Kũguũrĩrio
17 Mũraika ũmwe wa acio maarĩ na mbakũri icio mũgwanja agĩũka akĩnjĩra ũũ: “Ũka, na nĩ ngũkuonia ituĩro rĩa mũmaraya ũrĩa mũnene ũikaragĩra maĩ maingĩ, 2 o we athamaki a thĩ mekĩte nake ciĩko cia ngomanio itagĩrĩire,* nao aikari a thĩ makĩrĩwo nĩ ndibei ya ngomanio ciake itagĩrĩire.”*
3 Na akĩnguua na hinya wa roho akĩndwara werũ-inĩ. Ngĩona mũtumia aikarĩire nyamũ ya rangi mũtune ĩiyũrĩtwo nĩ marĩĩtwa ma irumi na yarĩ na mĩtwe mũgwanja na hĩa ikũmi. 4 Mũtumia ũcio eehumbĩte nguo ya rangi wa ndaathi na mũtune, na agekĩra mathaga ma thahabu na mahiga ma goro na ruru, na guoko-inĩ gwake aanyitĩte gĩkombe gĩa thahabu kĩiyũire maũndũ marĩ magigi na maũndũ matarĩ matheru ma ngomanio ciake itagĩrĩire.* 5 Thiithi-inĩ wake aandĩkĩtwo rĩĩtwa rĩarĩ kĩriga: “Babuloni Ũrĩa Mũnene, nyina wa maraya na wa maũndũ marĩa marĩ magigi ma thĩ.” 6 Na ngĩona atĩ mũtumia ũcio nĩ aarĩtwo nĩ thakame ya arĩa aamũre na akarĩwo nĩ thakame ya aira a Jesu.
Na rĩrĩa ndamuonire ngĩgega mũno. 7 Mũraika ũcio agĩkĩnjũria atĩrĩ: “Wagegio nĩ kĩĩ? Nĩ ngũkwĩra ũhoro wa kĩriga kĩa mũtumia ũcio na kĩa ũhoro wa nyamũ ĩyo ĩmũkuuĩte, o ĩyo ĩrĩ na mĩtwe mũgwanja na hĩa ikũmi: 8 Nyamũ ĩyo wona nĩ yarĩ kuo, no rĩu ndĩrĩ kuo, na ĩrĩ hakuhĩ kuuma thĩinĩ wa irima rĩrĩa rĩtarĩ gĩturi,* ĩthiĩ ĩkanangwo. Nao aikari a thĩ, arĩa marĩĩtwa mao mataandĩkĩtwo gĩkũnjo-inĩ kĩa muoyo kuuma o kĩambĩrĩria* gĩa thĩ, nĩ makaagega mona atĩ nyamũ ĩyo yarĩ kuo, no rĩu ndĩrĩ kuo, na nĩ ĩgũcoka ĩkorũo kuo.
9 “Ũhoro ũyũ ũrabatara meciria ma ũũgĩ: Mĩtwe ĩyo mũgwanja nĩ irĩma mũgwanja, iria mũtumia ũcio aikarĩire igũrũ rĩacio. 10 Na kũrĩ na athamaki mũgwanja: Atano ao nĩ magwĩte, ũmwe arĩ kuo, nake ũcio ũngĩ ndarĩ arakinya; no rĩrĩa agaakinya, agaaikara o kahinda kanini. 11 Na nyamũ ĩyo yarĩ kuo no rĩu ndĩrĩ kuo, ningĩ nĩ mũthamaki wa kanana, ĩndĩ yumanaga na athamaki acio mũgwanja, na nĩ ĩkanangwo.
12 “Hĩa iria ikũmi wonire nĩ athamaki ikũmi matarĩ maraamũkĩra ũthamaki, ĩndĩ nĩ makaamũkĩra wathani matuĩke athamaki kwa ihinda rĩa ithaa rĩmwe hamwe na nyamũ ĩyo. 13 Acio marĩ na rĩciria rĩmwe, nĩ ũndũ ũcio nĩ makaahe nyamũ ĩyo hinya na wathani wao. 14 Nĩ makaarũa na Gatũrũme, no tondũ we nĩ Mwathani wa athani na Mũthamaki wa athamaki-rĩ, Gatũrũme nĩ akaamahoota. Ningĩ, arĩa magaakorũo hamwe nake arĩa metĩtwo na magathurũo na ehokeku nĩ makaahootana.”
15 Akĩnjĩra atĩrĩ: “Maĩ marĩa wonire, harĩa mũmaraya ũcio aikarĩire, nĩ iruka cia andũ na irĩndĩ na ndũrĩrĩ na thiomi. 16 Hĩa iria ikũmi wonire o hamwe na nyamũ ĩyo, nĩ igaathũũra mũmaraya ũcio na imũconorithie na imũtige arĩ njaga, na irĩe nyama ciake na imũcine biũ na mwaki. 17 Nĩ gũkorũo Ngai nĩ ekĩrĩte ũndũ ũcio ngoro-inĩ ciao nĩguo mahingie rĩciria rĩake, mahingie rĩciria rĩao rĩmwe na njĩra ya kũhe nyamũ ĩyo ũthamaki wao, o nginya ciugo cia Ngai igaakorũo ihingĩte. 18 Nake mũtumia ũcio wonire nĩ itũũra rĩrĩa inene rĩrĩ na wathani igũrũ rĩa athamaki a thĩ.”