Ũhoro Mwega Ũrĩa Waandĩkirũo nĩ Johana

18 Thutha wa Jesu kuuga maũndũ macio, akĩringa Mũkuru wa Kidironi*+ marĩ na arutwo ake magĩthiĩ handũ haarĩ na mũgũnda magĩtonya kuo.+ 2 Na rĩrĩ, Judasi ũrĩa wamũkunyanĩire o nake nĩ ooĩ handũ hau, tondũ Jesu nĩ aagomanaga na arutwo ake ho kaingĩ. 3 Kwoguo Judasi akĩrehe gĩkundi gĩa thigari o hamwe na thigari cia anene a athĩnjĩri-Ngai na cia Afarisai, magĩũka ho marĩ na icinga na matawa o na matharaita.+ 4 Nake Jesu, tondũ nĩ aamenyaga maũndũ mothe marĩa megwĩkĩka harĩ we, agĩthiĩ mbere yao akĩmoria: “Nũũ mũracaria?” 5 Nao makĩmũcokeria atĩrĩ: “Nĩ Jesu ũrĩa Mũnazarethi.”+ Akĩmacokeria: “Nĩ niĩ we.” Na rĩrĩ, Judasi ũcio wamũkunyanĩire o nake aarũngiĩ hamwe nao.+

6 O na kũrĩ ũguo, rĩrĩa Jesu aameerire, “Nĩ niĩ we,” magĩcoka na thutha makĩgwa thĩ.+ 7 Nĩ ũndũ ũcio akĩmoria o rĩngĩ: “Nũũ mũracaria?” Makiuga: “Nĩ Jesu ũrĩa Mũnazarethi.” 8 Jesu akĩmacokeria atĩrĩ: “Nĩ ndamwĩra atĩ nĩ niĩ we. Angĩkorũo nĩ niĩ mũracaria-rĩ, rekei aya mathiĩ.” 9 Ũndũ ũcio warĩ wa kũhingia ũrĩa ooigĩte: “Arĩa othe ũũheete gũtirĩ o na ũmwe wao ndateire.”+

10 Hĩndĩ ĩyo Simoni Petero, tondũ aarĩ na rũhiũ rwa njora, akĩrũcomora na agĩtinia gũtũ kwa ũrĩo kwa ndungata ya mũthĩnjĩri-Ngai ũrĩa mũnene gũkĩgwa.+ Ndungata ĩyo yetagwo Maliku. 11 No Jesu akĩra Petero atĩrĩ: “Cokia rũhiũ rũu rwa njora njora-inĩ yaruo.+ Githĩ ndiagĩrĩirũo nĩ kũnyuĩra gĩkombe kĩrĩa Awa aheete nyuĩre?”+

12 Nacio thigari icio na mũtongoria wa mbũtũ, na thigari cia Ayahudi ikĩnyita Jesu ikĩmuoha. 13 Ikĩamba ikĩmũtwara kũrĩ Anasi, nĩ gũkorũo ũcio aarĩ ithe wa mũtumia wa Kaiafa,+ ũrĩa warĩ mũthĩnjĩri-Ngai mũnene mwaka ũcio.+ 14 Kaiafa ũcio nĩwe wataarĩte Ayahudi atĩ nĩo mekũgunĩka mũndũ ũmwe angĩkua nĩ ũndũ wa andũ.+

15 Na rĩrĩ, Simoni Petero o hamwe na mũrutwo ũngĩ, maathiire marũmĩrĩire Jesu.+ Mũrutwo ũcio nĩ ooĩkaine nĩ mũthĩnjĩri-Ngai ũrĩa mũnene, na agĩtonya hamwe na Jesu nja kwa mũthĩnjĩri-Ngai ũcio mũnene, 16 no Petero aarũgamĩte nja mũrango-inĩ.* Mũrutwo ũcio ũngĩ woĩkaine nĩ mũthĩnjĩri-Ngai ũrĩa mũnene, akiuma nja na akĩarĩria mũikaria wa mũrango na agĩtonyia Petero thĩinĩ. 17 Mũirĩtu ũrĩa waikaragia mũrango akĩra Petero atĩrĩ: “Githĩ wee o nawe ndũrĩ ũmwe wa arutwo a mũndũ ũyũ?” Nake akiuga: “Niĩ ndirĩ ũmwe wao.”+ 18 Hĩndĩ ĩyo, ngombo imwe na thigari ciarũgamĩte ithiũrũrũkĩirie mwaki wa makara ũrĩa ciaakĩtie tondũ kwarĩ na heho na nĩ guota ciootaga mwaki ũcio. Petero o nake aarũgamĩte hamwe nacio agĩota mwaki.

