Samueli wa Mbere

5 Rĩrĩa Afilisti maatahire Ithandũkũ+ rĩa Ngai ũrĩa wa ma, maarĩrutire Ebenezeri makĩrĩtwara Ashidodi. 2 Afilisti acio mooire Ithandũkũ rĩu rĩa Ngai ũrĩa wa ma makĩrĩtwara nyũmba-inĩ* ya Dagoni na makĩrĩiga hakuhĩ na Dagoni.+ 3 Na rĩrĩa Aashidodi mookĩrire tene mũthenya ũyũ ũngĩ, magĩkora Dagoni ĩgwĩte ũthiũ ũgaturuma thĩ mbere ya Ithandũkũ rĩa Jehova.+ Kwoguo makĩoya Dagoni na makĩmĩcokia hau yaigagwo.+ 4 Rĩrĩa mookĩrire rũcinĩ tene mũthenya ũrĩa warũmĩrĩire, magĩkora Dagoni ĩgwĩte ũthiũ ũgaturuma thĩ mbere ya Ithandũkũ rĩa Jehova. Mũtwe wa Dagoni na moko mayo meerĩ cioinĩkĩte ikagwa hau mũromo-inĩ. Gĩcunjĩ kĩrĩa gĩatariĩ ta thamaki nokĩo tu* gĩatigarĩte gĩtarĩ kiunĩku. 5 Nĩkĩo nginya ũmũthĩ athĩnjĩri-ngai a Dagoni na andũ arĩa othe maingĩraga nyũmba-inĩ ya Dagoni matageragĩra mũromo-inĩ wa Dagoni kũu Ashidodi.

6 Guoko kwa Jehova gũkĩgũmĩra Aashidodi, na akĩmaananga na njĩra ya kũhũũra Ashidodi na icigo ciakuo na mũrimũ wa kũimba.*+ 7 Na rĩrĩa andũ a Ashidodi moonire ũrĩa gwekĩkaga, makiuga ũũ: “Mũtikareke Ithandũkũ rĩa Ngai wa Isiraeli rĩthiĩ na mbere gũikara hamwe na ithuĩ, nĩ gũkorũo guoko gwake nĩ gũtũgũmĩire hamwe na ngai witũ Dagoni.” 8 Nĩ ũndũ ũcio magĩtũmanĩra athani othe a Afilisti na makĩmacokanĩrĩria hamwe makĩmoria ũũ: “Tũgwĩka atĩa na Ithandũkũ rĩa Ngai wa Isiraeli?” Makĩmacokeria atĩrĩ: “Ithandũkũ rĩu rĩa Ngai wa Isiraeli nĩ rĩtwarũo Gathu.”+ Nĩ ũndũ ũcio magĩtwara Ithandũkũ rĩa Ngai wa Isiraeli kũu.

9 Rĩrĩa maarĩtwarire kũu, guoko kwa Jehova gũkĩgũmĩra itũũra rĩu, ũndũ ũrĩa watũmire kũgĩe guoya mũnene. Akĩhũũra andũ a itũũra rĩu, kuuma ũrĩa mũnini o nginya ũrĩa mũnene, na makĩgĩa mũrimũ wa kũimba.*+ 10 Nĩ ũndũ ũcio magĩtwara Ithandũkũ rĩa Ngai ũrĩa wa ma Ekironi,+ no rĩrĩa Ithandũkũ rĩu rĩa Ngai ũrĩa wa ma rĩakinyire Ekironi, Aekironi makĩambĩrĩria kũrĩra manĩrĩire makiugaga ũũ: “Matũrehera Ithandũkũ rĩa Ngai wa Isiraeli nĩgetha ithuĩ hamwe na andũ aitũ tũũragwo!”+ 11 Magĩcoka magĩtũmanĩra athani othe a Afilisti na makĩmacokanĩrĩria hamwe makĩmeera ũũ: “Eheriai Ithandũkũ rĩa Ngai wa Isiraeli; rekei rĩcoke kũrĩa rĩikaraga nĩgetha ithuĩ o hamwe na andũ aitũ tũtikooragwo.” Nĩ gũkorũo guoya wa gĩkuũ watheremete itũũra-inĩ rĩu rĩothe; nakuo guoko kwa Ngai ũrĩa wa ma nĩ kwamagũmĩire mũno,+ 12 na andũ arĩa mataakuire, maahũũrirũo na mũrimũ wa kũimba.* Nakĩo kĩrĩro gĩa kũhoya ũteithio gĩa itũũra rĩu gĩgĩkinya o igũrũ.