Ũhoro Mwega Ũrĩa Waandĩkirũo nĩ Mariko
9 Agĩcoka akĩmeera ũũ: “Ngũmwĩra atĩrĩ o ma, nĩ harĩ amwe marũgamĩte haha matagacama gĩkuũ o rĩ nginya mambe mone Ũthamaki wa Ngai ũũkĩte ũrĩ na hinya.”+ 2 Thikũ ithathatũ thutha ũcio, Jesu akĩoya Petero na Jakubu na Johana akĩmambatia kĩrĩma-inĩ kĩnene mũno marĩ oiki. Na arĩ mbere yao akĩgarũrũka ũrĩa aatariĩ;+ 3 nguo ciake cia igũrũ ikĩambĩrĩria kũhenia mũno, ikĩerũha gũkĩra ũrĩa mũthambia wa nguo o na ũrĩkũ thĩinĩ wa thĩ angĩtũma cierũhe. 4 Ningĩ makiumĩrĩrũo nĩ Elija na Musa, na maaranagĩria na Jesu. 5 Petero akĩra Jesu atĩrĩ: “Rabii, nĩ wega gũkorũo tũrĩ haha. Nĩ ũndũ ũcio reke twambe hema ithatũ, ĩmwe yaku, ĩmwe ya Musa, na ĩmwe ya Elija.” 6 Petero ndaamenyaga ũrĩa egwĩka, nĩ gũkorũo nĩ maaiguire guoya mũno. 7 Hagĩcoka hakĩgĩa na itu, rĩkĩmahumbĩra, na mũgambo+ ũkiuma thĩinĩ wa itu rĩu ũkiuga: “Ũyũ nĩ Mũrũ wakwa, ũrĩa nyendete.+ Mũthikagĩrĩriei.”+ 8 Hĩndĩ o ĩyo makĩrora mĩena yothe, no gũtirĩ mũndũ ũngĩ moonire tiga Jesu.
9 Rĩrĩa maaikũrũkaga kuuma kĩrĩma-inĩ, akĩmahe mũkaana mũrũmu atĩ matikeere mũndũ o na ũmwe maũndũ macio moonire+ o nginya rĩrĩa Mũrũ wa mũndũ akaariũkio kuuma kũrĩ arĩa akuũ.+ 10 Nao makĩiga ciugo icio ngoro-inĩ,* no magĩteereta gatagatĩ-inĩ kao ũrĩa kũriũkio kũu kuuma kũrĩ arĩa akuũ kuugĩte. 11 Na makĩambĩrĩria kũmũũria atĩrĩ: “Nĩ kĩĩ gĩtũmaga andĩki-watho moige atĩ no mũhaka Elija+ ambe oke?”+ 12 Nake akĩmeera atĩrĩ: “Elija no mũhaka ambe oke na acokie maũndũ mothe;+ no nĩ kĩĩ gĩtũmĩte kwandĩkwo ũhoro wĩgiĩ Mũrũ wa mũndũ atĩ no mũhaka acemanie na mĩnyamaro mĩingĩ+ na anyararũo?+ 13 No ngũmwĩra atĩrĩ, Elija+ nĩ arĩkĩtie gũka, na makĩmwĩka ũrĩa wothe meendire kũmwĩka, o ta ũrĩa kwandĩkĩtwo ũhoro ũmwĩgiĩ.”+
14 Na rĩrĩa maakinyire harĩ arutwo acio angĩ, makĩona kĩrĩndĩ kĩnene kĩmarigicĩirie, na nĩ haarĩ na andĩki-watho maakararanagia nao.+ 15 No rĩrĩa andũ acio othe maamuonire, makĩgega na makĩhanyũka harĩ we nĩguo mamũgeithie. 16 Nake akĩmoria atĩrĩ: “Nĩ kĩĩ mũrakararanĩria nao?” 17 Mũndũ ũmwe thĩinĩ wa kĩrĩndĩ kĩu akĩmũcokeria: “Mũrutani, ngũrehete mũrũ wakwa kũrĩ wee tondũ akoragwo na roho mũũru ũtũmaga akorũo arĩ bubu.