Kũguũrĩrio kwa Johana
4 Na rĩrĩ, thutha ũcio ngĩona mũrango mũhingũre kũu igũrũ, na mũgambo ũrĩa ndambire kũigua ũkĩnjarĩria watariĩ ta wa karumbeta, ũkiuga atĩrĩ: “Ambata ũũke gũkũ, na nĩ ngũkuonia maũndũ marĩa arĩ o mũhaka mekĩke.” 2 Thutha ũcio hinya wa roho ũgĩũka igũrũ rĩakwa o rĩmwe, na rĩrĩ, gĩtĩ kĩa ũnene kĩarĩ handũ hakĩo kũu igũrũ, na haarĩ mũndũ waikarĩire gĩtĩ kĩu kĩa ũnene.+ 3 Na Ũcio waikarĩte thĩ aahaanaga ta ihiga rĩa njathibi+ na ihiga rĩa saridisi,* na gĩtĩ kĩu kĩa ũnene gĩathiũrũrũkĩirio nĩ mũkũnga-mbura watariĩ ta ihiga rĩa emeradi.+
4 Na gĩtĩ kĩu kĩa ũnene gĩathiũrũrũkĩirio nĩ itĩ 24 cia ũnene, na ngĩona itĩ icio cia ũnene cikarĩirũo nĩ athuri 24+ mehumbĩte nguo cia rangi mwerũ, na maarĩ na thũmbĩ cia thahabu igũrũ rĩa mĩtwe yao. 5 Gĩtĩ-inĩ kĩu kĩa ũnene nĩ hooimaga heni+ na mĩgambo na marurumĩ;+ na haarĩ na matawa mũgwanja ma mwaki maakanaga mbere ya gĩtĩ kĩu kĩa ũnene, na matawa macio marũgamĩrĩire maroho marĩa mũgwanja ma Ngai.+ 6 Mbere ya gĩtĩ kĩu kĩa ũnene haarĩ na kĩndũ kĩahaanaga ta iria rĩa gĩcicio,+ ta kahiga karahenia.
Gatagatĩ-inĩ ga gĩtĩ kĩu kĩa ũnene* na gũthiũrũrũkĩria gĩtĩ kĩu haarĩ na ciũmbe inya irĩ muoyo+ iria ciaiyũire maitho mwena wa mbere na wa thutha. 7 Kĩũmbe kĩa mbere kĩrĩ muoyo kĩahaanaga mũrũthi,+ na kĩũmbe gĩa kerĩ kĩrĩ muoyo kĩahaanaga ndegwa,+ na kĩũmbe gĩa gatatũ kĩrĩ muoyo+ kĩarĩ na ũthiũ ta wa mũndũ, nakĩo kĩũmbe gĩa kana kĩrĩ muoyo+ kĩahaanaga nderi ĩrombũka.+ 8 Ũhoro-inĩ wĩgiĩ ciũmbe icio inya irĩ muoyo, o kĩũmbe kĩarĩ na mathagu matandatũ; ciaiyũire maitho kũndũ guothe o na rungu.+ Na mũthenya o na ũtukũ ithiaga na mbere kuuga ũũ: “Mũtheru, mũtheru, mũtheru nĩ Jehova*+ Ngai, Mwene-Hinya-Wothe, o ũcio warĩ ho na nowe ũrĩ ho na nowe ũroka.”+
9 Hingo ciothe rĩrĩa ciũmbe icio irĩ muoyo ciagooca Ũcio ũikarĩire gĩtĩ kĩa ũnene, o Ũcio ũtũũraga tene na tene,+ o na ciamũhe gĩtĩo na ciamũcokeria ngatho, 10 athuri acio 24+ megũithagia thĩ mbere ya Ũcio ũikarĩire gĩtĩ kĩa ũnene na magathathaiya Ũcio ũtũũraga tene na tene, na magaikia thũmbĩ ciao mbere ya gĩtĩ kĩu kĩa ũnene, makiugaga atĩrĩ: 11 “Wee Jehova* Ngai witũ, nĩ wagĩrĩire kwamũkĩra riri+ na gĩtĩo+ o na hinya,+ nĩ gũkorũo nĩwe wombire indo ciothe,+ na tondũ wa wendi waku ikĩgĩa kuo na ikĩũmbwo.”