Ũhoro Mwega Ũrĩa Waandĩkirũo nĩ Mariko
15 Na gwakinya rũcinĩ o ũguo, anene a athĩnjĩri-Ngai, athuri, andĩki-watho, Sanhedrini yothe magĩciira marĩ hamwe, na makĩoha Jesu makĩmũtwara makĩmũneana kũrĩ Pilato.+ 2 Nĩ ũndũ ũcio Pilato akĩmũũria atĩrĩ: “Wee nĩwe Mũthamaki wa Ayahudi?”+ Nake akĩmũcokeria: “Wee mwene nĩ woiga.”+ 3 No anene a athĩnjĩri-Ngai nĩ maamũthitangagĩra maũndũ maingĩ. 4 Na Pilato akĩambĩrĩria o rĩngĩ kũmũũria atĩrĩ: “Ndũrĩ na ũndũ ũngĩcokia?+ Ta igua maũndũ marĩa mothe maragũthitangĩra.”+ 5 No Jesu ndarĩ ũndũ ũngĩ ooigire, nĩ ũndũ ũcio Pilato akĩgega mũno.+
6 Na rĩrĩ, o gĩathĩ o gĩathĩ, Pilato nĩ aamenyerete kuohorera andũ mũndũ ũmwe ũrĩa moria mohorerũo.+ 7 Hĩndĩ ĩyo, nĩ kwarĩ mũndũ wetagwo Baraba warĩ njera hamwe na aregani a thirikari, arĩa mooraganĩte makĩregana na thirikari. 8 Kwoguo kĩrĩndĩ kĩa andũ gĩgĩũka na makĩambĩrĩria kũhoya Pilato amekĩre ũrĩa aamenyerete kũmekĩra. 9 Nake akĩmoria atĩrĩ: “Nĩ mũkwenda ndĩmuohorere Mũthamaki wa Ayahudi?”+ 10 Nĩ gũkorũo Pilato nĩ aamenyaga atĩ anene a athĩnjĩri-Ngai maaneanĩte Jesu nĩ ũndũ wa ũiru.+ 11 No anene acio a athĩnjĩri-Ngai magĩcogera andũ moige Baraba ohorũo arĩ we.+ 12 O rĩngĩ Pilato akĩmoria atĩrĩ: “Nake mũndũ ũyũ mwĩtaga Mũthamaki wa Ayahudi ndĩmwĩke atĩa?”+ 13 Nao makĩanĩrĩra o rĩngĩ makiuga: “Nĩ acuurio mũtĩ-inĩ!”*+ 14 No Pilato akĩmoria atĩrĩ: “Nĩkĩ? Nĩ ũũru ũrĩkũ ekĩte?” No magĩkĩrĩrĩria kwanĩrĩra: “Nĩ acuurio mũtĩ-inĩ!”*+ 15 Nĩ ũndũ ũcio, Pilato akĩmohorera Baraba nĩ ũndũ wa kwenda gũkenia kĩrĩndĩ; agĩcoka akĩhũũrithia Jesu iboko+ na akĩmũneana akoragĩrũo mũtĩ-inĩ.+
16 Nacio thigari ikĩmũtwara nja kũu kwa ngavana mũciĩ na igĩta mbũtũ yothe ya thigari.+ 17 Na makĩmũhumba nguo ya rangi wa papũ na magĩtuma thũmbĩ ya mĩigua makĩmwĩkĩra; 18 na makĩambĩrĩria kũmwĩra ũũ: “Geithĩka,* wee Mũthamaki wa Ayahudi!”+ 19 Ningĩ nĩ maamũringaga mũtwe na ithanjĩ na makamũtuĩra mata, na makĩmũturĩria maru makĩmũinamĩrĩra. 20 Na thutha wa kũmũnyũrũria, makĩmũruta nguo ĩyo ya rangi wa papũ na makĩmũhumba nguo ciake cia igũrũ. Magĩcoka makĩmũtwara makamũhũũrĩrĩre mũtĩ-inĩ na mĩcumarĩ.+ 21 Ningĩ magĩcemania na mũndũ wahĩtũkaga wa kuuma Kurene, wetagwo Simoni ithe wa Aleksanda na Rufasi akiuma mĩgũnda-inĩ na makĩmũtindĩkĩrĩria akuue mũtĩ wa Jesu wa kũnyarirĩrũo.*+
22 Nĩ ũndũ ũcio makĩmũtwara kũndũ gwĩtagwo Gologotha, rĩĩtwa rĩu rĩataũrũo nĩ kuuga, “Kũndũ kwa Ihĩndĩ rĩa Kĩongo.”+ 23 Na marĩ kũu makĩgeria kũmũhe ndibei ĩtukanĩtio na manemane,*+ no akĩrega kũmĩnyua. 24 Magĩcoka makĩmũhũũrĩra mũtĩ-inĩ na mĩcumarĩ na makĩgayana nguo ciake cia igũrũ na njĩra ya gũcuka mĩtĩ nĩguo mamenye kĩrĩa o mũndũ egũthiĩ nakĩo.+ 25 Na rĩrĩ, kwarĩ thaa ithatũ cia rũcinĩ, nao makĩmũhũũrĩra mũtĩ-inĩ na mĩcumarĩ. 26 Na maandĩko megiĩ ũndũ ũrĩa aathitangĩirũo maandĩkĩtwo ũũ: “Mũthamaki wa Ayahudi.”