Kũguũrĩrio
1 Maũndũ marĩa maaguũririo nĩ Jesu Kristo, o marĩa Ngai aamũheire, nĩguo onie ngombo ciake maũndũ marĩa arĩ o mũhaka mekĩke ica ikuhĩ. Agĩtũma mũraika wake na akĩonia Johana ngombo yake maũndũ macio na njĩra ya cioneki* kũgerera harĩ we, 2 nake akĩruta ũira wĩgiĩ maũndũ marĩa Ngai oigire na akĩruta ũira wĩgiĩ Jesu Kristo, o na ũira wĩgiĩ maũndũ mothe marĩa onire. 3 Gũkena-rĩ, nĩ mũndũ ũrĩa ũthomaga anĩrĩire na arĩa maiguaga ciugo cia ũrathi ũyũ o na arĩa marũmagĩrĩra maũndũ marĩa mandĩkĩtwo thĩinĩ waguo, nĩ gũkorũo ihinda rĩrĩa rĩtuĩtwo rĩrĩ hakuhĩ.
4 Nĩ niĩ Johana, kũrĩ ciũngano iria mũgwanja irĩ mwena wa Asia:
Mũrogĩa na ũtugi mũnene na thayũ kuuma kũrĩ “Ũrĩa ũrĩ ho na nowe warĩ ho na nowe ũroka,” na kuuma kũrĩ maroho mũgwanja marĩa marĩ mbere ya gĩtĩ gĩake kĩa ũnene, 5 na kuuma kũrĩ Jesu Kristo, “Mũira Ũrĩa Mwĩhokeku,” “ũrĩa warĩ wa mbere kũriũkio kuuma kũrĩ arĩa akuũ,” na nowe “Mũtongoria wa athamaki a thĩ.”
Ũcio watwendire na agĩtũkũũra kuuma mehia-inĩ maitũ kũgerera thakame yake mwene— 6 na agĩtũtua athamaki, na athĩnjĩri-Ngai tũtungatagĩre Ngai wake, o we Ithe, ũcio arogĩa na riri o na ũhoti tene na tene. Ameni.
7 Atĩrĩrĩ, ũcio nĩ aroka na matu, na andũ othe nĩ makaamuona, na arĩa maamũthecire; na mĩhĩrĩga yothe ya andũ gũkũ thĩ nĩ ĩkehũũrahũra ĩgĩcakaya nĩ ũndũ wake. Ũhoro ũcio nĩ wa ma. Ameni.
8 “Nĩ niĩ Alifa na Omega,” ũguo nĩguo Jehova* Ngai ekuuga, “Ũrĩa ũrĩ ho na nowe warĩ ho na nowe ũroka, o we Mwene Hinya Wothe.”
9 Niĩ Johana, mũrũ wa Ithe wanyu, o niĩ nyitanagĩra na inyuĩ harĩ mĩnyamaro na ũthamaki na ũkirĩrĩria ndĩ mũrũmĩrĩri wa Jesu, ndaarĩ gĩcigĩrĩra-inĩ gĩtagwo Patimosi nĩ ũndũ wa kwaria ũhoro wĩgiĩ Ngai na kũruta ũira wĩgiĩ Jesu. 10 Kũgerera roho mũtheru, nĩ ndekorire ndĩ thĩinĩ wa mũthenya wa Mwathani, na ngĩigua mũgambo mũnene thutha wakwa ũtariĩ ta wa karumbeta, 11 ũkiuga ũũ: “Maũndũ marĩa ũkuona, andĩka gĩkũnjo-inĩ na ũtũme kũrĩ ciũngano ici mũgwanja: kĩa Efeso, Simurina, Perigamo, Thuatira, Sadisi, Filadefia, na Laodikia.”
12 Ngĩĩhũgũra nyone nũ waragia na niĩ, na rĩrĩa ndehũgũrire, ngĩona mĩtĩ mũgwanja ya thahabu ya kũigĩrĩrũo matawa, 13 na hau gatagatĩ-inĩ ka mĩtĩ ĩyo ya kũigĩrĩrĩrũo matawa haarĩ na mũndũ watariĩ ta mũrũ wa mũndũ, wehumbĩte nguo yakinyĩte nyarĩrĩ-inĩ na akeyoha mũcibi wa thahabu gĩthũri-inĩ. 14 Makĩria ma ũguo, mũtwe na njuĩrĩ ciake cieerũhĩte o ta guoya mwerũ, kana ira, namo maitho make maatariĩ ta rũrĩrĩmbĩ rwa mwaki, 15 na magũrũ make maatariĩ ta gĩcango kĩrĩa kĩega gĩkĩrĩrĩmbũka kĩrĩ mwaki-inĩ, na mũgambo wake watariĩ ta mũrurumo wa maĩ maingĩ. 16 Ningĩ guoko-inĩ gwake kwa ũrĩo aarĩ na njata mũgwanja, na kanua-inĩ gake hagacomoka rũhiũ rwa njora rũraihu na rũũgĩ rũnoretwo mĩena yerĩ, naguo ũthiũ wake watariĩ ta riũa hĩndĩ ĩrĩa rĩarĩte biũ. 17 Rĩrĩa ndaamuonire, ngĩgwa thĩ magũrũ-inĩ make, ngĩhaana ta nguĩte.
Nake akĩnjigĩrĩra guoko gwake kwa ũrĩo akĩnjĩra atĩrĩ: “Tiga gwĩtigĩra. Nĩ niĩ wa Mbere na wa Mũthia, 18 ningĩ nĩ niĩ ũrĩa ũrĩ muoyo, na nĩ ndaakuĩte, no rĩrĩ, ngũtũũra muoyo tene na tene, na ndĩ na cabi cia gĩkuũ o na cia Mbĩrĩra.* 19 Nĩ ũndũ ũcio-rĩ, andĩka maũndũ marĩa wona, na marĩa marĩ kuo, o na marĩa mageekĩka thutha ũcio. 20 Na ha ũhoro wa hitho ya Ngai ĩgiĩ njata icio mũgwanja wona guoko-inĩ gwakwa kwa ũrĩo na mĩtĩ mũgwanja ya thahabu ya kũigĩrĩrũo matawa: Njata icio mũgwanja irũgamĩrĩire araika a ciũngano icio mũgwanja, nayo mĩtĩ ĩyo mũgwanja ya kũigĩrĩrũo matawa ĩrũgamĩrĩire ciũngano icio mũgwanja.