+ 18 Rĩrĩa rĩothe wamũnyita, ũmũtungumanagia thĩ, akaruta mũhũyũ na kanua, akahagarania magego na agathirũo nĩ hinya. Njũririe arutwo aku maũingate, no matinahota.” 19 Nake akĩmeera atĩrĩ: “Inyuĩ rũciaro rũrũ rũtarĩ wĩtĩkio,+ ngũtũũra hamwe na inyuĩ nginya rĩ? Ngũmũkirĩrĩria nginya rĩ? Mũrehei haha harĩ niĩ.”+ 20 Nĩ ũndũ ũcio magĩtwara kamwana kau harĩ we, no rĩrĩa roho ũcio woonire Jesu, o rĩmwe ũgĩtugutania mwana ũcio. Thutha wa kũgwa thĩ, akĩambĩrĩria kwĩgaragaria akĩrutaga mũhũyũ na kanua. 21 Jesu agĩcoka akĩũria ithe wa mwana ũcio atĩrĩ: “Ũndũ ũyũ ũkoretwo ũgĩkĩka harĩ we kuuma rĩ?” Nake akĩmũcokeria: “Kuuma arĩ o mwana, 22 na kaingĩ nĩ ũmũikagia mwaki-inĩ na maĩ-inĩ nĩguo ũmũniine. No angĩkorũo no ũhote gwĩka ũndũ, tũiguĩre tha ũtũteithie.” 23 Jesu akĩmwĩra ũũ: “Nĩ kĩĩ gĩatũma ũnjĩre, ‘Angĩkorũo no ũhote’? Maũndũ mothe nĩ mahotekaga harĩ mũndũ ũrĩ na wĩtĩkio.”+ 24 O hĩndĩ ĩyo ithe wa mwana ũcio akĩanĩrĩra akiuga: “Ndĩ na wĩtĩkio! Ndeithia harĩa ndĩrabatara wĩtĩkio!”+
25 Rĩrĩa Jesu oonire kĩrĩndĩ gĩtengʼerete harĩ o, agĩkũũma roho ũcio mũũru, akiuga ũũ: “Wee roho ũyũ ũtũmaga mũndũ akorũo arĩ bubu na mũndũ age kũigua, ndakwĩra uume na ndũkanaingĩre thĩinĩ wake rĩngĩ!”+ 26 Thutha wa gũtũma mwana ũcio akae na kũmũtugutania mũno, ũkiuma thĩinĩ wake na akĩhaana ta akuĩte, nginya andũ aingĩ makĩambĩrĩria kuuga: “Nĩ akua!” 27 No Jesu akĩmũnyita guoko na akĩmũũkĩria, nake akĩrũgama. 28 Na rĩrĩ, thutha wa kũingĩra nyũmba, arutwo ake makĩmũũria ũũ hatarĩ andũ angĩ: “Tũremirũo nĩ kũingata roho ũcio nĩkĩ?”+ 29 Akĩmacokeria atĩrĩ: “Mũthemba ũcio no uumire na njĩra ya mahoya tu.”
30 Makiuma kũu makĩgerera Galili, no ndeendaga mũndũ o na ũrĩkũ amenye ũhoro ũcio. 31 Nĩ gũkorũo nĩ aarutaga arutwo ake akĩmeeraga ũũ: “Mũrũ wa mũndũ nĩ egũkunyanĩrũo aneanwo moko-inĩ ma andũ, na nĩ mekũmũũraga,+ o na kũrĩ ũguo, nĩ akaariũka thutha wa thikũ ithatũ.”+ 32 No rĩrĩ, matiataũkagĩrũo nĩ ciugo icio ciake, na nĩ meetigagĩra kũmũũria ũndũ.
