Ũhoro Mwega Ũrĩa Waandĩkirũo nĩ Mathayo
3 Na rĩrĩ, matukũ-inĩ macio Johana+ Mũbatithania nĩ ookire na akĩambĩrĩria kũhunjia+ werũ-inĩ wa Judea, 2 akiugaga ũũ: “Mwĩrirei, tondũ Ũthamaki wa igũrũ nĩ ũkuhĩrĩirie.”+ 3 Ũcio nĩwe warĩtio ũhoro wake nĩ mũnabii Isaia+ na ciugo ici: “Harĩ mũgambo wa mũndũ ũranĩrĩra werũ-inĩ ũkoiga: ‘Haarĩriai njĩra ya Jehova!* Rũngai barabara ciake.’”+ 4 Na rĩrĩ, Johana eehumbaga nguo cia guoya wa ngamĩra na akeyoha mũcibi wa rũũa njohero.+ Irio ciake ciarĩ ngigĩ na ũũkĩ wa gĩthaka.+ 5 Nao andũ a Jerusalemu na Judea yothe na bũrũri wothe ũrĩa wathiũrũrũkĩirie Jorodani nĩ maathiaga kũrĩ we,+ 6 na makabatithio* nĩwe Rũũĩ-inĩ rwa Jorodani,+ makiumbũraga mehia mao matekũhithĩrĩra.
7 Rĩrĩa oonire Afarisai na Asadukai+ aingĩ magĩũka harĩa aabatithanagĩria, akĩmoria atĩrĩ: “Inyuĩ rũciaro rwa nyoka irĩ thumu,+ nũũ ũmwĩrĩte atĩ no mũũrĩre marakara marĩa maroka?+ 8 Nĩ ũndũ ũcio, ciarai maciaro maronania nĩ mwĩrirĩte. 9 Mũtikeĩre atĩrĩ, ‘Ithe witũ nĩ Iburahimu.’+ Tondũ ngũmwĩra atĩ Ngai no ahote gũtũma Iburahimu agĩe na ciana kuuma mahiga-inĩ maya. 10 Ithanwa nĩ rĩigĩtwo gĩtina-inĩ kĩa mĩtĩ. Kwoguo mũtĩ ũrĩa wothe ũtaciaraga maciaro mega nĩ ũgũtemwo na ũikio mwaki-inĩ.+ 11 Niĩ ndĩmũbatithagia na maĩ nĩ ũndũ wa kwĩrira kwanyu,+ no ũrĩa ũroka thutha wakwa arĩ na hinya kũngĩra, nacio iratũ ciake ndirĩ mwagĩrĩru wa gũciruta.+ Ũcio akaamũbatithagia na roho mũtheru+ na mwaki.+ 12 Gĩcakũri gĩake gĩa kũhuuha kĩrĩ guoko-inĩ gwake, na nĩ egũtheria kĩhuuhĩro gĩake biũ na acokanĩrĩrie ngano yake thĩinĩ wa ikũmbĩ, no mahuti nĩ gũcina ekũmacina na mwaki+ ũrĩa ũtangĩhoreka.”
13 Nake Jesu akiuma Galili agĩthiĩ kũrĩ Johana Rũũĩ-inĩ rwa Jorodani nĩguo abatithio nĩwe.+ 14 No Johana akĩgeria kũmũgiria, akĩmũũria atĩrĩ: “Niĩ nĩ niĩ ndĩrabatara kũbatithio nĩwe, wagĩũka kũrĩ niĩ atĩa?” 15 Jesu akĩmũcokeria akĩmwĩra: “Reke gũtuĩke guo rĩu, tondũ na njĩra ĩyo nĩ kwagĩrĩire tũhingie maũndũ mothe ma ũthingu.” Nake agĩtiga kũmũgiria. 16 Thutha wa Jesu kũbatithio, akiumĩra maĩ-inĩ o rĩmwe; na rĩrĩ, igũrũ rĩkĩhingũka,+ akĩona roho wa Ngai ũgĩikũrũka ũhaana ta ndutura ũgĩũka igũrũ rĩake.+ 17 Na rĩrĩ, mũgambo ũkiuma igũrũ+ ũkiuga atĩrĩ: “Ũyũ nĩ Mũrũ wakwa,+ ũrĩa nyendete, na nĩ ndĩmwĩtĩkĩrĩte.”+