Maũndũ Marĩa Meekirũo nĩ Atũmwo

2 Na rĩrĩ, rĩrĩa mũthenya wa Gĩathĩ kĩa Pentekoste+ wathiaga na mbere, maarĩ handũ hamwe othe. 2 O rĩmwe gũkĩgĩa mũgambo mũnene kuuma igũrũ, ta wa rũhuho rũnene rũkĩhurutana, ũkĩiyũra nyũmba yothe kũrĩa maaikarĩte thĩ.+ 3 Nao makĩona nĩmĩ ciatariĩ ta nĩnĩmbĩ cia mwaki na ikĩgayũkana, igĩikara igũrũ rĩao, rũmwe harĩ o mũndũ o mũndũ, 4 nao othe makĩiyũrũo nĩ roho mũtheru+ na makĩambĩrĩria kwaria na thiomi itiganĩte, o ta ũrĩa roho wamahotithirie kwaria.+

5 Hĩndĩ ĩyo Ayahudi etigĩri Ngai kuuma mabũrũri mothe thĩinĩ wa thĩ maaikaraga Jerusalemu.+ 6 Kwoguo rĩrĩa kwagĩire na mũgambo ũcio, kĩrĩndĩ gĩgĩcokanĩrĩra kĩgegete, tondũ o mũndũ nĩ aaiguaga makĩaria na rũthiomi rwake mwene. 7 Ti itherũ nĩ maagegire mũno na makĩũrania atĩrĩ: “Na githĩ aya othe mararia ti andũ a Galili?+ 8 Gũgĩthiĩte atĩa atĩ o ũmwe witũ araigua rũthiomi rwa kũrĩa aaciarirũo? 9 Aparithi, Amedi,+ na Aelamu,+ aikari a Mesopotamia, Judea na Kapadokia, Ponto na gĩcigo kĩa Asia,+ 10 Ferugia na Pamfilia, Misiri na icigo cia Libia iria irĩ hakuhĩ na Kurene, ageni a kuuma Roma, Ayahudi na arĩa maagarũrũkĩte magatuĩka Ayahudi,+ 11 Akirete, na andũ a Arabia—tũraigua makĩaria na thiomi citũ ũhoro wĩgiĩ maũndũ manene ma Ngai.” 12 Nao othe makĩmaka na makĩgega makĩũrania atĩrĩ: “Ũndũ ũyũ ũrenda kuonania atĩa?” 13 No rĩrĩ, andũ angĩ makĩmanyũrũria makiuga: “Aya nĩ kũrĩĩo marĩĩtwo nĩ ndibei ĩrĩa ĩrĩ cama.”*

14 No Petero akĩrũgama hamwe na arĩa Ikũmi na Ũmwe,+ akĩmaarĩria anĩrĩire akĩmeera atĩrĩ: “Inyuĩ andũ a Judea na inyuĩ aikari othe a Jerusalemu, menyai ũndũ ũyũ na mũthikĩrĩrie ciugo ciakwa wega. 15 Andũ aya ti kũrĩĩo marĩĩtwo ta ũguo mũrecirĩria, nĩ gũkorũo nĩ thaa ithatũ cia rũcinĩ. 16 Mũgarũ na ũguo-rĩ, ũndũ ũyũ nĩ ũrĩa woigirũo kũgerera mũnabii Joeli: 17 ‘Ngai ekuuga atĩrĩ, “Matukũ-inĩ ma kũrigĩrĩria, nĩ ngaaitĩrĩria andũ a mĩthemba yothe* roho wakwa, na ariũ anyu na aarĩ anyu nĩ makaaratha mohoro nao anake anyu nĩ makoona cioneki na athuri anyu arĩa akũrũ nĩ makaarota iroto,+ 18 o na ngombo ciakwa cia arũme na cia atumia nĩ ngaaciitĩrĩria roho wakwa matukũ-inĩ macio, nacio nĩ ikaaratha mohoro.+ 19 Na nĩ ngoonania maũndũ ma magegania* igũrũ na imenyithia thĩinĩ wa thĩ—thakame na mwaki na matu ma ndogo. 20 Riũa nĩ rĩkaagarũrũo rĩtuĩke nduma na mweri ũtuĩke thakame mũthenya ũrĩa mũnene na wa kũgegania wa Jehova* ũtanakinya. 21 Na mũndũ o wothe ũkayagĩra rĩĩtwa rĩa Jehova* nĩ akaahonokio.”’+

22 “Andũ aya a Isiraeli, ta iguai ciugo ici: Jesu ũrĩa Mũnazarethi nĩ aamenyithanirio wega kũrĩ inyuĩ nĩ Ngai kũgerera mawĩko ma hinya, maũndũ ma magegania* na ciama iria Ngai aaringire gatagatĩ-inĩ kanyu kũgerera harĩ we,+ o ta ũrĩa inyuĩ ene mũĩ. 23 Mũndũ ũcio, ũrĩa waneanirũo kũrĩ inyuĩ kũringana na wendi* wa Ngai na Ngai akĩmenyaga ũguo o mbere,+ inyuĩ nĩ mwahũthĩrire oini-watho mũkĩmũcuuria mũtĩ-inĩ, na mũkĩmũũraga.+ 24 No Ngai akĩmũriũkia+ akĩmuohora kuuma ruo-inĩ rwa* gĩkuũ, tondũ gũtingĩahotekire aikare ohetwo nĩ kĩo.+ 25 Nĩ gũkorũo Daudi oigĩte ũũ igũrũ rĩake: ‘Njigaga Jehova* mbere yakwa* hingo ciothe, tondũ arĩ guoko-inĩ gwakwa kwa ũrĩo nĩguo ndikanenyenyeke. 26 Nĩ ũndũ ũcio, ngoro yakwa ĩgĩkena na rũrĩmĩ rwakwa rũgĩcanjamũka mũno. Na ngũtũũra ndĩ* na kĩĩrĩgĩrĩro; 27 tondũ ndũkandiganĩria thĩinĩ wa Mbĩrĩra,* o na kana ũreke ũrĩa waku mwĩhokeku abuthe.+ 28 Niĩ nĩ ũũmenyithĩtie njĩra cia muoyo; nĩ ũgaatũma njiyũrĩrĩrũo nĩ gĩkeno kĩnene ndĩ mbere yaku.’*+

