MAŨNDŨ MA ALAWII

1 Na Jehova agĩta Musa na akĩmwarĩria kuuma hema-inĩ ya gũtũnganwo,+ akĩmwĩra: 2 “Aria na Aisiraeli* ũmeere ũũ, ‘Mũndũ o wothe angĩkorũo nĩ ekũrutĩra Jehova igongona kuuma harĩ nyamũ cia mũciĩ, agĩrĩirũo kũruta igongona rĩake kuuma rũũru-inĩ rwa ngʼombe kana rũũru-inĩ rwa mbũri kana ngʼondu.+

3 “‘Angĩkorũo ekũruta igongona rĩa njino kuuma rũũru-inĩ rwa ngʼombe, agĩrĩirũo kũruta nyamũ ya njamba ĩtarĩ na kaũgũ.+ Agĩrĩirũo kũmĩruta eyendeire+ mbere ya Jehova mũromo-inĩ wa hema ya gũtũnganwo. 4 Abatiĩ kũigĩrĩra guoko gwake mũtwe-inĩ wa nyamũ ĩyo ya igongona rĩa njino, na nĩ rĩgwĩtĩkĩrũo nĩ ũndũ wake rĩrĩ rĩa kũhumbĩra mehia make.

5 “‘Thutha ũcio no mũhaka gategwa kau gathĩnjĩrũo mbere ya Jehova, nao athĩnjĩri-Ngai ariũ a Haruni,+ matware thakame na mamĩminjaminjie mĩena yothe ya kĩgongona,+ kĩrĩa kĩrĩ mũromo-inĩ wa hema ya gũtũnganwo. 6 Igongona rĩu rĩa njino rĩagĩrĩire kũrutwo rũũa na rĩtinangio icunjĩ.+ 7 Nao athĩnjĩri-Ngai ariũ a Haruni, maakie mwaki kĩgongona-inĩ+ na mabange ngũ mwaki-inĩ ũcio. 8 Athĩnjĩri-Ngai ariũ a Haruni, mabange icunjĩ icio cia igongona,+ maigĩrĩre mũtwe na maguta* igũrũ rĩa ngũ iria irĩ mwaki-inĩ ũrĩa ũrĩ kĩgongona-inĩ. 9 Namo mara mayo na matharigo mayo mathambio na maĩ, nake mũthĩnjĩri-Ngai acicinĩre ciothe kĩgongona-inĩ irute ndogo irĩ igongona rĩa njino, rĩu nĩ igongona rĩa gũcinwo na mwaki rĩa mũtararĩko mwega harĩ* Jehova.+

10 “‘Angĩkorũo ekũruta igongona rĩa njino kuuma rũũru-inĩ rwa mbũri na ngʼondu,+ kuuma harĩ tũtũrũme kana harĩ mbũri, agĩrĩirũo kũruta nyamũ ya njamba ĩtarĩ na kaũgũ.+ 11 Yagĩrĩirũo gũthĩnjĩrũo mwena wa rũgongo wa kĩgongona mbere ya Jehova, nao athĩnjĩri-Ngai ariũ a Haruni, maminjaminjie thakame yayo mĩena yothe ya kĩgongona.+ 12 Agĩrĩirũo gũtinangia nyamũ ĩyo ya igongona icunjĩ, nake mũthĩnjĩri-Ngai abange mũtwe na maguta* mayo igũrũ rĩa ngũ iria irĩ mwaki-inĩ ũrĩa ũrĩ kĩgongona-inĩ. 13 Agĩrĩirũo gũthambia mara mayo na matharigo mayo na maĩ, nake mũthĩnjĩri-Ngai agaciruta ciothe irĩ igongona na njĩra ya gũcicinĩra kĩgongona-inĩ irute ndogo. Rĩu nĩ igongona rĩa gũcinwo na mwaki rĩa mũtararĩko mwega harĩ* Jehova.

14 “‘No rĩrĩ, angĩkorũo ekũruta nyoni irĩ ta igongona rĩa njino harĩ Jehova, abatiĩ kũruta ndutura kana njui cia ndirahũgĩ.+ 15 Mũthĩnjĩri-Ngai agĩrĩirũo kũmĩtwara kĩgongona-inĩ na akonore mũtwe wayo na amĩcinĩre kĩgongona-inĩ ĩrute ndogo, no thakame yayo yagĩrĩire gũitwo mwena-inĩ wa kĩgongona. 16 Agĩrĩirũo nĩ kũruta kabutu* kayo na maguoya mayo na acite hakuhĩ na kĩgongona, mwena wa irathĩro, harĩa mũhu* ũkoragwo.+ 17 Agĩrĩirũo kũmĩatũra mathagu-inĩ mayo atekũmĩgayania icunjĩ igĩrĩ. Nake mũthĩnjĩri-Ngai amĩcinĩre kĩgongona-inĩ ĩrute ndogo igũrũ rĩa ngũ iria irĩ mwaki-inĩ. Rĩu nĩ igongona rĩa gũcinwo na mwaki rĩa mũtararĩko mwega harĩ* Jehova.

2 “‘Angĩkorũo mũndũ ekũrutĩra Jehova igongona rĩa mũtu,+ igongona rĩu rĩagĩrĩire gũkorũo rĩrĩ rĩa mũtu mũhinyu, na akarĩitĩrĩria maguta na akaigĩrĩra ũbani igũrũ rĩarĩo.+ 2 Agacoka akarĩtwara kũrĩ athĩnjĩri-Ngai ariũ a Haruni, nake mũthĩnjĩri-Ngai akarũma ngundi ya mũtu ũcio mũhinyu hamwe na maguta na ũbani waguo wothe, akaũcinĩra kĩgongona-inĩ ũrĩ gacunjĩ kanini ka igongona rĩu*+ ũrute ndogo, igongona rĩa gũcinwo na mwaki rĩa mũtararĩko mwega harĩ* Jehova. 3 Na kĩrĩa kĩrĩtigaraga kĩa igongona rĩu rĩa mũtu kĩrĩkoragwo kĩrĩ kĩa Haruni na ariũ ake,+ kĩrĩ kĩndũ gĩtheru mũno+ kuuma harĩ magongona ma Jehova ma gũcinwo na mwaki.

4 “‘Angĩkorũo ũkũruta igongona rĩa mũtu rĩrugĩirũo riiko-inĩ rĩa keki, rĩagĩrĩire gũkorũo rĩrĩ rĩa mũtu mũhinyu, mĩgate ya gĩthiũrũrĩ* itarĩ mĩkĩre ndawa ya kũimbia ĩtukanĩtio na maguta kana tũmĩgate tũceke tũtekĩrĩtwo ndawa ya kũimbia tũhakĩtwo maguta.+

5 “‘Angĩkorũo ũkũruta igongona rĩa mũtu rĩrugĩirũo rũgĩo-inĩ,+ rĩagĩrĩire gũkorũo rĩrĩ rĩa mũtu mũhinyu, ũtarĩ mwĩkĩre ndawa ya kũimbia ũtukanĩtio na maguta. 6 Wagĩrĩire kwenyũrangwo icunjĩ, na ũitĩrĩrie maguta igũrũ rĩa guo.+ Rĩu nĩ igongona rĩa mũtu.

7 “‘Angĩkorũo ũkũruta igongona rĩa mũtu rĩrugĩirũo nyũngũ-inĩ, rĩagĩrĩire gũthondekwo na mũtu mũhinyu na maguta. 8 Wagĩrĩirũo gũtwara igongona rĩu rĩa mũtu rĩthondeketwo na indo icio kũrĩ Jehova, na rĩrĩneagwo mũthĩnjĩri-Ngai, nake akarĩtwara hakuhĩ na kĩgongona. 9 Mũthĩnjĩri-Ngai arĩoyaga mũtu ũigana ũna wa igongona rĩu ũrĩ gacunjĩ kanini ka igongona,*+ akaũcinĩra kĩgongona-inĩ ũrute ndogo ũrĩ igongona rĩa gũcinwo na mwaki rĩa mũtararĩko mwega harĩ* Jehova.+ 10 Kĩrĩa kĩrĩtigaraga kĩa igongona rĩu rĩa mũtu kĩrĩkoragwo kĩrĩ kĩa Haruni na ariũ ake, kĩrĩ kĩndũ gĩtheru mũno kuuma harĩ magongona ma Jehova ma gũcinwo na mwaki.+

11 “‘Igongona o rĩothe rĩa mũtu rĩrĩa ũkũrutĩra Jehova rĩtiagĩrĩire gũkorũo rĩkĩrĩtwo ndawa ya kũimbia,+ tondũ ndwagĩrĩirũo gũcina mũtu mwĩkĩre ndawa ya kũimbia kana ũũkĩ irĩ igongona rĩa gũcinwo na mwaki harĩ Jehova.

12 “‘Indo icio no ũcirutĩre Jehova irĩ igongona rĩa maciaro ma mbere,+ no citiagĩrĩire gũtwarũo kĩgongona-inĩ irĩ ta mũtararĩko mwega.*

13 “‘Igongona o rĩothe rĩa mũtu ũkũruta rĩagĩrĩire gũkorũo rĩkĩrĩtwo cumbĩ; ndũkanareke cumbĩ wa kĩrĩkanĩro kĩa Ngai waku wage igongona-inĩ rĩaku rĩa mũtu. Igongona rĩothe rĩaku ũrĩrĩrutaga hamwe na cumbĩ.+

14 “‘Angĩkorũo ũkũrutĩra Jehova igongona rĩa mũtu rĩa maciaro ma mbere, wagĩrĩirũo kũruta ngano* ya mũgethano* ĩcinĩtwo na mwaki, ĩgathĩo ĩtegũkonyorũo, rĩrĩ igongona rĩa maciaro maku ma mbere.+ 15 Wagĩrĩirũo kũrĩitĩrĩria maguta igũrũ na ũigĩrĩre ũbani igũrũ rĩarĩo. Rĩu nĩ igongona rĩa mũtu. 16 Mũthĩnjĩri-Ngai arĩcinaga gacunjĩ kanini ka igongona*+ rĩu, ũguo nĩ kuuga arĩcinaga mũtu ũigana ũna ũtarĩ mũkonyore na maguta hamwe na ũbani warĩo wothe, rĩrĩ igongona rĩa gũcinwo na mwaki harĩ Jehova.

3 “‘Angĩkorũo igongona rĩake nĩ rĩa ũiguano*+ na angĩkorũo ekũrĩruta kuuma rũũru-inĩ rwake rwa ngʼombe, rĩrĩ rĩa njamba kana rĩa mũgoma, agĩrĩirũo kũrutĩra Jehova nyamũ ĩtarĩ na kaũgũ. 2 Agĩrĩirũo kũigĩrĩra guoko gwake mũtwe-inĩ wa nyamũ ĩyo ya igongona rĩake, na ĩgathĩnjĩrũo mũromo-inĩ wa hema ya gũtũnganwo; nao athĩnjĩri-Ngai ariũ a Haruni, maminjaminje thakame ĩyo mĩena yothe ya kĩgongona kĩu. 3 Arĩrutaga gĩcunjĩ kĩa igongona rĩu rĩa ũiguano kĩrĩ ta igongona rĩa gũcinwo na mwaki harĩ Jehova:+ maguta+ marĩa mahumbĩrĩte mara, maguta mothe marĩa mathiũrũrũkĩirie mara, 4 na higo cierĩ irĩ na maguta ma cio marĩa marĩ hakuhĩ na njohero. Na ningĩ nĩ arĩrutaga maguta marĩa mahumbĩrĩte ini hamwe na higo icio.+ 5 Nao ariũ a Haruni makarĩcinĩra kĩgongona-inĩ rĩrute ndogo igũrũ rĩa igongona rĩa njino rĩrĩa rĩigĩrĩirũo ngũ-inĩ iria irĩ igũrũ rĩa mwaki;+ rĩu nĩ igongona rĩa gũcinwo na mwaki rĩa mũtararĩko mwega harĩ* Jehova.+

6 “‘Angĩkorũo ekũrutĩra Jehova igongona rĩa ũiguano kuuma rũũru-inĩ rwa mbũri kana rwa ngʼondu, agĩrĩirũo kũruta nyamũ ya njamba kana ya mũgoma ĩtarĩ na kaũgũ.+ 7 Angĩkorũo ekũruta gatũrũme karĩ igongona rĩake, abatiĩ gũgatwara mbere ya Jehova. 8 Agĩrĩirũo kũigĩrĩra guoko gwake mũtwe-inĩ wa nyamũ ĩyo ya igongona rĩake, na ĩthĩnjĩrũo mbere ya hema ya gũtũnganwo. Nao ariũ a Haruni maminjaminje thakame yayo mĩena yothe ya kĩgongona. 9 Arĩrutaga maguta ma igongona rĩa ũiguano marĩ ta igongona rĩa gũcinwo na mwaki harĩ Jehova.+ Arĩrutaga mũtingʼoe wothe na maguta maguo hakuhĩ na ihĩndĩ rĩa mũgongo, maguta marĩa mahumbĩrĩte mara, maguta mothe marĩa mathiũrũrũkĩirie mara, 10 na higo cierĩ irĩ na maguta ma cio marĩa marĩ hakuhĩ na njohero. Na ningĩ nĩ arĩrutaga maguta marĩa mahumbĩrĩte ini hamwe na higo icio.+ 11 Nake mũthĩnjĩri-Ngai akarĩcinĩra kĩgongona-inĩ rĩrute ndogo rĩrĩ ta irio,* rĩu nĩ igongona rĩa gũcinwo na mwaki harĩ Jehova.+

12 “‘Angĩkorũo ekũruta mbũri ĩrĩ igongona rĩake, abatiĩ kũmĩtwara mbere ya Jehova. 13 Agĩrĩirũo kũigĩrĩra guoko gwake mũtwe-inĩ wayo, na ĩthĩnjĩrũo mbere ya hema ya gũtũnganwo, nao ariũ a Haruni maminjaminje thakame yayo mĩena yothe ya kĩgongona kĩu. 14 Gĩcunjĩ kĩrĩa ekũruta kĩrĩ ta igongona rĩake rĩa gũcinwo na mwaki harĩ Jehova nĩ maguta marĩa mahumbĩrĩte mara, maguta mothe marĩa mathiũrũrũkĩirie mara,+ 15 na higo cierĩ irĩ na maguta ma cio marĩa marĩ hakuhĩ na njohero. Na ningĩ nĩ arĩrutaga maguta marĩa mahumbĩrĩte ini hamwe na higo icio. 16 Nake mũthĩnjĩri-Ngai agacicinĩra kĩgongona-inĩ irute ndogo irĩ ta irio,* igatuĩka igongona rĩa gũcinwo na mwaki rĩa mũtararĩko mwega.* Maguta mothe nĩ ma Jehova.+

17 “‘Ũyũ nĩ watho wa gũtũũra ũrũmagĩrĩrũo njiarũa-inĩ cianyu ciothe, ciikaro-inĩ cianyu ciothe: Mũtiagĩrĩirũo kũrĩa maguta o mothe kana thakame o yothe+ o na hanini.’”

4 Jehova agĩthiĩ na mbere kwĩra Musa ũũ: 2 “Ĩra Aisiraeli atĩrĩ, ‘Mũndũ angĩhia atekwenda+ na njĩra ya gwĩka ũmwe wa maũndũ marĩa Jehova athanĩte matikanekwo:

3 “‘Mũthĩnjĩri-Ngai ũrĩa mũitĩrĩrie maguta+ angĩhia+ na areherere andũ mahĩtia, no mũhaka arehe gategwa gatarĩ na kaũgũ mbere ya Jehova karĩ igongona rĩa mehia macio ekĩte.+ 4 Agĩrĩirũo gũtwara gategwa kau mũromo-inĩ wa hema ya gũtũnganwo+ mbere ya Jehova na aigĩrĩre guoko gwake mũtwe-inĩ wa gategwa kau, na athĩnjĩre gategwa kau mbere ya Jehova.+ 5 Mũthĩnjĩri-Ngai ũcio mũitĩrĩrie maguta+ acoke oe thakame ĩmwe ya gategwa kau na amĩtware thĩinĩ wa hema ya gũtũnganwo; 6 na mũthĩnjĩri-Ngai ũcio atobokie kĩara gĩake thakame-inĩ+ ĩyo na ataatie ĩmwe ya thakame ĩyo maita mũgwanja+ mbere ya Jehova hau mbere ya gĩtaama kĩa harĩa hatheru. 7 Mũthĩnjĩri-Ngai ũcio ningĩ ahake ĩmwe ya thakame ĩyo hĩa-inĩ cia kĩgongona kĩa ũbumba ũrĩa mũnungi wega,+ kĩrĩa kĩrĩ mbere ya Jehova thĩinĩ wa hema ya gũtũnganwo; nayo thakame ĩyo ĩngĩ yothe ya gategwa kau amĩite gĩtina-inĩ gĩa kĩgongona kĩa igongona rĩa njino,+ kĩrĩa kĩrĩ mũromo-inĩ wa hema ya gũtũnganwo.

8 “‘Acoke arute maguta mothe ma gategwa kau ka igongona rĩa mehia, hamwe na maguta marĩa mahumbĩrĩte mara na maguta marĩa mathiũrũrũkĩirie mara, 9 na higo cierĩ irĩ na maguta ma cio marĩa marĩ hakuhĩ na njohero. Na ningĩ arute maguta marĩa mahumbĩrĩte ini hamwe na higo icio.+ 10 Karĩrutagwo indo o ta iria ndegwa ya igongona rĩa ũiguano ĩrutagwo.+ Nake mũthĩnjĩri-Ngai agacicinĩra kĩgongona-inĩ kĩa igongona rĩa njino irute ndogo.

11 “‘No rũũa rwa gategwa kau na nyama ciako ciothe hamwe na mũtwe wako, matharigo mako, mara mako, na taatha wako+— 12 indo icio ingĩ ciothe cia gategwa kau—agĩrĩirũo gũtigĩrĩra atĩ nĩ cioimio nja ya kambĩ na itwarũo handũ hatheru harĩa mũhu* ũteagwo, na acicine na mwaki wa ngũ.+ Ciagĩrĩire gũcinĩrũo harĩa mũhu ũteagwo.

13 “‘Na rĩrĩ, kĩrĩndĩ gĩothe kĩa Isiraeli kĩngĩkorũo nĩ kĩgĩte na mahĩtia na njĩra ya kwĩhia gĩtekwenda,+ no kĩũngano kĩu gĩkorũo atĩ gĩtiramenyaga atĩ nĩ gĩkĩte ũndũ ũrĩa Jehova agĩathĩte gĩtigeke,+ 14 namo mehia macio mamenyeke-rĩ, no mũhaka kĩũngano kĩu kĩrute gategwa ka igongona rĩa mehia na gĩkarehe mbere ya hema ya gũtũnganwo. 15 Athuri* a kĩrĩndĩ kĩu magĩrĩirũo kũigĩrĩra moko mao mũtwe-inĩ wa gategwa kau mbere ya Jehova, na gategwa kau gathĩnjĩrũo mbere ya Jehova.

16 “‘Mũthĩnjĩri-Ngai ũcio mũitĩrĩrie maguta acoke atware thakame ĩmwe ya gategwa kau thĩinĩ wa hema ya gũtũnganwo. 17 Mũthĩnjĩri-Ngai ũcio atobokie kĩara gĩake thakame-inĩ ĩyo na ataatie ĩmwe ya thakame ĩyo maita mũgwanja mbere ya Jehova hau mbere ya gĩtaama kĩa harĩa hatheru.+ 18 Acoke ahake ĩmwe ya thakame ĩyo hĩa-inĩ cia kĩgongona+ kĩrĩa kĩrĩ mbere ya Jehova, thĩinĩ wa hema ya gũtũnganwo; nayo thakame ĩyo ĩngĩ yothe amĩite gĩtina-inĩ gĩa kĩgongona kĩa igongona rĩa njino, kĩrĩa kĩrĩ mũromo-inĩ wa hema ya gũtũnganwo.+ 19 Na arute maguta mothe mako na amacinĩre kĩgongona-inĩ marute ndogo.+ 20 Agĩrĩirũo gwĩka gategwa kau o ta ũrĩa arĩkaga gategwa kau kangĩ ka igongona rĩa mehia. Ũguo nĩguo agĩrĩirũo gũgeka, na njĩra ĩyo mũthĩnjĩri-Ngai akaruta igongona rĩa kũhumbĩra mehia mao,+ nao makoherũo. 21 Agĩrĩirũo gũtigĩrĩra atĩ gategwa kau nĩ gatwarũo nja ya kambĩ na agacine, o ta ũrĩa arĩcinaga gategwa kau ka mbere.+ Rĩu nĩ igongona rĩa mehia rĩa kĩũngano kĩu.+

22 “‘Mũtongoria wa andũ+ angĩhia atekwenda na njĩra ya gwĩka ũmwe wa maũndũ mothe marĩa Jehova Ngai wake athanĩte matikanekwo na agĩe ihĩtia, 23 kana amenye atĩ nĩ harĩ rĩhia ekĩte akagarara rĩathani-rĩ, no mũhaka arehe gathenge gatarĩ na kaũgũ karĩ igongona rĩake. 24 Agĩrĩirũo kũigĩrĩra guoko gwake mũtwe-inĩ wa gathenge kau na agathĩnjĩre harĩa igongona rĩa njino rĩthĩnjagĩrũo mbere ya Jehova.+ Rĩu nĩ igongona rĩa mehia. 25 Nake mũthĩnjĩri-Ngai oe thakame ĩmwe ya igongona rĩu rĩa mehia na kĩara gĩake na amĩhake hĩa-inĩ+ cia kĩgongona kĩa igongona rĩa njino, nayo thakame ĩyo ĩngĩ yothe yako amĩite gĩtina-inĩ gĩa kĩgongona kĩa igongona rĩa njino.+ 26 Namo maguta mothe mako akamacinĩra kĩgongona-inĩ marute ndogo o ta ũrĩa maguta ma igongona rĩa ũiguano macinagwo;+ na njĩra ĩyo mũthĩnjĩri-Ngai akaruta igongona rĩa kũhumbĩra mehia ma mũtongoria ũcio, nake akoherũo.

27 “‘Mũndũ o wothe wa bũrũri ũyũ angĩhia atekwenda na agĩe ihĩtia na njĩra ya gwĩka ũmwe wa maũndũ mothe marĩa Jehova athanĩte matikanekwo,+ 28 kana amenye atĩ nĩ harĩ rĩhia ekĩte-rĩ, no mũhaka arehe kaharika gatarĩ na kaũgũ karĩ igongona rĩake nĩ ũndũ wa rĩhia rĩu ekĩte. 29 Agĩrĩirũo kũigĩrĩra guoko gwake mũtwe-inĩ wa nyamũ ĩyo ya igongona rĩa mehia na athĩnjĩre nyamũ ĩyo ya igongona rĩa mehia harĩa igongona rĩa njino rĩthĩnjagĩrũo.+ 30 Nake mũthĩnjĩri-Ngai oe thakame ĩmwe yako na kĩara gĩake na amĩhake hĩa-inĩ cia kĩgongona kĩa igongona rĩa njino, nayo thakame ĩyo ĩngĩ yothe yako amĩite gĩtina-inĩ gĩa kĩgongona.+ 31 Agĩrĩirũo kũruta maguta mothe mako,+ o ta ũrĩa maguta marutagwo nyamũ-inĩ ya igongona rĩa ũiguano,+ na mũthĩnjĩri-Ngai amacinĩre kĩgongona-inĩ marute ndogo ĩrĩ mũtararĩko mwega harĩ* Jehova; na njĩra ĩyo mũthĩnjĩri-Ngai akaruta igongona rĩa kũhumbĩra mehia ma mũndũ ũcio, nake akoherũo.

32 “‘No angĩkorũo ekũruta kagondu karĩ igongona rĩake rĩa mehia, agĩrĩirũo kũruta kamwatĩ gatarĩ na kaũgũ. 33 Agĩrĩirũo kũigĩrĩra guoko gwake mũtwe-inĩ wa nyamũ ĩyo ya igongona rĩa mehia na amĩthĩnje ĩrĩ igongona rĩa mehia harĩa igongona rĩa njino rĩthĩnjagĩrũo.+ 34 Nake mũthĩnjĩri-Ngai oe thakame ĩmwe ya nyamũ ĩyo ya igongona rĩa mehia na kĩara gĩake amĩhake hĩa-inĩ cia kĩgongona kĩa igongona rĩa njino,+ na aite thakame ĩyo ĩngĩ yothe yayo gĩtina-inĩ gĩa kĩgongona kĩa igongona rĩa njino. 35 Agĩrĩirũo kũruta maguta mothe mayo, o ta ũrĩa maguta ma gatũrũme ka igongona rĩa ũiguano marutagwo, na mũthĩnjĩri-Ngai amacinĩre kĩgongona-inĩ marute ndogo igũrũ rĩa magongona ma Jehova ma gũcinwo na mwaki;+ na njĩra ĩyo mũthĩnjĩri-Ngai akaruta igongona rĩa kũhumbĩra mehia ma mũndũ ũcio, nake akoherũo.+

5 “‘Mũndũ angĩigua gũgĩtanwo nĩguo mũndũ akarute ũira*+ na akorũo we nĩ mũira kana nĩ onete kana akamenya ũndũ ũcio na akaga kũumbũra, nĩ ehĩtie, na nĩ akoorio nĩ ũndũ wa ihĩtia rĩu rĩake.

2 “‘Kana mũndũ* angĩhutia kĩndũ o gĩothe kĩrĩ thahu, kĩimba kĩa nyamũ ya gĩthaka ĩrĩ thahu, kĩa nyamũ ya mũciĩ ĩrĩ thahu, kana gĩa kĩũmbe kĩrĩ thahu harĩ iria ithiaga irĩ gĩkundi,+ arĩkoragwo arĩ na thahu na arĩ na ihĩtia o na angĩkorũo ndoĩ. 3 Kana mũndũ angĩhutia thahu uumanĩte na mũndũ atekũmenya+—kĩndũ o gĩothe kĩrĩ thahu kĩngĩtũma akorũo na thahu⁠—acoke amenye ũndũ ũcio, arĩkoragwo na ihĩtia.

4 “‘Kana mũndũ angĩĩhĩta gwĩka ũndũ atecirĩtie wega—ũrĩ ũndũ mwega kana mũũru, gũtekũmakania nĩ ũndũ ũrĩkũ—na ndaramenyaga ũndũ ũcio, no acoke amenye atĩ nĩ eehĩtire atecirĩtie wega, arĩkoragwo na ihĩtia.*+

5 “‘Mũndũ angĩgĩa ihĩtia na njĩra ya gwĩka ũmwe wa maũndũ macio, no mũhaka oimbũre+ oige ũrĩa ehĩtie. 6 Ningĩ arehe igongona rĩake rĩa mahĩtia harĩ Jehova nĩ ũndũ wa mehia macio ekĩte,+ arehe mũgoma kuuma rũũru-inĩ rwa mbũri kana rwa ngʼondu, kamwatĩ kana kaharika, nĩ ũndũ wa igongona rĩa mehia. Nake mũthĩnjĩri-Ngai arute igongona rĩa kũhumbĩra mehia nĩ ũndũ wa mehia ma mũndũ ũcio.

7 “‘No angĩkorũo ndangĩhota kũruta ngʼondu, agĩrĩirũo kũrehera Jehova ndutura igĩrĩ kana njui igĩrĩ cia ndirahũgĩ+ irĩ igongona rĩa mahĩtia nĩ ũndũ wa mehia macio make, ĩmwe ĩrĩ igongona rĩa mehia na ĩyo ĩngĩ ĩrĩ igongona rĩa njino.+ 8 Agĩrĩirũo gũcitwara kũrĩ mũthĩnjĩri-Ngai, nake arute ĩyo ya igongona rĩa mehia ĩrĩ ya mbere na amĩkonore mũtwe ngingo-inĩ yayo mwena wa na mbere atekũmĩtinania. 9 Agĩrĩirũo gũtaatia thakame ĩmwe ya igongona rĩa mehia mwena-inĩ wa kĩgongona, no thakame ĩrĩa yatigara yagĩrĩire gũitwo gĩtina-inĩ gĩa kĩgongona.+ Rĩu nĩ igongona rĩa mehia. 10 Nayo ĩyo ĩngĩ arĩmĩkaga o ta ũrĩa igongona rĩa njino rĩkagwo kũringana na mũtaratara ũrĩa ũrũmagĩrĩrũo;+ na njĩra ĩyo mũthĩnjĩri-Ngai akaruta igongona rĩa mehia nĩ ũndũ wa mehia marĩa mũndũ ũcio ekĩte, nake akoherũo.+

11 “‘No rĩrĩ, angĩkorũo ndangĩhota kũruta ndutura igĩrĩ kana njui igĩrĩ cia ndirahũgĩ, agĩrĩirũo gũtwara igongona rĩa mehia make rĩa mũtu mũhinyu gĩcunjĩ kĩmwe harĩ ikũmi kĩa eba*+ nĩ ũndũ wa igongona rĩa mehia. Ndagĩrĩirũo kũwĩkĩra maguta kana kũigĩrĩra ũbani igũrũ rĩaguo, nĩ gũkorũo rĩu nĩ igongona rĩa mehia. 12 Arĩũtwaraga kũrĩ mũthĩnjĩri-Ngai, nake mũthĩnjĩri-Ngai akarũma ngundi ya mũtu ũcio ũrĩ gacunjĩ kanini ka igongona rĩu* akaũcinĩra kĩgongona-inĩ ũrute ndogo igũrũ rĩa magongona ma Jehova ma gũcinwo na mwaki. Rĩu nĩ igongona rĩa mehia. 13 Mũthĩnjĩri-Ngai arĩrutaga igongona rĩa kũhumbĩra mehia nĩ ũndũ wa mehia marĩa mũndũ ũcio ekĩte, rĩhia o rĩothe harĩ mehia macio, nake akoherũo.+ Nakĩo kĩrĩa kĩrĩtigaraga harĩ igongona rĩu kĩrĩkoragwo kĩrĩ kĩa mũthĩnjĩri-Ngai,+ o ta igongona rĩa mũtu.’”+

14 Jehova agĩthiĩ na mbere kwarĩria Musa akĩmwĩra atĩrĩ: 15 “Mũndũ angĩaga wĩhokeku na njĩra ya kwĩhia atekwenda ũndũ ũkonainie na indo iria theru cia Jehova,+ agĩrĩirũo kũrehera Jehova ndũrũme ĩtarĩ na kaũgũ kuuma rũũru-inĩ ĩrĩ igongona rĩa mahĩtia;+ thogora wayo wa cekeri* cia betha wagĩrĩire gũkorũo ũringaine na cekeri ĩrĩa ĩtuĩtwo ya harĩa hatheru.*+ 16 No nginya akarĩhĩra mehia marĩa ekĩte makonainie na harĩa hatheru na ningĩ nĩ arĩongagĩrĩra gĩcunjĩ kĩmwe harĩ ithano gĩa thogora wa indo icio.+ Arĩcineanaga kũrĩ mũthĩnjĩri-Ngai, nĩguo mũthĩnjĩri-Ngai ahũthĩre ndũrũme ĩyo ya igongona rĩa mahĩtia kũruta igongona rĩa kũhumbĩra mehia+ ma mũndũ ũcio, nake akoherũo.+

17 “Mũndũ angĩhia na njĩra ya gwĩka ũndũ o wothe wa maũndũ marĩa Jehova athanĩte matikanekwo, o na angĩkorũo ekĩte atekũmenya, arĩkoragwo arĩ na mahĩtia na nĩ akoorio nĩ ũndũ wa mahĩtia macio make.+ 18 Agĩrĩirũo gũtwarĩra mũthĩnjĩri-Ngai ndũrũme ĩtarĩ na kaũgũ kuuma rũũru-inĩ kũringana na thogora ũrĩa ũgũtuwo, nĩ ũndũ wa igongona rĩa mahĩtia.+ Nake mũthĩnjĩri-Ngai arute igongona rĩa kũhumbĩra mehia nĩ ũndũ wa mũndũ ũcio tondũ wa mahĩtia marĩa ekĩte atekũmenya, nake akoherũo. 19 Rĩu nĩ igongona rĩa mahĩtia. Nĩ gũkorũo mũndũ ũcio arĩ na mahĩtia nĩ ũndũ wa kwĩhĩria Jehova.”

