Ũhoro Mwega Ũrĩa Waandĩkirũo nĩ Mariko
12 Agĩcoka akĩambĩrĩria kwaria nao na ngerekano akĩmeera atĩrĩ: “Mũndũ ũmwe nĩ aahandire mĩthabibũ mũgũnda-inĩ,+ akĩũirigĩra na akĩenja irima rĩa kĩhihĩro kĩa ndibei na agĩaka nyũmba ndaya na igũrũ;+ agĩcoka akĩũkomborithia arĩmi, na agĩthiĩ bũrũri wa kũraya.+ 2 Na rĩrĩa hĩndĩ ya magetha yakinyire-rĩ, agĩtũma ngombo kũrĩ arĩmi acio ĩkagĩĩre maciaro mamwe ma mũgũnda ũcio wa mĩthabibũ kuuma kũrĩ o. 3 No makĩmĩnyita, makĩmĩhũũra, na makĩmĩingata moko matheri. 4 O rĩngĩ agĩtũma ngombo ĩngĩ kũrĩ arĩmi acio, nao makĩmĩhũũra mũtwe na makĩmĩagĩra gĩtĩo.+ 5 Ningĩ agĩtũma ngombo ĩngĩ, nao makĩmĩũraga, na agĩtũma ingĩ nyingĩ, makĩhũũra imwe na makĩũraga iria ingĩ. 6 Aarĩ na ũmwe aatigĩtie, mũrũwe ũrĩa eendete mũno.+ Akĩmũtũma arĩ wa mũico, akiuga atĩrĩ, ‘Nĩ mekũhe mũrũ wakwa gĩtĩo.’ 7 No arĩmi acio makĩĩrana atĩrĩ, ‘Ũyũ nĩwe mũgai.+ Nĩ tũmũũragei, narĩo igai rĩake rĩgũtuĩka ritũ.’ 8 Kwoguo makĩmũnyita, makĩmũũraga, na makĩmũikia nja ya mũgũnda ũcio wa mĩthabibũ.+ 9 Mwene mũgũnda ũcio wa mĩthabibũ ageeka atĩa hihi? Agooka orage arĩmi acio, acoke akomborithie arĩmi angĩ mũgũnda ũcio wa mĩthabibũ.+ 10 Kaĩ mũtarĩ mwathoma rĩandĩko rĩrĩ: ‘Ihiga rĩrĩa aaki maaregire, nĩrĩo rĩtuĩkĩte ihiga rĩrĩa inene rĩa kona.*+ 11 Ũndũ ũcio uumĩte kũrĩ Jehova,* na nĩ wa magegania maitho-inĩ maitũ’?”+
12 Nao nĩ meendaga kũmũnyita tondũ nĩ maamenyire atĩ aaheanaga ngerekano ĩyo nĩ ũndũ wao. No tondũ nĩ meetigagĩra kĩrĩndĩ, magĩtigana nake magĩthiĩ.+
13 Magĩcoka magĩtũma Afarisai amwe na arũmĩrĩri amwe a kĩama kĩa Herode nĩguo mamũtege na mĩario yake.+ 14 Rĩrĩa maakinyire makĩmwĩra: “Mũrutani, nĩ tũĩ atĩ waragia ma na ndũcaragia ũrĩa ũngĩtĩkĩrĩka nĩ mũndũ o na ũrĩkũ, tondũ ndũroraga ũrĩa andũ matariĩ na nja, no ũrutanaga njĩra ya Ngai kũringana na ũrĩa ma ĩtariĩ. Hihi nĩ kwagĩrĩire kũrĩha Kaisari igooti kana gũtiagĩrĩire? 15 Hihi nĩ twagĩrĩirũo kũrĩha kana tũtiagĩrĩirũo?” Rĩrĩa oonire ũhinga wao akĩmeera atĩrĩ: “Nĩ kĩĩ kĩratũma mũngerie? Ta ndeherai dinari* ndĩmĩone.” 16 Makĩmũrehera dinari ĩmwe, nake akĩmoria atĩrĩ: “Mbica ĩno na maandĩko maya nĩ cia ũ?” Makĩmũcokeria: “Nĩ cia Kaisari.” 17 Nake Jesu akĩmeera: “Rĩhai Kaisari indo cia Kaisari,+ no indo cia Ngai mũrĩhe Ngai.”+ Nao makĩgegio mũno nĩwe.
