Jesu Nĩ Mũrũ Wa Ngai

Thutha wa Ayahudi amwe gũthitanga Jesu atĩ nĩ oinĩte watho wa Thabatũ nĩ ũndũ wa kũhonia mũndũ, Jesu akameera: “Awa atũire arutaga wĩra o nginya rĩu, o na niĩ ndũire ndutaga wĩra.”​—Johana 5:17.

Ũndũ ũrĩa Jesu areka ndũgirĩtio nĩ watho wa Ngai wĩgiĩ Thabatũ. Arahunjia na akahonania akĩĩgerekania na maũndũ mega marĩa Ngai ekaga. Nĩ ũndũ ũcio Jesu agathiĩ na mbere gwĩka wega o mũthenya. O na kũrĩ ũguo, arĩa maramũthitanga makarakario makĩria nĩ icokio rĩake nginya magacaria ũrĩa mangĩmũũraga. Nĩ kĩĩ kĩratũma marakare ũguo?

Hamwe na gũkorũo na mawoni matagĩrĩire atĩ Jesu nĩ aroina watho wa Thabatũ nĩ ũndũ wa kũhonania, mararakara makĩria nĩ ũndũ wake kuuga atĩ we nĩ Mũrũ wa Ngai. Marona ta arĩ kwagĩra Ngai gĩtĩo Jesu kuuga atĩ Ngai nĩ Ithe, makona ta kuuga ũguo arĩ kuonania atĩ nĩ aiganaine na Jehova. No Jesu ndaretigĩra, na agathiĩ na mbere kũmataarĩria ũkuruhanu wa mwanya ũrĩa arĩ naguo hamwe na Ngai. Akoiga: “Ithe nĩ endete Mũriũ na nĩ amuonagia maũndũ marĩa mothe we mwene ekaga.”​—Johana 5:20.

Ithe nĩwe Mũheani-Muoyo, na nĩ onanĩtie ũguo mahinda mahĩtũku na njĩra ya kũhe andũ ũhoti wa kũriũkania. Jesu agathiĩ na mbere kuuga: “O ta ũrĩa Ithe ariũkagia arĩa akuũ akamacokia muoyo, noguo Mũriũ o nake acokagia muoyo mũndũ o wothe ũrĩa endaga.” (Johana 5:21) Githĩ icio ti ciugo njega ironania kĩĩrĩgĩrĩro kĩa ihinda rĩũkĩte? O na mahinda maya Mũriũ nĩ arariũkia arĩa makuĩte na njĩra ya kĩĩroho. Nĩkĩo arongerera ũũ: “Mũndũ o wothe ũiguaga ciugo ciakwa na agetĩkia Ũrĩa wandũmire arĩ na muoyo wa tene na tene, na ndagaatuĩrũo no nĩ oimĩte gĩkuũ-inĩ agatonya muoyo-inĩ.”​—Johana 5:24.

Gũkinyĩria ihinda rĩrĩ Jesu araria na arĩa maramũthitanga, gũtiiguĩkĩte atĩ harĩ mũndũ Jesu ariũkĩtie, no nĩ arameera atĩ harĩ hĩndĩ ũndũ ũcio ũgeekĩka. Akoiga: “Ihinda nĩ rĩroka, rĩrĩa arĩa othe marĩ thĩinĩ wa mbĩrĩra makaigua mũgambo wake na moime kuo.”​—Johana 5:​28, 29.

O na gũtuĩka itemi rĩa Jesu nĩ rĩa mwanya, aronania wega atĩ Ngai nĩ mũnene kũmũkĩra, akoiga: “Ndingĩka ũndũ o na ũmwe ndĩĩrĩte niĩ mwene. . . . Ndiĩkaga wendi wakwa, no njĩkaga wendi wa ũrĩa wandũmire.” (Johana 5:30) Ĩndĩ, Jesu arataarĩria itemi rĩake rĩa bata harĩ muoroto wa Ngai, ũndũ ũrĩa gũkinyĩria ihinda rĩrĩ atarĩ araguũrĩria andũ. No maũndũ marĩa Jesu aroiga mamwĩgiĩ to mo mangĩteithia arĩa maramũthitanga kũmenya we nĩwe ũ na maũndũ marĩa angĩgeeka. Aramaririkania akameera, “Inyuĩ nĩ mũtũmĩte andũ kũrĩ Johana [Mũbatithania], na akaruta ũira igũrũ rĩgiĩ ma.”​—Johana 5:33.

No kũhoteke andũ acio nĩ maiguĩte atĩ mĩaka ta ĩĩrĩ mĩhĩtũku, Johana nĩ eerĩte atongoria a ndini Ayahudi ũhoro wĩgiĩ Ũrĩa ũngĩgooka thutha wake, ũrĩa wetirũo “Mũnabii” na “Kristo.” (Johana 1:20-25) Jesu akaririkania acio maramũthitanga ũrĩa hingo ĩmwe maatĩĩte Johana ũrĩa rĩu wĩ njera, akameera: “Kwa ihinda inyinyi nĩ mweriragĩria gũkenera mũno ũtheri wake.” (Johana 5:35) Ĩndĩ Jesu araheana ũira mũnene makĩria gũkĩra Johana Mũbatithania.

Jesu akoiga: “Mawĩra marĩa . . . ndĩraruta [nginya kũhonania kũrĩa arĩkia kũhonania], nĩ marutaga ũira atĩ ndũmĩtwo nĩ Awa.” Makĩria ma ũguo, agathiĩ na mbere kuuga: “Na Awa ũcio wandũmire nĩ arutĩte ũira igũrũ rĩakwa.” (Johana 5:​36, 37) Kwa ngerekano, Ngai nĩ aarutire ũira wĩgiĩ Jesu rĩrĩa aabatithagio.​—Mathayo 3:17.

Kwoguo, acio marathitanga Jesu matirĩ na gĩtũmi gĩa kũmũũkĩrĩra. Maandĩko marĩa maroiga atĩ nĩ mathuthuragia o namo nĩ maraheana ũira ũmwĩgiĩ. Nĩkĩo Jesu ararĩkĩrĩria na kũmeera: “Korũo nĩ mwĩtĩkĩtie Musa, o na niĩ mwanjĩtĩkia, nĩ gũkorũo nĩ aandĩkire ũhoro wakwa. No angĩkorũo mũtiĩtĩkĩtie ũhoro ũrĩa aandĩkire-rĩ, mũngĩgĩtĩkia atĩa ũrĩa njugaga?”​—Johana 5:​46, 47.