6 Jehova agĩcoka akĩra Musa atĩrĩ: 2 “Mũndũ angĩhia na age wĩhokeku harĩ Jehova+ na njĩra ya kũheenia mũndũ ũrĩa ũngĩ ũndũ-inĩ ũkonainie na kĩndũ ehokeirũo,+ kana kĩndũ anengeretwo, kana akaiya kana agatunya mũndũ ũrĩa ũngĩ kĩndũ na njĩra ya wara, 3 kana akona kĩndũ kĩũrĩte na akaheenania ũhoro-inĩ wakĩo, na angĩĩhĩta na maheeni igũrũ rĩgiĩ rĩhia o rĩothe angĩkorũo ehĩtie harĩ mehia macio,+ ũũ nĩguo agĩrĩirũo nĩ gwĩka: 4 Angĩkorũo nĩ ehĩtie akereherera mahĩtia, no mũhaka acokie kĩrĩa aiyĩte, kĩrĩa atunyanĩte, kĩrĩa oete na njĩra ya wara, kĩrĩa eehokeirũo, kana kĩndũ kĩũrĩte agakĩona, 5 kana kĩndũ o gĩothe kĩrĩa eehĩtire na maheeni ũhoro-inĩ wakĩo, na no mũhaka arute mũigana wothe wakĩo akĩrĩhĩre,+ na ongerere gĩcunjĩ kĩmwe harĩ ithano gĩa thogora wakĩo. Agaacinengera mwene mũthenya ũrĩa agaatuĩrũo atĩ arĩ na mahĩtia. 6 Ningĩ nĩ agĩrĩirũo kũrehera mũthĩnjĩri-Ngai ndũrũme ĩtarĩ na kaũgũ kuuma rũũru-inĩ ĩrĩ igongona rĩake rĩa mahĩtia harĩ Jehova kũringana na thogora ũrĩa ũgũtuwo, nĩ ũndũ wa igongona rĩa mahĩtia.+ 7 Nake mũthĩnjĩri-Ngai akaruta igongona rĩa kũhumbĩra mehia nĩ ũndũ wa mũndũ ũcio mbere ya Jehova, na nĩ arĩohagĩrũo ũndũ o wothe angĩkorũo ekĩte ũgatũma akorũo na mahĩtia.”+

8 Jehova agĩthiĩ na mbere kwaria na Musa akĩmwĩra ũũ: 9 “Atha Haruni na ariũ ake ũmeere atĩrĩ, ‘Ũyũ nĩguo watho wa igongona rĩa njino:+ Igongona rĩa njino rĩrĩtigagwo igũrũ rĩa riiko rĩa kĩgongona ũtukũ wothe o nginya rũcinĩ, naguo mwaki ũrĩigagwo wakanĩte kĩgongona-inĩ. 10 Mũthĩnjĩri-Ngai arĩĩhumbaga nguo yake ya gatani ya ũthĩnjĩri-Ngai,+ na agekĩra kĩnyatha* gĩa gatani+ ahumbĩre mwĩrĩ wake. Agacoka akeheria mũhu*+ wa igongona rĩa njino rĩrĩa mwaki ũcinĩte kĩgongona-inĩ na akaũiga mwena-inĩ wa kĩgongona. 11 Arĩcokaga akaruta nguo icio ciake+ agekĩra nguo ingĩ na agatwara mũhu ũcio handũ hatheru nja ya kambĩ.+ 12 Mwaki ũrĩigagwo wakanĩte kĩgongona-inĩ. Ndwagĩrĩire kũhora. Mũthĩnjĩri-Ngai agĩrĩirũo gwĩkĩraga ngũ mwaki-inĩ ũcio+ o rũcinĩ nĩguo ciakane na akabanga igongona rĩa njino igũrũ rĩaguo, na agacinĩra maguta ma igongona rĩa ũiguano igũrũ rĩaguo marute ndogo.+ 13 Mwaki ũrĩigagwo wakanĩte hingo ciothe kĩgongona-inĩ. Ndwagĩrĩire kũhora.

14 “‘Na rĩrĩ, ũyũ nĩguo watho wa igongona rĩa mũtu:+ Inyuĩ ariũ a Haruni mwagĩrĩirũo kũrutaga igongona rĩu mbere ya Jehova o hau mbere ya kĩgongona. 15 Ũmwe wao arĩrũmaga ngundi ya mũtu ũcio mũhinyu wa igongona rĩa mũtu na maguta mamwe maguo na ũbani wothe ũrĩa ũrĩ igũrũ rĩa igongona rĩu rĩa mũtu, na akaũcinĩra kĩgongona-inĩ ũrute ndogo ĩrĩ mũtararĩko mwega* wa gacunjĩ kanini ka igongona rĩu* harĩ Jehova.+ 16 Nao Haruni na ariũ ake makarĩa kĩrĩa gĩatigara harĩ igongona rĩu.+ Kĩrĩrĩagwo kĩrĩ mĩgate ĩtarĩ mĩkĩre ndawa ya kũimbia marĩ handũ hatheru. Marĩkĩrĩaga marĩ hau nja ya hema ya gũtũnganwo.+ 17 Gĩtiagĩrĩire kũrugwo hamwe na kĩndũ o gĩothe kĩrĩ na ndawa ya kũimbia.+ Ndĩkĩheanĩte kĩrĩ igai rĩao kuuma kũrĩ magongona makwa ma gũcinwo na mwaki.+ Kĩu nĩ kĩndũ gĩtheru mũno,+ o ta igongona rĩa mehia na o ta igongona rĩa mahĩtia. 18 Mũndũrũme wothe gatagatĩ-inĩ ka ariũ a Haruni nĩ arĩkĩrĩaga.+ Rĩu nĩ igai rĩao kuuma harĩ magongona ma Jehova ma gũcinwo na mwaki, rĩa gũtũũra njiarũa-inĩ cianyu ciothe.+ Kĩndũ o gĩothe kĩrĩmahutagia* kĩrĩtuĩkaga gĩtheru.’”

19 Jehova akĩarĩria Musa o rĩngĩ akĩmwĩra: 20 “Rĩrĩ nĩrĩo igongona rĩrĩa Haruni na ariũ ake makaarutĩra Jehova mũthenya ũrĩa agaaitĩrĩrio maguta:+ mũtu mũhinyu gĩcunjĩ kĩmwe harĩ ikũmi kĩa eba*+ ũrĩ igongona rĩa mũtu rĩa kũrutagwo hingo ciothe,+ nuthu yaguo ĩkarutwo rũcinĩ na nuthu ĩyo ĩngĩ hwaĩ-inĩ. 21 Wagĩrĩire gũkaarugwo hamwe na maguta rũgĩo-inĩ.+ Ũkaaũrehe ũrĩ mũtukanie wega na maguta na ũũrute ũrĩ mwenyũrange ũrĩ kĩndũ kĩruge kĩa igongona rĩa mũtu ũtuĩke mũtararĩko mwega harĩ* Jehova. 22 Mũthĩnjĩri-Ngai ũrĩa mũitĩrĩrie maguta ũrĩcokaga ithenya rĩake kuuma gatagatĩ-inĩ ka ariũ ake+ nĩ arĩrutaga igongona rĩu. Ũyũ nĩguo ũgũtuĩka watho wa gũtũũra ũrũmagĩrĩrũo: Igongona rĩu igima rĩrĩcinagwo rĩrute ndogo harĩ Jehova. 23 Igongona o rĩothe rĩa mũtu rĩa mũthĩnjĩri-Ngai rĩagĩrĩire gũkorũo rĩrĩ igongona igima. Rĩtiagĩrĩire kũrĩo.”

24 Jehova akĩarĩria Musa o rĩngĩ akĩmwĩra: 25 “Ĩra Haruni na ariũ ake atĩrĩ, ‘Ũyũ nĩguo watho wa igongona rĩa mehia:+ Handũ harĩa igongona rĩa njino rĩrĩthĩnjagĩrũo+ noho o na igongona rĩa mehia rĩrĩthĩnjagĩrũo mbere ya Jehova. Kĩu nĩ kĩndũ gĩtheru mũno. 26 Mũthĩnjĩri-Ngai ũrĩa ũrĩrutaga igongona rĩu nĩ ũndũ wa mehia nĩwe ũrĩrĩrĩaga.+ Rĩrĩrĩagĩrũo handũ hatheru, hau nja ya hema ya gũtũnganwo.+

27 “‘Kĩndũ o gĩothe kĩrĩhutagia nyama yayo kĩrĩtuĩkaga gĩtheru, na mũndũ o wothe angĩtaatia ĩmwe ya thakame yayo nguo-inĩ yake, wagĩrĩirũo gũthambia kĩrĩa gĩataatĩrũo nĩ thakame ĩyo ũrĩ handũ hatheru. 28 Nyũngũ ya rĩũmba ĩrĩa igongona rĩu rĩatherũkĩrio nĩ kũũragwo ĩrĩũragagwo. No angĩkorũo rĩatherũkĩrio nyũngũ-inĩ ya gĩcango, nyũngũ ĩyo no mũhaka ĩkumuthagwo na ĩgathambio na maĩ.

29 “‘Mũndũrũme wothe gatagatĩ-inĩ ka athĩnjĩri-Ngai nĩ arĩrĩaga igongona rĩu.+ Kĩu nĩ kĩndũ gĩtheru mũno.+ 30 O na kũrĩ ũguo, igongona rĩa mehia rĩtirĩrĩagwo angĩkorũo thakame ĩmwe yarĩo ĩtwarĩtwo hema-inĩ ya gũtũnganwo thĩinĩ wa harĩa hatheru ĩrĩ ya kũruta igongona rĩa kũhumbĩra mehia.+ Rĩagĩrĩire gũcinwo na mwaki.

7 “‘Ũyũ nĩguo watho wa igongona rĩa mahĩtia:+ Kĩu nĩ kĩndũ gĩtheru mũno. 2 Magĩrĩirũo gũthĩnjagĩra igongona rĩa mahĩtia harĩa mathĩnjagĩra magongona ma njino, nayo thakame yarĩo+ ĩkaminjaminjwo mĩena yothe ya kĩgongona.+ 3 Arĩrutaga maguta mothe+ ma rĩo marĩ igongona, hamwe na mũtingʼoe na maguta maguo, maguta marĩa mahumbĩrĩte mara, 4 na higo cierĩ irĩ na maguta ma cio marĩa marĩ hakuhĩ na njohero. Na ningĩ nĩ arĩrutaga maguta marĩa mahumbĩrĩte ini hamwe na higo icio.+ 5 Nake mũthĩnjĩri-Ngai agacicinĩra kĩgongona-inĩ irute ndogo irĩ igongona rĩa gũcinwo na mwaki harĩ Jehova.+ Rĩu nĩ igongona rĩa mahĩtia. 6 Mũndũrũme wothe gatagatĩ-inĩ ka athĩnjĩri-Ngai nĩ arĩrĩaga igongona rĩu,+ na rĩagĩrĩire kũrĩĩrũo handũ hatheru. Kĩu nĩ kĩndũ gĩtheru mũno.+ 7 Watho wĩgiĩ igongona rĩa mehia noguo ũrĩrũmagĩrĩrũo harĩ igongona rĩa mahĩtia; nyama cia nyamũ ya igongona rĩu irĩkoragwo irĩ cia mũthĩnjĩri-Ngai ũrĩa wamĩruta ĩrĩ igongona rĩa kũhumbĩra mehia.+

8 “‘Rĩrĩa mũthĩnjĩri-Ngai aruta igongona rĩa njino nĩ ũndũ wa mũndũ o wothe, rũũa+ rwa nyamũ ĩyo ya igongona rĩa njino o ĩyo yaneanwo kũrĩ mũthĩnjĩri-Ngai rũrĩtuĩkaga rwake.

9 “‘Igongona o rĩothe rĩa mũtu rĩrĩa rĩrĩrugagĩrũo riiko-inĩ rĩa keki kana rĩkarugĩrũo nyũngũ-inĩ kana rũgĩo-inĩ+ rĩrĩkoragwo rĩrĩ rĩa mũthĩnjĩri-Ngai ũrĩa warĩruta. Rĩrĩtuĩkaga rĩake.+ 10 No igongona o rĩothe rĩa mũtu mũtukanie na maguta+ kana mũtu mũũmũ+ rĩrĩkoragwo rĩrĩ rĩa ariũ othe a Haruni; o mũndũ arĩheagwo igai rĩiganaine na rĩa ũrĩa ũngĩ.

11 “‘Naguo ũyũ nĩguo watho wa igongona rĩa ũiguano+ rĩrĩa mũndũ angĩrutĩra Jehova: 12 Angĩkorũo ekũrĩruta rĩrĩ rĩa gũcokia ngatho,+ agĩrĩirũo kũruta igongona rĩa gũcokia ngatho hamwe na mĩgate ya gĩthiũrũrĩ* ĩtarĩ mĩkĩre ndawa ya kũimbia ĩtukanĩtio na maguta, tũmĩgate tũceke tũtekĩrĩtwo ndawa ya kũimbia tũhakĩtwo maguta, na mĩgate ya gĩthiũrũrĩ* ĩrugĩtwo na mũtu mũhinyu, ũkimĩtwo wega na ũgatukanio na maguta. 13 Arĩrutaga igongona rĩake hamwe na mĩgate ya gĩthiũrũrĩ* mĩkĩre ndawa ya kũimbia na igongona rĩa gũcokia ngatho rĩa magongona make ma ũiguano. 14 Arĩrutaga o kĩndũ kuuma harĩ indo icio cia igongona kĩrĩ kĩheo kĩamũre harĩ Jehova; kĩrĩkoragwo kĩrĩ kĩa mũthĩnjĩri-Ngai ũrĩa waminjaminja thakame ya magongona macio ma ũiguano.+ 15 Nyama cia igongona rĩa gũcokia ngatho rĩa magongona make ma ũiguano irĩrĩagwo mũthenya o ro ũcio aruta igongona rĩu. Ndagĩrĩirũo kũiga nyama o na ĩmwe ĩkinyie rũcinĩ.+

16 “‘Angĩkorũo ekũruta igongona rĩu rĩake rĩrĩ rĩa mwĩhĩtwa+ kana rĩrĩ igongona rĩa kwĩyendera,+ rĩagĩrĩire kũrĩo o ro mũthenya ũcio aruta igongona rĩake, na kĩrĩa gĩatigara kĩa igongona rĩu no kĩrĩo o na mũthenya ũrĩa ũrũmĩrĩire. 17 Ĩndĩ nyama o yothe ya igongona rĩu ĩrĩa ĩgũtigara ĩkinyie mũthenya wa gatatũ yagĩrĩire gũcinwo na mwaki.+ 18 No nyama o na ĩrĩkũ ya igongona rĩu rĩake rĩa ũiguano ĩngĩkaarĩo mũthenya wa gatatũ, ũcio ũrĩrutĩte ndagetĩkĩrĩka. Ndakoonwo ta arĩrutĩte; kĩu nĩ kĩndũ kĩrĩ magigi, na mũndũ* ũrĩa ũngĩkorũo arĩte nyama ĩmwe ya icio nĩ akoorio ihĩtia rĩu rĩake.+ 19 Nyama ĩrĩa yahutia kĩndũ o gĩothe kĩrĩ thahu ndĩagĩrĩire kũrĩo. Yagĩrĩire gũcinwo na mwaki. No mũndũ wothe ũtarĩ na thahu no arĩe nyama ĩtarĩ na thahu.

20 “‘No mũndũ* o wothe ũrĩ na thahu angĩkaarĩa nyama ya igongona rĩa ũiguano, o rĩu rĩa Jehova, mũndũ* ũcio agĩrĩire kweherio* gatagatĩ-inĩ ka andũ ao.+ 21 Mũndũ* angĩkaahutia kĩndũ o gĩothe kĩrĩ thahu, thahu wa mũndũ+ kana nyamũ ĩrĩ thahu,+ kana kĩndũ o gĩothe kĩrĩ na thahu na kĩrĩ magigi,+ na acoke arĩe nyama ya igongona rĩa ũiguano, o rĩu rĩa Jehova, mũndũ* ũcio agĩrĩire kweherio* gatagatĩ-inĩ ka andũ ao.’”

22 Jehova agĩgĩthiĩ na mbere kwaria na Musa akĩmwĩra atĩrĩ: 23 “Ĩra Aisiraeli ũũ, ‘Mũtikanarĩe maguta o mothe+ ma ndegwa kana ma gatũrũme kana ma mbũri. 24 Maguta ma nyamũ yonetwo handũ ĩrĩ nguũ kana maguta ma nyamũ yũragĩtwo nĩ nyamũ ĩngĩ no mahũthĩrũo ũndũ-inĩ ũngĩ o wothe, no mũtikanamarĩe.+ 25 Nĩ gũkorũo mũndũ o wothe angĩrĩa maguta ma nyamũ ĩrĩa araruta ĩrĩ igongona rĩa gũcinwo na mwaki harĩ Jehova agĩrĩire kweherio* gatagatĩ-inĩ ka andũ ao.

26 “‘Mũtikanarĩe thakame o na ĩrĩkũ+ kũndũ guothe kũrĩa mũikaraga, ĩkorũo ĩrĩ ya nyoni kana ya nyamũ. 27 Mũndũ o wothe angĩrĩa thakame o na ĩrĩkũ agĩrĩire kweherio*+ gatagatĩ-inĩ ka andũ ao.’”

28 Jehova agĩcoka akĩarĩria Musa akĩmwĩra atĩrĩ: 29 “Ĩra Aisiraeli ũũ, ‘Mũndũ wothe ũkũruta igongona rĩake rĩa ũiguano harĩ Jehova, gĩcunjĩ kĩmwe kĩa igongona rĩake rĩa ũiguano arĩkĩrehagĩra Jehova.+ 30 Arĩrehaga maguta+ o hamwe na gĩthũri acinyitĩte na moko make mwene irĩ igongona rĩa gũcinwo na mwaki harĩ Jehova, na agacicũgia mbere na thutha irĩ igongona rĩa gũcũgio+ mbere ya Jehova. 31 Nake mũthĩnjĩri-Ngai agacinĩra maguta macio kĩgongona-inĩ marute ndogo,+ no gĩthũri kĩrĩkoragwo kĩrĩ kĩa Haruni na ariũ ake.+

32 “‘Mwagĩrĩirũo kũheaga mũthĩnjĩri-Ngai kũgũrũ kwa ũrĩo kũrĩ igai rĩamũre kuuma harĩ magongona manyu ma ũiguano.+ 33 Mũriũ wa Haruni ũrĩa waruta igongona na thakame ĩyo ya magongona ma ũiguano o hamwe na maguta nĩwe ũrĩheagwo kũgũrũ kwa ũrĩo kũrĩ igai rĩake.+ 34 Nĩ gũkorũo nĩ njoete gĩthũri kĩa igongona rĩa gũcũgio na kũgũrũ kwa igai rĩamũre kuuma magongona-inĩ ma ũiguano ma Aisiraeli, na ngaciheana kũrĩ Haruni mũthĩnjĩri-Ngai na ariũ ake ũrĩ watho wa gũtũũra ũrũmagĩrĩrũo nĩ Aisiraeli.+

35 “‘Rĩu nĩrĩo rĩarĩ igai rĩa athĩnjĩri-Ngai kuuma harĩ magongona ma Jehova ma gũcinwo na mwaki, rĩa Haruni na ariũ ake, mũthenya ũrĩa aamamũrire matungatage marĩ athĩnjĩri-Ngai harĩ Jehova.+ 36 Jehova nĩ aathanire maheagwo igai rĩu kuuma kũrĩ Aisiraeli mũthenya ũrĩa aamaitĩrĩirie maguta.+ Ũcio nĩ watho wa gũtũũra njiarũa-inĩ ciao ciothe.’”

37 Ũcio nĩguo watho wĩgiĩ igongona rĩa njino,+ igongona rĩa mũtu,+ igongona rĩa mehia,+ igongona rĩa mahĩtia,+ igongona rĩa kwamũra,+ na igongona rĩa ũiguano,+ 38 o ta ũrĩa Jehova aathire Musa arĩ Kĩrĩma-inĩ gĩa Sinai+ mũthenya ũrĩa aathire Aisiraeli marutage magongona mao harĩ Jehova marĩ werũ-inĩ wa Sinai.+

8 Jehova agĩthiĩ na mbere kwaria na Musa akĩmwĩra atĩrĩ: 2 “Oya Haruni hamwe na ariũ ake,+ na nguo,+ maguta ma gũitanĩrĩrio,+ ndegwa ya igongona rĩa mehia, ndũrũme igĩrĩ, na gĩkabu kĩa mĩgate ĩtarĩ mĩkĩre ndawa ya kũimbia,+ 3 na ũcokanĩrĩrie kĩrĩndĩ gĩothe mũromo-inĩ wa hema ya gũtũnganwo.”

4 Musa agĩgĩka o ta ũrĩa Jehova aamwathire eke, nakĩo kĩrĩndĩ gĩgĩcokanĩrĩra hamwe mũromo-inĩ wa hema ya gũtũnganwo. 5 Musa akĩra kĩrĩndĩ kĩu atĩrĩ: “Ũũ nĩguo Jehova athanĩte twĩke.” 6 Kwoguo Musa akĩrehe Haruni na ariũ ake na akĩmathambia na maĩ.+ 7 Thutha ũcio akĩmũhumba kanjũ,+ akĩmuoha mũcibi,+ akĩmwĩkĩra kagooti gatarĩ moko,+ na akĩmwĩkĩra ebodi+ na akĩmĩoha na mũcibi*+ wa gũtumwo wa ebodi, akĩmĩrũmia wega harĩ we. 8 Agĩcoka akĩmwĩkĩra gakuo ga gĩthũri+ na agĩĩkĩra Urimu na Thumimu+ gakuo-inĩ kau ga gĩthũri. 9 Ningĩ akĩmwĩkĩra kĩremba+ mũtwe, na mwena wa mbere wa kĩremba kĩu agĩĩkĩra kabaati karĩa kahenagia ga thahabu, nĩko rũũri rũrĩa rũtheru rwa kwamũrũo,*+ o ta ũrĩa Jehova aathĩte Musa.

10 Musa agĩcoka akĩoya maguta ma gũitanĩrĩrio na agĩitĩrĩria gĩikaro kĩrĩa kĩamũre o hamwe na kĩrĩa gĩothe kĩarĩ thĩinĩ wakĩo+ na agĩcitheria. 11 Thutha ũcio akĩminjaminja maguta mamwe kĩgongona-inĩ maita mũgwanja na akĩamũra kĩgongona o hamwe na indo ciakĩo ciothe na kĩraĩ na handũ hakĩo ha gũkĩigĩrĩra nĩguo acitherie. 12 Mũthia-inĩ agĩitĩrĩria mũtwe wa Haruni maguta mamwe ma gũitanĩrĩrio, agĩkĩmũitĩrĩria maguta nĩguo amũtherie.+

13 Musa agĩcoka akĩrehe ariũ a Haruni na akĩmahumba kanjũ na akĩmoha mĩcibi na akĩmekĩra ngũbia,*+ o ta ũrĩa Jehova aathĩte Musa.

14 Ningĩ akĩrehe ndegwa ya igongona rĩa mehia, nao Haruni na ariũ ake makĩigĩrĩra moko mao mũtwe-inĩ wa ndegwa ĩyo ya igongona rĩa mehia.+ 15 Musa akĩmĩthĩnja na akĩoya thakame+ na kĩara gĩake na akĩhaka hĩa-inĩ cia kĩgongona mĩena yakĩo yothe, na agĩtheria kĩgongona kĩu kuumana na mehia, no thakame ĩrĩa yatigarire akĩmĩita gĩtina-inĩ gĩa kĩgongona kĩu, nĩguo agĩtherie arutĩre ho igongona rĩa kũhumbĩra mehia. 16 Thutha ũcio akĩoya maguta mothe marĩa maarĩ igũrũ rĩa mara, maguta marĩa maahumbĩrĩte ini, na higo cierĩ irĩ na maguta ma cio, na Musa agĩcicinĩra kĩgongona-inĩ irute ndogo.+ 17 Agĩtigĩrĩra atĩ indo icio ingĩ cia ndegwa ĩyo, rũũa rwayo, nyama ciayo, na taatha wayo, nĩ ciacinwo na mwaki nja ya kambĩ,+ o ta ũrĩa Jehova aathĩte Musa.

18 Ningĩ akĩrehe ndũrũme ya igongona rĩa njino, na Haruni na ariũ ake makĩigĩrĩra moko mao mũtwe-inĩ wa ndũrũme ĩyo.+ 19 Musa agĩcoka akĩmĩthĩnja na akĩminjaminja thakame yayo mĩena yothe ya kĩgongona. 20 Agĩtinangia ndũrũme ĩyo icunjĩ, na Musa agĩgĩcina mũtwe wayo, icunjĩ icio ciayo, na maguta* mayo irute ndogo. 21 Agĩthambia mara na matharigo mayo na maĩ, na Musa agĩcinĩra ndũrũme ĩyo yothe kĩgongona-inĩ ĩrute ndogo. Rĩu rĩarĩ igongona rĩa njino rĩa mũtararĩko mwega.* Rĩarĩ igongona rĩa gũcinwo na mwaki harĩ Jehova, o ta ũrĩa Jehova aathĩte Musa.

22 Agĩcoka akĩrehe ndũrũme ya kerĩ, ndũrũme ya igongona rĩa kwamũra,+ nao Haruni na ariũ ake makĩigĩrĩra moko mao mũtwe-inĩ wa ndũrũme ĩyo.+ 23 Musa akĩmĩthĩnja na akĩoya thakame ĩmwe yayo akĩmĩhaka moni-inĩ ya gũtũ kwa ũrĩo kwa Haruni na kĩara-inĩ kĩrĩa kĩnene gĩa guoko gwake kwa ũrĩo na kĩara-inĩ kĩrĩa kĩnene gĩa kũgũrũ gwake kwa ũrĩo. 24 Musa agĩcoka akĩrehe ariũ a Haruni hau mbere na akĩmahaka thakame ĩmwe moni-inĩ ya gũtũ kwao kwa ũrĩo na kĩara-inĩ kĩrĩa kĩnene gĩa guoko kwao kwa ũrĩo na kĩara-inĩ kĩrĩa kĩnene gĩa kũgũrũ kwao kwa ũrĩo; no thakame ĩrĩa yatigarire Musa aamĩminjaminjire mĩena yothe ya kĩgongona.+

25 Ningĩ akĩoya maguta, mũtingʼoe na maguta maguo, maguta mothe marĩa maarĩ igũrũ rĩa mara, maguta marĩa maahumbĩrĩte ini, higo cierĩ irĩ na maguta ma cio, na kũgũrũ kwa ũrĩo.+ 26 Na kuuma gĩkabu-inĩ kĩa mĩgate ĩtarĩ mĩkĩre ndawa ya kũimbia kĩrĩa kĩarĩ mbere ya Jehova akĩoya mũgate ũmwe wa gĩthiũrũrĩ* ũtarĩ mwĩkĩre ndawa ya kũimbia,+ mũgate ũmwe wa gĩthiũrũrĩ* wĩkĩrĩtwo maguta,+ na kamũgate kamwe gaceke. Agĩcoka agĩciigĩrĩra igũrũ rĩa icunjĩ icio cia maguta na kũgũrũ kũu kwa ũrĩo. 27 Thutha ũcio agĩciigĩrĩra ciothe moko-inĩ ma Haruni na moko-inĩ ma ariũ ake na akĩambĩrĩria gũcicũgia mbere na thutha irĩ igongona rĩa gũcũgio mbere ya Jehova. 28 Musa agĩcoka agĩcioya kuuma moko-inĩ mao na agĩcicinĩra kĩgongona-inĩ irute ndogo igũrũ rĩa igongona rĩa njino. Ciarĩ igongona rĩa kwamũra rĩa mũtararĩko mwega.* Rĩarĩ igongona rĩa gũcinwo na mwaki harĩ Jehova.

29 Ningĩ Musa akĩoya gĩthũri na agĩgĩcũgia mbere na thutha kĩrĩ igongona rĩa gũcũgio mbere ya Jehova.+ Gĩgĩtuĩka igai rĩa Musa kuuma harĩ ndũrũme ya igongona rĩa kwamũra, o ta ũrĩa Jehova aathĩte Musa.+

30 Na Musa akĩoya maguta mamwe ma gũitanĩrĩrio+ na thakame ĩmwe ĩrĩa yarĩ kĩgongona-inĩ na akĩminjaminjĩria Haruni na nguo ciake na akĩminjaminjĩria ariũ ake acio maarĩ hamwe nake o hamwe na nguo ciao. Na njĩra ĩyo agĩtheria Haruni na nguo ciake na ariũ ake+ o hamwe na nguo ciao.+

31 Musa agĩcoka akĩra Haruni na ariũ ake ũũ: “Therũkiai+ nyama mũrĩ mũromo-inĩ wa hema ya gũtũnganwo, na mũcirĩĩre hau hamwe na mĩgate ĩrĩa ĩrĩ gĩkabu-inĩ kĩa igongona rĩa kwamũra, o ta ũrĩa ndathirũo ngĩrũo atĩrĩ, ‘Haruni na ariũ ake nĩo megũcirĩa.’+ 32 Kĩrĩa gĩgũtigara harĩ nyama na mĩgate ĩyo mũgĩcine na mwaki.+ 33 Mũtiagĩrĩirũo kuuma nja ya mũromo wa hema ya gũtũnganwo ihinda rĩa thikũ mũgwanja, o nginya thikũ cianyu cia kwamũrũo ithire, tondũ kwamũrũo kwanyu nĩguo mũtuĩke athĩnjĩri-Ngai* gũkuoya thikũ mũgwanja.+ 34 Jehova aathanire atĩ twĩke ũguo tweka ũmũthĩ nĩgetha tũrute igongona rĩa kũhumbĩra mehia nĩ ũndũ wanyu.+ 35 Mũgũikara mũromo-inĩ wa hema ya gũtũnganwo mũthenya na ũtukũ ihinda rĩa thikũ mũgwanja+ nĩgetha mũhingie ũrĩa Jehova arenda,+ nĩguo mũtigakue; nĩ gũkorũo ũguo nĩguo njathĩtwo.”