18 Na rĩrĩ, Asadukai, arĩa moigaga atĩ andũ matikaariũkio,+ magĩthiĩ kũrĩ we makĩmũũria atĩrĩ:+ 19 “Mũrutani, Musa aatwandĩkĩire atĩ mũrũ wa nyina na mũndũ angĩkua, na atige mũtumia no akorũo ndararĩ na mwana, mũrũ wa nyina na mũndũ ũcio agĩrĩire kũhikia mũtumia ũcio nĩguo aciarĩre mũrũ wa nyina ciana.*+ 20 Kwarĩ na ariũ mũgwanja a nyina ũmwe. Wa mbere akĩhikania, no agĩkua atagĩĩte ciana.* 21 Nake wa kerĩ akĩhikia mũtumia ũcio no agĩkua atagĩĩte ciana,* na noguo gwathiire harĩ wa gatatũ. 22 Na othe mũgwanja magĩkua matagĩĩte ciana.* Mũthia-inĩ, mũtumia ũcio o nake agĩkua. 23 Hĩndĩ ĩrĩa andũ makaariũkio-rĩ, agaatuĩka mũtumia wa ũ? Nĩ gũkorũo nĩ aatuĩkĩte mũtumia wao othe mũgwanja.” 24 Nake Jesu akĩmeera atĩrĩ: “Na githĩ tikĩo mũhĩtĩtie, tondũ mũtiũĩ Maandĩko o na kana hinya wa Ngai?+ 25 Nĩ gũkorũo rĩrĩa andũ makaariũkio kuuma kũrĩ akuũ, matikahikanagia kana kũhika, no magaakorũo matariĩ ta araika arĩa marĩ igũrũ.+ 26 No ha ũhoro wa kũriũkio kwa arĩa akuũ-rĩ, kaĩ mũtathomete thĩinĩ wa ibuku rĩa Musa ũhoro-inĩ wĩgiĩ kĩhinga kĩrĩa kĩa mĩigua, atĩ Ngai aamwĩrire ũũ: ‘Niĩ nĩ niĩ Ngai wa Iburahimu, na Ngai wa Isaaka, na Ngai wa Jakubu’?+ 27 We ti Ngai wa arĩa makuĩte, no nĩ wa arĩa marĩ muoyo. Nĩ mũhĩtĩtie mũno.”+
28 Na mwandĩki-watho ũmwe wokĩte akaigua magĩkararania nake, amenya atĩ nĩ amacokeria na njĩra njega, akĩũria Jesu atĩrĩ: “Rĩathani rĩrĩa rĩa mbere* harĩ marĩa mangĩ mothe nĩ rĩrĩkũ?”+ 29 Jesu agĩcokia ũũ: “Rĩa mbere nĩ rĩrĩ, ‘Thikĩrĩria wee Isiraeli, Jehova* Ngai witũ nowe wiki Jehova,* 30 na no mũhaka wende Jehova* Ngai waku na ngoro yaku yothe na muoyo* waku wothe na meciria maku mothe na hinya waku wothe.’+ 31 Rĩa kerĩ nĩ rĩrĩ, ‘No mũhaka wende mũndũ ũrĩa mũriganĩtie nake o ta ũrĩa wĩyendete wee mwene.’+ Gũtirĩ rĩathani rĩngĩ inene gũkĩra macio.” 32 Mwandĩki-watho ũcio akĩmwĩra atĩrĩ: “Mũrutani, nĩ waria ma, ‘Ngai nĩ Ũmwe, na gũtirĩ ũngĩ tiga we’;+ 33 na mũndũ kũmwenda na ngoro yake yothe, na meciria make mothe, na hinya wake wothe, na mũndũ kwenda ũrĩa mariganĩtie nake o ta ũrĩa eyendete nĩ kwa bata makĩria gũkĩra magongona mothe magima ma njino na maruta.”+ 34 Nĩ ũndũ ũcio, rĩrĩa Jesu oonire atĩ mũndũ ũcio nĩ acokia na ũũgĩ, akĩmwĩra: “Ndũrĩ haraya na Ũthamaki wa Ngai.” Na gũtirĩ mũndũ warĩ na ũmĩrĩru wa kũmũũria ciũria rĩngĩ.+
35 O na kũrĩ ũguo, rĩrĩa Jesu aarutanaga thĩinĩ wa hekarũ, akiuga atĩrĩ: “Nĩ kĩĩ gĩtũmaga andĩki-watho moige atĩ Kristo nĩ mũrũ wa Daudi?+ 36 Daudi we mwene atongoretio nĩ roho mũtheru+ ooigire atĩrĩ, ‘Jehova* nĩ eerire Mwathani wakwa ũũ: “Ikara thĩ guoko-inĩ gwakwa kwa ũrĩo nginya rĩrĩa ngaaiga thũ ciaku rungu rwa magũrũ maku.”’+ 37 Daudi we mwene amwĩtĩte Mwathani, kwoguo-rĩ, kũngĩgĩtuĩka atĩa atĩ nĩ mũrũwe?”+
Nakĩo kĩrĩndĩ kĩu kĩnene nĩ gĩakeneire kũmũthikĩrĩria. 38 Nake agĩthiĩ na mbere kũrutana akĩmeera ũũ: “Mwĩmenyagĩrĩrei andĩki-watho arĩa mendete gũthiĩ mehumbĩte kanjũ na mendete kũgeithio nĩ andũ thoko-inĩ+ 39 na gũikarĩra itĩ cia mbere* thunagogi-inĩ na gũikara handũ harĩa hatĩĩku makĩria maruga-inĩ ma hwaĩ-inĩ.+ 40 Manyamaragia mĩciĩ ya* atumia a ndigwa, na makahoya mahoya maraihu nĩguo meyonanie. Acio nĩ magaatuĩrũo ituĩro inene makĩria.”*
41 Agĩcoka agĩikara thĩ handũ oonaga mathandũkũ ma mĩhothi+ na akĩambĩrĩria kwĩrorera ũrĩa kĩrĩndĩ gĩaikagia mbeca thĩinĩ wa mathandũkũ macio ma mĩhothi, na andũ aingĩ arĩa maarĩ atongu maaikagia thendi nyingĩ.+ 42 Na rĩrĩ, mũtumia ũmwe wa ndigwa warĩ mũthĩni agĩũka na agĩikia tũthendi twĩrĩ twa thogora mũnini mũno.*+ 43 Nĩ ũndũ ũcio agĩta arutwo ake akĩmeera ũũ: “Ngũmwĩra atĩrĩ na ma, mũtumia ũyũ mũthĩni wa ndigwa aikia nyingĩ gũkĩra arĩa othe megũikagia mbeca thĩinĩ wa mathandũkũ ma mĩhothi.+ 44 Tondũ othe maikia kuumana na matigari ma kĩrĩa marĩ nakĩo, no mũtumia ũyũ, o na arĩ mũthĩni,* aikia kĩrĩa gĩothe oima nakĩo, kĩrĩa gĩothe oima nakĩo ũtũũro-inĩ.”+