Samueli wa Kerĩ
7 Na rĩrĩa mũthamaki aaikarire gwake nyũmba*+ na Jehova agĩkorũo amũheete ũhurũko kuuma kũrĩ thũ ciake ciothe iria ciamũthiũrũrũkĩirie, 2 mũthamaki akĩra mũnabii Nathani+ ũũ: “Atĩrĩrĩ, njikaraga nyũmba-inĩ yakĩtwo na mĩtarakwa+ no Ithandũkũ rĩa Ngai ũrĩa wa ma rĩikaraga gatagatĩ-inĩ ga itambaya cia hema.”+ 3 Nathani agĩcokeria mũthamaki ũũ: “Thiĩ wĩke ũrĩa wothe ũrĩ ngoro-inĩ yaku, nĩ gũkorũo Jehova arĩ hamwe nawe.”+
4 Ũtukũ o ro ũcio, kiugo kĩa Jehova gĩgĩkinyĩra Nathani, akĩmwĩra atĩrĩ: 5 “Thiĩ wĩre Daudi ndungata yakwa atĩrĩ, ‘Ũũ nĩguo Jehova oigĩte: “Hihi nĩwe ũkũnjakĩra nyũmba njikarage?+ 6 Nĩ gũkorũo ndirĩ ndaikara thĩinĩ wa nyũmba kuuma mũthenya ũrĩa ndarutire andũ a Isiraeli Misiri nginyagia mũthenya ũyũ wa ũmũthĩ,+ ĩndĩ ndũũraga thaamathaamaga* ndĩ thĩinĩ wa hema na ndĩ thĩinĩ wa gĩikaro kĩrĩa kĩamũre.+ 7 Ihinda-inĩ rĩrĩa rĩothe ndathiaga hamwe na Aisiraeli* othe-rĩ, hihi nĩ harĩ hĩndĩ ndaririe kiugo o na kĩmwe na ũmwe wa atongoria a mĩhĩrĩga ya Isiraeli arĩa ndamũrire marĩithagie andũ akwa Isiraeli, ngiuga ũũ, ‘Mũregete kũnjakĩra nyũmba ya mĩtarakwa nĩkĩ?’”’ 8 Rĩu ĩra Daudi ndungata yakwa atĩrĩ, ‘Ũũ nĩguo Jehova mũnene wa ita oigĩte: “Ndakũrutire kũndũ gwa kũrĩithia, ũgĩtiga kũrũmĩrĩra rũũru,+ nĩguo ũtuĩke mũtongoria wa gũtongoragia andũ akwa Isiraeli.+ 9 Na nĩ ndĩkoragwo hamwe nawe kũrĩa guothe ũrĩthiaga,+ na nĩ ngũniina* thũ ciaku ciothe ciehere mbere yaku;+ na nĩ ngũgũthondekera rĩĩtwa inene+ o ta rĩĩtwa rĩa andũ arĩa marĩ igweta thĩinĩ wa thĩ. 10 Nĩ ngũthuura kũndũ nĩ ũndũ wa andũ akwa Isiraeli na ndĩmahe maikarage kuo, na kũu nĩkuo megũtũũra na gũtirĩ hĩndĩ magaacoka gũthumbũrũo; na andũ arĩa aganu matikamahinyĩrĩria rĩngĩ ta ũrĩa meekaga ihinda-inĩ rĩrĩa ihĩtũku,+ 11 kuuma mũthenya ũrĩa ndamũrire atiirĩrĩri bũrũri+ a gũtiirĩrĩra andũ akwa Isiraeli. Na nĩ ngũmũhe ũhurũko kuuma kũrĩ thũ cianyu ciothe.+
“‘“Ningĩ Jehova nĩ akwĩrĩte atĩ Jehova nĩ egũgũthondekera nyũmba.*+ 12 Rĩrĩa matukũ maku magaakinya mũthia+ na ũhurũkio hamwe na maithe manyu ma tene, hĩndĩ ĩyo nĩ ngaarahũra mbeũ yaku* ĩrĩa ĩgooka thutha waku, mũrũ waku wee mwene,* na nĩ ngaahanda ũthamaki wake ũrũme biũ.+ 13 Ũcio nĩwe ũgaaka nyũmba nĩ ũndũ wa rĩĩtwa rĩakwa,+ na nĩ ngaahanda gĩtĩ kĩa ũnene kĩa ũthamaki wake kĩrũme tene na tene.+ 14 Nĩ ngaatuĩka ithe, nake atuĩke mũrũ wakwa.+ Ahĩtia ngaamũrũngaga na rũthanju rwa andũ na ngamũhũũra na iboko cia ariũ a andũ.*+ 15 Wendo wakwa mwĩhokeku ndũkeeherio harĩ we ta ũrĩa ndaweheririe harĩ Saulu+ ũrĩa ndeheririe mbere yaku. 16 Nyũmba yaku na ũthamaki waku igũtũũra irũmĩte tene na tene mbere yaku; gĩtĩ gĩaku kĩa ũnene gĩgũtũũra kĩĩhandĩte wega tene na tene.”’”+
