Kũguũrĩrio kwa Johana
17 Mũraika ũmwe wa acio maarĩ na mbakũri mũgwanja+ agĩũka akĩnjĩra ũũ: “Ũka, na nĩ ngũkuonia ituĩro rĩa mũmaraya ũrĩa mũnene ũikaragĩra maĩ maingĩ,+ 2 o we athamaki a thĩ meekire nake ciĩko cia ngomanio itagĩrĩire,*+ nao aikari a thĩ makĩrĩĩo nĩ ndibei ya ngomanio ciake itagĩrĩire.”*+
3 Na akĩnguua na hinya wa roho akĩndwara werũ-inĩ. Ngĩona mũtumia aikarĩire nyamũ ya gĩthaka ya rangi mũtune yaiyũrĩtwo nĩ marĩĩtwa ma kũruma Ngai na yarĩ na mĩtwe mũgwanja na hĩa ikũmi. 4 Mũtumia ũcio eehumbĩte nguo ya rangi wa papũ+ na mũtune, na akegemia na mathaga ma thahabu na mahiga ma goro na ruru,+ na guoko-inĩ gwake aanyitĩte gĩkombe gĩa thahabu kĩiyũire maũndũ marĩ magigi na maũndũ matarĩ matheru ma ngomanio ciake itagĩrĩire.* 5 Thiithi-inĩ wake aandĩkĩtwo rĩĩtwa rĩarĩ kĩriga: “Babuloni Ũrĩa Mũnene, nyina wa maraya+ na wa maũndũ marĩa marĩ magigi ma thĩ.”+ 6 Na ngĩona atĩ mũtumia ũcio nĩ aarĩĩtwo nĩ thakame ya arĩa aamũre na akarĩĩo nĩ thakame ya aira a Jesu.+
Na rĩrĩa ndamuonire ngĩgega mũno. 7 Mũraika ũcio agĩkĩnjũria atĩrĩ: “Wagegio nĩ kĩĩ? Nĩ ngũkwĩra ũhoro wa kĩriga kĩa mũtumia ũcio+ na kĩa ũhoro wa nyamũ ĩyo ya gĩthaka ĩmũkuuĩte, o ĩyo ĩrĩ na mĩtwe mũgwanja na hĩa ikũmi:+ 8 Nyamũ ĩyo ya gĩthaka wona nĩ yarĩ kuo, no rĩu ndĩrĩ kuo, na ĩrĩ hakuhĩ kwambata kuuma irima-inĩ rĩrĩa rĩtarĩ gĩturi,*+ ĩthiĩ ĩkanangwo. Nao aikari a thĩ—arĩa marĩĩtwa mao matandĩkĩtwo gĩkũnjo-inĩ kĩa muoyo+ kuuma o kĩambĩrĩria gĩa thĩ—nĩ makaagega mona ũrĩa nyamũ ĩyo ya gĩthaka yarĩ kuo, no rĩu ndĩrĩ kuo, na nĩ ĩgũcoka ĩkorũo kuo.
9 “Ũhoro ũyũ ũrabatara meciria ma ũũgĩ: Mĩtwe ĩyo mũgwanja+ nĩ irĩma mũgwanja, iria mũtumia ũcio aikarĩire igũrũ rĩacio. 10 Na kũrĩ na athamaki mũgwanja: Atano nĩ magwĩte, ũmwe arĩ kuo, nake ũcio ũngĩ ndarĩ arakinya; no rĩrĩa agaakinya, no mũhaka agaaikara o kahinda kanini. 11 Na nyamũ ĩyo ya gĩthaka yarĩ kuo no rĩu ndĩrĩ kuo,+ ningĩ nĩ mũthamaki wa kanana, ĩndĩ yumanaga na athamaki acio mũgwanja, na ĩrathiĩ kwanangwo.
12 “Hĩa icio ikũmi wona nĩ athamaki ikũmi matarĩ maramũkĩra ũthamaki, ĩndĩ nĩ makaamũkĩra wathani matuĩke athamaki kwa ihinda rĩa ithaa rĩmwe hamwe na nyamũ ĩyo ya gĩthaka. 13 Acio marĩ na rĩciria rĩmwe, nĩ ũndũ ũcio nĩ maheaga nyamũ ĩyo ya gĩthaka hinya na wathani wao. 14 Nĩ makaarũa na Gatũrũme,+ no tondũ we nĩ Mwathani wa athani na Mũthamaki wa athamaki,+ Gatũrũme nĩ akaamahoota.+ Ningĩ, arĩa marĩ hamwe nake arĩa metĩtwo na magathuurũo na ehokeku nĩ mageeka ũguo.”+
15 Akĩnjĩra atĩrĩ: “Maĩ marĩa wona, harĩa mũmaraya ũcio aikarĩire, nĩ ikundi cia andũ na irĩndĩ na ndũrĩrĩ na thiomi.+ 16 Na hĩa icio ikũmi+ wona o hamwe na nyamũ ĩyo ya gĩthaka,+ nĩ igaathũũra mũmaraya ũcio+ na imwanange na imũtige arĩ njaga, na nĩ ikaarĩa nyama ciake na imũcine biũ na mwaki.+ 17 Nĩ gũkorũo Ngai nĩ ekĩrĩte ũndũ ũcio ngoro-inĩ ciao nĩguo mahingie rĩciria rĩake,+ mahingie rĩciria rĩao rĩmwe na njĩra ya kũhe nyamũ ĩyo ya gĩthaka+ ũthamaki wao, o nginya ciugo cia Ngai igaakorũo ihingĩte. 18 Nake mũtumia+ ũcio wona nĩ itũũra rĩrĩa inene rĩrĩ na ũthamaki igũrũ rĩa athamaki a thĩ.”