+ 27 Ningĩ magĩcuuria aici erĩ mĩtĩ-inĩ hakuhĩ nake, ũmwe mwena wake wa ũrĩo na ũcio ũngĩ mwena wake wa ũmotho.+ 28 *—— 29 Nao andũ arĩa maahĩtũkagĩra hau maamwaragĩria na kĩnyũrũri makĩinagia mĩtwe yao+ makiugaga ũũ: “Haiya! Wee ũroigaga atĩ nĩ ũkũmomora hekarũ na ũmĩake na thikũ ithatũ,+ 30 wĩhonokie wĩrute mũtĩ-inĩ ũcio wa kũnyarirĩrũo.”* 31 O nao anene a athĩnjĩri-Ngai na andĩki-watho nĩ maamũnyũrũragia gatagatĩ-inĩ kao makoiga ũũ: “Nĩ arahonokagia arĩa angĩ no we mwene ndangĩhota kwĩhonokia!+ 32 Kristo, Mũthamaki wa Isiraeli, rĩu nĩ erute mũtĩ-inĩ wa kũnyarirĩrũo,* nĩguo tuone na twĩtĩkie.”+ O nao arĩa maacuurĩtio mĩtĩ-inĩ hamwe nake nĩ maamũnyũrũragia.+
33 Rĩrĩa gwakinyire ta thaa thita cia mũthenya, gũkĩgĩa nduma bũrũri-inĩ ũcio wothe o nginya ta thaa kenda cia mũthenya.+ 34 Na kũrĩ ta thaa kenda cia mũthenya, Jesu akĩanĩrĩra na mũgambo mũnene akiuga: “Eli, Eli, lama sabakithani?” ciugo icio ciataũrũo ciugaga ũũ: “Ngai wakwa, Ngai wakwa, ũndiganĩirie nĩkĩ?”+ 35 Na rĩrĩa andũ amwe arĩa maarũgamĩte hau maaiguire ũguo, makĩĩrana atĩrĩ: “Ta iguai! Areta Elija.” 36 Na mũndũ ũmwe akĩhanyũka, akĩrikia thibonji ndibei-inĩ ngagatu, akĩmĩthecereria ithanjĩ-inĩ na akĩmũhe anyue+ akiuga ũũ: “Tiganai nake! Rekei tuone kana Elija nĩ egũka kũmũcuurũria mũtĩ-inĩ.” 37 No Jesu akĩanĩrĩra na mũgambo mũnene na agĩtuĩkana.*+ 38 Na gĩtaama kĩa handũ harĩa hatheru+ gĩgĩtarũkana icunjĩ igĩrĩ kuuma igũrũ nginya thĩ.+ 39 Na rĩrĩa mũnene wa mbũtũ ũrĩa warũgamĩte hau amũrorete oonire maũndũ macio meekĩkire Jesu agĩkua, akiuga ũũ: “Hatarĩ nganja mũndũ ũyũ ararĩ Mũrũ wa Ngai.”+
40 Ningĩ nĩ kwarĩ na atumia meeroragĩra marĩ haraya. Amwe ao nĩ Mariamu Mũmagidali o hamwe na Salome na Mariamu nyina wa Jose na Jakubu ũrĩa Mũnini,+ 41 arĩa maathiaga hamwe na Jesu na makamũtungatĩra+ rĩrĩa aarĩ Galili, o na atumia angĩ aingĩ arĩa maathiĩte nake Jerusalemu.
42 Na rĩrĩ, tondũ kwarĩ hakuhĩ gũtuka, na kwarĩ mũthenya wa Kũhaarĩria, ũguo nĩ kuuga mũthenya ũmwe mbere ya Thabatũ, 43 hagĩũka mũndũ wetagwo Jusufu wa Arimathea, warĩ mũthuri wa Kĩama waheetwo gĩtĩo, ningĩ we mwene nĩ eetereire Ũthamaki wa Ngai. Akĩĩyũmĩrĩria akĩingĩra kũrĩ Pilato na akĩhoya anengerũo mwĩrĩ wa Jesu.+ 44 No Pilato akĩrigwo kana hihi no akorũo akuĩte, na kwoguo agĩta mũnene wa mbũtũ akĩmũũria kana Jesu nĩ akuĩte. 45 Na thutha wa kwĩrũo nĩ mũnene wa mbũtũ atĩ nĩ akuĩte, agĩtĩkĩria Jusufu oe mwĩrĩ ũcio. 46 Thutha wa kũgũra gĩtambaya gĩa gatani ĩrĩa njega na kũmũcuurũria mũtĩ-inĩ, akĩmũthaya na gĩtambaya kĩu kĩa gatani ĩrĩa njega, na akĩmũkomia thĩinĩ wa mbĩrĩra*+ yenjetwo rwaro-inĩ rwa ihiga; agĩcoka akĩgaragaria ihiga nginya mũromo-inĩ wa mbĩrĩra ĩyo.+ 47 No Mariamu Mũmagidali na Mariamu nyina wa Jose magĩthiĩ na mbere kũrora harĩa aakometio.+