17 Nathani akĩra Daudi ciugo icio ciothe o hamwe na kĩoneki kĩu gĩothe.+
18 Hĩndĩ ĩyo Mũthamaki Daudi akĩingĩra na agĩikara thĩ mbere ya Jehova na akiuga ũũ: “Niĩ ndĩ ũ, wee Jehova Mwathani Ũrĩa Mũnene? Nayo nyũmba yakwa nĩ kĩĩ atĩ nĩguo ũnginyie haha ũnginyĩtie?+ 19 Makĩria ma ũguo, wee Jehova Mwathani Ũrĩa Mũnene, ningĩ nĩ warĩtie ũhoro wa nyũmba ya ndungata yaku wĩgiĩ ihinda rĩrĩa rĩgooka thutha-inĩ; na ũyũ nĩ ũtaaro* harĩ andũ othe, wee Jehova Mwathani Ũrĩa Mũnene. 20 Nĩ atĩa ũngĩ ndungata yaku Daudi ĩngĩkwĩra na nĩ ũnjũĩ wega,+ wee Jehova Mwathani Ũrĩa Mũnene? 21 Nĩ ũndũ wa uuge waku na nĩ ũndũ wa gũkorũo wĩtĩkanĩtie na ũndũ ũcio ngoro-inĩ yaku* nĩ wĩkĩte maũndũ maya manene na ũkamaguũrĩria ndungata yaku.+ 22 Nĩkĩo wĩ mũnene,+ wee Jehova Mwathani Ũrĩa Mũnene. Gũtirĩ ũngĩ ũhaana tawe,+ na gũtirĩ Ngai ũngĩ tiga wee;+ maũndũ mothe marĩa twĩiguĩrĩire na matũ maitũ nĩ maheanĩte ũira wa ũndũ ũcio. 23 Na nĩ rũrĩrĩ rũrĩkũ rũngĩ rũtariĩ ta andũ aku Isiraeli?+ Ngai aathiire na akĩmakũũra magĩtuĩka andũ ake,+ agĩĩthondekera rĩĩtwa+ na njĩra ya kũmekĩra maũndũ manene na ma magegania.+ Ũkĩingata ndũrĩrĩ na ngai ciacio nĩ ũndũ wa andũ aku, arĩa wekũũrĩire kuuma Misiri. 24 Wahandire andũ aku Isiraeli magĩtuĩka andũ aku mwene mahinda mothe;+ nawe Jehova, nĩ ũtuĩkĩte Ngai wao.+
25 “Rĩu wee Jehova Ngai, hingia kĩĩranĩro kĩrĩa wĩranĩire ũhoro-inĩ wĩgiĩ ndungata yaku na nyũmba yayo mahinda-inĩ mothe, na ũroeka o ta ũrĩa wĩranĩire.+ 26 Rĩĩtwa rĩaku rĩrotũũgĩrio tene na tene,+ nĩgetha andũ moige atĩrĩ, ‘Jehova mũnene wa ita nĩwe Ngai wa Isiraeli,’ na nyũmba ya Daudi ndungata yaku ĩroehanda wega mbere yaku.+ 27 Nĩ gũkorũo wee Jehova mũnene wa ita Ngai wa Isiraeli nĩ ũguũrĩirie ndungata yaku ũkamĩra atĩrĩ, ‘Nĩ ngũgwakĩra nyũmba.’*+ Nĩkĩo ndungata yaku ĩrĩ na ũmĩrĩru wa* gũkũhoya ihoya rĩrĩ. 28 Na rĩu, wee Jehova Mwathani Ũrĩa Mũnene, wee nĩwe Ngai ũrĩa wa ma, na ciugo ciaku nĩ cia ma,+ na nĩ wĩrĩire ndungata yaku maũndũ macio mega. 29 Kwoguo ũrokenio nĩ kũrathima nyũmba ya ndungata yaku, na ĩrotũũra tene na tene mbere yaku;+ nĩ gũkorũo wee Jehova Mwathani Ũrĩa Mũnene, nĩ wĩranĩire, na nyũmba ya ndungata yaku ĩrorathimwo na kĩrathimo gĩaku tene na tene.”+