Ũhoro Mwega Ũrĩa Waandĩkirũo nĩ Johana
16 “Ndamwĩra maũndũ macio nĩguo mũtikae kũhĩngĩka. 2 Andũ nĩ makaamũingata thunagogi-inĩ.+ Na rĩrĩ, hĩndĩ nĩ ĩroka rĩrĩa mũndũ o wothe ũkaamũũraga inyuĩ+ ageeciragia atĩ arutĩra Ngai ũtungata mũtheru. 3 No mageeka maũndũ macio tondũ matiũĩ Awa na o na niĩ matinjũĩ.+ 4 O na kũrĩ ũguo, ndamwĩra maũndũ macio nĩguo hĩndĩ yamo ya gwĩkĩka yakinya, mũkaaririkana atĩ nĩ ndamwĩrĩte.+
“Ndiamwĩrire maũndũ macio kĩambĩrĩria-inĩ, tondũ ndarĩ hamwe na inyuĩ. 5 No rĩu ndĩrathiĩ kũrĩ Ũrĩa wandũmire;+ ĩndĩ gũtirĩ o na ũmwe wanyu ũranjũria, ‘Ũrathiĩ kũ?’ 6 No tondũ nĩ ndamwĩra maũndũ macio, nĩ mwaiyũrũo nĩ kĩeha ngoro-inĩ cianyu.+ 7 O na kũrĩ ũguo, ndĩramwĩra ma, ndĩrathiĩ nĩguo inyuĩ mũgunĩke. Nĩ gũkorũo ingĩaga gũthiĩ, mũteithia+ ndangĩũka kũrĩ inyuĩ; no ndathiĩ, nĩ ngũmũtũmĩra mũteithia. 8 Na rĩrĩa ũcio agooka, nĩ akaaruta ũira mũiganu harĩ thĩ wĩgiĩ mehia na wĩgiĩ ũthingu na wĩgiĩ ituĩro: 9 ambe arute ũira wĩgiĩ mehia+ tondũ mationanagia wĩtĩkio harĩ niĩ;+ 10 acoke arute ũira wĩgiĩ ũthingu, tondũ ndĩrathiĩ kũrĩ Awa na mũtigũcoka kũnyona rĩngĩ; 11 ningĩ wĩgiĩ ituĩro, tondũ mũnene wa thĩ ĩno nĩ arĩkĩtie gũtuĩrũo.+
12 “Ndĩ na maũndũ mangĩ maingĩ ma kũmwĩra, ĩndĩ mũtingĩhota kũmetiiria rĩu. 13 O na kũrĩ ũguo, rĩrĩa ũcio* agooka, roho wa ũhoro ũrĩa wa ma,+ nĩ akaamũtongoria harĩ ũhoro ũrĩa wa ma wothe, nĩ gũkorũo ndakaaragia maũndũ make mwene, ĩndĩ akaaragia maũndũ marĩa aiguaga, na nĩ akaamũmenyithia maũndũ marĩa maroka.+ 14 Ũcio nĩ akaangoocithia,+ tondũ akaamũkĩra kĩrĩa kĩrĩ gĩakwa na amũmenyithie ũhoro wakĩo.+ 15 Indo ciothe iria Awa arĩ nacio nĩ ciakwa.+ Nĩkĩo ndoiga ũcio amũkagĩra kĩrĩa kĩrĩ gĩakwa na akamũmenyithia. 16 Thutha wa kahinda kanini mũtikũnyona rĩngĩ,+ ningĩ thutha wa kahinda kanini nĩ mũrĩcoka mũnyone.”
