Kũguũrĩrio kwa Johana
1 Ũyũ nĩguo ũguũrio wa Jesu Kristo, ũrĩa Ngai aamũheire,+ nĩgetha onie ngombo ciake+ maũndũ marĩa arĩ o mũhaka mekĩke ica ikuhĩ. Na agĩtũma mũraika wake na akĩwonania na njĩra ya imenyithia kũgerera harĩ we kũrĩ Johana+ ngombo yake, 2 nake akĩruta ũira wĩgiĩ kiugo kĩrĩa Ngai aaheanire na wĩgiĩ ũira ũrĩa Jesu Kristo aaheanire, wĩgiĩ maũndũ mothe marĩa oonire. 3 Gũkena-rĩ, nĩ mũndũ ũrĩa ũthomaga anĩrĩire na arĩa maiguaga ciugo cia ũrathi ũyũ o na arĩa marũmagĩrĩra maũndũ marĩa mandĩkĩtwo thĩinĩ waguo,+ nĩ gũkorũo ihinda rĩrĩa rĩtuĩtwo rĩrĩ hakuhĩ.
4 Nĩ niĩ Johana, kũrĩ ciũngano iria mũgwanja+ irĩ gĩcigo-inĩ kĩa Asia:
Mũrogĩa na ũtugi mũnene na thayũ kuuma kũrĩ “Ũrĩa ũrĩ ho na nowe warĩ ho na nowe ũroka,”+ na kuuma kũrĩ maroho marĩa mũgwanja+ marĩ mbere ya gĩtĩ gĩake kĩa ũnene, 5 na kuuma kũrĩ Jesu Kristo, “Mũira Ũrĩa Mwĩhokeku,”+ “irigithathi kuuma kũrĩ arĩa akuũ,”+ na “Mwathani wa athamaki a thĩ.”+
Ũcio ũtwendete+ na watũkũũrire kuuma mehia-inĩ maitũ kũgerera thakame yake mwene+— 6 na agĩtũtua ũthamaki,+ na athĩnjĩri-Ngai+ tũtungatagĩre Ngai wake, o we Ithe—arogĩa na riri o na ũhoti tene na tene. Ameni.
7 Atĩrĩrĩ, ũcio nĩ aroka na matu,+ na gũtirĩ riitho rĩtakaamuona, o na arĩa maamũthecire; na mĩhĩrĩga yothe ya andũ thĩinĩ wa thĩ nĩ ĩkehũũrahũũra ĩrĩ na kĩeha nĩ ũndũ wake.+ Ũguo nĩguo gũgeekĩka. Ameni.
8 “Nĩ niĩ Alifa na Omega,”*+ ũguo nĩguo Jehova* Ngai ekuuga, “Ũrĩa ũrĩ ho na nowe warĩ ho na nowe ũroka, o we Mwene-Hinya-Wothe.”+
9 Niĩ Johana, mũrũ wa Ithe wanyu, o niĩ nyitanagĩra na inyuĩ harĩ mĩnyamaro+ na ũthamaki+ na ũkirĩrĩria+ ndĩ na ngwatanĩro hamwe na Jesu,+ ndarĩ gĩcigĩrĩra-inĩ kĩrĩa gĩtagwo Patimosi nĩ ũndũ wa kwaria ũhoro wĩgiĩ Ngai na kũruta ũira wĩgiĩ Jesu. 10 Kũgerera ũtongoria wa roho mũtheru, nĩ ndekorire thĩinĩ wa mũthenya wa Mwathani, na ngĩigua mũgambo mũnene thutha wakwa ũtariĩ ta wa karumbeta, 11 ũkiuga ũũ: “Maũndũ marĩa ũkuona, maandĩke gĩkũnjo-inĩ na ũtũme kũrĩ ciũngano iria mũgwanja: kĩrĩa kĩrĩ Efeso,+ kĩrĩa kĩrĩ Simurina,+ kĩrĩa kĩrĩ Perigamo,+ kĩrĩa kĩrĩ Thiatira,+ kĩrĩa kĩrĩ Sadisi,+ kĩrĩa kĩrĩ Filadefia,+ na kĩrĩa kĩrĩ Laodikia.”+
12 Ngĩĩhũgũra nyone ũrĩa waaragia na niĩ, na rĩrĩa ndehũgũrire, ngĩona mĩtĩ mũgwanja ya kũigĩrĩrũo matawa ya thahabu,+ 13 na hau gatagatĩ-inĩ ka mĩtĩ ĩyo ya kũigĩrĩrĩrũo matawa haarĩ na mũndũ watariĩ ta mũrũ wa mũndũ,+ wehumbĩte nguo yakinyĩte nyarĩrĩ-inĩ na akeyoha mũcibi wa thahabu gĩthũri-inĩ. 14 Makĩria ma ũguo, mũtwe wake na njuĩrĩ yake cieerũhĩte o ta guoya wa rangi mwerũ, o ta mbarabu, namo maitho make maatariĩ ta rũrĩrĩmbĩ rwa mwaki,+ 15 na magũrũ make maatariĩ ta gĩcango kĩrĩa kĩega+ gĩgĩkenga kĩrĩ mwaki-inĩ, na mũgambo wake watariĩ ta mũrurumo wa maĩ maingĩ. 16 Ningĩ guoko-inĩ gwake kwa ũrĩo aarĩ na njata mũgwanja,+ na kanua-inĩ gake hagacomoka rũhiũ rwa njora rũraihu na rũũgĩ rũnooretwo mĩena yerĩ,+ naguo ũthiũ wake watariĩ ta riũa hĩndĩ ĩrĩa rĩarĩte biũ.+ 17 Rĩrĩa ndamuonire, ngĩgwa thĩ magũrũ-inĩ make ta nguĩte.
Nake akĩnjigĩrĩra guoko gwake kwa ũrĩo akĩnjĩra atĩrĩ: “Ndũgetigĩre. Nĩ niĩ wa Mbere+ na wa Mũico,+ 18 na ũrĩa ũtũũraga muoyo,+ na nĩ ndakuĩte,+ no rĩrĩ, ngũtũũra muoyo tene na tene,+ na ndĩ na cabi cia gĩkuũ o na cia Mbĩrĩra.*+ 19 Nĩ ũndũ ũcio-rĩ, andĩka maũndũ marĩa wona, na marĩa marĩ kuo, o na marĩa mageekĩka thutha ũcio. 20 Na ha ũhoro wa hitho ĩrĩa theru ĩgiĩ njata icio mũgwanja wona guoko-inĩ gwakwa kwa ũrĩo na mĩtĩ mũgwanja ya kũigĩrĩrũo matawa ya thahabu: Njata icio mũgwanja irũgamĩrĩire araika a ciũngano icio mũgwanja, nayo mĩtĩ ĩyo mũgwanja ya kũigĩrĩrũo matawa ĩrũgamĩrĩire ciũngano icio mũgwanja.+