19 Nake mũnene ũcio wa athĩnjĩri-Ngai akĩũria Jesu ciũria ciĩgiĩ arutwo ake na ũrutani wake. 20 Jesu akĩmũcokeria atĩrĩ: “Ngoretwo ngĩaria mbere ya andũ othe. Ndĩratũire ndutanaga thunagogi-inĩ na hekarũ-inĩ,+ kũrĩa Ayahudi othe magomanaga, na gũtirĩ ũndũ o na ũmwe ndĩraaragia na hitho. 21 Ũranjũria ciũria nĩkĩ? Ũria arĩa maraiguaga maũndũ marĩa ndĩrameeraga. Acio nĩ moĩ ũrĩa ndĩroigaga.” 22 Rĩrĩa Jesu aarĩkirie kuuga ũguo, mũthigari ũmwe warũgamĩte hau akĩmũgũtha rũhĩ rwa ũthiũ+ na akĩmũũria: “Ũguo nĩguo ũracokeria mũnene wa athĩnjĩri-Ngai?” 23 Jesu akĩmũcokeria ũũ: “Okorũo nĩ ndoiga ũũru, heana ũira wa ũũru ũcio; no angĩkorũo ndoiga ũrĩa kũrĩ-rĩ, wakĩngũtha nĩkĩ?” 24 Anasi agĩcoka akĩmeera mamũtware arĩ muohe gwa Kaiafa mũthĩnjĩri-Ngai ũrĩa mũnene.+

25 Na rĩrĩ, Simoni Petero aarũgamĩte hau agĩota mwaki. Nao makĩmwĩra atĩrĩ: “Githĩ wee o nawe ndũrĩ ũmwe wa arutwo ake?” Nake agĩkaana akiuga: “Niĩ ndirĩ ũmwe wao.”+ 26 Ngombo ĩmwe ya mũthĩnjĩri-Ngai ũrĩa mũnene, ĩrĩa yarĩ ya mbarĩ cia mũndũ ũrĩa Petero aatinĩtie gũtũ+ ĩkiuga: “Githĩ wee ndikuonire mũgũnda-inĩ mũrĩ nake?” 27 O na kũrĩ ũguo, Petero agĩkaana rĩngĩ, na hĩndĩ o ĩyo ngũkũ ĩgĩkũga.+

28 Magĩcoka makĩruta Jesu gwa Kaiafa makĩmũtwara kwa ngavana.+ Hĩndĩ ĩyo kwarĩ kĩroko tene. No o ene matiatonyire kwa ngavana matigethahie+ nĩguo marĩe Pasaka. 29 Kwoguo Pilato akiuma nja agĩthiĩ harĩ o akĩmoria: “Nĩ ũndũ ũrĩkũ mũrathitangĩra mũndũ ũyũ?” 30 Nao makĩmũcokeria atĩrĩ: “Korũo mũndũ ũyũ ti mwĩhia-rĩ,* tũtingĩamũrehe kũrĩ wee.” 31 Nake Pilato akĩmeera: “Thiĩi nake mũkamũtuĩre kũringana na watho wanyu.”+ Nao Ayahudi acio makĩmwĩra ũũ: “Ithuĩ tũtiagĩrĩirũo kũũraga mũndũ o na ũrĩkũ.”+ 32 Ũndũ ũcio wekĩkire nĩguo ũhingie ũrĩa Jesu ooigĩte akĩaria ũhoro wa gĩkuũ kĩrĩa angĩakuire.+

33 Nĩ ũndũ ũcio Pilato agĩtonya gĩikaro kĩa ngavana o rĩngĩ, agĩta Jesu akĩmũũria: “Wee nĩwe Mũthamaki wa Ayahudi?”+ 34 Nake Jesu akĩmũcokeria akĩmũũria atĩrĩ: “Maũndũ macio ũranjũria moimanĩte nawe mwene-ĩ, kana nĩ andũ angĩ makũheete ũhoro wakwa?” 35 Pilato agĩcokia: “Kaĩ niĩ ndĩ Mũyahudi? Rũrĩrĩ rwanyu na anene a athĩnjĩri-Ngai nĩo makũrehire kũrĩ niĩ. Kaĩ wĩkĩte atĩa?” 36 Jesu akĩmũcokeria atĩrĩ:+ “Ũthamaki wakwa ti wa thĩ ĩno.+ Korũo Ũthamaki wakwa nĩ wa thĩ ĩno-rĩ, ndungata ciakwa nĩ ingĩndũĩrĩire nĩguo ndikaneanwo kũrĩ Ayahudi.+ No ũrĩa kũrĩ nĩ atĩ, Ũthamaki wakwa nduumĩte gũkũ.” 37 Nake Pilato akĩmũũria: “Kwoguo wee ũrĩ mũthamaki?” Jesu agĩcokia: “Wee mwene nĩ woiga atĩ ndĩ mũthamaki.+ Na nĩkĩo ndaciarirũo, na nĩkĩo njũkĩte thĩinĩ wa thĩ, nĩguo ndute ũira wĩgiĩ ũhoro ũrĩa wa ma.+ Mũndũ wothe ũrĩ mwena wa ũhoro ũrĩa wa ma nĩ athikagĩrĩria mũgambo wakwa.” 38 Pilato akĩmũũria: “Ma nĩ kĩĩ?”

Thutha wa kũmũũria ũguo, akiuma nja o rĩngĩ kũrĩ Ayahudi akĩmeera atĩrĩ: “Ndirona ihĩtia rĩa mũndũ ũyũ.+ 39 Makĩria ma ũguo-rĩ, nĩ mũmenyerete kũũria ndĩmuohorere mũndũ hĩndĩ ya Pasaka.+ Nĩ ũndũ ũcio nĩ mũkwenda ndĩmuohorere Mũthamaki wa Ayahudi?” 40 Makĩanĩrĩra o rĩngĩ makiuga: “Aca ti ũcio, tuohorere Baraba!” Na rĩrĩ, Baraba aarĩ mũtunyani.+