36 Haruni na ariũ ake magĩgĩka maũndũ mothe marĩa Jehova aathanĩte kũgerera Musa.

9 Na rĩrĩ, mũthenya wa kanana,+ Musa agĩta Haruni na ariũ ake na athuri* a Isiraeli. 2 Akĩra Haruni atĩrĩ: “Oya gacaũ nĩ ũndũ waku wee mwene karĩ ka igongona rĩa mehia+ na woe ndũrũme ĩrĩ ya igongona rĩa njino, na ikorũo itarĩ na kaũgũ, na ũcitware mbere ya Jehova. 3 No Aisiraeli ũmeere atĩrĩ, ‘Oyai thenge nĩ ũndũ wa igongona rĩa mehia na njaũ na gatũrũme, cia mwaka ũmwe, na itarĩ na kaũgũ, irĩ cia igongona rĩa njino, 4 na ndegwa na ndũrũme nĩ ũndũ wa igongona rĩa ũiguano,+ irutwo igongona mbere ya Jehova, na igongona rĩa mũtu+ ũtukanĩtio na maguta, nĩ gũkorũo ũmũthĩ Jehova nĩ ekũmuumĩrĩra.’”+

5 Nĩ ũndũ ũcio magĩtwara indo icio mbere ya hema ya gũtũnganwo o ta ũrĩa Musa aathanĩte. Nakĩo kĩrĩndĩ gĩothe gĩgĩkuhĩrĩria na gĩkĩrũgama mbere ya Jehova. 6 Nake Musa akiuga atĩrĩ: “Ũguo nĩguo Jehova amwathĩte mwĩke, nĩguo riri wa Jehova ũmuumĩrĩre.”+ 7 Musa agĩcoka akĩra Haruni atĩrĩ: “Kuhĩrĩria kĩgongona na ũrehe igongona rĩaku rĩa mehia+ na igongona rĩaku rĩa njino, na ũrute igongona rĩa kũhumbĩra mehia nĩ ũndũ waku mwene+ na nĩ ũndũ wa nyũmba yaku; na ũrehe igongona rĩa andũ,+ na ũrute igongona rĩa kũhumbĩra mehia nĩ ũndũ wao,+ o ta ũrĩa Jehova athanĩte.”

8 O rĩo Haruni agĩkuhĩrĩria kĩgongona na agĩthĩnja gacaũ kau ka igongona rĩa mehia nĩ ũndũ wake.+ 9 Nao ariũ a Haruni makĩmũnengera thakame yako,+ nake agĩtobokia kĩara gĩake thakame-inĩ ĩyo akĩhaka hĩa cia kĩgongona, nayo thakame ĩrĩa yatigarire akĩmĩita gĩtina-inĩ gĩa kĩgongona kĩu.+ 10 Namo maguta na higo na maguta marĩa maahumbĩrĩte ini kuuma igongona-inĩ rĩa mehia agĩcicinĩra kĩgongona-inĩ irute ndogo, o ta ũrĩa Jehova aathĩte Musa.+ 11 Nacio nyama na rũũa agĩcicina na mwaki nja ya kambĩ.+

12 Agĩcoka agĩthĩnja nyamũ ya igongona rĩa njino, nao ariũ a Haruni makĩmũnengera thakame yayo, nake akĩmĩminjaminja mĩena yothe ya kĩgongona.+ 13 Makĩmũnengera icunjĩ cia igongona rĩu rĩa njino hamwe na mũtwe, na agĩcicinĩra kĩgongona-inĩ irute ndogo. 14 Agĩcoka agĩthambia mara na matharigo na agĩcicinĩra kĩgongona-inĩ irute ndogo igũrũ rĩa igongona rĩa njino.

15 Ningĩ akĩrehe igongona rĩa andũ, akĩoya thenge ĩyo yarĩ ya igongona rĩa mehia nĩ ũndũ wa andũ, akĩmĩthĩnja na akĩruta igongona rĩa mehia nayo o ta ũrĩa eekĩte ĩyo ya mbere. 16 Na akĩrehe nyamũ ya igongona rĩa njino na akĩmĩka kũringana na mũtaratara ũrĩa ũrũmagĩrĩrũo.+

17 Agĩcoka akĩrehe igongona rĩa mũtu,+ akĩrũma mũtu ũcio akĩũiyũria guoko-inĩ gwake na akĩũcinĩra kĩgongona-inĩ ũrute ndogo, hamwe na igongona rĩa njino rĩa rũcinĩ.+

18 Thutha ũcio agĩthĩnja ndegwa na ndũrũme icio ciarĩ cia igongona rĩa ũiguano nĩ ũndũ wa andũ. Ariũ a Haruni magĩcoka makĩmũnengera thakame yacio, nake akĩmĩminjaminja mĩena yothe ya kĩgongona.+ 19 Nacio icunjĩ cia maguta ma ndegwa ĩyo,+ mũtingʼoe wa ndũrũme ĩyo na maguta maguo, maguta marĩa maahumbĩrĩte ciĩga cia na thĩinĩ, higo, na maguta marĩa maahumbĩrĩte ini,+ 20 icunjĩ icio ciothe cia maguta magĩcigĩrĩra igũrũ rĩa ithũri cia nyamũ icio, na thutha ũcio agĩcinĩra icunjĩ icio cia maguta hau kĩgongona-inĩ irute ndogo.+ 21 No ithũri icio na kũgũrũ kwa ũrĩo Haruni agĩcicũgia mbere na thutha irĩ igongona rĩa gũcũgio mbere ya Jehova, o ta ũrĩa Musa aathanĩte.+

22 Haruni agĩcoka akĩambararia moko make kũrĩ andũ na akĩmarathima+ na agĩikũrũka kuuma hau aarutagĩra igongona rĩa mehia na igongona rĩa njino na magongona ma ũiguano. 23 Thutha ũcio Musa na Haruni makĩingĩra thĩinĩ wa hema ya gũtũnganwo magĩcoka makiuma na makĩrathima andũ.+

Naguo riri wa Jehova ũkiumĩrĩra andũ othe,+ 24 na mwaki ũkiuma kũrĩ Jehova+ na ũkĩambĩrĩria gũcina igongona rĩa njino na icunjĩ cia maguta iria ciarĩ kĩgongona-inĩ. Rĩrĩa andũ othe moonire ũguo, makĩambĩrĩria kuugĩrĩria na makĩĩgũithia magĩturumithia mothiũ mao thĩ.+

10 Thutha ũcio ariũ a Haruni, nĩo Nadabu na Abihu+ makĩoya o mũndũ rũgĩo rwake rwa mwaki na magĩciĩkĩra mwaki na makĩigĩrĩra ũbumba+ igũrũ rĩacio. Magĩcoka magĩtwara mbere ya Jehova mwaki ũtetĩkĩrĩtio,+ ũndũ ũrĩa ataamathĩte meke. 2 Nĩ ũndũ ũcio mwaki ũkiuma mbere ya Jehova na ũkĩmacina,+ magĩkuĩra hau mbere ya Jehova.+ 3 Nake Musa akĩra Haruni atĩrĩ: “Ũũ nĩguo Jehova oigĩte, ‘Nĩ ngũtuwo mũtheru gatagatĩ-inĩ ka arĩa marĩ hakuhĩ na niĩ,+ na nĩ ngũgoocwo mbere ya andũ othe.’” No Haruni agĩkira ki.

4 Kwoguo Musa agĩta Mishaeli na Elizafani, ariũ a Uzieli+ ithe mũnini wa Haruni, akĩmeera: “Ũkai haha, mũkuue ariũ a ithe wanyu mũmarute mbere ya harĩa hatheru mũmatware handũ nja ya kambĩ.” 5 Magĩgĩkuhĩrĩria na magĩkuua andũ acio marĩ o na kanjũ ciao makĩmatwara handũ nja ya kambĩ, o ta ũrĩa Musa aameerire.

6 Musa agĩcoka akĩra Haruni na ariũ acio angĩ ake Eliazaru na Ithamaru ũũ: “Mũtikareke njuĩrĩ cia mĩtwe yanyu ciikare itarĩ thondeke o na kana mũtembũre nguo cianyu,+ nĩguo mũtigakue na nĩgetha Ngai ndakarakarĩre kĩrĩndĩ gĩothe. Ariũ a ithe wanyu a nyũmba yothe ya Isiraeli nĩ mekũrĩrĩra andũ acio Jehova oragĩte na mwaki. 7 Mũtiagĩrĩirũo gũthiĩ nja ya mũromo wa hema ya gũtũnganwo, kwaga ũguo nĩ mũgũkua, nĩ gũkorũo maguta ma gũitanĩrĩrio ma Jehova marĩ igũrũ rĩanyu.”+ Nĩ ũndũ ũcio magĩka kũringana na uuge wa Musa.

8 Jehova agĩcoka akĩra Haruni ũũ: 9 “Ndũkananyue ndibei o na kana kĩndũ kĩngĩ kĩngĩtũma mũndũ arĩĩo, wee o hamwe na ariũ aku arĩa mũrĩ nao, rĩrĩa mũgũtonya hema-inĩ ya gũtũnganwo,+ nĩguo mũtigakue. Ũcio nĩ watho wa gũtũũra njiarũa-inĩ cianyu ciothe. 10 Nĩgetha gũkagĩaga na ngũrani ya kĩndũ kĩrĩa kĩamũre na kĩrĩa gĩtarĩ kĩamũre na ngũrani ya kĩndũ kĩrĩ na thahu na gĩtarĩ na thahu,+ 11 na nĩ ũndũ wa kũruta Aisiraeli mawatho marĩa mothe Jehova arĩtie kũgerera Musa.”+

12 Musa agĩcoka akĩaria na Haruni na ariũ ake acio maatigarire, Eliazaru na Ithamaru, akĩmeera: “Oyai kĩrĩa gĩtigarĩte harĩ igongona rĩa mũtu kuuma magongona-inĩ ma Jehova ma gũcinwo na mwaki na mũkĩrĩe kĩrĩ mũgate ũtarĩ mwĩkĩre ndawa ya kũimbia mũrĩ hakuhĩ na kĩgongona,+ nĩ gũkorũo kĩu nĩ kĩndũ gĩtheru mũno.+ 13 Mwagĩrĩirũo gũkĩrĩĩra handũ hatheru,+ tondũ rĩu nĩ igai rĩaku na igai rĩa ariũ aku kuuma magongona-inĩ ma Jehova ma gũcinwo na mwaki, nĩ gũkorũo ũguo nĩguo njathĩtwo. 14 Ningĩ nĩ mwagĩrĩirũo kũrĩa gĩthũri kĩa igongona rĩa gũcũgio, na kũgũrũ kwa igai rĩamũre+ mũrĩ handũ hatheru, wee o hamwe na ariũ aku na aarĩ aku arĩa ũrĩ nao,+ tondũ nĩ ũheetwo indo icio irĩ igai rĩaku na igai rĩa ariũ aku kuuma harĩ magongona ma ũiguano ma Aisiraeli. 15 Marĩrehaga kũgũrũ kwa igai rĩamũre na gĩthũri kĩa igongona rĩa gũcũgio hamwe na magongona ma gũcinwo na mwaki ma maguta, nĩguo macũgie igongona rĩa gũcũgio mbere na thutha mbere ya Jehova; tondũ nĩ rĩgũtuĩka igai rĩa gũtũũra harĩ wee na harĩ ariũ aku arĩa ũrĩ nao,+ o ta ũrĩa Jehova athanĩte.”

16 Na rĩrĩ, Musa agĩcaria na kĩyo mbũri ya igongona rĩa mehia,+ na akĩmenya atĩ nĩ gũcinwo yacinĩtwo. Kwoguo akĩrakarĩra Eliazaru na Ithamaru, ariũ a Haruni arĩa maatigarĩte, na akiuga: 17 “Mwagire kũrĩa nyamũ ya igongona rĩa mehia mũrĩ handũ hatheru nĩkĩ,+ na kĩu nĩ kĩndũ gĩtheru mũno na amũheete nĩgetha mũũragio mehia ma kĩrĩndĩ na mũgakĩrutagĩra igongona rĩa kũhumbĩra mehia mbere ya Jehova? 18 Atĩrĩrĩ, thakame yayo ndĩtwarĩtwo thĩinĩ wa harĩa hatheru.+ Nĩ mũkwagĩrĩirũo kũrĩa nyamũ ĩyo mũrĩ handũ hatheru, o ta ũrĩa njathĩtwo.” 19 Haruni agĩcokeria Musa ũũ: “Atĩrĩrĩ, ũmũthĩ marutire igongona rĩao rĩa mehia na igongona rĩao rĩa njino mbere ya Jehova,+ na maũndũ maya macoka mangora. Korũo nĩ ndĩire nyamũ ya igongona rĩa mehia ũmũthĩ-rĩ, hihi ũndũ ũcio nĩ ũngĩkenirie Jehova?” 20 Rĩrĩa Musa aaiguire ũguo, akĩiganĩra.

11 Jehova agĩcoka akĩra Musa na Haruni atĩrĩ: 2 “Ĩrai Aisiraeli ũũ, ‘Ici nĩcio ciũmbe iria ĩrĩ muoyo cia gũkũ thĩ iria mũngĩrĩa:+ 3 Nyamũ yothe ĩrĩ mahũngũ marekanĩtie na ĩrĩ na mwatũka mahũngũ-inĩ mayo na ĩrĩa ĩcokagia ithagumia* no ĩrĩo.

4 “‘No mũtiagĩrĩirũo kũrĩa nyamũ ici iria icokagia ithagumia* kana irĩ mahũngũ marekanĩtie: ngamĩra, tondũ nĩ ĩcokagia ithagumia* no ndĩrĩ mahũngũ marekanĩtie. Kĩu nĩ kĩndũ kĩrĩ thahu harĩ inyuĩ.+ 5 O na gĩkami,*+ tondũ nĩ gĩcokagia ithagumia* no gĩtirĩ mahũngũ marekanĩtie. Kĩu nĩ kĩndũ kĩrĩ thahu harĩ inyuĩ. 6 O na mbũkũ, tondũ nĩ ĩcokagia ithagumia* no ndĩrĩ mahũngũ marekanĩtie. Kĩu nĩ kĩndũ kĩrĩ thahu harĩ inyuĩ. 7 O na ngũrũe,+ tondũ nĩ ĩrĩ mahũngũ marekanĩtie na nĩ ĩrĩ mwatũka mahũngũ-inĩ no ndĩcokagia ithagumia.* Kĩu nĩ kĩndũ kĩrĩ thahu harĩ inyuĩ. 8 Mũtiagĩrĩirũo kũrĩa nyama cia nyamũ o na ĩmwe ya icio kana mũhutie kĩimba gĩacio. Nyamũ icio nĩ kĩndũ kĩrĩ thahu harĩ inyuĩ.+

9 “‘Ici nĩcio nyamũ iria mũngĩrĩa harĩ iria ciothe irĩ maĩ-inĩ: Kĩndũ o gĩothe kĩrĩ maĩ-inĩ na nĩ kĩrĩ mathagu na ngũũcĩ, gĩkorũo kĩrĩ iria-inĩ kana rũũĩ-inĩ, kĩu no mũrĩe.+ 10 No kĩndũ o gĩothe kĩrĩ iria-inĩ kana rũũĩ-inĩ gĩtarĩ mathagu na ngũũcĩ, harĩ ciũmbe ciothe iria ithiaga irĩ gĩkundi na kĩũmbe* kĩngĩ o gĩothe kĩrĩ muoyo kĩrĩa gĩkoragwo maĩ-inĩ, nĩ kĩndũ kĩrĩ magigi harĩ inyuĩ. 11 Nyamũ icio ciagĩrĩire gũkorũo irĩ magigi harĩ inyuĩ, na mũtiagĩrĩirũo kũrĩa nyama ya nyamũ o na ĩmwe yacio+ na no mũhaka muonage ciimba ciacio irĩ magigi. 12 Kĩndũ gĩothe kĩrĩ maĩ-inĩ na gĩtirĩ mathagu na ngũũcĩ nĩ kĩndũ kĩrĩ magigi harĩ inyuĩ.

13 “‘Ici nĩcio ciũmbe iria ciũmbũkaga iria mwagĩrĩirũo kuona irĩ magigi; itiagĩrĩire kũrĩo, nĩ gũkorũo nĩ kĩndũ kĩrĩ magigi: nderi,+ ndiyũ, ngoru ĩrĩa njirũ,+ 14 hũngũ ĩrĩa ndune na mũthemba wothe wa hũngũ ĩrĩa njirũ, 15 mũthemba wothe wa ihuru, 16 nyaga, ndundu, gĩthimambũri,* mũthemba wothe wa rwĩgĩ, 17 ndundu ĩrĩa nini, cua,* ndundu ĩrĩa ĩrĩ matũ maraihu, 18 thambĩri, gakuua-ũrogi, ngoru, 19 njũũ, mũthemba wothe wa cũcũ wa njoka, hudihuda, na rũhuhu. 20 Kĩũmbe gĩothe kĩrĩ mathagu harĩ iria ithiaga irĩ gĩkundi* na gĩthiaga na magũrũ mothe mana nĩ kĩndũ kĩrĩ magigi harĩ inyuĩ.

21 “‘Harĩ ciũmbe iria ithiaga irĩ gĩkundi na ithiaga na magũrũ mothe mana, no mũrĩe o iria tu irĩ na magũrũ marĩ na marũngo igũrũ wa magũrũ macio mangĩ ma gũtũma ikahota kũrũga thĩinĩ wa thĩ. 22 Harĩ icio no mũrĩe ici: mĩthemba ngũrani ya ngigĩ iria ithaamathaamaga, ngigĩ ingĩ ingĩrĩo,+ ngiria na ndaahi. 23 Ciũmbe iria ingĩ ciothe ithiaga irĩ gĩkundi na irĩ magũrũ mana nĩ kĩndũ kĩrĩ magigi harĩ inyuĩ. 24 Mũngĩka maũndũ maya mũrĩkoragwo mwĩthahĩtie. Mũndũ wothe ũrĩhutagia ciimba ciacio arĩkoragwo na thahu o nginya hwaĩ-inĩ.+ 25 Mũndũ o wothe ũrĩkuuaga kĩimba o gĩothe gĩacio agĩrĩirũo gũthambia nguo ciake;+ arĩkoragwo arĩ na thahu o nginya hwaĩ-inĩ.

26 “‘Nyamũ o yothe ĩrĩ mahũngũ marekanĩtie no ndĩrĩ mwatũka na ndĩcokagia ithagumia* nĩ kĩndũ kĩrĩ thahu harĩ inyuĩ. Mũndũ wothe ũrĩcihutagia nĩ arĩgĩaga na thahu.+ 27 Kĩũmbe gĩothe kĩrĩ muoyo gĩthiaga na ithu* harĩ ciũmbe irĩ muoyo iria ithiaga na magũrũ mothe mana nĩ kĩndũ kĩrĩ thahu harĩ inyuĩ. Mũndũ wothe ũrĩhutagia ciimba ciacio arĩkoragwo na thahu o nginya hwaĩ-inĩ. 28 Mũndũ angĩkuua ciimba ciacio agĩrĩirũo gũthambia nguo ciake,+ na arĩkoragwo arĩ na thahu o nginya hwaĩ-inĩ.+ Ciũmbe icio nĩ kĩndũ kĩrĩ thahu harĩ inyuĩ.

29 “‘Ici nĩcio ciũmbe cia gũkũ thĩ iria ithiaga irĩ gĩkundi iria irĩ thahu harĩ inyuĩ: huko, mbĩa,+ mĩthemba yothe ya njagathi, 30 gĩthenyũka, njagathi ĩrĩa nene, kĩgurumũki, njagathi ya mũthanga-inĩ, na kĩĩmbu. 31 Ciũmbe icio ithiaga irĩ gĩkundi nĩ kĩndũ kĩrĩ thahu harĩ inyuĩ.+ Mũndũ wothe ũrĩhutagia ciimba ciacio arĩkoragwo na thahu o nginya hwaĩ-inĩ.+

32 “‘Kĩndũ o gĩothe kĩrĩa cingĩgwĩra rĩrĩa ciakua nĩ kĩrĩgĩaga thahu, kĩndũ gĩthondeketwo na mbaũ, nguo, ngothi, kana nguo ya ikũnia. Kĩndũ o gĩothe kĩhũthagĩrũo kĩagĩrĩire kũrikio maĩ-inĩ, na kĩrĩkoragwo kĩrĩ na thahu o nginya hwaĩ-inĩ; thutha ũcio nĩ kĩrĩkoragwo gĩtarĩ na thahu. 33 Cingĩgwa nyũngũ-inĩ ya rĩũmba, mwagĩrĩirũo kũmĩũraga, na kĩndũ o gĩothe kĩrarĩ thĩinĩ wayo kĩrĩkoragwo na thahu.+ 34 Mũthemba o wothe wa irio iria ingĩhutania na maĩ kuuma nyũngũ-inĩ ta ĩyo nĩ irĩgĩaga na thahu, na kĩndũ o gĩothe gĩa kũnyuo kĩngĩkorũo nyũngũ-inĩ ta ĩyo nĩ kĩrĩgĩaga na thahu. 35 Kĩndũ o gĩothe ciimba ciacio ingĩgwĩra nĩ kĩrĩgĩaga na thahu. O na angĩkorũo nĩ riiko rĩa kũruga keki kana kariiko kanini, ciagĩrĩire kuunangwo icunjĩ. Irĩkoragwo na thahu, na irĩikaraga irĩ na thahu harĩ inyuĩ. 36 No itherũkĩro na irima rĩa kũiga maĩ tu itarĩgĩaga na thahu, ĩndĩ mũndũ ũrĩa ũrĩhutagia ciimba ciacio nĩ arĩgĩaga na thahu. 37 Ciimba ciacio ingĩgwĩra mbegũ ya mũmera ĩrĩa ĩkũhandwo, mbegũ ĩyo ndĩrĩgĩaga na thahu. 38 No angĩkorũo mbegũ ĩyo nĩ ĩitĩrĩirio maĩ naguo mwena ũmwe wa kĩimba gĩa ciũmbe icio ũmĩgwĩre, mbegũ ĩyo nĩ ĩrĩkoragwo na thahu harĩ inyuĩ.

39 “‘Na rĩrĩ, nyamũ o yothe mwĩtĩkĩrĩtio kũrĩa ĩngĩkua, mũndũ o wothe ũngĩhutia kĩimba kĩayo arĩkoragwo arĩ na thahu o nginya hwaĩ-inĩ.+ 40 Mũndũ o wothe angĩrĩa nyama ya kĩimba kĩayo agĩrĩirũo gũthambia nguo ciake, na arĩkoragwo na thahu o nginya hwaĩ-inĩ.+ Mũndũ o wothe angĩkuua kĩimba kĩayo agĩrĩirũo gũthambia nguo ciake, na arĩkoragwo na thahu o nginya hwaĩ-inĩ. 41 Kĩũmbe gĩothe gĩa gũkũ thĩ harĩ iria ithiaga irĩ gĩkundi nĩ kĩndũ kĩrĩ magigi.+ Gĩtiagĩrĩire kũrĩo. 42 Mũtiagĩrĩirũo kũrĩa kĩũmbe o gĩothe gĩthiaga na nda, kĩũmbe o gĩothe gĩthiaga na magũrũ mothe mana, kana kĩũmbe o gĩothe gĩa gũkũ thĩ harĩ iria ithiaga irĩ gĩkundi na gĩkoragwo na magũrũ maingĩ, nĩ gũkorũo ciũmbe icio nĩ kĩndũ kĩrĩ magigi.+ 43 Mũtikanethahie na kĩũmbe o gĩothe harĩ iria ithiaga irĩ gĩkundi, na mũtikanethũkie mũgĩe thahu kũgerera harĩ cio.+ 44 Nĩ gũkorũo niĩ nĩ niĩ Jehova Ngai wanyu,+ na no mũhaka mwĩtherie mũkorũo mũrĩ atheru,+ tondũ niĩ ndĩ mũtheru.+ Nĩ ũndũ ũcio mũtiagĩrĩirũo gwĩthahia na kĩũmbe o gĩothe harĩ iria ithiagĩra thĩ irĩ gĩkundi. 45 Nĩ gũkorũo niĩ nĩ niĩ Jehova, ũrĩa ũmũtongoretie kuuma bũrũri-inĩ wa Misiri nĩguo ndĩmenyithanie kũrĩ inyuĩ atĩ nĩ niĩ Ngai,+ na no mũhaka mũkorũo mũrĩ atheru,+ tondũ niĩ ndĩ mũtheru.+

46 “‘Ũcio nĩguo watho wĩgiĩ nyamũ, ciũmbe iria ciũmbũkaga, kĩũmbe* gĩothe kĩrĩ muoyo kĩrĩa gĩthiagĩra maĩ-inĩ, na wĩgiĩ ciũmbe* ciothe ithiagĩra thĩ irĩ gĩkundi, 47 nĩgetha hagĩe ngũrani gatagatĩ-inĩ ga kĩndũ kĩrĩ thahu na kĩrĩa gĩtarĩ thahu na gatagatĩ-inĩ ga ciũmbe iria irĩ muoyo iria ingĩrĩo na iria itangĩrĩo.’”+

12 Na rĩrĩ, Jehova agĩthiĩ na mbere kwĩra Musa ũũ: 2 “Ĩra Aisiraeli atĩrĩ, ‘Mũtumia angĩgĩa nda na aciare kahĩĩ, arĩkoragwo arĩ na thahu thikũ mũgwanja, o ta ũrĩa akoragwo arĩ na thahu matukũ ma ihinda rĩake rĩa mweri.+ 3 Na mũthenya wa kanana wakinya, nyama ya gĩkonde kĩa igũrũ ya kahĩĩ kau yagĩrĩirũo kũruithio.+ 4 Mũtumia ũcio agĩrĩirũo gũthiĩ na mbere gwĩtheria kwa ihinda rĩa thikũ ingĩ 33 nĩ ũndũ wa kuura thakame. Ndagĩrĩirũo kũhutia kĩndũ o gĩothe kĩamũre, na ndagĩrĩirũo gũthiĩ harĩa hatheru o nginya arĩkie matukũ make ma gwĩtheria.

5 “‘Angĩciara kairĩtu, arĩkoragwo arĩ na thahu thikũ 14, o ta ũrĩa akoragwo ihinda-inĩ rĩake rĩa mweri. Agĩrĩirũo gũthiĩ na mbere gwĩtheria kwa ihinda rĩa thikũ ingĩ 66 nĩ ũndũ wa kuura thakame. 6 Matukũ make ma gwĩtheria nĩ ũndũ wa mwana wake wa kahĩĩ kana wa kairĩtu mathira, arĩrehaga gatũrũme karĩ mwaka-inĩ wako wa mbere karĩ igongona rĩa njino+ na njui ya ndirahũgĩ kana ndutura ĩrĩ igongona rĩa mehia mũromo-inĩ wa hema ya gũtũnganwo, kũrĩ mũthĩnjĩri-Ngai. 7 Nake akamĩrehe mbere ya Jehova na akaruta igongona rĩa kũhumbĩra mehia nĩ ũndũ wa mũtumia ũcio, nake agathirũo nĩ thahu nĩ ũndũ wake kuura thakame. Ũcio nĩguo watho wĩgiĩ mũtumia ũciarĩte mwana wa kahĩĩ kana wa kairĩtu. 8 No angĩkorũo ndangĩhota kũruta ngʼondu, agĩrĩirũo gũtwara ndutura igĩrĩ kana njui igĩrĩ cia ndirahũgĩ,+ ĩmwe ĩrĩ igongona rĩa njino na ĩyo ĩngĩ ĩrĩ igongona rĩa mehia, nake mũthĩnjĩri-Ngai akaruta igongona rĩa kũhumbĩra mehia nĩ ũndũ wa mũtumia ũcio, nake agathirũo nĩ thahu.’”

13 Jehova agĩthiĩ na mbere kwaria na Musa na Haruni, akiuga ũũ: 2 “Mũndũ angĩimba ngothi-inĩ yake,* agĩe na kĩronda, kana atũnde na hahaane ta hangĩgĩa mũrimũ wa mangũ*+ ngothi-inĩ ĩyo yake agĩrĩirũo kũrehwo kũrĩ Haruni mũthĩnjĩri-Ngai kana kũrĩ ũmwe wa ariũ ake, athĩnjĩri-Ngai.+ 3 Mũthĩnjĩri-Ngai agĩrĩirũo kũbaara handũ hau harwaru ngothi-inĩ ya mũndũ ũcio. Njuĩrĩ ĩrĩa ĩrĩ hau harwaru ĩngĩkorũo ĩcenjetie ĩgatuĩka ya rangi mwerũ kana handũ hau harwaru hakoneka harikĩire na thĩinĩ gũkĩra ngothi yake, ũcio nĩ mũrimũ wa mangũ. Mũthĩnjĩri-Ngai agĩrĩirũo kũhabaara na anĩrĩre atĩ mũndũ ũcio arĩ na thahu. 4 No angĩkorũo gũtũnda kũu kũrĩ ngothi-inĩ ya mũndũ ũcio nĩ kwa rangi mwerũ na kuoneke gũtarikĩire gũkĩra ngothi yake na njuĩrĩ ndĩcenjetie ĩgatuĩka ya rangi mwerũ, mũthĩnjĩri-Ngai agĩrĩirũo kũiga mũndũ ũcio mũrwaru handũ mwanya thikũ mũgwanja.+ 5 Thutha ũcio mũthĩnjĩri-Ngai agĩrĩirũo kũmũbaara mũthenya wa mũgwanja, na kũngĩoneka atĩ handũ hau harwaru hatithiĩte na mbere na hatitheremete ngothi-inĩ, mũthĩnjĩri-Ngai agĩrĩirũo kũiga mũndũ ũcio mũrwaru handũ mwanya thikũ ingĩ mũgwanja.