17 Oiga ũguo arutwo ake amwe makĩũrania atĩrĩ: “Arenda kuuga atĩa rĩrĩa aratwĩra, ‘Thutha wa kahinda kanini mũtikũnyona rĩngĩ, ningĩ thutha wa kahinda kanini nĩ mũrĩcoka mũnyone,’ na, ‘tondũ ndĩrathiĩ kũrĩ Awa’?” 18 Nao mooranagia: “Arenda kuuga atĩa akiuga, ‘kahinda kanini’? Tũtiũĩ araria ũhoro wa ũndũ ũrĩkũ.” 19 Jesu akĩmenya atĩ nĩ meendaga kũmũũria ciũria, nĩ ũndũ ũcio akĩmoria atĩrĩ: “Mũrorania ũguo tondũ nĩ ndoiga, ‘Thutha wa kahinda kanini mũtikũnyona rĩngĩ, ningĩ thutha wa kahinda kanini nĩ mũrĩcoka mũnyone’? 20 Ngũmwĩra atĩrĩ o ma o ma, nĩ mũkaarĩra na mũcakae, no thĩ nĩ ĩgaakena; mũkaagĩa na kĩeha, ĩndĩ kĩeha kĩanyu gĩgaatuo gĩkeno.+ 21 Mũtumia agĩciara mwana, akoragwo na kĩeha tondũ ihinda rĩake nĩ rĩakinya, no arĩkia gũciara mwana, ndacokaga kũririkana thĩna ũcio rĩngĩ nĩ ũndũ wa gĩkeno kĩa atĩ nĩ gwaciarũo mũndũ thĩinĩ wa thĩ. 22 Na njĩra o ta ĩyo, rĩu inyuĩ mũrĩ na kĩeha; no nĩ ngaamuona rĩngĩ, nacio ngoro cianyu icanjamũke,+ na gũtirĩ mũndũ ũkeeheria gĩkeno kĩanyu. 23 Mũthenya ũcio gũtirĩ kĩũria mũkaanjũria. Ngũmwĩra atĩrĩ o ma o ma, ũndũ ũrĩa wothe mũrĩhoyaga Awa,+ nĩ arĩmũhingagĩria na rĩĩtwa rĩakwa.+ 24 Gũkinyĩria rĩu gũtirĩ ũndũ o na ũmwe mũhoete na rĩĩtwa rĩakwa. Hoyai na nĩ mũkũheo, nĩguo gĩkeno kĩanyu gĩkinyanĩre.
25 “Ndamwĩra maũndũ macio na njĩra ya ngerekano. Hĩndĩ nĩ ĩroka rĩrĩa itakamwaragĩria na ngerekano, no ngaamwĩraga cara-rũkũ ũhoro wĩgiĩ Awa. 26 Mũthenya ũcio nĩ mũkaahoya Awa thĩinĩ wa rĩĩtwa rĩakwa; ngĩmwĩra ũguo, ndirenda kuuga atĩ nĩ ndĩrĩmũhoyagĩra. 27 Nĩ gũkorũo Awa we mwene nĩ amwendete,+ tondũ nĩ mũkoretwo mũnyendete na mũgetĩkia atĩ ndatũmirũo nĩ Ngai.+ 28 Ndokire gũkũ thĩ ndũmĩtwo nĩ Awa. Rĩu nĩ kuuma ndĩroima thĩ ĩno na ndathiĩ kũrĩ Awa.”+
29 Arutwo ake makiuga: “Rĩu ũraria cara-rũkũ ũtekũhũthĩra ngerekano. 30 Rĩu nĩ tũĩ atĩ wee nĩ ũĩ maũndũ mothe na atĩ ndũrabatara kũũrio ciũria nĩ mũndũ o na ũrĩkũ. Nĩ ũndũ ũcio nĩ twĩtĩkĩtie atĩ woimire kwĩ Ngai.” 31 Nake Jesu akĩmacokeria: “Nĩ mũretĩkia rĩu? 32 Atĩrĩrĩ, ihinda nĩ rĩroka, na nĩ ikinyu, rĩrĩa inyuothe mũkũhurunjũka o mũndũ acoke gwake mũciĩ na nĩ mũkũndiganĩria. No ndirĩ nyiki,+ Awa arĩ hamwe na niĩ.+ 33 Ndamwĩra maũndũ macio nĩguo kũgerera harĩ niĩ mũgĩe na thayũ.+ Nĩ mũrĩkoragwo na thĩna thĩinĩ wa thĩ, no gĩai na ũmĩrĩru. Niĩ nĩ ndooretie thĩ.”+