29 “Athuri aya, ariũ a baba, nĩ ũndũ mwĩtĩkĩrĩku njarie na inyuĩ ndĩ na wĩyathi igũrũ rĩgiĩ Daudi, o ũcio warĩ kĩongo kĩa famĩlĩ, atĩ nĩ aakuire na agĩthikwo,+ na mbĩrĩra yake ĩrĩ gũkũ nginya ũmũthĩ ũyũ. 30 Tondũ aarĩ mũnabii na nĩ aamenyete atĩ Ngai nĩ aamwĩrĩire na mwĩhĩtwa atĩ nĩ angĩgaikarĩria mũndũ ũmwe wa rũciaro rwake* gĩtĩ-inĩ gĩake kĩa ũnene,+ 31 nĩ aamenyire o mbere na akĩaria ũhoro wa kũriũka gwa Kristo, atĩ ndaatiganĩirio thĩinĩ wa Mbĩrĩra* o na kana mwĩrĩ wake ũkĩbutha.+ 32 Ngai nĩ aariũkirie Jesu, na ithuothe tũrĩ aira a ũndũ ũcio.+ 33 Na rĩu tondũ nĩ aatũũgĩririo guoko-inĩ kwa ũrĩo kwa Ngai+ na akĩamũkĩra roho mũtheru ũrĩa weranĩirũo nĩ Ithe witũ-rĩ,+ nĩ atũitĩrĩria kĩrĩa mũrona na mũkaigua. 34 Nĩ gũkorũo Daudi ndaambatire igũrũ, no we mwene oigĩte atĩrĩ, ‘Jehova* nĩ eerire Mwathani wakwa ũũ: “Ikara thĩ guoko-inĩ gwakwa kwa ũrĩo 35 nginya rĩrĩa ngaatũma thũ ciaku ituĩke gaturũa ka magũrũ maku.”’+ 36 Nĩ ũndũ ũcio-rĩ, nyũmba ya Isiraeli yothe nĩ ĩmenye atĩ, hatarĩ nganja Ngai nĩ aatuire Jesu Mwathani+ na Kristo, o ũcio muoragĩire mũtĩ-inĩ.”+

37 Na rĩrĩa maaiguire ũguo, magĩthecwo ngoro, makĩũria Petero na atũmwo arĩa angĩ atĩrĩ: “Athuri aya, ariũ a baba, twagĩrĩirũo gwĩka atĩa?” 38 Petero akĩmeera atĩrĩ: “Mwĩrirei,+ na o mũndũ abatithio+ thĩinĩ wa rĩĩtwa rĩa Jesu Kristo nĩguo muoherũo mehia manyu,+ na nĩ mũkwamũkĩra kĩheo kĩa roho mũtheru kĩrĩa kĩheanagwo o ũguo tũhũ. 39 Nĩ gũkorũo kĩĩranĩro+ kĩu nĩ inyuĩ mwĩrĩirũo, na ciana cianyu, o hamwe na arĩa othe marĩ kũraya, arĩa othe Jehova* Ngai witũ angĩta moke harĩ we.”+ 40 Na akĩmarutĩra ũira kĩhinyio na ciugo ingĩ nyingĩ na akĩmataara akĩmeera: “Ĩtĩkĩrai kũhonokio kuuma harĩ rũciaro rũrũ ruogomu.”+ 41 Nĩ ũndũ ũcio, arĩa meetĩkĩrire ciugo ciake meyendeire, makĩbatithio+ na mũthenya ũcio gũkĩongerereka andũ* ta 3,000.+ 42 Na magĩthiĩ na mbere kũrũmĩrĩra na kĩyo ũrutani wa atũmwo, kũnyitanagĩra,* kũrĩanagĩra irio,+ o na kũhoya.+

43 Na rĩrĩ, andũ othe makĩnyitwo nĩ guoya, na maũndũ maingĩ ma magegania* makĩambĩrĩria gwĩkwo o na ciama nyingĩ ikĩringwo kũgerera atũmwo.+ 44 Arĩa othe maatuĩkire etĩkia maarĩ hamwe na nĩ maagayanaga indo ciothe, 45 na makendia mĩgũnda yao+ na indo ciao, na kĩrĩa mona magakĩgayania kũrĩ andũ othe, kũringana na mabataro ma o mũndũ.+ 46 Na mũthenya o mũthenya nĩ maathiaga hekarũ-inĩ mategũtĩrĩria marĩ na muoroto o ũmwe, na makarĩagĩra irio mĩciĩ ngũrani ngũrani na makagayana irio ciao makenete mũno marĩ na ngoro theru, 47 makĩgoocaga Ngai na magetĩkĩrĩka nĩ andũ othe. Ningĩ Jehova* agĩthiĩ na mbere kuongerera harĩ o andũ arĩa maahonokagio o mũthenya.+