6 “Mũthĩnjĩri-Ngai agĩrĩirũo kũmũbaara rĩngĩ mũthenya wa mũgwanja, na angĩkorũo handũ hau harwaru nĩ hahoohete na hatitheremete ngothi-inĩ, mũthĩnjĩri-Ngai agĩrĩirũo kwanĩrĩra atĩ mũndũ ũcio ndarĩ na thahu;+ kĩu kĩrarĩ o kĩronda tu. Mũndũ ũcio agĩrĩirũo gũthambia nguo ciake na nĩ arĩthiragwo nĩ thahu. 7 No kĩronda kĩu* kĩngĩkorũo gĩtheremete ngothi-inĩ thutha wa mũndũ ũcio gũthiĩ harĩ mũthĩnjĩri-Ngai nĩguo atherio, nĩ agĩrĩirũo gũthiĩ rĩngĩ* harĩ mũthĩnjĩri-Ngai. 8 Mũthĩnjĩri-Ngai agĩrĩirũo kũbaara kĩronda kĩu, na angĩkorũo nĩ gĩtheremete ngothi-inĩ, mũthĩnjĩri-Ngai agĩrĩirũo kwanĩrĩra atĩ mũndũ ũcio arĩ na thahu. Macio nĩ mangũ.+

9 “Mũndũ angĩnyitwo nĩ mũrimũ wa mangũ, agĩrĩirũo gũtwarũo harĩ mũthĩnjĩri-Ngai, 10 nake mũthĩnjĩri-Ngai agĩrĩirũo kũmũbaara.+ Angĩkorũo ngothi yake ĩrĩ na handũ haimbu na hakagĩa rangi mwerũ na nĩ hatũmĩte njuĩrĩ ĩtuĩke ya rangi mwerũ na hau haimbu hagatũrĩka kĩronda,+ 11 ũcio nĩ mũrimũ mũnene wa mangũ ũrĩ ngothi-inĩ yake, na mũthĩnjĩri-Ngai agĩrĩirũo kwanĩrĩra atĩ mũndũ ũcio arĩ na thahu. Ndagĩrĩirũo kũiga mũndũ ũcio handũ mwanya,+ tondũ arĩ na thahu. 12 Na rĩrĩ, mangũ mangĩtuthũka ngothi-inĩ guothe na mũndũ ũcio aiyũrũo nĩ mũrimũ ũcio wa mangũ kuuma mũtwe nginya kũgũrũ, harĩa hothe mũthĩnjĩri-Ngai angĩhota kuona, 13 na mũthĩnjĩri-Ngai amũbaare na one atĩ mangũ macio nĩ maiyũire ngothi-inĩ yake yothe, agĩrĩirũo kwanĩrĩra atĩ mũndũ ũcio mũrwaru ndarĩ na thahu.* Tondũ ngothi yake yothe nĩ ĩcenjetie ĩgatuĩka ya rangi mwerũ, na ndarĩ na thahu. 14 Ĩndĩ hangĩtũrĩka kĩronda hau ngothi-inĩ ĩyo, arĩkoragwo arĩ na thahu. 15 Mũthĩnjĩri-Ngai ona kĩronda kĩu gĩtũrĩkĩte, agĩrĩirũo kwanĩrĩra atĩ mũndũ ũcio arĩ na thahu.+ Kĩronda kĩu gĩtũrĩkĩte kĩrĩ na thahu. Macio nĩ mangũ.+ 16 No kĩronda kĩu gĩtũrĩkĩte kĩngĩcenjia rĩngĩ gĩtuĩke kĩa rangi mwerũ, agĩrĩirũo gũthiĩ kũrĩ mũthĩnjĩri-Ngai. 17 Mũthĩnjĩri-Ngai agĩrĩirũo kũmũbaara,+ na handũ hau harwaru hangĩkorũo hatuĩkĩte ha rangi mwerũ, mũthĩnjĩri-Ngai agĩrĩirũo kwanĩrĩra atĩ mũndũ ũcio mũrwaru ndarĩ na thahu. Mũndũ ũcio ndarĩ na thahu.

18 “Mũndũ angĩgĩa ihũha ngothi-inĩ yake rĩcoke rĩhone, 19 no handũ hau hararĩ na ihũha haimbe na hagĩe rangi mwerũ kana hatũnde na hagĩe rangi ũhaana ta mũtune ũtukanĩte na mwerũ, no mũhaka eyonanie kũrĩ mũthĩnjĩri-Ngai. 20 Mũthĩnjĩri-Ngai agĩrĩirũo kũhabaara,+ na angĩkorũo haroneka harikĩire na thĩinĩ gũkĩra ngothi na njuĩrĩ ya handũ hau nĩ ĩtuĩkĩte ya rangi mwerũ, mũthĩnjĩri-Ngai agĩrĩirũo kwanĩrĩra atĩ mũndũ ũcio arĩ na thahu. Ũcio nĩ mũrimũ wa mangũ ũtuthũkĩire ihũha-inĩ rĩu. 21 No mũthĩnjĩri-Ngai angĩbaara handũ hau one atĩ hatirĩ na njuĩrĩ ya rangi mwerũ na hatirikĩire thĩinĩ gũkĩra ngothi na haroneka hahoohete, mũthĩnjĩri-Ngai agĩrĩirũo kũiga mũndũ ũcio handũ mwanya thikũ mũgwanja.+ 22 No gũtũnda kũu kũngĩkorũo gũtheremete ngothi-inĩ, mũthĩnjĩri-Ngai agĩrĩirũo kwanĩrĩra atĩ mũndũ ũcio arĩ na thahu. Ũcio nĩ mũrimũ. 23 No gũtũnda kũu kũngĩikara o handũ hamwe na gũtitheremete-rĩ, kũu no kũhĩa kuumanĩte na ihũha rĩu, na mũthĩnjĩri-Ngai agĩrĩirũo kwanĩrĩra atĩ mũndũ ũcio ndarĩ na thahu.+

24 “Kana mũndũ angĩkorũo na kĩrema kiumanĩte na kũhĩa nĩ mwaki na nyama ya hau harĩ na kĩrema ĩcenjie ĩtuĩke ya rangi ũhaana ta mũtune ũtukanĩte na mwerũ kana rangi mwerũ tu, 25 mũthĩnjĩri-Ngai agĩrĩirũo kũhabaara. Angĩkorũo njuĩrĩ ya handũ hau hatũndĩte nĩ ĩcenjetie ĩgatuĩka ya rangi mwerũ na hakoneka harikĩire na thĩinĩ gũkĩra ngothi, macio nĩ mangũ matuthũkĩire kĩrema-inĩ kĩu, na mũthĩnjĩri-Ngai agĩrĩirũo kwanĩrĩra atĩ mũndũ ũcio arĩ na thahu. Ũcio nĩ mũrimũ wa mangũ. 26 No mũthĩnjĩri-Ngai angĩhabaara one atĩ handũ hau hatũndĩte hatirĩ na njuĩrĩ ya rangi mwerũ na hatirikĩire thĩinĩ gũkĩra ngothi na nĩ hahoohu, mũthĩnjĩri-Ngai agĩrĩirũo kũiga mũndũ ũcio handũ mwanya thikũ mũgwanja.+ 27 Mũthĩnjĩri-Ngai agĩrĩirũo kũmũbaara mũthenya wa mũgwanja, na angĩkorũo gũtũnda kũu nĩ gũtheremete ngothi-inĩ, mũthĩnjĩri-Ngai agĩrĩirũo kwanĩrĩra atĩ mũndũ ũcio arĩ na thahu. Ũcio nĩ mũrimũ wa mangũ. 28 No gũtũnda kũu kũngĩikara o handũ hamwe na gũtitheremete ngothi-inĩ na nĩ kũhoohete, kĩrema kĩu no kũimba tu kĩimbĩte, na mũthĩnjĩri-Ngai agĩrĩirũo kwanĩrĩra atĩ mũndũ ũcio ndarĩ na thahu, tondũ kũu no kũhĩa kuumanĩte na kĩrema kĩu.

29 “Mũndũrũme kana mũtumia angĩgĩa mũrimũ mũtwe kana kĩreru-inĩ, 30 mũthĩnjĩri-Ngai agĩrĩirũo kũbaara mũrimũ ũcio.+ Mũrimũ ũcio ũngĩkorũo ũrikĩire na thĩinĩ gũkĩra ngothi na njuĩrĩ ĩkorũo ĩcenjetie ĩgatuĩka ya rangi wa yerũ na ĩgacekeha, mũthĩnjĩri-Ngai agĩrĩirũo kwanĩrĩra atĩ mũndũ ũcio arĩ na thahu; ũcio nĩ mũrimũ wa ngothi ya mũtwe kana wa nderu. Nĩ mangũ ma mũtwe kana ma kĩreru. 31 No mũthĩnjĩri-Ngai angĩona atĩ mũrimũ ũcio ndũroneka ũrikĩire thĩinĩ gũkĩra ngothi na atĩ hatirĩ na njuĩrĩ njirũ, mũthĩnjĩri-Ngai agĩrĩirũo kũiga mũndũ ũcio mũrwaru handũ mwanya thikũ mũgwanja.+ 32 Mũthĩnjĩri-Ngai agĩrĩirũo kũbaara mũrimũ ũcio mũthenya wa mũgwanja, na angĩkorũo handũ hau harwaru hatitheremete na hatigĩte njuĩrĩ ya rangi wa yerũ na handũ hau harwaru hatironeka harikĩire thĩinĩ gũkĩra ngothi, 33 mũndũ ũcio agĩrĩirũo kwenjwo, no ndagĩrĩirũo kwenja handũ hau harwaru. Na mũthĩnjĩri-Ngai agĩrĩirũo kũiga mũndũ ũcio mũrwaru handũ mwanya thikũ mũgwanja.

34 “Mũthĩnjĩri-Ngai agĩrĩirũo kũbaara rĩngĩ handũ hau harwaru mũthenya wa mũgwanja, na angĩkorũo mũrimũ ũcio wa ngothi ya mũtwe kana wa nderu ndũtheremete ngothi-inĩ na ndũroneka ũrikĩire thĩinĩ gũkĩra ngothi, mũthĩnjĩri-Ngai agĩrĩirũo kwanĩrĩra atĩ mũndũ ũcio ndarĩ na thahu, nake agĩrĩirũo nĩ gũthambia nguo ciake na nĩ arĩthiragwo nĩ thahu. 35 Ĩndĩ mũrimũ ũcio ũngĩtherema ngothi-inĩ ya mũndũ ũcio thutha wake gũtherio, 36 mũthĩnjĩri-Ngai agĩrĩirũo nĩ kũmũbaara, na angĩkorũo mũrimũ ũcio nĩ ũtheremete ngothi-inĩ, mũthĩnjĩri-Ngai ndarabatara kũrora kana mũndũ ũcio arĩ na njuĩrĩ ya rangi wa yerũ; mũndũ ũcio arĩ na thahu. 37 No angĩbaarũo oneke atĩ mũrimũ ũcio ndũtheremete na njuĩrĩ njirũ nĩ ĩmerete handũ hau, mũrimũ ũcio nĩ mũhonu. Mũndũ ũcio ndarĩ na thahu, na mũthĩnjĩri-Ngai agĩrĩirũo kwanĩrĩra atĩ ndarĩ na thahu.+

38 “Mũndũrũme kana mũtumia angĩtũnda ngothi-inĩ* na gũtũnda kũu gũkorũo kũrĩ kwa rangi mwerũ, 39 mũthĩnjĩri-Ngai agĩrĩirũo kũmĩbaara.+ Angĩkorũo ngothi ĩyo ĩtũndĩte ĩgatuĩka ya rangi ũtarĩ mwerũ biũ, tũu nĩ tũthundo tũtangĩgwatanio tũtuthũkĩte ngothi-inĩ. Mũndũ ũcio ndarĩ na thahu.

40 “Mũndũ angĩmunyũka njuĩrĩ ya mũtwe wake na agĩe kĩhara, ndarĩ na thahu. 41 Angĩmunyũka njuĩrĩ mũtwe-inĩ wake mwena wa mbere na agĩe kĩhara ho, ndarĩ na thahu. 42 No handũ hau harĩ na kĩhara ngothi-inĩ ya mũtwe wake kana thiithi-inĩ wake hangĩtũrĩka kĩronda na hagĩe rangi ũhaana ta mũtune ũtukanĩte na mwerũ, macio nĩ mangũ maratuthũka ngothi-inĩ ya mũtwe wake kana thiithi-inĩ wake. 43 Mũthĩnjĩri-Ngai agĩrĩirũo kũmũbaara, na angĩkorũo handũ hau haimbu kuumana na mũrimũ ũcio nĩ ha rangi ũhaana ta mũtune ũtukanĩte na mwerũ kĩhara-inĩ kĩa mũtwe wake kana thiithi-inĩ wake na hahaana ta arĩ mangũ ngothi-inĩ yake-rĩ, 44 mũndũ ũcio arĩ na mangũ. Arĩ na thahu, na mũthĩnjĩri-Ngai agĩrĩirũo kwanĩrĩra atĩ arĩ na thahu nĩ ũndũ wa mũrimũ ũcio ũrĩ mũtwe-inĩ wake. 45 Nake mũndũ ũcio mũrwaru mangũ, agĩrĩirũo gũtembũra nguo ciake na kũreka njuĩrĩ ya mũtwe wake ĩikare ĩtarĩ thondeke na agĩrĩirũo kũhumbĩra nderu* ciake na akaanagĩrĩra ũũ, ‘Ndĩ na thahu, ndĩ na thahu!’ 46 Arĩkoragwo arĩ na thahu hĩndĩ ĩrĩa yothe arĩ na mũrimũ ũcio. Nĩ ũndũ wa gũkorũo arĩ na thahu, agĩrĩirũo gũikaraga arĩ wiki. Arĩikaraga nja ya kambĩ.+

47 “Nguo ĩngĩgĩo nĩ mũrimũ ũcio wa mangũ, ĩrĩ nguo ya guoya kana ya gatani, 48 ũkorũo ũrĩ ndigi-inĩ iria irũgamĩte kana ndigi-inĩ iria ikĩranĩtie cia nguo ĩyo ya gatani kana ya guoya, kana rũũa-inĩ kana kĩndũ-inĩ o gĩothe gĩthondeketwo na rũũa, 49 na kĩrooro kĩa rangi ũhaana ta wa yerũ ũtukanĩte na wa ngirini kana rangi ũhaana ta wĩ mũtune kuuma mũrimũ-inĩ ũcio kĩgĩe nguo ĩyo, rũũa, ndigi iria irũgamĩte, ndigi iria ikĩranĩtie, kana kĩndũ o gĩothe kĩa rũũa, kĩndũ kĩu nĩ kũgĩo kĩgĩtwo nĩ mangũ, na kĩndũ kĩu kĩagĩrĩire kuonio mũthĩnjĩri-Ngai. 50 Mũthĩnjĩri-Ngai agĩrĩirũo kũbaara mũrimũ ũcio, na kĩndũ kĩu kĩgĩtwo nĩ mũrimũ ũcio no mũhaka akĩige handũ mwanya thikũ mũgwanja.+ 51 Angĩbaara mũrimũ ũcio mũthenya wa mũgwanja na one atĩ nĩ ũtheremete nguo-inĩ ĩyo, ndigi-inĩ iria irũgamĩte, ndigi-inĩ iria ikĩranĩtie, kana rũũa-inĩ (gũtekũmakania ũrĩa rũũa rũu rũhũthagĩrũo), ũcio nĩ mũrimũ mũũru mũno wa mangũ, na kĩndũ kĩu kĩrĩ na thahu.+ 52 Agĩrĩirũo gũcina nguo ĩyo kana ndigi icio irũgamĩte kana ndigi icio ikĩranĩtie nguo-inĩ ya guoya kana gatani-inĩ kana kĩndũ o gĩothe kĩa rũũa kĩrĩa kĩgĩte na mũrimũ ũcio, nĩ gũkorũo macio nĩ mangũ moru mũno. Kĩndũ kĩu kĩagĩrĩire gũcinwo na mwaki.

53 “Ĩndĩ mũthĩnjĩri-Ngai angĩbaara kĩndũ kĩu na mũrimũ ũkorũo ndũtheremete nguo-inĩ kana ndigi-inĩ iria irũgamĩte kana ndigi-inĩ iria ikĩranĩtie kana kĩndũ-inĩ o gĩothe kĩa rũũa, 54 mũthĩnjĩri-Ngai agĩrĩirũo gwathana kĩndũ kĩu kĩgĩtwo nĩ mũrimũ ũcio gĩthambio, na akĩige handũ mwanya thikũ ingĩ mũgwanja. 55 Mũthĩnjĩri-Ngai acoke abaare kĩndũ kĩu kĩgĩtwo nĩ mũrimũ ũcio thutha wakĩo gũthambio wega. Angĩkorũo harĩa hagĩtwo nĩ mũrimũ ũcio hatironeka hacenjetie, o na angĩkorũo mũrimũ ũcio ndũtheremete, kĩndũ kĩu kĩrĩ na thahu. Wagĩrĩirũo gũgĩcina na mwaki tondũ nĩ kĩrĩtwo mwena wa na thĩinĩ, kana wa na nja.

56 “No angĩkorũo mũthĩnjĩri-Ngai nĩ abaarĩte kĩndũ kĩu na handũ hau hagĩtwo nĩ mũrimũ ũcio hakorũo mũrimũ ũcio no gũthirathira ũthirathirĩte thutha wakĩo gũthambio wega-rĩ, agĩrĩirũo kũhatembũra kuuma nguo-inĩ ĩyo kana rũũa-inĩ rũu kana ndigi-inĩ icio irũgamĩte kana ndigi-inĩ icio ikĩranĩtie. 57 No rĩrĩ, mũrimũ ũcio ũngĩoneka handũ hangĩ nguo-inĩ ĩyo kana ndigi-inĩ icio irũgamĩte kana ndigi-inĩ icio ikĩranĩtie kana kĩndũ-inĩ o gĩothe kĩa rũũa, mũrimũ ũcio nĩ gũtherema ũratherema, na kĩndũ o gĩothe kĩgĩtwo nĩ mũrimũ ũcio wagĩrĩirũo gũgĩcina na mwaki.+ 58 No rĩrĩa mũrimũ ũcio wathira nguo-inĩ ĩyo kana ndigi-inĩ icio irũgamĩte kana ndigi-inĩ icio ikĩranĩtie kana kĩndũ-inĩ o gĩothe kĩa rũũa kĩrĩa ũgũthambia, yagĩrĩire gũthambio riita rĩa kerĩ, na nĩ ĩgũkorũo ĩtarĩ na thahu.

59 “Ũcio nĩguo watho wĩgiĩ mũrimũ wa mangũ ũngĩkorũo nguo-inĩ ya guoya kana ya gatani, kana ndigi-inĩ iria irũgamĩte kana ndigi-inĩ iria ikĩranĩtie, kana kĩndũ-inĩ o gĩothe kĩa rũũa, nĩ ũndũ wa gũtua kana kĩrĩ na thahu kana gĩtirĩ na thahu.”

14 Jehova agĩthiĩ na mbere kwaria na Musa akĩmwĩra atĩrĩ: 2 “Ũyũ nĩguo ũrĩkoragwo ũrĩ watho wa mũndũ ũrĩ na mangũ mũthenya ũrĩa arĩtheragio, hĩndĩ ĩrĩa arĩtwaragwo kũrĩ mũthĩnjĩri-Ngai.+ 3 Mũthĩnjĩri-Ngai arĩthiaga nja ya kambĩ na akamũbaara. Angĩkorũo mũndũ ũcio ũrĩ na mangũ nĩ ahonete mangũ macio, 4 mũthĩnjĩri-Ngai arĩmwathaga arehe nyoni igĩrĩ irĩ muoyo na itarĩ thahu, kamũtĩ ka mũtarakwa, ndigi cia rangi mũtune, na mũthobi nĩgetha atherio.+ 5 Mũthĩnjĩri-Ngai agĩrĩirũo gwathana nyoni ĩmwe yũragĩrũo nyũngũ-inĩ ya rĩũmba igũrũ rĩa maĩ ma handũ haratherera. 6 No nyoni ĩyo ĩngĩ ĩrĩ muoyo agĩrĩirũo kũmĩoya hamwe na kamũtĩ ka mũtarakwa, ndigi cia rangi mũtune, na mũthobi, na acirikie irĩ hamwe thakame-inĩ ya nyoni ĩyo yũragĩirũo igũrũ rĩa maĩ ma handũ haratherera. 7 Acoke aminjaminje thakame ĩyo maita mũgwanja harĩ mũndũ ũcio ũretheria mangũ na anĩrĩre atĩ mũndũ ũcio ndarĩ na thahu, nayo nyoni ĩyo ĩrĩ muoyo amĩrekererie werũ-inĩ.+

8 “Mũndũ ũcio ũretheria no mũhaka athambie nguo ciake na enje njuĩrĩ yake yothe na ethambe na maĩ, na nĩ arĩthiragwo nĩ thahu. Thutha ũcio no acoke kambĩ-inĩ, no agĩrĩirũo gũikara nja ya hema yake ihinda rĩa thikũ mũgwanja. 9 Mũthenya wa mũgwanja agĩrĩirũo kwenja njuĩrĩ yothe ĩrĩ mũtwe-inĩ wake na kĩreru-inĩ gĩake na mbutu ciake.* Na thutha wa kwenja njuĩrĩ yake yothe, agĩrĩirũo gũthambia nguo ciake na ethambe na maĩ, na nĩ arĩthiragwo nĩ thahu.

10 “Mũthenya wa kanana agĩrĩirũo gũtwara tũtũrũme twĩrĩ tũtarĩ na kaũgũ, kamwatĩ kamwe karĩ mwaka-inĩ wako wa mbere na gatarĩ na kaũgũ,+ icunjĩ ithatũ harĩ ikũmi cia eba* cia mũtu mũhinyu ũtukanĩtio na maguta ũrĩ igongona rĩa mũtu,+ na maguta gĩthimi kĩa logi ĩmwe;*+ 11 nake mũthĩnjĩri-Ngai ũrĩa ũrĩanagĩrĩra atĩ mũndũ ũcio ndarĩ na thahu agĩrĩirũo kũrehe mũndũ ũcio ũretheria, o hamwe na magongona macio, mbere ya Jehova mũromo-inĩ wa hema ya gũtũnganwo. 12 Mũthĩnjĩri-Ngai arĩoyaga gatũrũme kamwe agakaruta karĩ igongona rĩa mahĩtia+ hamwe na maguta macio ma gĩthimi kĩa logi ĩmwe, na agacicũgia mbere na thutha irĩ igongona rĩa gũcũgio mbere ya Jehova.+ 13 Agacoka agathĩnjĩra gatũrũme kau harĩa igongona rĩa mehia na igongona rĩa njino ithĩnjagĩrũo,+ handũ hatheru, tondũ o ta igongona rĩa mehia, igongona rĩa mahĩtia rĩrĩkoragwo rĩrĩ rĩa mũthĩnjĩri-Ngai.+ Kĩu nĩ kĩndũ gĩtheru mũno.+

14 “Mũthĩnjĩri-Ngai arĩcokaga akoya thakame ĩmwe ya igongona rĩu rĩa mahĩtia, na mũthĩnjĩri-Ngai ũcio akamĩhaka moni-inĩ ya gũtũ kwa ũrĩo kwa mũndũ ũcio ũretheria na kĩara-inĩ kĩrĩa kĩnene gĩa guoko gwake kwa ũrĩo na kĩara-inĩ kĩrĩa kĩnene gĩa kũgũrũ gwake kwa ũrĩo. 15 Ningĩ mũthĩnjĩri-Ngai akoya mamwe ma maguta macio ma gĩthimi kĩa logi ĩmwe+ na akamaitĩrĩria rũhĩ-inĩ rwake mwene rwa ũmotho. 16 Mũthĩnjĩri-Ngai agacoka agatobokia kĩara gĩake kĩa ũrĩo maguta-inĩ macio marĩ rũhĩ-inĩ rwake rwa ũmotho na agataatia maguta mamwe na kĩara gĩake maita mũgwanja mbere ya Jehova. 17 Thutha ũcio mũthĩnjĩri-Ngai akahaka maguta mamwe ma marĩa matigara rũhĩ-inĩ rwake moni-inĩ ya gũtũ kwa ũrĩo kwa mũndũ ũcio ũretheria na kĩara-inĩ kĩrĩa kĩnene gĩa guoko gwake kwa ũrĩo na kĩara-inĩ kĩrĩa kĩnene gĩa kũgũrũ gwake kwa ũrĩo igũrũ rĩa thakame ya igongona rĩa mahĩtia. 18 Mũthĩnjĩri-Ngai agĩrĩirũo kũhaka maguta marĩa matigara rũhĩ-inĩ rwake mũtwe-inĩ wa mũndũ ũcio ũretheria, na njĩra ĩyo mũthĩnjĩri-Ngai akaruta igongona rĩa kũhumbĩra mehia ma mũndũ ũcio mbere ya Jehova.+

19 “Mũthĩnjĩri-Ngai arĩrutaga igongona rĩa mehia+ nĩguo ahumbĩre mehia ma mũndũ ũcio ũretheria thahu wake, na thutha ũcio agathĩnja nyamũ ya igongona rĩa njino. 20 Ningĩ mũthĩnjĩri-Ngai akarutĩra igongona rĩa njino na igongona rĩa mũtu+ kĩgongona-inĩ, na njĩra ĩyo mũthĩnjĩri-Ngai akaruta igongona rĩa kũhumbĩra mehia ma mũndũ ũcio,+ nake agathirũo nĩ thahu.+

21 “No mũndũ ũcio angĩkorũo arĩ mũthĩni na ndarĩ na ũhoti mũnene, agĩrĩirũo kũrehe gatũrũme kamwe karĩ igongona rĩa mahĩtia nĩ ũndũ wa igongona rĩa gũcũgio, nĩgetha ahumbĩre mehia make, na arehe gĩcunjĩ kĩmwe harĩ ikũmi kĩa eba* kĩa mũtu mũhinyu ũtukanĩtio na maguta ũrĩ igongona rĩa mũtu, maguta ma gĩthimi kĩa logi ĩmwe, 22 na ndutura igĩrĩ kana njui igĩrĩ cia ndirahũgĩ, kũringana na ũhoti wake. Ĩmwe ĩrĩkoragwo ĩrĩ ya igongona rĩa mehia, nayo ĩyo ĩngĩ ĩrĩkoragwo ĩrĩ ya igongona rĩa njino.+ 23 Mũthenya wa kanana+ agĩrĩirũo kũrehe indo icio kũrĩ mũthĩnjĩri-Ngai mũromo-inĩ wa hema ya gũtũnganwo mbere ya Jehova nĩguo atherio.+

24 “Mũthĩnjĩri-Ngai arĩoyaga gatũrũme kau ka igongona rĩa mahĩtia+ hamwe na maguta macio ma gĩthimi kĩa logi ĩmwe, na mũthĩnjĩri-Ngai ũcio agacicũgia mbere na thutha irĩ igongona rĩa gũcũgio mbere ya Jehova.+ 25 Agacoka agathĩnja gatũrũme kau ka igongona rĩa mahĩtia, mũthĩnjĩri-Ngai ũcio akoya thakame ĩmwe ya igongona rĩu rĩa mahĩtia akamĩhaka moni-inĩ ya gũtũ kwa ũrĩo kwa mũndũ ũcio ũretheria na kĩara-inĩ kĩrĩa kĩnene gĩa guoko gwake kwa ũrĩo na kĩara-inĩ kĩrĩa kĩnene gĩa kũgũrũ gwake kwa ũrĩo.+ 26 Mũthĩnjĩri-Ngai agaitĩrĩria maguta mamwe rũhĩ-inĩ rwake mwene rwa ũmotho,+ 27 namo maguta macio marĩ rũhĩ-inĩ rwake rwa ũmotho akoya mamwe na kĩara gĩake kĩa ũrĩo agataatia maita mũgwanja mbere ya Jehova. 28 Na mũthĩnjĩri-Ngai akahaka maguta mamwe ma macio marĩ rũhĩ-inĩ rwake moni-inĩ ya gũtũ kwa ũrĩo kwa mũndũ ũcio ũretheria na kĩara-inĩ kĩrĩa kĩnene gĩa guoko gwake kwa ũrĩo na kĩara-inĩ kĩrĩa kĩnene gĩa kũgũrũ gwake kwa ũrĩo, akahaka harĩa hothe ekũhakĩte thakame ya igongona rĩa mahĩtia. 29 Thutha ũcio mũthĩnjĩri-Ngai agĩrĩirũo kũhaka maguta marĩa matigara rũhĩ-inĩ rwake mũtwe-inĩ wa mũndũ ũcio ũretheria, na njĩra ĩyo akahumbĩra mehia ma mũndũ ũcio mbere ya Jehova.

30 “Agĩrĩirũo kũruta ĩmwe ya ndutura icio kana ĩmwe ya njui icio cia ndirahũgĩ, kũringana na ũhoti wake,+ 31 o ĩrĩa angĩhota kũruta, ĩrĩ ya igongona rĩa mehia nayo ĩyo ĩngĩ ĩrĩ ya igongona rĩa njino+ hamwe na igongona rĩa mũtu; nake mũthĩnjĩri-Ngai akaruta igongona rĩa kũhumbĩra mehia ma mũndũ ũcio ũretheria mbere ya Jehova.+

32 “Ũcio nĩguo watho wa mũndũ ũrarĩ na mũrimũ wa mangũ no ndarĩ na ũhoti wa kũruta kĩrĩa kĩrabatarania nĩguo atherio.”

33 Jehova agĩcoka akĩra Musa na Haruni atĩrĩ: 34 “Rĩrĩa mũgaakinya bũrũri-inĩ wa Kanaani,+ ũrĩa ngũmũhe ũtuĩke igai rĩanyu,+ na hũũre nyũmba o yothe na mũrimũ wa mangũ bũrũri-inĩ ũcio wanyu,+ 35 mwene nyũmba ĩyo agĩrĩirũo gũthiĩ kũrĩ mũthĩnjĩri-Ngai amwĩre ũũ, ‘Kũrĩ mũthemba wa mũrimũ ũgĩĩte nyũmba yakwa.’ 36 Nake mũthĩnjĩri-Ngai agĩrĩirũo kũheana watho nĩguo indo ciothe irutwo thĩinĩ wa nyũmba ĩyo atanathiĩ kũbaara mũrimũ ũcio, nĩgetha ndakanĩrĩre atĩ kĩndũ gĩothe kĩrĩ thĩinĩ wa nyũmba ĩyo kĩrĩ na thahu; thutha ũcio mũthĩnjĩri-Ngai agathiĩ akaingĩra nyũmba ĩyo akamĩthuthuria. 37 Agĩrĩirũo kũbaara harĩa hagĩtwo nĩ mũrimũ ũcio, na angĩkorũo thingo cia nyũmba ĩyo irĩ na tũrima twa rangi ũhaana ta wa yerũ ũtukanĩte na wa ngirini kana rangi ũhaana ta mũtune na tũrima tũu tũkorũo tũroneka tũrikĩire gũkĩra rũthingo ruo rwene, 38 mũthĩnjĩri-Ngai agĩrĩirũo kuuma nja ya nyũmba ĩyo athiĩ gacĩra-inĩ ga gũtonya nyũmba ĩyo na amĩhinge kwa ihinda rĩa thikũ mũgwanja.+

39 “Thutha ũcio mũthĩnjĩri-Ngai agacoka mũthenya wa mũgwanja nĩgetha amĩthuthurie. Angĩkorũo mũrimũ ũcio nĩ ũtheremete kũu thingo-inĩ cia nyũmba ĩyo, 40 mũthĩnjĩri-Ngai arĩrutaga watho na no mũhaka mahiga macio magĩĩtwo nĩ mũrimũ ũcio marutwo na mateo nja wa itũũra handũ hatarĩ hatheru. 41 Agacoka agathana nyũmba ĩyo ĩkũrũrũo* biũ mwena wa thĩinĩ, na mũthanga na thimiti iria ciarutwo ciagĩrĩire gũteo nja wa itũũra handũ hatarĩ hatheru. 42 Magacoka magekĩra mahiga mangĩ hau mahiga macio maruta moima, na agĩrĩirũo kũhũthĩra thimiti ĩngĩ na athinge nyũmba ĩyo.

