Maũndũ Marĩa Meekirũo nĩ Atũmwo

3 Na rĩrĩ, Petero na Johana maambataga hekarũ-inĩ nĩ gũkorũo kwarĩ ithaa rĩa mahoya, ta thaa kenda cia mũthenya, 2 na mũndũ ũmwe waciarĩtwo arĩ muonju magũrũ nĩ gũkuuo aakuuĩtwo. O mũthenya andũ acio maamũigaga hakuhĩ na kĩhingo kĩa hekarũ kĩrĩa gĩetagwo Kĩhingo Gĩthaka, nĩguo ahoe iheo cia tha kuuma kũrĩ andũ arĩa maatonyaga hekarũ-inĩ. 3 Rĩrĩa oonire Petero na Johana makĩenda gũtonya thĩinĩ wa hekarũ, akĩambĩrĩria kũhoya iheo cia tha. 4 No Petero na Johana makĩmũrora makĩmwĩra atĩrĩ: “Ta tũrore.” 5 Nĩ ũndũ ũcio akĩmarora, atanyĩte kũheo kĩndũ nĩo. 6 O na kũrĩ ũguo, Petero akĩmwĩra: “Niĩ ndirĩ na betha kana thahabu, no kĩrĩa ndĩ nakĩo nĩkĩo ngũkũhe. Thĩinĩ wa rĩĩtwa rĩa Jesu Kristo ũrĩa Mũnazarethi, rũgama wĩtware!”+ 7 Oiga ũguo akĩmũnyita guoko kwa ũrĩo akĩmũũkĩria.+ Na hĩndĩ o ĩyo makinya na thũngʼwa ciake ikĩgĩa na hinya;+ 8 akĩrũgama o rĩmwe na magũrũ make,+ akĩambĩrĩria gwĩtwara na agĩthiĩ hamwe nao hekarũ-inĩ, agĩthiĩ akĩrũgarũgaga na akĩgoocaga Ngai. 9 Na andũ othe makĩmuona agĩĩtwara akĩgoocaga Ngai. 10 Nao makĩmũmenya, atĩ nĩwe ũraikaraga thĩ akĩhoyaga iheo cia tha kĩhingo-inĩ kĩu gĩetagwo Kĩhingo Gĩthaka kĩa hekarũ,+ makĩgega na magĩkenio mũno nĩ ũndũ ũcio wekĩkĩte harĩ we.

11 Na rĩrĩ, mũndũ ũcio o anyitĩte Petero na Johana-rĩ, andũ othe magĩtengʼera harĩ o, harĩa heetagwo Gĩthaku gĩa Suleimani,+ magegete mũno. 12 Rĩrĩa Petero oonire ũguo, akĩũria andũ acio atĩrĩ: “Andũ aya a Isiraeli, nĩ kĩĩ gĩatũma mũmakio mũno nĩ ũndũ ũyũ, ningĩ mũratũrora mũgegete nĩkĩ ta arĩ hinya witũ kana wĩrutĩri witũ harĩ Ngai watũhotithia gũtũma mũndũ ũyũ etware? 13 Ngai wa Iburahimu, na wa Isaaka na wa Jakubu,+ Ngai wa maithe maitũ ma tene, nĩ atũũgĩrĩtie Ndungata yake+ Jesu,+ ũrĩa mwaneanire+ na mũkĩmũkaana mũrĩ mbere ya Pilato, o na gũtuĩka Pilato nĩ aatuĩte atĩ nĩ ekũmuohora. 14 Mũgĩkaana mũndũ ũcio mũtheru na mũthingu, mũkiuga muohorerũo mũndũ warĩ mũũragani,+ 15 ĩndĩ mũkĩũraga Mũtongoria Ũrĩa Mũnene wa muoyo.+ No Ngai akĩmũriũkia kuuma kũrĩ arĩa akuũ, na ithuĩ tũrĩ aira a ũndũ ũcio.+ 16 Na kũgerera rĩĩtwa rĩake, na wĩtĩkio witũ harĩ rĩĩtwa rĩake, mũndũ ũyũ mũrona na nĩ mũmũĩ nĩ agĩa na hinya. Wĩtĩkio witũ harĩ we nĩguo watũma mũndũ ũyũ agĩe na ũgima mwega wa mwĩrĩ inyuothe mũkĩĩyonagĩra. 17 Na rĩrĩ, ariũ a baba, nĩ njũĩ atĩ mwekire ũguo nĩ kũrigwo,+ o ta ũrĩa atongoria anyu meekire.+ 18 No na njĩra ĩyo Ngai nĩ ahingĩtie maũndũ marĩa aamenyithanirie o mbere kũgerera harĩ anabii othe, atĩ Kristo wake nĩ angĩkanyarirĩka.+

19 “Nĩ ũndũ ũcio-rĩ, mwĩrirei,+ na mũgarũrũke+ nĩguo mehia manyu marihũrũo,+ nĩguo hagĩe na mahinda ma gũcanjamũra moimĩte kũrĩ Jehova we mwene* 20 na amũtũmĩre Kristo ũrĩa aamũrĩte nĩ ũndũ wanyu, na nĩwe Jesu. 21 Igũrũ no mũhaka rĩikare nake thĩinĩ warĩo nginya ihinda rĩa kwerũhia indo ciothe rĩkinye, rĩrĩa Ngai aaririe ũhoro warĩo kũgerera anabii ake aamũre a tene. 22 Ti itherũ Musa ooigire atĩrĩ: ‘Jehova* Ngai wanyu nĩ akaamwarahũrĩra mũnabii ũtariĩ ta niĩ kuuma gatagatĩ-inĩ ka ariũ a ithe wanyu.+ No mũhaka mũgaathikĩrĩria ũrĩa wothe akaamwĩra.+ 23 Na mũndũ ũrĩa wothe ũtagathikĩrĩria Mũnabii ũcio nĩ kũniinwo akaaniinwo biũ ehere gatagatĩ-inĩ ka andũ.’+ 24 Anabii othe kuuma Samueli na arĩa maamũrũmĩrĩire, arĩa othe marĩtie-rĩ, nĩ maamenyithanirie matekũhithĩrĩra ũhoro wĩgiĩ matukũ macio.+ 25 Inyuĩ nĩ inyuĩ ariũ a anabii acio na agai a kĩrĩkanĩro kĩrĩa Ngai aarĩkanĩire na maithe manyu ma tene,+ akĩra Iburahimu atĩrĩ: ‘Na kũgerera harĩ mbeũ yaku,* famĩlĩ ciothe cia thĩ nĩ ikaarathimwo.’+ 26 Ngai arĩkia kwarahũra Ndungata yake, aambire kũmĩtũma+ kũrĩ inyuĩ ĩmũrathime na njĩra ya kũmũgarũra o mũndũ kuuma ciĩko-inĩ ciake njũru.”