Ũhoro Mwega Ũrĩa Waandĩkirũo nĩ Mathayo

23 Jesu agĩcoka akĩarĩria kĩrĩndĩ hamwe na arutwo ake, akiuga ũũ: 2 “Andĩki-watho na Afarisai nĩ maikarĩire gĩtĩ kĩa Musa. 3 Kwoguo, maũndũ marĩa mothe mamwĩraga-rĩ, mekagei na mũmarũmagie, no mũtikegerekanagie na ciĩko ciao, tondũ no kuuga moigaga no matiĩkaga ũrĩa moigaga.+ 4 Mohaga mĩrigo mĩritũ na makamĩigĩrĩra ciande-inĩ cia andũ,+ ĩndĩ o ene matiendaga o na kũmĩhutia na kaara kao.+ 5 Maũndũ marĩa mothe mekaga, mekaga nĩguo monwo nĩ andũ,+ tondũ maramagia tũthandũkũ twa maandĩko* tũrĩa mehumbaga tũrĩ ithitũ+ na makaraihia icũrĩ cia nguo ciao.+ 6 Mendete gũikara handũ harĩa hatĩĩku makĩria maruga-inĩ ma hwaĩ-inĩ na gũikarĩra itĩ cia mbere* thunagogi-inĩ+ 7 na kũgeithio nĩ andũ thoko-inĩ na gwĩtwo Rabii* nĩ andũ. 8 No inyuĩ mũtigetagwo Rabii, tondũ Mũrutani wanyu nĩ ũmwe,+ na inyuothe mũrĩ ariũ a Ithe ũmwe. 9 Ningĩ mũtikanete mũndũ o na ũmwe ithe wanyu gũkũ thĩ, nĩ gũkorũo Ithe wanyu nĩ ũmwe,+ Ũrĩa ũrĩ igũrũ. 10 O na mũtikanetwo atongoria, nĩ gũkorũo Mũtongoria wanyu nĩ ũmwe, nĩwe Kristo. 11 No ũrĩa mũnene gatagatĩ-inĩ kanyu no mũhaka atuĩke ndungata yanyu.+ 12 Mũndũ ũrĩa wothe wĩtũũgagĩria nĩ akaanyihio,+ na ũrĩa wothe wĩnyihagia nĩ agaatũũgĩrio.+

13 “Kaĩ mũrĩ na haaro-ĩ, inyuĩ andĩki-watho na Afarisai, hinga ici! tondũ mũhingagĩrĩria andũ Ũthamaki wa igũrũ; nĩ gũkorũo inyuĩ mũtingĩraga, na o na mũtirekaga arĩa marenda kũingĩra maingĩre.+ 14 *——

15 “Kaĩ mũrĩ na haaro-ĩ, inyuĩ andĩki-watho na Afarisai, hinga ici!+ tondũ mũtuĩkanagia iria na thĩ nyũmũ nĩguo mũgarũre mũndũ atuĩke Mũyahudi, na rĩrĩa agarũrũka, mũgatũma agĩrĩre Jehanamu* maita merĩ kũmũkĩra inyuĩ.

16 “Kaĩ mũrĩ na haaro-ĩ, inyuĩ atongoria atumumu,+ tondũ muugaga, ‘Mũndũ o wothe angĩĩhĩta na hekarũ, ũcio ti ũndũ; no mũndũ o wothe angĩĩhĩta na thahabu ya hekarũ, no mũhaka ahingie mwĩhĩtwa ũcio.’+ 17 Inyuĩ irimũ na itumumu ici! Nĩ kĩĩ kĩa bata makĩria, nĩ thahabu kana nĩ hekarũ ĩrĩa ĩtũmaga thahabu ĩyo ĩkorũo ĩrĩ theru? 18 Ningĩ muugaga, ‘Mũndũ o wothe angĩĩhĩta na kĩgongona, ũcio ti ũndũ, no mũndũ o wothe angĩĩhĩta na kĩheo kĩrĩ kĩgongona-inĩ, no mũhaka ahingie mwĩhĩtwa ũcio.’ 19 Inyuĩ itumumu ici! Nĩ kĩĩ kĩa bata makĩria, nĩ kĩheo kana nĩ kĩgongona kĩrĩa gĩtũmaga kĩheo kĩu gĩkorũo kĩrĩ gĩtheru? 20 Gũkĩrĩ ũguo-rĩ, mũndũ o wothe wĩhĩtaga na kĩgongona akoragwo akĩĩhĩta nakĩo hamwe na kĩrĩa gĩothe kĩrĩ kĩgongona-inĩ kĩu, 21 nake mũndũ o wothe wĩhĩtaga na hekarũ akoragwo akĩĩhĩta nayo hamwe na Ũrĩa ũikaraga thĩinĩ wayo;+ 22 na mũndũ o wothe wĩhĩtaga na igũrũ akoragwo akĩĩhĩta na gĩtĩ kĩa ũnene kĩa Ngai na akehĩta na Ũrĩa ũgĩikarĩire.