43 “No angĩkorũo mũrimũ ũcio nĩ ũgũcoka rĩngĩ na ũtuthũke thĩinĩ wa nyũmba ĩyo thutha wa mahiga macio kũrutwo na nyũmba ĩyo gũkũrũrũo* na ĩgathingwo rĩngĩ, 44 mũthĩnjĩri-Ngai agĩrĩirũo kũingĩra amĩthuthurie. Angĩkorũo mũrimũ ũcio nĩ ũtheremete thĩinĩ wa nyũmba ĩyo, ũcio nĩ mũrimũ mũũru mũno wa mangũ+ ũrĩ thĩinĩ wa nyũmba ĩyo. Nyũmba ĩyo ĩrĩ na thahu. 45 Agacoka agathana nyũmba ĩyo ĩmomorũo—mahiga mayo, mbaũ ciayo, na mũthanga na thimiti yothe ya nyũmba ĩyo—na igakuuo igatwarũo nja ya itũũra handũ hatarĩ hatheru.+ 46 No mũndũ o wothe angĩingĩra nyũmba ĩyo thikũ o yothe harĩ thikũ icio nyũmba ĩyo ĩhingĩtwo+ arĩkoragwo na thahu o nginya hwaĩ-inĩ;+ 47 na mũndũ o wothe angĩkoma thĩinĩ wa nyũmba ĩyo agĩrĩirũo gũthambia nguo ciake, na mũndũ o wothe angĩrĩĩra thĩinĩ wa nyũmba ĩyo agĩrĩirũo gũthambia nguo ciake.

48 “No mũthĩnjĩri-Ngai angĩũka na one mũrimũ ũcio ndũtheremete thĩinĩ wa nyũmba thutha wa nyũmba ĩyo gũthingwo rĩngĩ, mũthĩnjĩri-Ngai ũcio agĩrĩirũo kwanĩrĩra atĩ nyũmba ĩyo ndĩrĩ na thahu, tondũ mũrimũ ũcio nĩ ũthirĩte. 49 Nĩgetha atherie thahu wa* nyũmba ĩyo, arĩoyaga nyoni igĩrĩ, kamũtĩ ka mũtarakwa, ndigi cia rangi mũtune, na mũthobi.+ 50 Agĩrĩirũo kũũragĩra nyoni ĩmwe nyũngũ-inĩ ya rĩũmba igũrũ rĩa maĩ ma handũ haratherera. 51 Acoke oe kamũtĩ kau ka mũtarakwa, mũthobi, ndigi cia rangi mũtune, na nyoni ĩyo ĩngĩ ĩrĩ muoyo acirikie thakame-inĩ ya nyoni ĩyo yũragĩirũo igũrũ rĩa maĩ ma handũ haratherera, thutha ũcio agĩrĩirũo kũmĩminjaminja aroretie nyũmba-inĩ ĩyo maita mũgwanja.+ 52 Arĩtheragia thahu wa* nyũmba ĩyo na thakame ya nyoni ĩyo, maĩ macio ma handũ haratherera, nyoni ĩyo ĩngĩ ĩrĩ muoyo, kamũtĩ kau ka mũtarakwa, mũthobi ũcio, na ndigi icio cia rangi mũtune. 53 Agacoka akarekereria nyoni ĩyo ĩrĩ muoyo werũ-inĩ nja wa itũũra, na njĩra ĩyo akaruta igongona rĩa mehia nĩ ũndũ wa nyũmba ĩyo, nayo ĩgathirũo nĩ thahu.

54 “Ũcio nĩguo watho ũkoniĩ ũndũ wothe wĩgiĩ mangũ, mũrimũ wa ngothi ya mũtwe kana mũrimũ ũrĩ nderu-inĩ,+ 55 mangũ marĩ nguo-inĩ+ kana nyũmba-inĩ,+ 56 na ũndũ wothe wĩgiĩ kũimba, ironda, na gũtũnda,+ 57 nĩgetha kũmenyekage rĩrĩa kĩndũ kĩrĩ na thahu na rĩrĩa kĩndũ gĩtarĩ na thahu.+ Ũcio nĩguo watho wĩgiĩ mangũ.”+

15 Ningĩ Jehova agĩthiĩ na mbere kwarĩria Musa na Haruni akĩmeera ũũ: 2 “Arĩriai Aisiraeli mũmeere atĩrĩ, ‘Mũndũrũme angĩkorũo akiumwo nĩ gĩko kĩĩga-inĩ gĩake kĩa ũciari,* nĩ arĩkoragwo arĩ na thahu nĩ ũndũ wa gĩko kĩu.+ 3 Arĩ na thahu nĩ ũndũ wa gĩko kĩu, o na angĩkorũo gĩko kĩu nĩ gĩgũthiĩ na mbere kuuma ciĩga-inĩ ciake cia ũciari kana nĩ gĩthingĩkĩte gĩkaga kuuma, arĩ o na thahu.

4 “‘Ũrĩrĩ o wothe ũrĩa mũndũ ũcio ũroimwo nĩ gĩko angĩkomera nĩ ũrĩgĩaga thahu, na kĩndũ o gĩothe angĩikarĩra nĩ kĩrĩgĩaga thahu. 5 Mũndũ ũrĩa ũngĩhutia ũrĩrĩ wa mũndũrũme ũcio no mũhaka athambie nguo ciake na ethambe na maĩ, na arĩkoragwo arĩ na thahu o nginya hwaĩ-inĩ.+ 6 Mũndũ o wothe ũngĩikarĩra kĩndũ gĩgũikarĩirũo nĩ mũndũrũme ũcio ũroimwo nĩ gĩko agĩrĩirũo gũthambia nguo ciake, ethambe na maĩ, na arĩkoragwo arĩ na thahu o nginya hwaĩ-inĩ. 7 Mũndũ o wothe ũngĩhutia mwĩrĩ wa mũndũrũme ũcio ũroimwo nĩ gĩko agĩrĩirũo gũthambia nguo ciake, ethambe na maĩ, na arĩkoragwo arĩ na thahu o nginya hwaĩ-inĩ. 8 Mũndũrũme ũcio ũroimwo nĩ gĩko angĩtuĩra mũndũ ũtarĩ na thahu mata, ũcio watuĩrũo mata agĩrĩirũo gũthambia nguo ciake, ethambe na maĩ, na arĩkoragwo arĩ na thahu o nginya hwaĩ-inĩ. 9 Matandĩko o mothe mũndũrũme ũcio ũroimwo nĩ gĩko angĩikarĩra akuuĩtwo nĩ nyamũ marĩkoragwo na thahu. 10 Mũndũ o wothe angĩhutia kĩndũ o gĩothe gĩgũikarĩirũo nĩwe nĩ arĩgĩaga thahu o nginya hwaĩ-inĩ, na mũndũ o wothe angĩkuua indo icio agĩrĩirũo gũthambia nguo ciake, ethambe na maĩ, na arĩkoragwo arĩ na thahu o nginya hwaĩ-inĩ. 11 Mũndũrũme ũcio ũroimwo nĩ gĩko+ angĩhutia mũndũ ũngĩ atethambĩte moko na maĩ, ũcio wahutio no mũhaka athambie nguo ciake, ethambe na maĩ, na arĩkoragwo arĩ na thahu o nginya hwaĩ-inĩ. 12 Kĩndũ o gĩothe kĩa rĩũmba kĩrĩa mũndũrũme ũcio ũroimwo nĩ gĩko angĩhutia kĩagĩrĩire kũũragwo, na kĩndũ o gĩothe kĩa mbaũ kĩagĩrĩire gũthambio na maĩ.+

13 “‘Gĩko kĩu kĩngĩtiga kuuma na mũndũrũme ũcio akorũo atarĩ na gĩko kĩu rĩngĩ, arĩtaraga thikũ mũgwanja cia gũtherio gwake, na no mũhaka athambie nguo ciake, ethambe na maĩ ma handũ haratherera, na nĩ egũthirũo nĩ thahu.+ 14 Mũthenya wa kanana wakinya, agĩrĩirũo kuoya ndutura igĩrĩ kana njui igĩrĩ cia ndirahũgĩ+ na athiĩ mbere ya Jehova mũromo-inĩ wa hema ya gũtũnganwo na acineane kũrĩ mũthĩnjĩri-Ngai. 15 Na mũthĩnjĩri-Ngai agĩrĩirũo gũciruta igongona, ĩmwe ĩrĩ igongona rĩa mehia nayo ĩyo ĩngĩ ĩrĩ igongona rĩa njino, na njĩra ĩyo mũthĩnjĩri-Ngai ahumbĩre mehia ma mũndũ ũcio mbere ya Jehova megiĩ gĩko kĩu gĩake.

16 “‘Na rĩrĩ, mũndũrũme angiumwo nĩ hinya wake wa ũciari, agĩrĩirũo gwĩthamba mwĩrĩ wake wothe na maĩ na arĩkoragwo arĩ na thahu o nginya hwaĩ-inĩ.+ 17 No mũhaka athambie na maĩ nguo o yothe kana ngothi o yothe ĩgĩtwo nĩ hinya ũcio wa ũciari, na irĩkoragwo irĩ na thahu o nginya hwaĩ-inĩ.

18 “‘Mũndũrũme angĩkoma na mũtumia na oimwo nĩ hinya wa ũciari, magĩrĩirũo gwĩthamba na maĩ na marĩkoragwo marĩ na thahu o nginya hwaĩ-inĩ.+

19 “‘Mũtumia angiura thakame mwĩrĩ-inĩ wake, arĩthiaga na mbere gũkorũo na thahu wa ihinda rĩake rĩa mweri kwa ihinda rĩa thikũ mũgwanja.+ Mũndũ o wothe ũrĩmũhutagia arĩkoragwo arĩ na thahu o nginya hwaĩ-inĩ.+ 20 Kĩndũ o gĩothe arĩkomagĩra hĩndĩ ĩyo ya ihinda rĩake rĩa mweri nĩ kĩrĩgĩaga thahu, na kĩndũ o gĩothe arĩikaragĩra nĩ kĩrĩgĩaga thahu.+ 21 Mũndũ o wothe ũrĩhutagia ũrĩrĩ wa mũtumia ũcio agĩrĩirũo gũthambia nguo ciake, ethambe na maĩ, na arĩkoragwo arĩ na thahu o nginya hwaĩ-inĩ. 22 Mũndũ o wothe ũrĩhutagia kĩndũ o gĩothe gĩikarĩirũo nĩ mũtumia ũcio agĩrĩirũo gũthambia nguo ciake, ethambe na maĩ, na arĩkoragwo arĩ na thahu o nginya hwaĩ-inĩ. 23 Mũtumia ũcio angĩikarĩra ũrĩrĩ kana kĩndũ kĩngĩ, mũndũ ũrĩa ũngĩhutia kĩndũ kĩu arĩkoragwo arĩ na thahu o nginya hwaĩ-inĩ.+ 24 Na mũndũrũme angĩkoma na mũtumia ũcio na ahutio nĩ thahu wa ihinda rĩa mweri rĩa mũtumia ũcio,+ nĩ arĩgĩaga thahu thikũ mũgwanja, na ũrĩrĩ o wothe arĩkomagĩra nĩ ũrĩgĩaga thahu.

25 “‘Mũtumia angiura thakame matukũ maingĩ+ rĩrĩa atarĩ ihinda-inĩ rĩake rĩa mweri,+ kana angiura thakame ya ihinda rĩa mweri matukũ maingĩ gũkĩra ũrĩa oiraga rĩrĩa rĩngĩ, arĩkoragwo arĩ na thahu matukũ macio mothe egũkorũo akiura, o ta matukũ ma thahu wa ihinda rĩake rĩa mweri. 26 Ũrĩrĩ o wothe arĩkomagĩra rĩrĩa aroira ũrĩhaanaga o ta ũrĩrĩ wa rĩrĩa arĩ na thahu wa ihinda rĩake rĩa mweri,+ na kĩndũ o gĩothe arĩikaragĩra kĩrĩgĩaga thahu o ta thahu wa ihinda rĩake rĩa mweri. 27 Mũndũ o wothe ũrĩcihutagia nĩ arĩgĩaga thahu, na no mũhaka athambie nguo ciake, ethambe na maĩ, na arĩkoragwo arĩ na thahu o nginya hwaĩ-inĩ.+

28 “‘No rĩrĩ, atiga kuura, arĩtaraga thikũ mũgwanja, na thutha ũcio nĩ arĩthiragwo nĩ thahu.+ 29 Mũthenya wa kanana wakinya, agĩrĩirũo kuoya ndutura igĩrĩ kana njui igĩrĩ cia ndirahũgĩ,+ atwarĩre mũthĩnjĩri-Ngai mũromo-inĩ wa hema ya gũtũnganwo.+ 30 Na mũthĩnjĩri-Ngai agĩrĩirũo kũruta ĩmwe ĩrĩ igongona rĩa mehia nayo ĩyo ĩngĩ ĩrĩ igongona rĩa njino, na njĩra ĩyo mũthĩnjĩri-Ngai ahumbĩre mehia ma mũtumia ũcio mbere ya Jehova megiĩ thahu wake wa kuura.+

31 “‘Kwoguo no mũhaka wamũranie Aisiraeli kuuma harĩ thahu wao, nĩgetha matigakue thahu-inĩ wao nĩ ũndũ wa gũthahia gĩikaro gĩakwa kĩamũre, kĩrĩa kĩrĩ gatagatĩ-inĩ kao.+

32 “‘Ũcio nĩguo watho wĩgiĩ mũndũrũme ũroimwo nĩ gĩko, mũndũrũme ũrĩ na thahu nĩ ũndũ wa kuumwo nĩ hinya wa ũciari,+ 33 mũtumia ũrĩ na thahu wa ihinda rĩake rĩa mweri,+ mũndũrũme kana mũtumia o wothe ũrĩ na gĩko kĩroima mwĩrĩ-inĩ wake,+ na mũndũrũme ũngĩkoma na mũtumia ũrĩ na thahu.’”

16 Jehova akĩarĩria Musa thutha wa ariũ erĩ a Haruni gũkua nĩ ũndũ wa gũthiĩ mbere ya Jehova.+ 2 Jehova akĩra Musa ũũ: “Ĩra Haruni mũrũ wa nyũkwa atĩ ndagĩrĩirũo gũthiaga hĩndĩ o yothe harĩa hatheru+ thĩinĩ wa gĩtaama,+ mbere ya gĩkunĩko kĩrĩa kĩhumbĩrĩte Ithandũkũ, nĩgetha ndagakue,+ nĩ gũkorũo nĩ ndĩriumagĩra igũrũ rĩa gĩkunĩko kĩu+ ndĩ thĩinĩ wa itu.+

3 “Ici nĩcio indo iria Haruni arĩrehaga rĩrĩa aratonya harĩa hatheru: gategwa ka igongona rĩa mehia+ na ndũrũme ya igongona rĩa njino.+ 4 Agĩrĩirũo kwĩhumba kanjũ ĩrĩa nyamũre ya gatani,+ nakĩo kĩnyatha* gĩa gatani+ kĩagĩrĩire kũhumbĩra mwĩrĩ wake, na nĩ agĩrĩirũo kwĩyoha mũcibi wa gatani+ na mũtwe eyohe kĩremba gĩa gatani.+ Icio nĩ nguo nyamũre.+ Agĩrĩirũo gwĩthamba na maĩ+ na ehumbe nguo icio.

5 “Agĩrĩirũo kuoya kuuma kũrĩ kĩrĩndĩ kĩa Aisiraeli+ tũthenge twĩrĩ nĩ ũndũ wa igongona rĩa mehia na ndũrũme ĩmwe nĩ ũndũ wa igongona rĩa njino.

6 “Ningĩ no mũhaka Haruni arehe ndegwa ĩyo ya igongona rĩa mehia, rĩrĩa ekũruta nĩ ũndũ wake, na arute igongona rĩa kũhumbĩra mehia make+ na ma nyũmba yake.

7 “Nĩ arĩcokaga agatwara mbũri icio igĩrĩ agacirũgamia mbere ya Jehova mũromo-inĩ wa hema ya gũtũnganwo. 8 Haruni arĩcukaga mĩtĩ igũrũ rĩgiĩ mbũri icio igĩrĩ, mũtĩ ũmwe ũrĩ wa Jehova na ũcio ũngĩ ũrĩ wa Azazeli.* 9 Haruni arĩrehaga mbũri ĩrĩa yagwĩrũo nĩ mũtĩ+ wa Jehova na akamĩruta ĩrĩ igongona rĩa mehia. 10 Ĩndĩ mbũri ĩrĩa yagwĩrũo nĩ mũtĩ wa Azazeli yagĩrĩire kũrehwo ĩrĩ muoyo ĩrũgamio mbere ya Jehova nĩgetha igongona rĩa kũhumbĩra mehia rĩrutĩrũo igũrũ rĩayo, nĩguo ĩrekererio werũ-inĩ ĩrĩ ya Azazeli.+

11 “Haruni nĩ arĩrehaga ndegwa ya igongona rĩa mehia, nĩ ũndũ wake mwene, na akaruta igongona rĩa kũhumbĩra mehia make na ma nyũmba yake; thutha ũcio nĩ arĩthĩnjaga ndegwa ĩyo ya igongona rĩa mehia, nĩ ũndũ wake mwene.+

12 “Agacoka akoya rũgĩo rwa mwaki+ rũiyũrĩte makara marakana kuuma kĩgongona-inĩ+ mbere ya Jehova na agatahia ngundi igĩrĩ cia ũbumba ũrĩa mũnungi wega,+ agacirehe thĩinĩ wa gĩtaama.+ 13 Ningĩ nĩ arĩkĩraga ũbumba ũcio mwaki-inĩ mbere ya Jehova,+ na itu rĩa ũbumba ũcio nĩ rĩrĩhumbĩraga gĩkunĩko kĩa Ithandũkũ,+ kĩrĩa kĩrĩ igũrũ rĩa Ũira,+ nĩgetha ndagakue.

14 “Arĩoyaga thakame ĩmwe ya ndegwa ĩyo+ na akamĩtaatia na kĩara gĩake mbere ya gĩkunĩko kĩu mwena wa irathĩro, na agataatia thakame ĩmwe na kĩara gĩake maita mũgwanja mbere ya gĩkunĩko kĩu.+

15 “Agacoka agathĩnja mbũri ya igongona rĩa mehia, nĩ ũndũ wa andũ,+ na akarehe thakame yayo thĩinĩ wa gĩtaama+ na eke na thakame ĩyo+ o ta ũrĩa egwĩka na thakame ya ndegwa; agĩrĩirũo kũmĩtaatia aroretie gĩkunĩko-inĩ na mbere ya gĩkunĩko kĩu.

16 “Agĩrĩirũo kũruta igongona rĩa kũhumbĩra mehia rĩa harĩa hatheru nĩ ũndũ wa mĩtugo ĩtarĩ mĩtheru ya Aisiraeli na nĩ ũndũ wa mahĩtia na mehia mao,+ na ũguo noguo agĩrĩirũo nĩ gwĩka nĩ ũndũ wa hema ya gũtũnganwo, ĩrĩa ĩrĩ gatagatĩ-inĩ kao nĩ ũndũ wa mĩtugo yao ĩtarĩ mĩtheru.

17 “Gũtirĩ mũndũ ũngĩ wagĩrĩirũo gũkorũo thĩinĩ wa hema ya gũtũnganwo kwambĩrĩria rĩrĩa Haruni araingĩra harĩa hatheru kũruta igongona rĩa kũhumbĩra mehia nginya rĩrĩa ariuma. Agĩrĩirũo kũruta igongona rĩa kũhumbĩra mehia make na ma nyũmba yake+ na ma kĩrĩndĩ gĩothe kĩa Isiraeli.+

18 “Acoke oime athiĩ kĩgongona-inĩ,+ kĩrĩa kĩrĩ mbere ya Jehova, na arute igongona rĩa kũhumbĩra mehia nĩ ũndũ wakĩo, acoke oe thakame ĩmwe ya ndegwa ĩyo na thakame ĩmwe ya mbũri ĩyo na ahake hĩa cia kĩgongona kĩu mĩena yothe. 19 Ningĩ agĩtaatĩrie thakame ĩmwe na kĩara maita mũgwanja na agĩtherie na akĩamũre kuumana na mĩtugo ĩtarĩ mĩtheru ya Aisiraeli.

20 “Arĩkia kũruta igongona rĩa kũhumbĩra mehia+ nĩ ũndũ wa harĩa hatheru na nĩ ũndũ wa hema ya gũtũnganwo na nĩ ũndũ wa kĩgongona,+ agĩrĩirũo kũrehe mbũri ĩyo ĩngĩ ĩrĩ muoyo.+ 21 Haruni agĩrĩirũo kũigĩrĩra moko make meerĩ mũtwe-inĩ wa mbũri ĩyo ĩrĩ muoyo na oimbũre igũrũ rĩayo mahĩtia mothe ma Aisiraeli na mehia mao mothe, na amaige igũrũ rĩa mũtwe wa mbũri+ ĩyo na amĩrekererie ĩtwarũo werũ-inĩ nĩ mũndũ ũthuurĩtwo gwĩka ũguo.* 22 Mbũri ĩyo nĩyo ĩgũkuua mehia mao mothe+ ĩmatware bũrũri ũrĩ werũ-inĩ,+ na agĩrĩirũo kũrekereria mbũri ĩyo ĩthiĩ werũ-inĩ ũcio.+

23 “Haruni acoke aingĩre hema-inĩ ya gũtũnganwo na arute nguo cia gatani iria ekĩrire akĩingĩra harĩa hatheru, na aciige hau thĩ. 24 No mũhaka ethambe mwĩrĩ na maĩ+ arĩ handũ hatheru na ekĩre nguo ciake;+ acoke oime arute igongona rĩake rĩa njino+ na igongona rĩa andũ rĩa njino+ na njĩra ĩyo ahumbĩre mehia make na ma andũ.+ 25 Namo maguta ma igongona rĩu rĩa mehia amacinĩre kĩgongona-inĩ marute ndogo.

26 “Mũndũ ũrĩa ũgũthiĩ kũrekereria mbũri ĩyo ya Azazeli+ agĩrĩirũo gũthambia nguo ciake na ethambe na maĩ, na thutha ũcio no acoke kambĩ-inĩ.

27 “Nayo ndegwa ya igongona rĩa mehia na mbũri ya igongona rĩa mehia, iria thakame yacio ĩrehirũo harĩa hatheru kũhumbĩra mehia, ciagĩrĩire gũtwarũo nja ya kambĩ, na njũũa ciacio na nyama ciacio na taatha wacio icinwo na mwaki.+ 28 Ũrĩa ũgũcicina agĩrĩirũo gũthambia nguo ciake na ethambe na maĩ, thutha ũcio no acoke kambĩ-inĩ.

29 “Ũgũtuĩka watho wa gũtũũra ũrũmagĩrĩrũo nĩ inyuĩ: Mweri wa mũgwanja, mũthenya wa ikũmi wa mweri ũcio, mwagĩrĩirũo nĩ kwĩima,* na hatirĩ wĩra mwagĩrĩirũo nĩ kũruta,+ kana nĩ mũndũ ũciarĩirũo bũrũri-inĩ wanyu kana nĩ mũndũ wa kũngĩ ũrĩa ũtũũranagia na inyuĩ. 30 Mũthenya ũcio nĩrĩo igongona rĩa kũhumbĩra mehia+ rĩrĩrutagwo nĩ ũndũ wanyu, nĩgetha mũgatuo atheru. Mũrĩkoragwo mũrĩ atheru kuumana na mehia manyu mothe mbere ya Jehova.+ 31 Nĩ thabatũ ya kũhurũka biũ harĩ inyuĩ, na nĩ mwagĩrĩirũo kwĩima.+ Ũcio nĩ watho wa gũtũũra ũrũmagĩrĩrũo.

32 “Mũthĩnjĩri-Ngai ũrĩa ũitĩrĩirio maguta+ na akaamũrũo* gũtungata arĩ mũthĩnjĩri-Ngai+ ithenya rĩa ithe+ agĩrĩirũo kũruta igongona rĩa kũhumbĩra mehia na ekĩre nguo cia gatani,+ o cio nguo iria nyamũre.+ 33 Arĩrutaga igongona rĩa kũhumbĩra mehia nĩ ũndũ wa handũ harĩa hatheru,+ nĩ ũndũ wa hema ya gũtũnganwo,+ na nĩ ũndũ wa kĩgongona;+ na akaruta igongona rĩa kũhumbĩra mehia nĩ ũndũ wa athĩnjĩri-Ngai na nĩ ũndũ wa kĩrĩndĩ gĩothe kĩa andũ.+ 34 Ũcio ũgũtuĩka watho wa gũtũũra ũrũmagĩrĩrũo nĩ inyuĩ,+ harĩ kũhumbĩra mehia nĩ ũndũ wa Aisiraeli tondũ wa mehia mao mothe riita rĩmwe o mwaka.”+

Agĩgĩka o ta ũrĩa Jehova aathĩte Musa.

17 Jehova agĩthiĩ na mbere kwarĩria Musa akĩmwĩra ũũ: 2 “Aria na Haruni na ariũ ake na Aisiraeli othe na ũmeere atĩrĩ, ‘Ũũ nĩguo Jehova athanĩte:

3 “‘“Mũndũ o wothe wa nyũmba ya Isiraeli angĩthĩnja ndegwa kana gatũrũme kana mbũri thĩinĩ wa kambĩ kana athĩnjĩre nja wa kambĩ, 4 handũ ha kũmĩrehe mũromo-inĩ wa hema ya gũtũnganwo nĩguo arute igongona harĩ Jehova mbere ya gĩikaro kĩu kĩamũre kĩa Jehova, mũndũ ũcio nĩ arĩkoragwo na ihĩtia rĩa thakame. Nĩ aitĩte thakame, na no mũhaka mũndũ ũcio eherio* gatagatĩ-inĩ ka andũ ao. 5 Ũndũ ũcio nĩ ũgũtũma Aisiraeli marehage magongona, marĩa marutagĩra werũ-inĩ, makarehaga kũrĩ Jehova, mũromo-inĩ wa hema ya gũtũnganwo, kũrĩ mũthĩnjĩri-Ngai. Magĩrĩirũo kũruta magongona macio marĩ magongona ma ũiguano harĩ Jehova.+ 6 Nake mũthĩnjĩri-Ngai akaminjaminja thakame igũrũ rĩa kĩgongona kĩa Jehova mũromo-inĩ wa hema ya gũtũnganwo na agacina maguta marute ndogo ĩrĩ mũtararĩko mwega harĩ* Jehova.+ 7 Nĩguo matikarute rĩngĩ magongona kũrĩ ndaimono iria ihaana ta mbũri,*+ iria mahũũraga ũmaraya nacio.+ Ũyũ nĩ watho wa gũtũũra ũrũmagĩrĩrũo nĩ inyuĩ njiarũa-inĩ cianyu ciothe.”’

8 “Wagĩrĩirũo kũmeera atĩrĩ, ‘Mũndũ o wothe wa nyũmba ya Isiraeli kana mũndũ wa kũngĩ ũtũũraga gatagatĩ-inĩ kanyu angĩruta igongona rĩa njino kana iruta 9 na age kũrĩrehe mũromo-inĩ wa hema ya gũtũnganwo nĩguo arĩrutĩre Jehova, no mũhaka eherio* gatagatĩ-inĩ ka andũ ao.+

10 “‘Mũndũ o wothe wa nyũmba ya Isiraeli kana mũndũ wa kũngĩ ũtũũraga gatagatĩ-inĩ kanyu angĩkaarĩa thakame ya mũthemba o wothe,+ hatarĩ nganja nĩ ngeerekeria ũthiũ wakwa harĩ mũndũ* ũcio ũrarĩa thakame ndĩmũũkĩrĩre, na ndĩmweherie* gatagatĩ-inĩ ka andũ ao. 11 Nĩ gũkorũo muoyo* wa kĩũmbe kĩa mwĩrĩ wa nyama ũrĩ thĩinĩ wa thakame,+ na niĩ mwene ndĩmĩheanĩte kĩgongona-inĩ+ nĩguo inyuĩ mũmĩrutage ĩrĩ ya kũhumbĩra mehia manyu, tondũ nĩ thakame ĩhumbagĩra mehia+ kũgerera muoyo* ũrĩa ũrĩ thĩinĩ wayo. 12 Nĩkĩo ndera Aisiraeli ũũ: “Gũtirĩ mũndũ o na ũmwe wanyu wagĩrĩirũo kũrĩa thakame, na gũtirĩ mũndũ wa kũngĩ ũtũũraga gatagatĩ-inĩ kanyu+ wagĩrĩirũo kũrĩa thakame.”+

13 “‘Mũisiraeli kana mũndũ wa kũngĩ ũtũũraga gatagatĩ-inĩ kanyu angĩkorũo akĩhĩta na anyite nyamũ ya gĩthaka kana nyoni ĩngĩrĩo, no mũhaka aite thakame yayo+ na amĩhumbĩre na tĩri. 14 Nĩ gũkorũo muoyo* wa kĩũmbe o gĩothe nĩ thakame yakĩo, tondũ muoyo* ũrĩ thĩinĩ wayo. Nĩkĩo njĩrĩte Aisiraeli ũũ: “Mũtikanarĩe thakame ya kĩũmbe kĩa mũthemba o wothe, tondũ muoyo* wa kĩũmbe o gĩothe nĩ thakame yakĩo. Mũndũ o wothe ũngĩmĩrĩa agĩrĩirũo kweherio.”*+ 15 Mũndũ o wothe, akorũo nĩ mũndũ ũciarĩirũo bũrũri-inĩ wanyu kana nĩ mũndũ wa kũngĩ, angĩrĩa nyamũ yonetwo ĩrĩ nguũ kana ĩtamburĩtwo nĩ nyamũ ya gĩthaka,+ no mũhaka athambie nguo ciake na ethambe na maĩ na arĩkoragwo arĩ na thahu o nginya hwaĩ-inĩ;+ thutha ũcio agathirũo nĩ thahu. 16 Ĩndĩ angĩaga gũcithambia na age gwĩthamba mwĩrĩ, nĩ akoorio nĩ ũndũ wa ihĩtia rĩu rĩake.’”+

18 Jehova agĩthiĩ na mbere kwaria na Musa akĩmwĩra ũũ: 2 “Aria na Aisiraeli na ũmeere atĩrĩ, ‘Niĩ nĩ niĩ Jehova Ngai wanyu.+ 3 Mũtikaneke ũrĩa andũ arĩa marĩ bũrũri wa Misiri mekaga, o kũu mwatũũraga, na mũtikaneke ũrĩa andũ arĩa marĩ bũrũri wa Kanaani mekaga, o kũu ndĩramũtwara.+ Na mũtigathiage na mĩthiĩre yao. 4 Mwagĩrĩirũo kũrũmagĩrĩra matuĩro makwa ma ciira, ningĩ nĩ mwagĩrĩirũo kũrũmagia mawatho makwa na mũthiage kũringana namo.+ Niĩ nĩ niĩ Jehova Ngai wanyu. 5 No mũhaka mũrũmagie mawatho makwa na matuĩro makwa ma ciira; mũndũ o wothe ũrĩkaga maũndũ macio nĩ arĩtũũraga nĩ ũndũ wamo.+ Niĩ nĩ niĩ Jehova.

6 “‘Gũtirĩ mũndũ o na ũmwe wanyu wagĩrĩirũo gũkuhĩrĩria mũndũ wa hakuhĩ metainwo nake nĩguo akome nake.*+ Niĩ nĩ niĩ Jehova. 7 Ndũkanakome na thoguo, na ndũkanakome na maitũguo. Nĩ gũkorũo ũcio nĩ maitũguo, na ndwagĩrĩirũo gũkoma nake.