33 Na magĩkinya Kaperinaumu. Na arĩ nyũmba thĩinĩ akĩmoria atĩrĩ: “Nĩ ũndũ ũrĩkũ mũgũkararanagĩria njĩra-inĩ?”+ 34 Nao matiamũcokeirie, tondũ nĩ maakararanĩtie marĩ njĩra-inĩ igũrũ rĩgiĩ nũũ mũnene gũkĩra arĩa angĩ. 35 Nĩ ũndũ ũcio agĩikara thĩ na agĩta acio Ikũmi na Erĩ na akĩmeera ũũ: “Mũndũ o wothe angĩenda gũkorũo arĩ wa mbere, no mũhaka atuĩke wa mũico harĩ arĩa angĩ othe na atungatagĩre arĩa angĩ othe.”+ 36 Agĩcoka akĩoya kaana na agĩkarũgamia gatagatĩ-inĩ kao; agĩkaigĩrĩra moko ciande-inĩ, akĩmeera ũũ: 37 “Mũndũ o wothe wamũkagĩra kaana ta gaka+ nĩ ũndũ wa rĩĩtwa rĩakwa nĩ anyamũkagĩra o na niĩ; nake mũndũ o wothe ũnyamũkagĩra, to niĩ amũkagĩra ĩndĩ nĩ nginya Ũrĩa wandũmire.”+
38 Johana akĩmwĩra atĩrĩ: “Mũrutani, nĩ harĩ mũndũ tuonire akĩruta andũ ndaimono na rĩĩtwa rĩaku, na twageria kũmũgiria nĩ gũkorũo ndegũtũrũmagĩrĩra.”+ 39 No Jesu akiuga ũũ: “Mũtikagerie kũmũgiria, tondũ gũtirĩ mũndũ ũngĩka mawĩko ma hinya na rĩĩtwa rĩakwa ũngĩhiũha kuuga ũndũ mũũru igũrũ rĩakwa. 40 Tondũ mũndũ o wothe ũtararegana na ithuĩ arĩ mwena witũ.+ 41 Nake ũrĩa wothe ũkaamũhe gĩkombe kĩa maĩ ma kũnyua nĩ ũndũ mũrĩ a Kristo,+ ngũmwĩra atĩrĩ o ma, mũndũ ũcio ndarĩ hĩndĩ akoorũo nĩ kĩheo gĩake.+ 42 No ũrĩa wothe ũhĩngaga ũmwe wa aya matariĩ ta twana arĩa marĩ na wĩtĩkio, nĩ kaba ohererũo ihiga rĩa gĩthĩi ngingo rĩrĩa rĩthiũrũrũkagio nĩ ndigiri na aikio iria thĩinĩ.+
43 “Angĩkorũo guoko gwaku nĩ kũrakũhĩngithia, gũtinie ũgũte. Nĩ kaba ũgaatonya muoyo-inĩ ũrĩ kĩonje gũkĩra ũgaaikio Jehanamu* ũrĩ na moko meerĩ, thĩinĩ wa mwaki ũrĩa ũtangĩhoreka.+ 44 *—— 45 Na angĩkorũo kũgũrũ gwaku nĩ kũrakũhĩngithia, gũtinie ũgũte. Nĩ kaba ũgaatonya muoyo-inĩ ũgĩthuaga gũkĩra ũgaaikio Jehanamu* ũrĩ na magũrũ meerĩ.+ 46 *—— 47 Na angĩkorũo riitho rĩaku nĩ rĩrakũhĩngithia, rĩkũũre ũrĩte.+ Nĩ kaba ũkaaingĩra thĩinĩ wa Ũthamaki wa Ngai ũrĩ na riitho rĩmwe gũkĩra ũgaaikio Jehanamu* ũrĩ na maitho meerĩ,+ 48 kũrĩa igunyũ itakuaga na mwaki ũtahoraga.+
49 “Tondũ no mũhaka o mũndũ agaaitĩrĩrio mwaki ta cumbĩ.+ 50 Cumbĩ nĩ mwega, no ũngĩaga mũcamo waguo-rĩ, mũngĩcokia mũcamo waguo na kĩĩ?+ Gĩai na cumbĩ thĩinĩ wanyu,+ na mũtũũrie thayũ gatagatĩ-inĩ kanyu.”+