Ũhoro Mwega Ũrĩa Waandĩkirũo nĩ Johana
15 “Nĩ niĩ mũthabibũ ũrĩa wa ma, nake Awa nĩwe mũrĩmi. 2 Rũhonge o ruothe rũrĩa rũtagĩaga na maciaro thĩinĩ wakwa nĩ kũrũtema arũtemaga, na agatheria* rũrĩa ruothe rũgĩaga na maciaro nĩguo rũgĩe na maciaro maingĩ makĩria.+ 3 Inyuĩ nĩ mũrĩkĩtie gũthera nĩ ũndũ wa kiugo kĩrĩa ndĩmwĩrĩte.+ 4 Tũũrai mũrĩ na ũiguano na niĩ, na niĩ nĩ ngũtũũra ndĩ na ũiguano na inyuĩ. O ta ũrĩa rũhonge rũtangĩgĩa na maciaro rũrĩ rwiki o tiga rũtũũrire mũthabibũ-inĩ, o na inyuĩ mũtingĩgĩa namo o tiga mũtũũrire mũrĩ na ũiguano na niĩ.+ 5 Nĩ niĩ mũthabibũ; inyuĩ mũrĩ honge. Mũndũ o wothe ũtũũraga arĩ na ũiguano na niĩ, na niĩ ndĩ na ũiguano nake, ũcio nĩ agĩaga na maciaro maingĩ;+ tondũ itarĩ ho gũtirĩ ũndũ o na ũmwe mũngĩhota gwĩka. 6 Mũndũ o wothe angĩaga gũtũũra arĩ na ũiguano na niĩ, ateagwo o ta rũhonge na akooma. Nao andũ makongania honge icio magacikia mwaki-inĩ, ikahĩa. 7 Mũngĩtũũra mũrĩ na ũiguano na niĩ na uuge wakwa ũtũũre thĩinĩ wanyu, mwahoya ũndũ o wothe nĩ mũrĩhingagĩrio.+ 8 Ũndũ ũrĩa ũngĩgoocithia Awa nĩ ũyũ, atĩ mũgĩage na maciaro maingĩ, mũkonanagia atĩ mũrĩ arutwo akwa.+ 9 O ta ũrĩa Awa anyendete,+ noguo ndĩmwendete inyuĩ; tũũrai wendo-inĩ wakwa. 10 Mũngĩathĩkagĩra maathani makwa, mũgũtũũra wendo-inĩ wakwa, o ta ũrĩa njathĩkagĩra maathani ma Awa ngatũũra wendo-inĩ wake.
11 “Ndamwĩra maũndũ macio, nĩguo gĩkeno gĩakwa gĩkorũo thĩinĩ wanyu nakĩo gĩkeno kĩanyu gĩkinyanĩre.+ 12 Rĩrĩ nĩrĩo rĩathani rĩakwa, atĩ mwendanage inyuĩ ene o ta ũrĩa niĩ ndĩmwendete.+ 13 Gũtirĩ mũndũ ũrĩ wendo ũkĩrĩte ũyũ, atĩ mũndũ arute muoyo* wake nĩ ũndũ wa arata ake.+ 14 Mũrĩ arata akwa mũngĩka maũndũ marĩa ndĩramwatha.+ 15 Rĩu inyuĩ ndimwĩtaga ngombo, nĩ ũndũ ngombo ndĩmenyaga ũrĩa mwathi wayo ekaga. No ndĩmwĩtĩte arata, tondũ nĩ ndĩmũmenyithĩtie maũndũ mothe marĩa njiguĩte kuuma kũrĩ Awa. 16 Ti inyuĩ mwathuurire, ĩndĩ nĩ niĩ ndamũthuurire, na ngĩmwamũra nĩguo mũthiĩ na mũgĩage na maciaro, namo maciaro manyu matũũre, nĩguo ũndũ o wothe mũrĩhoyaga Awa na rĩĩtwa rĩakwa, akamũhe.+
17 “Ndĩramwatha maũndũ maya, atĩ mwendanage inyuĩ ene.+ 18 Thĩ ĩngĩmũthũũra-rĩ, nĩ mũĩ atĩ yambĩte ĩgaathũũra niĩ mbere ya kũmũthũũra.+ 19 Mũngĩrĩ a thĩ ĩno, thĩ nĩ ĩngĩmwendete tondũ mũrĩ ayo. No rĩu tondũ mũtirĩ a thĩ ĩno,+ ĩndĩ nĩ kũmũthuura ndĩmũthuurĩte kuuma harĩ thĩ, nĩkĩo thĩ ĩmũthũire.+ 20 Ririkanai kiugo kĩrĩa ndamwĩrire: Ngombo ti nene gũkĩra mwathi wayo. Angĩkorũo nĩ manyarirĩte niĩ, nĩ makaamũnyarira o na inyuĩ;+ angĩkorũo nĩ mathĩkĩire kiugo gĩakwa, nĩ magaathĩkĩra kĩanyu o nakĩo. 21 No makaamwĩka maũndũ macio mothe moru nĩ ũndũ wa rĩĩtwa rĩakwa, tondũ matiũĩ Ũrĩa wandũmire.+ 22 Korũo ndiokire na ngĩmaarĩria, matingĩrĩ na mehia.+ No rĩu matingĩona kĩĩgwatio kĩa mehia mao.+ 23 Mũndũ o wothe ũũthũire nĩ athũire Awa o nake.+ 24 Korũo ndiekire maũndũ marĩa matarĩ mekwo nĩ mũndũ ũngĩ gatagatĩ-inĩ kao, matingĩrĩ na mehia;+ no rĩu nĩ manyonete na magaathũũra o ũndũ ũmwe na Awa. 25 No gwĩkĩkĩte ũguo nĩguo kiugo kĩrĩa kĩandĩkĩtwo Watho-inĩ wao kĩhinge: ‘Niĩ-rĩ, mathũire hatarĩ gĩtũmi.’+ 26 Rĩrĩa mũteithia ũrĩa ngaamũtũmĩra kuuma kũrĩ Awa agooka, roho wa ũhoro ũrĩa wa ma,+ ũrĩa uumaga kũrĩ Awa, ũcio nĩ ũkaaruta ũira igũrũ rĩakwa;+ 27 o na inyuĩ, nĩ mũkaaruta ũira,+ tondũ mũkoretwo hamwe na niĩ kuuma o kĩambĩrĩria.