8 “‘Ndũkanakome na mũtumia wa thoguo.+ Kũu nĩ gũconorithia thoguo.*

9 “‘Ndũkanakome na mũirĩtu ũrĩa mũciaranĩirũo nake, akorũo arĩ mwarĩ wa thoguo kana mwarĩ wa nyũkwa, mũkorũo mũciarĩtwo nyũmba ĩmwe kana mũticiarĩtwo nyũmba ĩmwe.+

10 “‘Ndũkanakome na mũirĩtu wa mũrũguo kana mũirĩtu wa mwarĩguo, tondũ o nĩ njaga yaku mwene.

11 “‘Ndũkanakome na mũirĩtu wa mũtumia wa thoguo, ũrĩa ũciarĩtwo nĩ thoguo, tondũ nĩ mwarĩ wa thoguo.

12 “‘Ndũkanakome na mũirĩtu ũrĩa ũciaranĩirũo na thoguo. Ũcio nĩ mũndũ wa thakame ĩmwe na thoguo.+

13 “‘Ndũkanakome na mũirĩtu ũciaranĩirũo na maitũguo, tondũ nĩ mũndũ wa thakame ĩmwe na maitũguo.

14 “‘Ndũkanaconorithie mũndũ ũciaranĩirũo na thoguo* na njĩra ya gũkoma na mũtumia wake. Ũcio nĩ tataguo.*+

15 “‘Ndũkanakome na mũtumia ũhikĩtio nĩ mũrũguo.+ Ũcio nĩ mũtumia wa mũrũguo, na ndwagĩrĩirũo gũkoma nake.

16 “‘Ndũkanakome na mũtumia wa mũndũ mũciaranĩirũo nake,+ tondũ ũguo nĩ gũconorithia mũndũ ũcio mũciaranĩirũo nake.*

17 “‘Ndũkanakome na mũtumia o hamwe na mũirĩtu wake.+ Ndũkanoe mũirĩtu wa mũrũwe na mũirĩtu wa mwarĩ nĩguo ũkome nao. Acio nĩ andũ a hakuhĩ nake metainwo nake; ĩyo nĩ mĩtugo ya ũũra-thoni.*

18 “‘Ndũkanahikie mũtumia ũciaranĩirũo na mũtumia waku atuĩke mũiruwe+ ũkomage nake mũtumia waku arĩ o muoyo.

19 “‘Ndũkanakuhĩrĩrie mũtumia ũrĩ na thahu wa ihinda rĩake rĩa mweri nĩguo ũkome nake.+

20 “‘Ndũkanakome na mũtumia wa mũndũrũme ũngĩ* wĩthahie wee mwene.+

21 “‘Ndũkanetĩkĩrie mwana o na ũmwe wa rũciaro rwaku arutĩrũo* Moleku.+ Ndũkanathahie rĩĩtwa rĩa Ngai waku na njĩra ĩyo.+ Niĩ nĩ niĩ Jehova.

22 Ndũkanakome na mũndũrũme o ta ũrĩa ũkomaga na mũtumia.+ Kĩu nĩ gĩĩko kĩrĩ magigi.

23 “‘Mũndũrũme ndakanakome na nyamũ ndakagĩe thahu nĩ ũndũ wayo; o na mũtumia ndagĩrĩirũo gũthiĩ harĩ nyamũ nĩguo akome nayo.+ Kũu nĩ kwagarara ũndũ wa ndũire.

24 “‘Mũtigethahie na ũndũ o na ũmwe wa maũndũ macio, nĩ gũkorũo maũndũ macio mothe nĩmo ndũrĩrĩ iria ndĩraingata ciehere mbere yanyu ciĩthahĩtie namo.+ 25 Nĩ ũndũ ũcio, bũrũri ũcio ũrĩ na thahu, na nĩ ngũrehe ihera bũrũri-inĩ ũcio nĩ ũndũ wa mehia maguo, naguo bũrũri ũcio nĩ ũgũtahĩka aikari a kuo.+ 26 Ĩndĩ inyuĩ no mũhaka mũrũmie mawatho makwa na matuĩro makwa ma ciira,+ na mũtikaneke ũndũ o na ũmwe wa maũndũ macio marĩ magigi, mũndũ ũciarĩirũo bũrũri-inĩ wanyu o na kana mũndũ wa kũngĩ ũtũũranagia na inyuĩ.+ 27 Nĩ gũkorũo maũndũ macio mothe marĩ magigi nĩ meekagwo nĩ andũ arĩa maatũũraga bũrũri-inĩ ũrĩa ũrĩ mbere yanyu,+ na rĩu bũrũri ũcio ũrĩ na thahu. 28 Naguo bũrũri ũcio ndũkaamũtahĩka nĩ ũndũ wa kũũthahia ta ũrĩa ũgũtahĩka ndũrĩrĩ iria itũũraga bũrũri-inĩ ũrĩa ũrĩ mbere yanyu. 29 Mũndũ o na ũrĩkũ angĩka ũndũ o na ũmwe wa maũndũ macio marĩ magigi, arĩa othe marĩĩkaga maũndũ macio no mũhaka makeherio* gatagatĩ-inĩ ka andũ ao. 30 No mũhaka mũhingagie maũndũ marĩa mwagĩrĩirũo kũũhingagĩria niĩ na njĩra ya kwaga kũrũmĩrĩra mĩtugo o yothe ĩrĩ magigi ĩrĩa yekagwo mũtanoka,+ nĩguo mũtigethahie nayo. Niĩ nĩ niĩ Jehova Ngai wanyu.’”

19 Jehova agĩthiĩ na mbere kwaria na Musa, akĩmwĩra ũũ: 2 “Aria na kĩrĩndĩ gĩothe kĩa Isiraeli na ũkĩre atĩrĩ, ‘Mwagĩrĩirũo gũkorũo mũrĩ atheru, tondũ niĩ, Jehova Ngai wanyu, ndĩ mũtheru.+

3 “‘O mũndũ gatagatĩ-inĩ kanyu nĩ agĩrĩirũo gũtĩa* nyina na ithe,+ na nĩ mwagĩrĩirũo kũrũmagia thabatũ ciakwa.+ Niĩ nĩ niĩ Jehova Ngai wanyu. 4 Mũtikagarũrũkĩre ngai itarĩ kĩene+ kana mwĩthondekere ngai kuumana na cuma ndwekie.+ Niĩ nĩ niĩ Jehova Ngai wanyu.

5 “‘Na rĩrĩ, mũngĩkorũo mũkĩruta igongona rĩa ũiguano kũrĩ Jehova,+ mwagĩrĩirũo kũrĩruta na njĩra ĩgũtũma mwĩtĩkĩrĩke.+ 6 Rĩagĩrĩire kũrĩo mũthenya ũcio mwaruta igongona rĩu na mũthenya ũrĩa ũkũrũmĩrĩra, no kĩrĩa gĩatigara gũkinyĩria mũthenya wa gatatũ kĩagĩrĩire gũcinwo na mwaki.+ 7 No rĩrĩ, kĩndũ o na kĩrĩkũ kĩarĩo kĩngĩrĩo mũthenya wa gatatũ, ũcio nĩ ũndũ mũũru ũtangĩtĩkĩrĩka. 8 Ũrĩa ũngĩrĩa kĩndũ kĩu nĩ akoorio nĩ ũndũ wa ihĩtia rĩu rĩake tondũ nĩ athahĩtie kĩndũ gĩtheru kĩa Jehova, na mũndũ* ũcio no mũhaka eherio* gatagatĩ-inĩ ka andũ ao.

9 “‘Mũkĩgetha maciaro ma bũrũri wanyu, ndũkanagethe rũteere-inĩ rwa mũgũnda waku ũhinyĩtie na ndũkanonganie matigari ma* magetha maku.+ 10 Ningĩ, ndũkanahaare matigari ma mũgũnda waku wa mĩthabibũ kana ũnganie thabibũ iria citĩkangĩte mũgũnda-inĩ waku wa mĩthabibũ. Wagĩrĩirũo gũtigĩra mũndũ ũrĩa mũthĩni*+ na mũndũ wa kũngĩ ũrĩa ũikaranagia na inyuĩ. Niĩ nĩ niĩ Jehova Ngai wanyu.

11 “‘Mũtikanaiye,+ mũtikanaheenanie,+ na mũtikanahiũranie mũndũ na ũrĩa ũngĩ na njĩra ya wara. 12 Ndũkanehĩte na ũndũ wa maheeni na rĩĩtwa rĩakwa+ nĩ ũndũ ũcio ũthahie rĩĩtwa rĩa Ngai waku. Niĩ nĩ niĩ Jehova. 13 Ndũkanakungie wara woe kĩndũ kĩa mũndũ ũrĩa ũngĩ,+ na ndũkanatunyane.+ Ndwagĩrĩirũo gũikaria mũcara wa mũruti wĩra ũtukũ wothe nginya rũcinĩ.+

14 “‘Ndũkanarume* mũndũ ũtaiguaga kana ũigĩre mũtumumu kĩndũ gĩa kũmũhĩnga,+ na no mũhaka wĩtigĩre Ngai waku.+ Niĩ nĩ niĩ Jehova.

15 “‘No mũhaka mũtuage ciira wanyu na kĩhooto. Ndũkanathutũkanie mũndũ ũrĩa mũthĩni kana ũkorũo na kĩmenyano harĩ mũndũ ũrĩa mũtongu.+ Wagĩrĩirũo gũtuĩra mũndũ ũrĩa ũngĩ na kĩhooto.

16 “‘Ndũkanathiĩ ũgĩtheremagia njambanio kũrĩ andũ anyu.+ Ndũkanaingĩrie muoyo wa* mũndũ ũrĩa ũngĩ ũgwati-inĩ.*+ Niĩ nĩ niĩ Jehova.

17 “‘Ndũkanamene mũrũ wa thoguo ngoro-inĩ yaku.+ Nĩ wagĩrĩirũo ũtigagĩrĩre atĩ nĩ warũnga mũndũ ũrĩa ũngĩ,+ nĩgetha ndũkanyitanĩre nake mehia-inĩ.

18 “‘Ndũkanerĩhĩrie+ kana ũigĩre ariũ a andũ anyu muku, na no mũhaka wende mũndũ ũrĩa ũngĩ o ta ũrĩa wĩyendete wee mwene.+ Niĩ nĩ niĩ Jehova.

19 “‘Mwagĩrĩirũo kũrũmagia maathani makwa: Ndũkanaciarithanie nyamũ ciaku cia mũciĩ cia mĩthemba ĩĩrĩ. Ndũkanahande mũgũnda-inĩ waku mbegũ cia mĩthemba ĩĩrĩ,+ na ndũkanekĩre nguo ĩtumĩtwo na mĩthemba ĩĩrĩ ya ndigi itukanĩtio hamwe.+

20 “‘Na rĩrĩ, mũndũrũme angĩkoma na mũtumia, na mũtumia ũcio akorũo arĩ ndungata ĩĩrĩirũo mũndũrũme ũngĩ, na mũtumia ũcio ndakũũrĩtwo kana akaheo wĩyathi, nĩ hagĩrĩire gũkorũo na ihera. O na kũrĩ ũguo matiagĩrĩirũo kũũragwo, nĩ gũkorũo mũtumia ũcio ndarekereirio. 21 Mũndũrũme ũcio agĩrĩirũo kũrehe igongona rĩake rĩa mahĩtia kũrĩ Jehova mũromo-inĩ wa hema ya gũtũnganwo, ndũrũme ya igongona rĩa mahĩtia.+ 22 Nake mũthĩnjĩri-Ngai akaruta igongona rĩa kũhumbĩra mehia ma mũndũ ũcio akĩhũthĩra ndũrũme ya igongona rĩa mahĩtia mbere ya Jehova nĩ ũndũ wa mehia marĩa ekĩte, nake akoherũo nĩ ũndũ wa mehia macio ekĩte.

23 “‘Rĩrĩa mũkaaingĩra bũrũri ũcio na mũhande mũtĩ o wothe wa irio, mwagĩrĩirũo kuona maciaro maguo marĩ na thahu na matetĩkĩrĩtio.* Mĩaka ĩtatũ marĩkoragwo matetĩkĩrĩtio* harĩ inyuĩ. Matiagĩrĩire kũrĩo. 24 No mwaka-inĩ wa kana, maciaro maguo mothe marĩkoragwo marĩ matheru ma gũkenerũo mbere ya Jehova.+ 25 Naguo mwaka-inĩ wa gatano, no mũrĩe matunda maguo nĩguo muongerere maciaro maguo magetha-inĩ manyu. Niĩ nĩ niĩ Jehova Ngai wanyu.

26 “‘Mũtikanarĩe kĩndũ o na kĩ kĩrĩ na thakame.+

“‘Mũtikanacarie imenyithia cia ũragũri kana mwĩke maũndũ ma ũgo.+

27 “‘Mũtikanenje* njuĩrĩ cia mwena-inĩ wa mĩtwe yanyu* kana gũthũkia mĩthia ya nderu cianyu.+

28 “‘Mũtikanetemange mĩĩrĩ-inĩ yanyu nĩ ũndũ wa mũndũ ũkuĩte,+ na mũtikaneĩkĩre marũũri mĩĩrĩ-inĩ yanyu. Niĩ nĩ niĩ Jehova.

29 “‘Ndũkananyararithie mwarĩguo na njĩra ya kũmũtua mũmaraya,+ nĩguo bũrũri ndũkahũũre ũmaraya na ũiyũre mĩtugo mĩũru.+

30 “‘No mũhaka mũrũmagie thabatũ ciakwa,+ na no mũhaka mwĩtigagĩre* handũ hakwa harĩa hatheru. Niĩ nĩ niĩ Jehova.

31 “‘Mũtikanathiĩ kũrĩ andũ arĩa maragia na maroho,+ na mũtikanacarie ũhoro kũrĩ arĩa marathaga mohoro+ nĩguo mũtikanethahie nao. Niĩ nĩ niĩ Jehova Ngai wanyu.

32 “‘Nĩ wagĩrĩirũo kũrũgamaga mbere ya njuĩrĩ ĩrĩ na mbuĩ,+ na no mũhaka wonagie mũndũ mũkũrũ gĩtĩo,+ na no mũhaka wĩtigagĩre Ngai waku.+ Niĩ nĩ niĩ Jehova.

33 “‘Mũngĩgatũũrania na mũndũ wa kũngĩ bũrũri-inĩ wanyu, mũtikanamũhinyĩrĩrie.+ 34 Mũgeni ũrĩa ũikaranagia na inyuĩ agĩrĩirũo gũtuĩka o ta mũndũ ũciarĩirũo bũrũri-inĩ wanyu,+ na no mũhaka mũmwendage o ta ũrĩa mwĩyendete, nĩ gũkorũo o na inyuĩ mwatũire mũrĩ ageni bũrũri-inĩ wa Misiri.+ Niĩ nĩ niĩ Jehova Ngai wanyu.

35 “‘Mũtikanahũthĩre ithimi itarĩ cia kĩhooto mũgĩthima ũraihu, ũritũ, kana ũingĩ.+ 36 Mwagĩrĩirũo kũhũthagĩra ratiri iria ciagĩrĩire cia gũthima, ithimi iria ciagĩrĩire cia ũritũ, ithimi iria ciagĩrĩire cia indo nyũmũ,* na ithimi iria ciagĩrĩire cia indo iria itariĩ ta maĩ.*+ Niĩ nĩ niĩ Jehova Ngai wanyu ũrĩa wamũrutire bũrũri wa Misiri. 37 Kwoguo no mũhaka mũrũmagie mawatho makwa mothe na matuĩro makwa mothe ma ciira, na no mũhaka mũmarũmagĩrĩre.+ Niĩ nĩ niĩ Jehova.’”

20 Jehova agĩthiĩ na mbere kwaria na Musa akĩmwĩra atĩrĩ: 2 “Ĩra Aisiraeli ũũ, ‘Mũndũ o wothe wa Isiraeli na mũndũ o wothe wa kũngĩ ũikaraga Isiraeli ũrĩa ũrĩneanaga mwana o wothe wa rũciaro rwake kũrĩ Moleku, no mũhaka oragwo.+ Andũ a bũrũri magĩrĩirũo kũmũhũũra na mahiga nginya akue. 3 Niĩ mwene nĩ ndĩrĩerekagĩria ũthiũ wakwa harĩ mũndũ ũcio ndĩmũũkĩrĩre, na nĩ ndĩrĩmweheragia* gatagatĩ-inĩ ka andũ ao, tondũ nĩ aneanĩte rũciaro rũmwe rwake kũrĩ Moleku na agathahia handũ hakwa harĩa hatheru+ na nĩ athahĩtie rĩĩtwa rĩakwa. 4 No andũ acio a bũrũri mangĩhinga maitho mage gũtindanĩra na ũndũ ũrĩa mũndũ ũcio ekĩte wa kũneana ũmwe wa rũciaro rwake kũrĩ Moleku na mage kũmũũraga-rĩ,+ 5 nĩ ngeerekeria ũthiũ wakwa harĩ mũndũ ũcio ndĩmũũkĩrĩre hamwe na famĩlĩ yake.+ Na nĩ ngeeheria* mũndũ ũcio gatagatĩ-inĩ ka andũ ao o hamwe na arĩa othe manyitanĩire nake kũhũũra ũmaraya na Moleku.

6 “‘Mũndũ* ũrĩa ũrĩthiaga kũrĩ andũ arĩa maragia na maroho+ na arĩa marathaga mohoro+ ahũũre ũmaraya wa kĩĩroho nao, no nginya ngookĩrĩra mũndũ* ũcio na ndĩmweherie* gatagatĩ-inĩ ka andũ ao.+

7 “‘No mũhaka mwĩtherie mũtuĩke aamũre,+ tondũ niĩ nĩ niĩ Jehova Ngai wanyu. 8 Na no mũhaka mũrũmagie mawatho makwa na mũmahingagie.+ Niĩ nĩ niĩ Jehova, ũrĩa ũramũtheria.+

9 “‘Mũndũ o wothe angĩruma* ithe kana nyina, no mũhaka oragwo.+ Tondũ nĩ arumĩte ithe kana nyina, we mwene nĩwe ũrĩcokagĩrĩrũo nĩ thakame yake.

10 “‘Na rĩrĩ, mũndũrũme angĩtharia na mũtumia wa mũndũrũme ũngĩ: Mũndũ ũcio ũtharĩtie na mũtumia wa mũndũ ũcio ũngĩ no mũhaka oragwo, mũndũrũme ũcio ũtharĩtie o hamwe na mũtumia ũcio matharĩtie nake.+ 11 Mũndũrũme angĩkoma na mũtumia wa ithe nĩ aconorithĩtie ithe.*+ Eerĩ no mũhaka moragwo. O ene nĩo marĩcokagĩrĩrũo nĩ thakame yao. 12 Mũndũrũme angĩkoma na mũtumia wa mũrũwe, eerĩ no mũhaka moragwo. Nĩ mekĩte ũndũ ũtarĩ wa ndũire. O ene nĩo marĩcokagĩrĩrũo nĩ thakame yao.+

13 “‘Mũndũrũme angĩkoma na mũndũrũme ũngĩ o ta ũrĩa mũndũrũme akomaga na mũtumia, eerĩ nĩ mekĩte ũndũ ũrĩ magigi.+ No mũhaka moragwo. O ene nĩo marĩcokagĩrĩrũo nĩ thakame yao.

14 “‘Mũndũrũme angĩoya mũtumia na nyina wa mũtumia ũcio, kĩu nĩ gĩĩko kĩa ũũra-thoni.*+ Magĩrĩirũo kũmũcina na mwaki, we o hamwe nao,+ nĩgetha mĩtugo ĩyo ya ũũra-thoni ndĩgathiĩ na mbere gatagatĩ-inĩ kanyu.

15 “‘Mũndũrũme angĩkoma na nyamũ, no mũhaka oragwo, o na nyamũ ĩyo mwagĩrĩirũo kũmĩũraga.+ 16 Mũtumia angĩkuhĩrĩria nyamũ akome nayo,+ no mũhaka mũũrage mũtumia ũcio o hamwe na nyamũ ĩyo. No mũhaka moragwo. O ene nĩo marĩcokagĩrĩrũo nĩ thakame yao.

17 “‘Mũndũrũme angĩkoma na mũirĩtu ũrĩa maciaranĩirũo nake, mwarĩ wa ithe kana mwarĩ wa nyina, na one njaga ya mũirĩtu ũcio na mũirĩtu ũcio one njaga ya mũndũrũme ũcio, kĩu nĩ gĩconoko.+ Magĩrĩire kweherio* maitho-inĩ ma ariũ a andũ ao. Nĩ aconorithĩtie mũirĩtu ũcio maciaranĩirũo nake.* Mũndũrũme ũcio no mũhaka orio nĩ ũndũ wa mahĩtia macio make.

18 “‘Mũndũrũme angĩkoma na mũtumia ũrĩ ihinda-inĩ rĩake rĩa mweri, we o hamwe na mũtumia ũcio nĩ maguũrĩtie kuura kũu gwake gwa thakame.+ Eerĩ magĩrĩire kweherio* gatagatĩ-inĩ ka andũ ao.

19 “‘Ndũkanakome na mũirĩtu ũrĩa ũciaranĩirũo na maitũguo kana mũirĩtu ũrĩa ũciaranĩirũo na thoguo, tondũ gwĩka ũguo nĩ gũconorithia mũndũ wa thakame ĩmwe nake.+ Andũ acio nĩ magĩrĩire kũũrio nĩ ũndũ wa mahĩtia macio mao. 20 Mũndũrũme angĩkoma na mũtumia wa mamawe* nĩ aconorithĩtie mamawe.*+ Andũ acio nĩ magĩrĩire kũũrio nĩ ũndũ wa mehia macio mao. Magĩrĩire gũkua matagĩte ciana. 21 Mũndũrũme angĩoya mũtumia wa mwanake ũrĩa maciaranĩirũo nake, ũcio nĩ ũndũ ũrĩ magigi.+ Nĩ aconorithĩtie mwanake ũcio maciaranĩirũo nake.* Andũ acio magĩrĩire gũikara matagĩte ciana.

22 “‘No mũhaka mũrũmagie mawatho makwa mothe na matuĩro makwa mothe ma ciira+ na mũmahingagie,+ nĩgetha bũrũri ũrĩa ndĩramũtwara mũikarage ndũkanamũtahĩke.+ 23 Mũtikanarũmĩrĩre mĩtugo ya ndũrĩrĩ iria ndĩraingata ciehere mbere yanyu;+ nĩ gũkorũo nĩ ciĩkaga maũndũ macio mothe na nĩ ndĩcithũire.+ 24 Nĩkĩo ndamwĩrire ũũ: “Nĩ mũkeegwatĩra bũrũri wao, na nĩ ngaaũheana kũrĩ inyuĩ ũtuĩke igai rĩanyu, bũrũri ũiyũire iria na ũũkĩ.+ Niĩ nĩ niĩ Jehova Ngai wanyu, ũrĩa ũmwamũrĩte kuuma harĩ ikundi cia andũ.”+ 25 No mũhaka mũkũũranage nyamũ ĩrĩa ĩtarĩ thahu na ĩrĩa ĩrĩ thahu na nyoni ĩrĩa ĩrĩ thahu na ĩrĩa ĩtarĩ thahu;+ mũtikanethahie na nyamũ kana nyoni kana kĩũmbe o gĩothe gĩtambaga thĩ kĩrĩa ndamwamũranĩirie nĩguo muonage kĩrĩ na thahu.+ 26 No mũhaka mũkorũo mũrĩ atheru harĩ niĩ, tondũ niĩ Jehova, ndĩ mũtheru,+ na ndĩramwamũra kuuma harĩ ikundi cia andũ nĩguo mũtuĩke akwa.+

27 “‘Mũndũrũme kana mũtumia ũrĩa ũrĩaragia na maroho kana akaratha mohoro* no mũhaka oragwo.+ Andũ magĩrĩirũo kũmahũũra na mahiga nginya makue. O ene nĩo marĩcokagĩrĩrũo nĩ thakame yao.’”

21 Jehova agĩcoka akĩra Musa ũũ: “Aria na athĩnjĩri-Ngai, ariũ a Haruni, ũmeere atĩrĩ, ‘Gũtirĩ mũndũ o na ũmwe wagĩrĩirũo gwĩthahia nĩ ũndũ wa mũndũ mũkuũ gatagatĩ-inĩ ka andũ ake.+ 2 Ĩndĩ no eke ũguo nĩ ũndũ wa mũndũ wa hakuhĩ ũrĩa marĩ a thakame ĩmwe, nyina, ithe, mũrũwe, mwarĩ, mũndũrũme ũrĩa maciaranĩirũo nake, 3 na no ethahie nĩ ũndũ wa mũirĩtu maciaranĩirũo nake angĩkorũo mũirĩtu ũcio nĩ gathirange na arĩ hakuhĩ nake na ti mũhiku. 4 Ndakanethahie na eyagithie gĩtĩo nĩ ũndũ wa mũtumia wa mũthuri wa andũ ao. 5 Matiagĩrĩirũo kwenja mĩtwe yao ngʼũrũtũ+ kana kwenja mĩthia ya nderu ciao kana gwĩtemanga mĩĩrĩ-inĩ yao.+ 6 Magĩrĩirũo gũkorũo marĩ atheru harĩ Ngai wao,+ na matiagĩrĩirũo gũthahia rĩĩtwa rĩa Ngai wao,+ nĩ gũkorũo marutaga magongona ma Jehova ma gũcinwo na mwaki, mũgate wa* Ngai wao, na no mũhaka makorũo marĩ atheru.+ 7 Matiagĩrĩirũo kũhikia mũmaraya,+ mũtumia ũthahĩtio na njĩra ya ngomanio, kana mũtumia matiganĩte na mũthuriwe,+ tondũ mũthĩnjĩri-Ngai nĩ mũndũ mũtheru harĩ Ngai wake. 8 No mũhaka ũmũtherie,+ tondũ nĩwe ũrutaga mũgate wa Ngai waku. Agĩrĩirũo gũkorũo arĩ mũtheru, tondũ niĩ, Jehova, o niĩ ndĩramũtheria inyuĩ, ndĩ mũtheru.+

9 “‘Na rĩrĩ, mwarĩ wa mũthĩnjĩri-Ngai angĩĩyagithia gĩtĩo na njĩra ya kũhũũra ũmaraya, nĩ ithe angĩkorũo akĩagithia gĩtĩo. Agĩrĩirũo gũcinwo na mwaki.+

10 “‘Mũthĩnjĩri-Ngai ũrĩa mũnene wa ariũ a ithe, ũrĩa mũtwe wake ũitĩrĩirio maguta ma gũitanĩrĩrio+ na akaamũrũo* nĩguo ekĩre nguo cia ũthĩnjĩri-Ngai,+ ndagĩrĩirũo kũreka njuĩrĩ ya mũtwe wake ĩikare ĩtarĩ thondeke o na kana gũtembũra nguo ciake.+ 11 Ndagĩrĩirũo gũkuhĩrĩria mũndũ o wothe mũkuũ;+ ndakanethahie nginya nĩ ũndũ wa ithe kana nyina. 12 Ndagĩrĩirũo kuuma nja ya handũ harĩa hatheru na ndagĩrĩirũo gũthahia handũ hau hatheru ha Ngai wake,+ nĩ gũkorũo rũũri rwa kwamũrũo, o ruo maguta ma gũitanĩrĩrio ma Ngai wake,+ rũrĩ igũrũ rĩake. Niĩ nĩ niĩ Jehova.

13 “‘Agĩrĩirũo kũhikia mũirĩtu gathirange.+ 14 Ndangĩhikia mũtumia wa ndigwa, mũtumia matiganĩte na mũthuriwe, mũtumia ũthahĩtio na njĩra ya ngomanio, kana mũmaraya; no agĩrĩirũo kuoya mũirĩtu gathirange kuuma kũrĩ andũ ao atuĩke mũtumia wake. 15 Ndagĩrĩirũo gũthahia mbeũ yake* gatagatĩ-inĩ ka andũ ao,+ nĩ gũkorũo niĩ nĩ niĩ Jehova, o we ũrĩa ũramũtheria.’”

16 Jehova agĩgĩthiĩ na mbere kwarĩria Musa akĩmwĩra ũũ: 17 “Ĩra Haruni atĩrĩ, ‘Gũtirĩ mũndũrũme wa mbeũ yaku* njiarũa-inĩ ciao ciothe ũrĩ na wathe wagĩrĩire gũkuhĩrĩria nĩguo arute mũgate wa Ngai wake. 18 Mũndũrũme angĩkorũo arĩ na wathe, ndagĩrĩirũo gũkuhĩrĩria: mũndũ ũrĩa mũtumumu kana ũrathua kana ũrĩ na ũthiũ mũthũkangu* kana ũrĩ na kũgũrũ kana guoko kũmwe kũraihu makĩria, 19 mũndũ ũrĩ na kũgũrũ kuunĩku kana guoko kuunĩku, 20 mũndũ ũrĩ na iguku kana mũhomu,* kana mũndũ ũrĩ na wathe wa riitho kana mũndũ muomboku ngothi-inĩ kana ũrĩ na ithemithũ kana mũthũkangu nyee.+ 21 Gũtirĩ mũndũrũme wa mbeũ ya* Haruni mũthĩnjĩri-Ngai ũrĩ na wathe ũngĩkuhĩrĩria nĩguo arute magongona ma Jehova ma gũcinwo na mwaki. Tondũ arĩ na wathe, ndangĩkuhĩrĩria nĩguo arute mũgate wa Ngai wake. 22 No arĩe mũgate wa Ngai wake kuuma harĩ indo iria theru mũno+ na kuuma harĩ indo iria theru.+ 23 O na kũrĩ ũguo, ndangĩthiĩ hakuhĩ na gĩtaama,+ na ndangĩkuhĩrĩria kĩgongona,+ tondũ arĩ na wathe; na ndagĩrĩirũo gũthahia handũ hakwa harĩa hatheru,+ nĩ gũkorũo niĩ nĩ niĩ Jehova, o we ũrĩa ũramatheria.’”+

24 Nĩ ũndũ ũcio Musa akĩaria na Haruni na ariũ ake na Aisiraeli othe.

22 Jehova agĩkĩarĩria Musa o rĩngĩ akĩmwĩra ũũ: 2 “Ĩra Haruni na ariũ ake atĩ nĩ magĩrĩirũo kwĩmenyerera ũrĩa mararũmbũyania na indo iria theru cia Aisiraeli na matigathahie rĩĩtwa rĩakwa itheru+ ũhoro-inĩ wĩgiĩ indo iria manyamũrĩire.+ Niĩ nĩ niĩ Jehova. 3 Meere atĩrĩ, ‘Njiarũa-inĩ cianyu ciothe, mũndũ o wothe wa rũciaro rwanyu, angĩkorũo arĩ na thahu, na akuhĩrĩrie indo iria theru iria Aisiraeli mamũrĩire Jehova, mũndũ* ũcio agĩrĩire kweherio* mbere yakwa.+ Niĩ nĩ niĩ Jehova. 4 Gũtirĩ mũndũ wa rũciaro rwa Haruni ũrĩ na mangũ+ kana ũroimwo nĩ gĩko+ wagĩrĩirũo nĩ kũrĩa indo iria theru o nginya rĩrĩa arĩtuĩka mũtheru,+ o na kana mũndũ ũhutĩtie mũndũ wĩthahĩtie na mũndũ mũkuũ,+ kana mũndũ woimwo nĩ hinya wake wa ũciari.+ 5 kana mũndũ ũhutĩtie kĩũmbe kĩrĩ thahu harĩ iria ithiaga irĩ gĩkundi+ kana ũhutĩtie mũndũ ũgĩĩte na thahu na njĩra o yothe na ũngĩtũma agĩe na thahu.+ 6 Mũndũ* ũrĩa ũrĩhutagia kĩndũ o gĩothe harĩ icio arĩkoragwo arĩ na thahu o nginya hwaĩ-inĩ na ndangĩrĩa kĩndũ o gĩothe kĩa iria theru, ĩndĩ agĩrĩirũo gwĩthamba na maĩ.+ 7 Riũa rĩathũa, nĩ arĩkoragwo atarĩ na thahu, na thutha ũcio no arĩe indo iria theru tondũ icio nĩ irio ciake.+ 8 Ningĩ, ndagĩrĩirũo kũrĩa nyamũ o yothe yonetwo handũ ĩrĩ nguũ kana kĩndũ o gĩothe gĩtamburĩtwo nĩ nyamũ ya gĩthaka gĩtũme agĩe na thahu.+ Niĩ nĩ niĩ Jehova.

