli,+ na gũtirĩ hĩndĩ ĩngĩ gũkaagĩa na mũndũ mũkũrũ nyũmba-inĩ yaku. 33 Mũndũ wa gwaku ũrĩa itakeeheria atige gũtungataga kĩgongona-inĩ gĩakwa agaatũma maitho maku mage kuona na akũrehere kĩeha, no andũ aingĩ a nyũmba yaku magaakua kũgerera rũhiũ rwa njora rwa andũ.+ 34 Na ũndũ ũrĩa ũgaakora ariũ aku eerĩ Hofini na Finehasi, nĩguo ũgaakorũo ũrĩ kĩmenyithia harĩ wee: Eerĩ magaakua mũthenya ũmwe.+ 35 Na nĩ ngeethuurĩra mũthĩnjĩri-Ngai mwĩhokeku.+ Ageekaga kũringana na wendi wa ngoro yakwa; na nĩ ngaamwakĩra nyũmba ĩgũtũũra, nake agaathiaga hĩndĩ ciothe arĩ mbere ya ũrĩa wakwa mũitĩrĩrie maguta. 36 Mũndũ o wothe ũrĩa ũgaatigara nyũmba-inĩ yaku agooka na amũinamĩrĩre nĩguo aheo marĩhi ma mbeca na mũgate, na oige ũũ: “Ndagũthaitha ũũhe wĩra ũmwe wa ũthĩnjĩri-Ngai nĩgetha ngarĩaga kĩenyũ kĩa mũgate.”’”+