23 “Kaĩ mũrĩ na haaro-ĩ, inyuĩ andĩki-watho na Afarisai, hinga ici! tondũ mũrutaga gĩcunjĩ gĩa ikũmi gĩa terere na kĩa bitharĩ na gĩa kumini,*+ no mũtitindanagĩra na maũndũ marĩa ma bata ma Watho, nĩmo kĩhooto+ na tha+ na wĩhokeku. Maũndũ macio maarĩ ma bata kũhingia, mũtegũtiganĩria maũndũ macio mangĩ.+ 24 Inyuĩ atongoria atumumu,+ mũcungaga rwagĩ+ no mũkameria ngamĩra!+

25 “Kaĩ mũrĩ na haaro-ĩ, inyuĩ andĩki-watho na Afarisai, hinga ici! tondũ mũthambagia gĩkombe na mbakũri mwena wa na igũrũ,+ no na thĩinĩ ciyũrĩtwo nĩ ũkoroku+ na kwaga kwĩgirĩrĩria.+ 26 Wee Mũfarisai gĩtumumu, amba ũthambie gĩkombe na mbakũri mwena wa thĩinĩ, nĩgetha o na mwena wa igũrũ ũkorũo ũrĩ mũtheru.

27 “Kaĩ mũrĩ na haaro-ĩ, inyuĩ andĩki-watho na Afarisai, hinga ici!+ tondũ mũtariĩ ta mbĩrĩra ihakĩtwo rangi mwerũ,+ iria cionekaga irĩ thaka mwena wa igũrũ no thĩinĩ ciyũire mahĩndĩ ma andũ akuũ na gĩko kĩa mĩthemba yothe. 28 No taguo inyuĩ muonekaga nĩ andũ mũrĩ athingu na nja, no thĩinĩ mũiyũire ũhinga na uuni-watho.+

29 “Kaĩ mũrĩ na haaro-ĩ, inyuĩ andĩki-watho na Afarisai, hinga ici!+ tondũ mwakaga mbĩrĩra cia anabii na mũkagemia mbĩrĩra* cia andũ arĩa athingu,+ 30 na muugaga atĩrĩ, ‘Korũo twatũũraga matukũ-inĩ ma maithe maitũ ma tene, tũtingĩanyitanĩire nao gũita thakame ya anabii.’ 31 Nĩ ũndũ ũcio, mwĩyumbũraga atĩ mũrĩ ariũ a andũ arĩa mooragire anabii.+ 32 Gũkĩrĩ ũguo-rĩ, kĩiyũrĩrĩriei gĩthimi kĩa maithe manyu ma tene.

33 “Inyuĩ rũciaro rwa nyoka irĩ thumu,+ mũkoorĩra atĩa ituĩro rĩa gũikio Jehanamu?*+ 34 Nĩ ũndũ ũcio, nĩ ngũmũtũmĩra anabii+ na andũ ogĩ na arutani a andũ.+ Na nĩ mũkooraga amwe ao+ na mũmacuurie mĩtĩ-inĩ, mũhũũre amwe ao iboko+ thunagogi-inĩ cianyu na mũmanyarire+ kuuma itũũra rĩmwe nginya rĩrĩa rĩngĩ, 35 nĩguo mũcokererũo nĩ thakame ĩrĩa yanaitwo thĩinĩ wa thĩ ya arĩa othe athingu, kuuma thakame ya Habili ũrĩa warĩ mũthingu+ nginya thakame ya Zekaria mũrũ wa Barakia, ũrĩa muoragĩire gatagatĩ ka handũ harĩa hatheru na kĩgongona.+ 36 Ngũmwĩra atĩrĩ na ma, maũndũ macio mothe nĩ magaakora rũciaro rũrũ.

37 “Jerusalemu, Jerusalemu, wee ũũragaga anabii na ũkahũũra na mahiga arĩa matũmagwo kũrĩ wee+—nĩ maita maigana ndanenda gũcokanĩrĩria ciana ciaku o ta ũrĩa ngũkũ ĩcokanagĩrĩria tũcui twayo rungu rwa mathagu mayo! No wee ndũigana kwenda ũndũ ũcio.+ 38 Atĩrĩrĩ, nyũmba yanyu nĩ ĩtiganĩirio.*+ 39 Tondũ ngũmwĩra atĩrĩ, mũtikanyona rĩngĩ nginyagia rĩrĩa mũkoiga, ‘Kũrathimwo nĩ ũrĩa ũroka na rĩĩtwa rĩa Jehova!’”*+