9 “‘No mũhaka mahingagie maũndũ marĩa magĩrĩirũo nĩ kũũhingagĩria, nĩguo matigakorũo na mehia nĩ ũndũ wamo na nĩ ũndũ ũcio makue nĩ ũndũ wa gũthahia indo icio theru. Niĩ nĩ niĩ Jehova, o we ũrĩa ũramatheria.

10 “‘Mũndũ ũtetĩkĩrĩtio* ndagĩrĩirũo kũrĩa kĩndũ o gĩothe gĩtheru.+ Na gũtirĩ mũndũ wa kũngĩ ũceereire mũthĩnjĩri-Ngai kana mũruti wĩra wa mũcara wagĩrĩirũo kũrĩa kĩndũ o gĩothe gĩtheru. 11 No mũthĩnjĩri-Ngai angĩgũra mũndũ na mbeca ciake, mũndũ ũcio no arĩe indo icio. Ngombo iria iciarĩtwo thĩinĩ wa nyũmba yake o nacio no irĩe irio ciake.+ 12 Mwarĩ wa mũthĩnjĩri-Ngai angĩhikĩra mũndũ ũtarĩ mũthĩnjĩri-Ngai,* ndagĩrĩirũo kũrĩa indo iria irutĩtwo irĩ indo iria theru. 13 No mwarĩ wa mũthĩnjĩri-Ngai angĩtuĩka wa ndigwa kana matigane na mũthuriwe na akorũo ndarĩ na rũciaro na acoke nyũmba-inĩ ya ithe kũrĩa aatũũraga arĩ mwĩthĩ, no arĩe irio cia ithe;+ ĩndĩ mũndũ ũtetĩkĩrĩtio* ndagĩrĩirũo gũcirĩa.

14 “‘Na rĩrĩ, mũndũ angĩrĩa kĩndũ gĩtheru atekũmenya, no mũhaka arehere mũthĩnjĩri-Ngai igongona rĩngĩ itheru na ongerere gĩcunjĩ kĩmwe harĩ ithano gĩa thogora wa kĩndũ kĩu.+ 15 Nĩ ũndũ ũcio matiagĩrĩirũo gũthahia indo iria theru cia Aisiraeli iria marutagĩra Jehova+ 16 na matũme magĩe na ihera nĩ ũndũ wa mahĩtia mao tondũ wa kũrĩa indo iria theru; nĩ gũkorũo niĩ nĩ niĩ Jehova, o we ũrĩa ũramatheria.’”

17 Jehova agĩthiĩ na mbere kwarĩria Musa, akĩmwĩra ũũ: 18 “Aria na Haruni na ariũ ake na Aisiraeli othe na ũmeere atĩrĩ, ‘Rĩrĩa mũndũrũme Mũisiraeli kana mũndũ wa kũngĩ ũrĩa ũikaraga Isiraeli ekũruta igongona rĩa njino+ kũrĩ Jehova nĩguo ahingie mĩĩhĩtwa yake kana nĩguo arute igongona rĩa kwĩyendera,+ 19 agĩrĩirũo kũrehe nyamũ ya njamba ĩtarĩ na kaũgũ+ kuuma rũũru-inĩ rwa ngʼombe, tũtũrũme, kana mbũri, nĩguo etĩkĩrĩke. 20 Mũtikanarute kĩndũ o gĩothe kĩrĩ na kaũgũ,+ nĩ gũkorũo gĩtingĩtũma mwĩtĩkĩrĩke.

21 “‘Angĩkorũo mũndũ nĩ ekũrutĩra Jehova igongona rĩa ũiguano+ nĩguo ahingie mĩĩhĩtwa kana rĩrĩ igongona rĩa kwĩyendera, rĩagĩrĩire gũkorũo rĩrĩ rĩa nyamũ ĩtarĩ na kaũgũ kuuma harĩ rũũru rwa ngʼombe kana rũũru rwa mbũri kana ngʼondu, nĩguo rĩtĩkĩrĩke. Ndĩagĩrĩire gũkorũo ĩrĩ na kaũgũ o na hanini. 22 Gũtirĩ nyamũ ya igongona yagĩrĩire gũkorũo ĩrĩ ndumumu, yunĩkĩte, ĩtemetwo, ĩrĩ na mbatata, ironda, kana ithemithũ; mũtikanarehere Jehova nyamũ o yothe ya icio kana mũrutĩre Jehova igongona ta rĩu kĩgongona-inĩ. 23 No ũrute ndegwa kana ngʼondu ĩrĩ na kũgũrũ kũmwe kũraihu makĩria kana gũkuhĩ makĩria ĩrĩ igongona rĩa kwĩyendera, no ndĩngĩtĩkĩrĩka ĩrĩ igongona rĩa mwĩhĩtwa. 24 Ndũkanarutĩre Jehova nyamũ ĩrĩ na nyee thũkangie kana hehenje kana ikaguucio kana igatinio, na ndwagĩrĩirũo kũruta nyamũ ta icio bũrũri-inĩ wanyu. 25 Na mũtikanarute nyamũ o yothe ya icio kuuma guoko-inĩ kwa mũndũ wa kũngĩ ĩrĩ ta mũgate kũrĩ Ngai wanyu, nĩ gũkorũo nyamũ icio ti njega na irĩ na kaũgũ. Itingĩtĩkĩrĩka handũ-inĩ hanyu.’”

26 Jehova agĩkĩaria o rĩngĩ na Musa, akĩmwĩra ũũ: 27 “Rĩrĩa ndegwa kana gatũrũme kana mbũri yaciarũo, yagĩrĩire gũikara na nyina thikũ mũgwanja,+ no kuuma mũthenya wa kanana gũthiĩ na mbere no ĩtĩkĩrĩke ĩrĩ igongona, igongona rĩa gũcinwo na mwaki harĩ Jehova. 28 Ũhoro-inĩ wĩgiĩ ndegwa kana ngʼondu, ndũkanamĩthĩnje hamwe na mwana wayo mũthenya-inĩ ũmwe.+

29 “Angĩkorũo mũraruta igongona rĩa gũcokia ngatho kũrĩ Jehova,+ mwagĩrĩirũo kũrĩruta nĩguo mwĩtĩkĩrĩke. 30 Rĩagĩrĩire kũrĩo mũthenya o ro ũcio. Mũtiagĩrĩirũo gũtigia kĩndũ o gĩothe kĩarĩo gĩkinyie rũcinĩ.+ Niĩ nĩ niĩ Jehova.

31 “No mũhaka mũrũmagie maathani makwa na mũmahingagie.+ Niĩ nĩ niĩ Jehova. 32 Mũtikanathahie rĩĩtwa rĩakwa itheru,+ na no mũhaka ngatuagwo mũtheru gatagatĩ-inĩ ka Aisiraeli.+ Niĩ nĩ niĩ Jehova, o we ũrĩa ũramũtheria,+ 33 ũrĩa ũramũruta bũrũri-inĩ wa Misiri nĩguo ndĩmenyithanie kũrĩ inyuĩ atĩ nĩ niĩ Ngai.+ Niĩ nĩ niĩ Jehova.”

23 Jehova agĩthiĩ na mbere kwarĩria Musa, akĩmwĩra ũũ: 2 “Aria na Aisiraeli ũmeere atĩrĩ, ‘Ciathĩ cia imera+ cia Jehova iria mwagĩrĩirũo nĩ kwanĩrĩra+ nĩ igomano nyamũre. Ici nĩcio ciathĩ ciakwa cia imera:

3 “‘Mĩthenya itandatũ wĩra no ũrutwo, no mũthenya wa mũgwanja nĩ thabatũ ya kũhurũka biũ,+ nĩ kĩgomano kĩamũre. Mũtirĩrutaga wĩra o na ũrĩkũ. Mũthenya ũcio wagĩrĩire gũkorũo ũrĩ thabatũ ya Jehova kũrĩa guothe mũrĩikaraga.+

4 “‘Ici nĩcio ciathĩ cia imera cia Jehova, igomano nyamũre iria mwagĩrĩirũo kwanĩrĩra mahinda-inĩ marĩa matuĩtwo nĩ ũndũ wacio: 5 Mweri wa mbere, mũthenya wa 14 wa mweri ũcio+ hwaĩ-inĩ gũkĩgĩa mairia* nĩ Pasaka+ ya Jehova.

6 “‘Mũthenya wa 15 wa mweri ũcio nĩ Gĩathĩ kĩa Mĩgate Ĩtarĩ Mĩimbie kĩa Jehova.+ Mĩthenya mũgwanja mwagĩrĩirũo kũrĩa mĩgate ĩtarĩ mĩkĩre ndawa ya kũimbia.+ 7 Mũthenya wa mbere, mũrĩkoragwo na kĩgomano kĩamũre.+ Mũtiagĩrĩirũo kũruta wĩra o na ũmwe mũritũ. 8 No nĩ mũrĩrutaga igongona rĩa gũcinwo na mwaki harĩ Jehova mĩthenya mũgwanja. Na mũthenya wa mũgwanja nĩ kũrĩkoragwo na kĩgomano kĩamũre. Mũtiagĩrĩirũo kũruta wĩra o na ũmwe mũritũ.’”

9 Jehova agĩgĩthiĩ na mbere kwarĩria Musa, akĩmwĩra ũũ: 10 “Aria na Aisiraeli ũmeere atĩrĩ, ‘Rĩrĩa mũkaaingĩra bũrũri-inĩ ũrĩa ndĩramũhe na mũgethe maciaro maguo, no mũhaka mũgaatwara gĩtĩa kĩa maciaro ma mbere+ ma magetha manyu kũrĩ mũthĩnjĩri-Ngai.+ 11 Nake acũgie gĩtĩa kĩu mbere na thutha arĩ hau mbere ya Jehova nĩguo atũme mwĩtĩkĩrĩke. Mũthĩnjĩri-Ngai agĩrĩirũo gũgĩcũgia mũthenya ũrĩa ũrũmĩrĩire Thabatũ. 12 Mũthenya ũrĩa gĩtĩa kĩanyu gĩgũcũgio, no mũhaka mũrute gatũrũme karĩ mwaka-inĩ wako wa mbere na gatarĩ na kaũgũ, mũkarute karĩ igongona rĩa njino harĩ Jehova. 13 Igongona rĩarĩo rĩa mũtu rĩrĩkoragwo rĩrĩ icunjĩ igĩrĩ harĩ ikũmi cia eba* cia mũtu mũhinyu ũtukanĩtio na maguta, ũrĩ igongona rĩa gũcinwo na mwaki harĩ Jehova, rĩa mũtararĩko mwega.* Igongona rĩarĩo rĩa ndibei rĩrĩkoragwo rĩrĩ gĩcunjĩ kĩmwe harĩ inya kĩa hini* kĩa ndibei. 14 Mũtiagĩrĩirũo kũrĩa mũgate o wothe, mũtu mũhĩhie, kana ngano* ya mũgethano nginya mũthenya ũcio ũkinye, o nginya mũrehe igongona rĩa Ngai wanyu. Ũcio nĩ watho wa gũtũũra ũrũmagĩrĩrũo njiarũa-inĩ cianyu ciothe kũrĩa guothe mũrĩikaraga.

15 “‘Mũrĩtaraga thabatũ mũgwanja kuuma mũthenya ũrĩa ũrũmĩrĩire Thabatũ, mũthenya ũrĩa mwarehe gĩtĩa kĩa igongona rĩa gũcũgio.+ Ciagĩrĩire gũkorũo irĩ ciumia ngʼima. 16 Mũrĩtaraga thikũ 50+ o nginya mũthenya ũrĩa ũrũmĩrĩire Thabatũ ya mũgwanja, na thutha ũcio mũkaruta igongona rĩa ngano* ya mũgethano kũrĩ Jehova.+ 17 Mwagĩrĩirũo kũrehe mĩgate ĩĩrĩ kuuma mĩciĩ-inĩ yanyu ĩrĩ igongona rĩa gũcũgio. Yagĩrĩire gũkorũo ĩthondeketwo na icunjĩ igĩrĩ cia eba* cia mũtu mũhinyu. Na yagĩrĩire kũrugwo ĩkĩrĩtwo ndawa ya kũimbia,+ ĩrĩ maciaro ma mbere kũrĩ Jehova.+ 18 Na mĩgate ĩyo mwagĩrĩirũo kũmĩruta hamwe na tũtũrũme mũgwanja tũtarĩ na kaũgũ, o gatũrũme gakorũo karĩ ka mwaka ũmwe, na gategwa kamwe na ndũrũme igĩrĩ.+ Irĩkoragwo irĩ igongona rĩa njino rĩa kũrutĩrũo Jehova hamwe na igongona rĩa mũtu rĩrĩa rĩagĩrĩire na magongona ma ndibei marĩa magĩrĩire, rĩrĩ igongona rĩa gũcinwo na mwaki, rĩa mũtararĩko mwega harĩ* Jehova. 19 Na no mũhaka mũrute kabũri kamwe karĩ igongona rĩa mehia+ na tũtũrũme twĩrĩ tũrĩ igongona rĩa ũiguano, o gatũrũme gakorũo karĩ ka mwaka ũmwe.+ 20 Mũthĩnjĩri-Ngai agĩrĩirũo gũcicũgia mbere na thutha irĩ hamwe na mĩgate ya maciaro ma mbere, irĩ igongona rĩa gũcũgio mbere ya Jehova, o hamwe na tũtũrũme tũu twĩrĩ. Ciagĩrĩire gũkorũo irĩ kĩndũ gĩtheru harĩ Jehova irĩ cia mũthĩnjĩri-Ngai.+ 21 Mũthenya ũcio nĩ mũrĩanagĩrĩra+ kĩgomano kĩamũre nĩ ũndũ wanyu inyuĩ ene. Mũtiagĩrĩirũo kũruta wĩra o na ũmwe mũritũ. Ũcio nĩ watho wa gũtũũra ũrũmagĩrĩrũo kũrĩa guothe mũrĩikaraga njiarũa-inĩ cianyu ciothe.

22 “‘Rĩrĩa mũkũgetha maciaro ma bũrũri wanyu, ndũkanagethe rũteere-inĩ rwa mũgũnda waku ũhinyĩtie na ndwagĩrĩirũo kũngania matigari ma magetha maku.+ Wagĩrĩirũo gũcitiga nĩ ũndũ wa mũndũ ũrĩa mũthĩni*+ na mũndũ wa kũngĩ ũrĩa ũikaranagia na inyuĩ.+ Niĩ nĩ niĩ Jehova Ngai wanyu.’”

23 Jehova agĩgĩthiĩ na mbere kwarĩria Musa, akĩmwĩra atĩrĩ: 24 “Ĩra Aisiraeli ũũ, ‘Mweri-inĩ wa mũgwanja, mũthenya wa mbere wa mweri ũcio mwagĩrĩirũo kũhurũka biũ, nĩ kĩririkano kĩrĩmenyithanagio na njĩra ya kũhuuha karumbeta,+ nĩ kĩgomano kĩamũre. 25 Mũtiagĩrĩirũo kũruta wĩra o na ũmwe mũritũ, no mwagĩrĩirũo kũruta igongona rĩa gũcinwo na mwaki harĩ Jehova.’”

26 Jehova akĩarĩria Musa o rĩngĩ, akĩmwĩra atĩrĩ: 27 “No mũthenya wa ikũmi wa mweri wa mũgwanja nĩ Mũthenya wa Kũhumbĩra Mehia.+ Mwagĩrĩirũo gũkorũo na kĩgomano kĩamũre, na no mũhaka mwĩime*+ na mũrute igongona rĩa gũcinwo na mwaki harĩ Jehova. 28 Mũtiagĩrĩirũo kũruta wĩra o na ũrĩkũ mũthenya ũcio tondũ nĩ mũthenya wa kũhumbĩra mehia+ nĩgetha mehia manyu mahumbĩrũo mbere ya Jehova Ngai wanyu. 29 Mũndũ o wothe ũtekwĩima* mũthenya-inĩ ũcio agĩrĩire kweherio* gatagatĩ-inĩ ka andũ ao.+ 30 Na mũndũ* wothe ũrĩrutaga wĩra o na ũrĩkũ mũthenya ũcio, nĩ ndĩrĩmũniinaga ehere gatagatĩ-inĩ ka andũ ao. 31 Mũtiagĩrĩirũo kũruta wĩra o na ũrĩkũ. Ũcio nĩ watho wa gũtũũra ũrũmagĩrĩrũo njiarũa-inĩ cianyu ciothe kũrĩa guothe mũrĩikaraga. 32 Ĩyo nĩ thabatũ yanyu ya kũhurũka biũ, na mwagĩrĩirũo kwĩima+ hwaĩ-inĩ wa mũthenya wa kenda wa mweri ũcio. Mwagĩrĩirũo gũkũngũĩra thabatũ yanyu kuuma hwaĩ-inĩ wa mũthenya ũcio nginya hwaĩ-inĩ wa mũthenya ũcio ũngĩ ũrũmĩrĩire.”

33 Jehova agĩthiĩ na mbere kwarĩria Musa, akĩmwĩra atĩrĩ: 34 “Ĩra Aisiraeli ũũ, ‘Mũthenya wa 15 wa mweri ũcio wa mũgwanja nĩ Gĩathĩ gĩa Ithũnũ* kĩrĩa kĩrĩkũngũyagĩrũo thikũ mũgwanja harĩ Jehova.+ 35 No mũhaka gũgakoragwo na kĩgomano kĩamũre mũthenya wa mbere, na mũtiagĩrĩirũo kũruta wĩra o na ũmwe mũritũ. 36 Thikũ mũgwanja no mũhaka mũkaruta igongona rĩa gũcinwo na mwaki harĩ Jehova. Naguo mũthenya wa kanana mwagĩrĩirũo gũkorũo na kĩgomano kĩamũre,+ na nĩ mwagĩrĩirũo kũruta igongona rĩa gũcinwo na mwaki harĩ Jehova. Kĩu nĩ kĩgomano gĩtheru. Mũtiagĩrĩirũo kũruta wĩra o na ũmwe mũritũ.

37 “‘Ici nĩcio ciathĩ cia imera+ cia Jehova iria mwagĩrĩirũo nĩ kwanĩrĩra irĩ igomano nyamũre+ cia kũrutagwo igongona rĩa gũcinwo na mwaki harĩ Jehova: igongona rĩa njino+ na igongona rĩa mũtu+ rĩa igongona rĩu na magongona ma ndibei+ kũringana na mũtaratara wa o mũthenya. 38 Macio nĩ magongona mangĩ hatatarĩtwo indo iria irĩrutagwo hĩndĩ ya thabatũ cia Jehova,+ na iheo cianyu,+ magongona manyu ma mwĩhĩtwa,+ magongona manyu ma kwĩyendera,+ iria mwagĩrĩirũo kũheana kũrĩ Jehova. 39 No rĩrĩ, mũthenya wa 15 wa mweri wa mũgwanja, mwacokanĩrĩria magetha ma bũrũri wanyu, mwagĩrĩirũo gũkũngũĩra gĩathĩ kĩa Jehova thikũ mũgwanja.+ Mũthenya wa mbere ũrĩkoragwo ũrĩ wa kũhurũka biũ na o naguo mũthenya wa kanana nĩ wa kũhurũka biũ.+ 40 Mũthenya wa mbere mũrĩoyaga maciaro ma mĩtĩ ĩrĩa mĩthaka, mathĩgĩ ma mĩtĩ ya mĩkĩndũ,+ honge cia mĩtĩ ĩrĩ na mathangũ maingĩ na mĩtĩ ya mĩcũgũcũgũ ya mũkuru-inĩ, na mũgakena+ mbere ya Jehova Ngai wanyu thikũ mũgwanja.+ 41 Mũrĩkũngũyagĩra ihinda rĩu thikũ mũgwanja o mwaka rĩrĩ gĩathĩ kĩa Jehova.+ Mwagĩrĩirũo kũrĩkũngũyagĩra mweri-inĩ wa mũgwanja ũrĩ watho wa gũtũũra ũrũmagĩrĩrũo njiarũa-inĩ cianyu ciothe. 42 Mwagĩrĩirũo gũikara ithũnũ-inĩ thikũ mũgwanja.+ Andũ othe a Isiraeli magĩrĩirũo gũikara ithũnũ-inĩ, 43 nĩguo njiarũa cianyu iria igooka thutha ikaamenya+ atĩ nĩ ndatũmire Aisiraeli maikare ithũnũ-inĩ rĩrĩa ndamarutaga bũrũri-inĩ wa Misiri.+ Niĩ nĩ niĩ Jehova Ngai wanyu.’”

44 Nĩ ũndũ ũcio Musa akĩra Aisiraeli ũhoro wĩgiĩ ciathĩ icio cia imera cia Jehova.

24 Jehova agĩthiĩ na mbere kwaria na Musa akĩmwĩra ũũ: 2 “Atha Aisiraeli makũrehere maguta mega biũ ma ndamaiyũ hihe nĩ ũndũ wa ũtheri, nĩguo matawa maikarage makanĩte hĩndĩ ciothe.+ 3 Ningĩ na nja wa gĩtaama kĩa Ũira kũu thĩinĩ wa hema ya gũtũnganwo, Haruni agĩrĩirũo kũbanga nĩgetha matawa macio magaikaraga makanĩte hĩndĩ ciothe mbere ya Jehova kuuma hwaĩ-inĩ o nginya rũcinĩ. Ũcio nĩ watho wa gũtũũra njiarũa-inĩ cianyu ciothe. 4 Agĩrĩirũo kũiga matawa macio mabangĩtwo wega mũtĩ-inĩ wa kũigĩrĩrũo matawa+ wa thahabu therie marĩ mbere ya Jehova hĩndĩ ciothe.

5 “Ningĩ wagĩrĩirũo kuoya mũtu mũhinyu ũruge mĩgate 12 ya gĩthiũrũrĩ.* O mũgate wagĩrĩirũo gũkorũo ũrĩ wa icunjĩ igĩrĩ harĩ ikũmi cia eba.* 6 Ũkamĩiga ĩiganĩrĩirũo mĩhari ĩrĩ, o mũhari ũiganĩrĩirũo mĩgate ĩtandatũ,+ igũrũ rĩa metha ya thahabu therie mbere ya Jehova.+ 7 Wagĩrĩirũo kũigĩrĩra ũbani mũtherie igũrũ rĩa o mũhari, naguo ũkorũo ũtariĩ ta mũgate, ũkorũo ũrĩ gacunjĩ kanini ka igongona*+ rĩa gũcinwo na mwaki harĩ Jehova. 8 O mũthenya wa Thabatũ, agĩrĩirũo kũmĩbangaga mbere ya Jehova hĩndĩ ciothe.+ Kĩu nĩ kĩrĩkanĩro gĩa gũtũũra hamwe na Aisiraeli. 9 Ĩrĩtuĩkaga ya Haruni na ariũ ake,+ na marĩmĩrĩagĩra handũ hatheru,+ tondũ nĩ kĩndũ gĩake gĩtheru mũno kuuma kũrĩ magongona ma Jehova ma gũcinwo na mwaki, ũrĩ watho wa gũtũũra ũrũmagĩrĩrũo.”

10 Na rĩrĩ, gatagatĩ-inĩ ka Aisiraeli nĩ kwarĩ na mũrũ wa mũtumia Mũisiraeli na mũthuri Mũmisiri,+ na gũkiumĩra haaro gatagatĩ-inĩ gake na mũndũrũme ũngĩ Mũisiraeli kambĩ-inĩ. 11 Mũrũ ũcio wa mũtumia Mũisiraeli akĩambĩrĩria gũcambia Rĩĩtwa* rĩa Ngai na kũrĩruma.+ Nĩ ũndũ ũcio makĩmũrehe kũrĩ Musa.+ Na rĩrĩ, nyina eetagwo Shelomithu, mwarĩ wa Dibiri wa mũhĩrĩga wa Dani. 12 Makĩmũhingĩra nginya rĩrĩa itua rĩa Jehova rĩamenyithanirio kũrĩ o.+

13 Jehova akĩra Musa ũũ: 14 “Twara mũndũ ũcio ũrumanĩte nja ya kambĩ, na no mũhaka arĩa othe maramũiguire maigĩrĩre moko mao mũtwe-inĩ wake, nakĩo kĩrĩndĩ gĩothe kĩmũhũũre na mahiga.+ 15 Na wĩre Aisiraeli atĩrĩ, ‘Mũndũ o wothe angĩruma Ngai wake, nĩ arĩũragio nĩ ũndũ wa mehia make. 16 Kwoguo mũndũ ũrumĩte rĩĩtwa rĩa Jehova no mũhaka oragwo.+ No mũhaka kĩrĩndĩ gĩothe kĩmũhũũre na mahiga. Mũndũ wa kũngĩ ũrĩa ũikaranagia na inyuĩ agĩrĩire kũũragwo o ta mũndũ ũciarĩirũo bũrũri-inĩ wanyu nĩ ũndũ wa kũruma Rĩĩtwa rĩu.

17 “‘Mũndũ angĩruta mũndũ ũngĩ muoyo,* no mũhaka oragwo.+ 18 Mũndũ o wothe angĩgũtha nyamũ ya mũciĩ amĩũrage agĩrĩirũo kũmĩrĩhĩra, muoyo ũrĩrĩhagwo na muoyo. 19 Mũndũ angĩtihia mũndũ ũrĩa ũngĩ, agĩrĩire gwĩkwo o ta ũguo amwĩkĩte.+ 20 Kuuna gũkarĩhwo na kuuna, riitho rĩkarĩhwo na riitho, igego rĩkarĩhwo na igego, agĩrĩire gũtihio o ta ũrĩa atihanĩtie.+ 21 Mũndũ angĩgũtha nyamũ amĩũrage agĩrĩire kũmĩrĩhĩra,+ no mũndũ angĩgũtha mũndũ ũngĩ amũũrage agĩrĩire kũũragwo.+

22 “‘Kũrĩkoragwo na ituĩro o rĩmwe rĩa ciira harĩ inyuĩ, kana nĩ mũndũ wa kũngĩ ũrĩa ũikaranagia na inyuĩ kana nĩ mũndũ ũciarĩirũo bũrũri-inĩ wanyu,+ tondũ niĩ nĩ niĩ Jehova Ngai wanyu.’”

23 Musa agĩkĩaria na Aisiraeli, nao magĩtwara mũndũ ũcio warumanĩte nja ya kambĩ, na makĩmũhũũra na mahiga.+ Nĩ ũndũ ũcio Aisiraeli magĩka o ta ũrĩa Jehova aathĩte Musa.

25 Jehova agĩthiĩ na mbere kwarĩria Musa Kĩrĩma-inĩ gĩa Sinai, akĩmwĩra ũũ: 2 “Aria na Aisiraeli ũmeere atĩrĩ, ‘Rĩrĩa mũkaaingĩra bũrũri-inĩ ũrĩa ndĩramũhe,+ bũrũri ũcio nĩ ũkaagĩaga na thabatũ ya Jehova.+ 3 Mwagĩrĩirũo gũkaahandaga mbegũ mĩgũnda-inĩ yanyu mĩaka ĩtandatũ, na mũgaceha mĩgũnda yanyu ya mĩthabibũ mĩaka ĩtandatũ, na mũgacokanĩrĩria maciaro ma bũrũri wanyu.+ 4 No mwaka-inĩ wa mũgwanja, kwagĩrĩire gũkoragwo kũrĩ thabatũ ya kũhurũka biũ ya bũrũri ũcio, thabatũ ya Jehova. Mũtiagĩrĩirũo kũhanda mbegũ mĩgũnda-inĩ yanyu o na kana gũceha mĩgũnda yanyu ya mĩthabibũ. 5 Mũtiagĩrĩirũo kũgetha kĩrĩa gĩakũra kuumana na maitĩka ma kĩrĩa gĩatigara mwagetha, na mũtikanacokanĩrĩrie thabibũ cia mĩthabibũ yanyu ĩrĩa ĩtarĩ mĩcehe. Kũrĩkoragwo na mwaka wa kũhurũka biũ wa bũrũri ũcio. 6 No rĩrĩ, irio iria igaakũraga bũrũri-inĩ ũcio hĩndĩ ya thabatũ yaguo no mũcirĩe; inyuĩ, ngombo cianyu cia arũme na cia atumia, aruti wĩra anyu a mũcara, na aikari a kuuma kũngĩ arĩa maikaraga gatagatĩ-inĩ kanyu no mũcirĩe, 7 o hamwe na nyamũ cia mũciĩ na nyamũ cia gĩthaka iria irĩ bũrũri-inĩ wanyu. Kĩrĩa gĩothe bũrũri ũcio ũrĩrutaga no kĩrĩo.

8 “‘Mũrĩtaraga mĩaka mũgwanja ya thabatũ, mĩaka mũgwanja maita mũgwanja, na matukũ ma mĩaka ĩyo mũgwanja ya thabatũ marĩkoragwo marĩ mĩaka 49. 9 Mũgacoka mũkahuuha coro na mũgambo mũnene mweri-inĩ wa mũgwanja, mũthenya wa ikũmi wa mweri ũcio; hĩndĩ ya Mũthenya wa Kũhumbĩra Mehia,+ mwagĩrĩirũo gũtũma mũgambo wa coro ũiguĩke bũrũri-inĩ wanyu wothe. 10 Mwagĩrĩirũo kwamũraga mwaka wa 50 na mũkaanĩrĩra ũhoro wa kũrekererio bũrũri-inĩ harĩ aikari a kuo othe.+ Mwaka ũcio ũrĩtuĩkaga Jubilii harĩ inyuĩ, na o ũmwe wanyu nĩ arĩcokaga indo-inĩ ciake na o ũmwe wanyu agacoka kũrĩ famĩlĩ yake.+ 11 Mwaka ũcio wa 50 ũrĩtuĩkaga Jubilii harĩ inyuĩ. Mũtirĩhandaga mbegũ o na kana mũkagetha kĩrĩa gĩakũra kuumana na maitĩka ma magetha manyu, o na kana mũgacokanĩrĩria thabibũ cia mĩthabibũ ĩrĩa ĩtarĩ mĩcehe.+ 12 Nĩ gũkorũo ĩyo nĩ Jubilii. Nĩ kĩndũ kĩamũre harĩ inyuĩ. Mũrĩrĩaga o kĩrĩa gĩĩkũrĩtie bũrũri-inĩ ũcio.+

13 “‘Mwaka-inĩ ũcio wa Jubilii, o ũmwe wanyu agĩrĩirũo gũcoka indo-inĩ ciake.+ 14 Ũngĩenderia mũndũ ũrĩa ũngĩ kĩndũ kana ũgũre kuuma kũrĩ we, mũtikanahinyanĩrĩrie mũndũ na ũrĩa ũngĩ.+ 15 Ũkĩgũra kĩndũ kuuma harĩ mũndũ ũrĩa ũngĩ, wagĩrĩirũo gũtara mĩaka ĩrĩa ĩhĩtũkĩte thutha wa Jubilii, nake agĩrĩirũo gũkwenderia kũringana na mĩaka ĩrĩa ĩtigarĩte ya magetha.+ 16 Angĩkorũo mĩaka ĩrĩa ĩtigarĩte nĩ mĩingĩ, nĩ arĩongagĩrĩra thogora waguo, na angĩkorũo mĩaka ĩrĩa ĩtigarĩte nĩ mĩnini, agĩrĩirũo kũnyihanyihia thogora waguo, tondũ arakwenderia mũigana wa maciaro marĩa mangĩgethwo. 17 Gũtirĩ mũndũ o na ũmwe gatagatĩ-inĩ kanyu wagĩrĩirũo kũhinyĩrĩria mũndũ ũrĩa ũngĩ,+ no mũhaka mwĩtigagĩre Ngai wanyu,+ nĩ gũkorũo niĩ nĩ niĩ Jehova Ngai wanyu.+ 18 Mũngĩkaarũmĩrĩra mawatho makwa na mwathĩkagĩre matuĩro makwa ma ciira, nĩ mũgaaikaraga na ũgitĩri bũrũri-inĩ ũcio.+ 19 Bũrũri ũcio nĩ ũkaarutaga maciaro maguo,+ na inyuĩ mũkarĩa mũkaigania na mũgaikara kuo na ũgitĩri.+

20 “‘Ĩndĩ mũngĩũria atĩrĩ: “Tũrĩrĩaga kĩ mwaka-inĩ wa mũgwanja twaga kũhanda mbegũ o na kana gũcokanĩrĩria magetha maitũ?”+ 21 Nĩ ndĩrĩtũmaga kĩrathimo gĩakwa kũrĩ inyuĩ mwaka-inĩ wa gatandatũ, naguo bũrũri ũcio ũkaruta maciaro ma kũigana mĩaka ĩtatũ.+ 22 Na inyuĩ mũrĩcokaga mũkahanda mbegũ mwaka-inĩ wa kanana na mũkarĩa kuumana na maciaro ma tene o nginya mwaka-inĩ wa kenda. O nginya magetha maguo makũre, mũkaarĩaga kuumana na maciaro macio ma tene.

23 “‘Mũgũnda ndwagĩrĩire kwendagio biũ,+ tondũ bũrũri ũcio nĩ wakwa.+ Nĩ gũkorũo kũringana na niĩ, inyuĩ mũrĩ o ageni na aikari a kuuma kũngĩ.+ 24 Kũndũ guothe bũrũri-inĩ ũcio mwĩgwatĩire, mwagĩrĩirũo gũtigĩrĩra atĩ mũndũ nĩ arĩkoragwo na kĩhooto gĩa gũkũũra* mũgũnda wake.

25 “‘Mũrũ wa ithe wanyu angĩthĩna na akinyĩrĩre kwendia kĩndũ kĩmwe kĩa indo ciake, mũndũ wa gũgĩkũũra wa mbarĩ ciao cia hakuhĩ agĩrĩirũo gũka gũkũũra* kĩrĩa mũrũ ũcio wa ithe endetie.+ 26 Mũndũ o wothe angĩkorũo atarĩ na mũndũ wa gũkũũra kĩndũ kĩu no we mwene agaacĩre na one kĩndũ gĩa gũgĩkũũra-rĩ, 27 agĩrĩirũo gũtara thogora wakĩo wa mĩaka ĩrĩa ĩhĩtũkĩte kuuma rĩrĩa aakĩendirie na acokerie mũndũ ũcio kĩrĩa gĩgũtigara. Na hĩndĩ ĩyo no acoke kũrĩ indo ciake.+

28 “‘No angĩaga kuona kĩndũ gĩa gũkĩgũra rĩngĩ kuuma kũrĩ mũndũ ũcio, kĩrĩa eendirie kĩrĩthiaga na mbere gũkorũo kĩrĩ kĩa mũndũ ũcio ũkĩgũrĩte o nginya mwaka wa Jubilii;+ na kĩrĩmũcokagĩrĩra hĩndĩ ya Jubilii, na nĩ arĩcokaga indo-inĩ ciake.+

29 “‘Na rĩrĩ, mũndũ angĩendia mũciĩ ũrĩ itũũra-inĩ rĩirigĩre, kĩhooto gĩake gĩa kũũkũũra kĩrĩthiaga na mbere o nginya mũico wa mwaka kuuma hĩndĩ ĩrĩa arĩkia kũwendia; kĩhooto gĩake gĩa kũũkũũra+ kĩrĩikaraga mwaka mũgima. 30 No mũciĩ ũcio ũngĩaga gũkũũrũo* gũkinyĩria mũthia-inĩ wa mwaka mũgima, nyũmba ĩyo ĩrĩ itũũra-inĩ rĩirigĩre ĩrĩtuĩkaga ya mũgũri ũcio biũ njiarũa-inĩ ciake ciothe. Ndĩagĩrĩire kũrekererio hĩndĩ ya Jubilii. 31 No rĩrĩ, nyũmba iria irĩ matũũra-inĩ matarĩ mathiũrũrũkĩrie na rũthingo ciagĩrĩire kuonwo irĩ gĩcunjĩ kĩa mĩgũnda ya gĩcagi-inĩ. Kĩhooto gĩa gũkũũra kĩagĩrĩire gũthiĩ na mbere kũhũthĩka harĩ cio, na nĩ ciagĩrĩire kũrekererio hĩndĩ ya Jubilii.

32 “‘No nyũmba cia Alawii iria irĩ matũũra-inĩ mao,+ Alawii hingo ciothe marĩkoragwo na kĩhooto gĩa gũcikũũra. 33 Indo cia Alawii cingĩaga gũkũũrũo,* nyũmba ĩrĩa yendetio itũũra-inĩ rĩao o nayo nĩ ĩrĩrekagĩrĩrio hĩndĩ ya Jubilii,+ tondũ nyũmba cia matũũra ma Alawii nĩ indo ciao gatagatĩ-inĩ ka Aisiraeli.+ 34 Makĩria ma ũguo, gĩcigo gĩa kũrĩithia+ kĩrĩa gĩthiũrũrũkĩirie matũũra mao gĩtiagĩrĩire kwendio, nĩ gũkorũo rĩu nĩ igai rĩao rĩa gũtũũra.

35 “‘Mũrũ wa ithe wanyu ũrĩa ũrĩ hakuhĩ nawe angĩthĩna na aremwo nĩ kwĩrũgamĩrĩra, no mũhaka ũmũteithĩrĩrie+ o ta ũrĩa ũngĩka mũgeni na mũndũ wa kũngĩ ũrĩa ũikaraga gatagatĩ-inĩ kanyu,+ nĩguo atũũre muoyo hamwe nawe. 36 Ndũkanamũnengere kĩndũ nĩguo agaagũcokeria na maciaro kana nĩguo wone uumithio kuuma harĩ we.+ No mũhaka wĩtigagĩre Ngai waku,+ na mũrũ wa ithe wanyu nĩ egũtũũra muoyo hamwe nawe. 37 Ndũkanamũkombere mbeca agaakũrĩha na maciaro+ kana ũmũnengere irio nĩguo wone uumithio. 38 Niĩ nĩ niĩ Jehova Ngai wanyu, o we wamũrutire bũrũri wa Misiri+ nĩgetha amũhe bũrũri wa Kanaani, nĩguo ndĩmenyithanie atĩ nĩ niĩ Ngai wanyu.+

39 “‘Mũrũ wa ithe wanyu ũrĩa ũikaraga hakuhĩ nawe angĩthĩna na akinyĩrĩre kwĩyendia kũrĩ wee,+ ndũkanamũrutithie wĩra wa ũkombo.+ 40 Agĩrĩire gwĩkwo o ta mũruti wĩra wa mũcara,+ o ta mũndũ wa kũngĩ ũrĩa ũikaraga gatagatĩ-inĩ kanyu. Agĩrĩirũo gũgũtungatĩra o nginya mwaka wa Jubilii. 41 Hĩndĩ ĩyo nĩ agaagũtiga, we mwene o hamwe na ciana ciake,* na acoke kũrĩ famĩlĩ yao. Agĩrĩirũo gũcoka indo-inĩ cia maithe make ma tene.+ 42 Nĩ gũkorũo andũ acio nĩ ngombo ciakwa iria ndarutire bũrũri-inĩ wa Misiri.+ Matiagĩrĩirũo kwĩyendia ũrĩa ngombo yendagio. 43 Ndũkanamũnyarire,+ no mũhaka wĩtigagĩre Ngai waku.+ 44 Ngombo cianyu cia arũme na cia atumia iriumaga ndũrĩrĩ-inĩ iria imũthiũrũrũkĩirie, no mũgũre ngombo cia arũme kana cia atumia kuuma kũrĩ cio. 45 Ningĩ no mũgũre ngombo kuuma kũrĩ ariũ a aikari a kuuma kũngĩ arĩa maikaraga gatagatĩ-inĩ kanyu,+ no mũcigũre kuuma kũrĩ o na kuuma kũrĩ famĩlĩ ciao iria maciarĩirũo bũrũri-inĩ wanyu, na matuĩke anyu. 46 No mũmaheane marĩ igai harĩ ariũ anyu arĩa magooka thutha wanyu matuĩke igai rĩao rĩa gũtũũra. No mũmahũthĩre marĩ aruti a wĩra, no mũtiagĩrĩirũo kũnyarira ariũ a ithe wanyu Aisiraeli.+

47 “‘No mũndũ wa kũngĩ kana mũgeni ũrĩa ũikaraga gatagatĩ-inĩ kanyu angĩtonga na mũrũ wa ithe wanyu ũrĩa ũikaraga hakuhĩ nake athĩne na akinyĩrĩre kwĩyendia kũrĩ mũndũ wa kũngĩ kana mũgeni ũcio ũikaraga gatagatĩ-inĩ kanyu, kana eyendie kũrĩ mũndũ wa famĩlĩ ya mũndũ wa kũngĩ-rĩ, 48 nĩ arĩthiaga na mbere gũkorũo na kĩhooto gĩa gũkũũrũo thutha wa kwĩyendia. Ũmwe wa ariũ a ithe no amũkũũre,*+ 49 kana mamawe* kana mũrũ wa mamawe* no amũkũũre,* kana mũndũ wa mbarĩ ciao wa hakuhĩ,* mũndũ wa famĩlĩ ciao, no amũkũũre.*

“‘Kana we mwene angĩkorũo nĩ atongete, o nake no ekũũre.*+ 50 Magĩrĩirũo gũtara na mũndũ ũcio ũmũgũrĩte ihinda rĩa kuuma mwaka ũrĩa eeyendirie kũrĩ we o nginya mwaka wa Jubilii,+ na mbeca iria eeyendirie ciagĩrĩire kũringana na mũigana wa mĩaka ĩyo.+ Thikũ ciake cia wĩra ihinda-inĩ rĩu ciagĩrĩire gũtarũo o ta cia mũruti wĩra wa mũcara.+ 51 Angĩkorũo mĩaka ĩrĩa ĩtigarĩte nĩ mĩingĩ, agĩrĩirũo kũrĩha thogora wake wa gwĩkũũra ũringaine na mĩaka ĩrĩa ĩtigarĩte. 52 No angĩkorũo no mĩaka mĩnini ĩtigarĩte mwaka wa Jubilii ũkinye, we mwene nĩwe wagĩrĩirũo gũtara na arĩhe thogora wake wa gwĩkũũra ũringaine na mĩaka ĩrĩa ĩtigarĩte. 53 Arĩthiaga na mbere kũmũtungatĩra mwaka o mwaka arĩ ta mũruti wĩra wa mũcara; na inyuĩ mwagĩrĩirũo gũtigĩrĩra atĩ ndaranyarirũo nĩ mũndũ ũcio ũmũgũrĩte.+ 54 No rĩrĩ, angĩkorũo ndangĩhota gwĩkũũra* akĩrũmĩrĩra maũndũ macio, nĩ arĩrekagĩrĩrio mwaka wa Jubilii,+ we mwene o hamwe na ciana ciake* iria arĩ nacio.

55 “‘Nĩ gũkorũo Aisiraeli nĩ ngombo ciakwa mwene. Nĩ ngombo ciakwa iria ndarutire bũrũri-inĩ wa Misiri.+ Niĩ nĩ niĩ Jehova Ngai wanyu.

26 “‘Mũtikanethondekere ngai itarĩ kĩene,+ na mũtikanahande mũhianano wa gwacũhio+ kana gĩtugĩ gĩa kũhoywo, na mũtikanethondekere ihiga rĩa gwacũhio+ bũrũri-inĩ wanyu nĩguo mũrĩinamagĩrĩre;+ nĩ gũkorũo niĩ nĩ niĩ Jehova Ngai wanyu. 2 Nĩ mwagĩrĩirũo kũrũmagia thabatũ ciakwa na gwĩtigagĩra* handũ hakwa harĩa hatheru. Niĩ nĩ niĩ Jehova.

3 “‘Angĩkorũo nĩ mũrĩthiaga na mbere kũrũmĩrĩra mawatho makwa na mũkarũmia maathani makwa na mũkamahingagia-rĩ,+ 4 nĩ ngaamuuragĩria mbura ihinda rĩayo rĩrĩa rĩagĩrĩire,+ naguo bũrũri ũcio ũkaruta maciaro maguo,+ na mĩtĩ ya gĩthaka ĩkaruta maciaro mayo. 5 Ihinda rĩanyu rĩa kũhũũra ngano rĩgaakinyagĩria hĩndĩ ya magetha ma thabibũ, namo magetha ma thabibũ magakinyĩria hĩndĩ ya mahanda; na nĩ mũkaarĩaga mũgate wanyu mũkaigania na mũgaikara mũrĩ na ũgitĩri bũrũri-inĩ wanyu.+ 6 Nĩ ngaatũma bũrũri ũcio ũkoragwo na thayũ,+ na mũgaakomaga gũtarĩ mũndũ ũngĩtũma mwĩtigĩre;+ nĩ ngeeheria nyamũ njũru cia gĩthaka bũrũri-inĩ ũcio, na rũhiũ rwa njora rwa mbaara rũtigaatuĩkanĩria bũrũri-inĩ wanyu. 7 Nĩ mũkaaingatithagia thũ cianyu, na nĩ mũgaacitooria na rũhiũ rwa njora. 8 Andũ anyu atano makaaingatithagia andũ 100, na andũ anyu 100 makaingatithia andũ 10,000, na nĩ mũgaatooria thũ cianyu na rũhiũ rwa njora.+

9 “‘Nĩ ngeerekeria wega wakwa kũrĩ* inyuĩ na ndũme mũciarane na ndũme muongerereke,+ na nĩ ngaatũũria kĩrĩkanĩro gĩakwa hamwe na inyuĩ.+ 10 Mũkĩrĩa maciaro ma tene ma mwaka mũthiru, mũkaabataraga kweheria maciaro macio ma tene nĩgetha muone ha kũiga maciaro marĩa mũgaakorũo mũkĩgetha hĩndĩ ĩyo. 11 Na nĩ ngaaiga gĩikaro gĩakwa kĩamũre gatagatĩ kanyu+ na ndikaamũrega. 12 Ngaathiaga ndĩ gatagatĩ-inĩ kanyu na nduĩke Ngai wanyu,+ na inyuĩ mũtuĩke andũ akwa.+ 13 Niĩ nĩ niĩ Jehova Ngai wanyu, o we ũrĩa wamũrutire bũrũri-inĩ wa Misiri nĩgetha mũtigacoke gũtuĩka ngombo ciao rĩngĩ, na ngiunanga mĩtĩ ya icoki rĩanyu na ngĩtũma mũthiage mĩtwe yanyu ĩĩhandĩte na igũrũ.*

14 “‘No rĩrĩ, mũngĩkaaga gũthikĩrĩria kana kũrũmia maathani macio mothe,+ 15 na mũngĩkaarega mawatho makwa,+ na mũthũũre matuĩro makwa ma ciira mwage kũrũmia maathani makwa mothe, na mũthũkie kĩrĩkanĩro gĩakwa,+ 16 niĩ na niĩ ngaamwĩka maũndũ maya: Ngaamũherithia na mĩtangĩko, ndĩmũrehere mũrimũ wa mahũri na mũrimũ wa kũhiũha mwĩrĩ, ũndũ ũcio ũtũme maitho manyu mage kuona na mũũrũo nĩ hinya. Na mũkaahandaga mbegũ cianyu irĩ cia tũhũ, nĩ gũkorũo ikaarĩagwo nĩ thũ cianyu.+ 17 Nĩ ngeerekeria ũthiũ wakwa harĩ inyuĩ ndĩmũũkĩrĩre, na nĩ mũkaahootwo nĩ thũ cianyu;+ na arĩa mamũthũire nĩ makaamũrangĩrĩria,+ na mũkooraga hatarĩ na mũndũ ũramũingatithia.+

18 “‘Na angĩkorũo ũndũ ũcio ndũgaatũma mũũthikĩrĩrie, ngaamũherithia maita mũgwanja makĩria ma ũguo nĩ ũndũ wa mehia manyu. 19 Nĩ ngaahehenja mwĩtĩo wanyu wa rũngʼathio na ndũme igũrũ rĩanyu rĩhaane o ta kĩgera+ na thĩ yanyu ĩhaane o ta gĩcango. 20 Mũkaahũthĩra hinya wanyu tũhũ, nĩ gũkorũo bũrũri wanyu ndũkaaruta maciaro maguo,+ na mĩtĩ ya bũrũri ũcio ndĩkaaruta maciaro mayo.

21 “‘Na mũngĩgaathiĩ na mbere kũregana na niĩ na mũrege gũũthikĩrĩria, no nginya ngaamũhũũra maita mũgwanja makĩria ma ũguo, kũringana na mehia manyu. 22 Nĩ ngaatũma nyamũ cia gĩthaka gatagatĩ-inĩ kanyu,+ na nĩ ikooraga ciana cianyu+ na iniine nyamũ cianyu cia mũciĩ na itũme mũigana wanyu ũnyihe, nacio barabara cianyu itiganĩrio.+

23 “‘Na angĩkorũo o na thutha wa maũndũ macio mũtigetĩkĩra kũrũngĩka+ na mũthiĩ o na mbere kũregana na niĩ, 24 o na niĩ nĩ ngaaregana na inyuĩ, na niĩ mwene ndĩmũhũũre maita mũgwanja nĩ ũndũ wa mehia manyu. 25 Nĩ ngaamũrehithĩria rũhiũ rwa njora rwa kũrĩhĩria nĩ ũndũ wa kwaga kũhingia kĩrĩkanĩro.+ Na rĩrĩa mwacokanĩrĩra matũũra-inĩ manyu, nĩ ngaatũma mũrimũ gatagatĩ-inĩ kanyu,+ na mũneanwo guoko-inĩ gwa thũ.+ 26 Rĩrĩa ngaananga harĩa mũrutaga* mũgate,*+ atumia ikũmi makaarugagĩra mũgate wanyu riiko-inĩ rĩmwe tu na makamũthimĩra mũgate wanyu na gĩthimi;+ mũkaarĩa no mũtikaigania.+

27 “‘Na angĩkorũo o na thutha wa ũguo mũtigathikĩrĩria, mũthiĩ o na mbere kũregana na niĩ-rĩ, 28 nĩ ngaakĩrĩrĩria kũregana na inyuĩ,+ na niĩ mwene ndĩmũherithie maita mũgwanja nĩ ũndũ wa mehia manyu. 29 Nĩ ũndũ ũcio nĩ mũgaakinyĩrĩra kũrĩa nyama cia ariũ anyu, na mũrĩe nyama cia aarĩ anyu.+ 30 Nĩ ngaananga kũndũ kwanyu kwamũre na gũtũũgĩru+ na ndemange indo cianyu cia gũcinĩra ũbumba na njigĩrĩre ciimba cianyu igũrũ wa ciimba cia mĩhianano yanyu ĩrĩ magigi,*+ na ndĩmweherere ta mũrĩ kĩndũ kĩ magigi.+ 31 Nĩ ngaaneana matũũra manyu rũhiũ-inĩ rwa njora+ na ndũme kũndũ kwanyu kũrĩa gũtheru gũtuĩke kũndũ gũtiganĩrie, na ndikanungĩra mũtararĩko mwega* wa magongona manyu. 32 Niĩ mwene nĩ ngaatũma bũrũri ũcio ũtuĩke kũndũ gũtiganĩrie,+ na thũ cianyu iria igaakorũo igĩikara kuo nĩ ikaawĩrorera igegete.+ 33 Na nĩ ngaamũhurunja gatagatĩ-inĩ ka ndũrĩrĩ,+ na njomore rũhiũ rwa njora ndĩmũingatithie;+ bũrũri wanyu ũgaatuo kũndũ gũtiganĩrie,+ na matũũra manyu maanangwo.

34 “‘Hĩndĩ ĩyo bũrũri ũcio nĩ ũkaarĩhĩra thabatũ ciaguo matukũ macio mothe ũgaaikara ũrĩ kũndũ gũtiganĩrie, na inyuĩ mũrĩ bũrũri-inĩ wa thũ cianyu. Hĩndĩ ĩyo bũrũri ũcio nĩ ũkaahurũka,* tondũ no mũhaka ũkaarĩhĩra thabatũ ciaguo.+ 35 Matukũ marĩa mothe bũrũri ũcio ũgaaikara ũrĩ mũtiganĩrie nĩ ũkaahurũka, tondũ ndwahurũkire hĩndĩ ya thabatũ cianyu rĩrĩa mwatũũraga kuo.

36 “‘Nao arĩa magaatigara,+ nĩ ngaatũma ngoro ciao ciyũrũo nĩ guoya mabũrũri-inĩ ma thũ ciao; na mũgambo wa ithangũ rĩrabarabario nĩ rũhuho nĩ ũgaatũma more, na makooraga o ta mũndũ ũrorĩra rũhiũ rwa njora na makagwa hatarĩ na mũndũ ũmaingatithĩtie.+ 37 Makaahĩnganaga o ene o ta andũ marorĩra rũhiũ rwa njora, o na gũtarĩ mũndũ ũmaingatithĩtie. Mũtikahota gwĩtiiria thũ cianyu.+ 38 Mũgaathirĩra gatagatĩ-inĩ ka ndũrĩrĩ,+ na bũrũri wa thũ cianyu nĩ ũkaamũniina. 39 Andũ anyu arĩa magaatigara magaatigwo makĩbutha mabũrũri-inĩ ma thũ cianyu+ tondũ wa mahĩtia manyu. Ĩni, nĩ kũbutha makaabutha tondũ wa mahĩtia ma maithe mao.+ 40 Thutha ũcio nĩ makoimbũra mahĩtia mao ene+ o hamwe na mahĩtia na kwaga kwĩhokeka kwa maithe mao na metĩkĩre atĩ nĩ maagire wĩhokeku nĩ ũndũ wa kũregana na niĩ.+ 41 Na niĩ ngĩregana nao+ na njĩra ya kũmatwara bũrũri-inĩ wa thũ ciao.+

“‘Hihi thutha ũcio ngoro ciao itarĩ nduu* nĩ ikenyihia,+ na marĩhe nĩ ũndũ wa mahĩtia mao. 42 Na nĩ ngaaririkana kĩrĩkanĩro gĩakwa na Jakubu,+ na kĩrĩkanĩro gĩakwa na Isaaka,+ na ndirikane kĩrĩkanĩro gĩakwa na Iburahimu,+ o na ndirikane bũrũri ũcio. 43 Rĩrĩa bũrũri ũcio watiganĩirio nĩo, nĩ kũrĩhĩra warĩhagĩra thabatũ ciaguo+ na ũgaikara ũrĩ mũtiganĩrie ũtarĩ nao, nao nĩ kũrĩha maarĩhaga nĩ ũndũ wa mahĩtia mao, tondũ nĩ maaregire matuĩro makwa ma ciira na magĩthũũra mawatho makwa.+ 44 O na thutha wa maũndũ macio mothe, rĩrĩa magaakorũo bũrũri-inĩ wa thũ ciao, ndirĩ hĩndĩ ngaamarega biũ+ kana ndĩmate ndĩmaniine mathire, tondũ ũndũ ũcio no ũthũkie kĩrĩkanĩro gĩakwa+ nao, nĩ gũkorũo niĩ nĩ niĩ Jehova Ngai wao. 45 No nĩ ũndũ wao, nĩ ngaaririkana kĩrĩkanĩro gĩakwa na maithe mao ma tene+ arĩa ndarutire bũrũri-inĩ wa Misiri maitho-inĩ ma ndũrĩrĩ,+ nĩguo ndĩmenyithanie atĩ nĩ niĩ Ngai wao. Niĩ nĩ niĩ Jehova.’”

46 Macio nĩmo matua, matuĩro ma ciira, na mawatho marĩa Jehova aathondekire gatagatĩ-inĩ gake na Aisiraeli Kĩrĩma-inĩ gĩa Sinai kũgerera Musa.+

27 Jehova agĩthiĩ na mbere kwaria na Musa, akĩmwĩra ũũ: 2 “Aria na Aisiraeli ũmeere atĩrĩ, ‘Mũndũ angĩĩhĩta mwĩhĩtwa wa mwanya+ wa kũrutĩra Jehova thogora ũrĩa ũtuĩtwo wa mũndũ,* 3 thogora ũrĩa ũtuĩtwo wa mũndũrũme wa kuuma mĩaka 20 nginya 60 ũrĩkoragwo ũrĩ cekeri* 50 cia betha kũringana na cekeri ĩrĩa ĩtuĩtwo ya harĩa hatheru.* 4 No angĩkorũo nĩ mũtumia, thogora ũrĩa ũtuĩtwo ũrĩkoragwo ũrĩ cekeri 30. 5 Angĩkorũo nĩ mũndũ wa kuuma mĩaka 5 nginya 20, thogora ũrĩa ũtuĩtwo wa mwanake ũrĩkoragwo ũrĩ cekeri 20 na wa mũirĩtu cekeri 10. 6 Angĩkorũo nĩ mwana wa kuuma mweri ũmwe nginya mĩaka ĩtano, thogora ũrĩa ũtuĩtwo wa kahĩĩ ũrĩkoragwo ũrĩ cekeri ithano na wa kairĩtu cekeri ithatũ.

7 “‘Angĩkorũo nĩ mũndũ wa kuuma mĩaka 60 gũthiĩ na igũrũ, thogora ũrĩa ũtuĩtwo wa mũndũrũme ũrĩkoragwo ũrĩ cekeri 15 na wa mũtumia cekeri 10. 8 No angĩkorũo nĩ mũthĩni mũno ũndũ atangĩhota kũrĩha thogora ũrĩa ũtuĩtwo,+ mũndũ ũcio agĩrĩirũo kũrũgama mbere ya mũthĩnjĩri-Ngai, nake mũthĩnjĩri-Ngai amũtuĩre thogora. Mũthĩnjĩri-Ngai agĩrĩirũo gũtua thogora ũcio kũringana na kĩrĩa mũndũ ũcio ũrehĩta angĩhota kũrĩha.+

9 “‘Angĩkorũo kĩrĩa eranĩire na mwĩhĩtwa nĩ nyamũ ĩngĩagĩrĩra kũrutĩrũo Jehova, nyamũ o yothe ĩrĩa ĩngĩheanwo kũrĩ Jehova ĩrĩtuĩkaga kĩndũ gĩtheru. 10 Ndangĩmĩcenjania kana amĩkũũranie, nyamũ njega na njũru kana njũru na njega. No angĩkorũo nĩ egũkũũrania nyamũ ĩyo na ĩngĩ, ĩyo ya mbere na ĩyo yakũũranio nayo irĩtuĩkaga kĩndũ gĩtheru cierĩ. 11 Angĩkorũo nĩ nyamũ ĩrĩ thahu+ ĩtangĩtwarũo ĩrĩ igongona harĩ Jehova, agĩrĩirũo kũrũgamia nyamũ ĩyo mbere ya mũthĩnjĩri-Ngai. 12 Nake mũthĩnjĩri-Ngai atue thogora wayo, ĩrĩ njega kana njũru. Thogora ũrĩa ũgũtuwo nĩ mũthĩnjĩri-Ngai nĩguo ũrĩtuĩkaga thogora wayo. 13 No angĩkenda kũmĩkũũra,* no mũhaka akaaneana gĩcunjĩ kĩmwe harĩ ithano gĩa thogora wa nyamũ ĩyo o hamwe na thogora ũrĩa ũtuĩtwo.+

14 “‘Na rĩrĩ, mũndũ angĩamũra nyũmba yake ĩtuĩke kĩndũ gĩtheru harĩ Jehova, mũthĩnjĩri-Ngai agĩrĩirũo gũtua thogora wayo, ĩrĩ njega kana njũru. Kũringana na thogora ũrĩa mũthĩnjĩri-Ngai egũtua, ũcio nĩguo ũrĩkoragwo ũrĩ thogora wayo.+ 15 No mũndũ ũcio wamũrĩte nyũmba yake angĩenda kũmĩkũũra,* no mũhaka aneane gĩcunjĩ kĩmwe harĩ ithano kĩa mbeca cia thogora ũrĩa ũtuĩtwo o hamwe na thogora ũcio, nayo nĩ ĩgũtuĩka yake.

16 “‘Mũndũ angĩamũrĩra Jehova gĩcunjĩ kĩmwe kĩa mũgũnda ũrĩa agaĩirũo, thogora wakĩo wagĩrĩire gũtuo kũringana na mbegũ iria ingĩigana kũhandwo kuo: homeri* ĩmwe ya mbegũ cia cairi yagĩrĩire gũkorũo ĩrĩ cekeri 50 cia betha. 17 Angĩamũra mũgũnda wake mwaka-inĩ wa Jubilii,+ thogora ũrĩa ũtuĩtwo noguo ũrĩkoragwo ũrĩ thogora waguo. 18 Angĩamũra mũgũnda wake thutha wa mwaka wa Jubilii, mũthĩnjĩri-Ngai agĩrĩirũo kũmũtarĩra thogora ũringaine na mĩaka ĩrĩa ĩtigarĩte mwaka wa Jubilii ũrĩa ũrũmĩrĩire ũkinye, naguo thogora ũcio wagĩrĩire kũrutithanio na thogora ũrĩa ũtuĩtwo.+ 19 No mũndũ ũcio ũwamũrĩte angĩgaakũũra* mũgũnda ũcio, no mũhaka aneane gĩcunjĩ kĩmwe harĩ ithano kĩa mbeca cia thogora ũrĩa ũtuĩtwo o hamwe na thogora ũcio, naguo ũkorũo ũrĩ wake. 20 No rĩrĩ, angĩaga gũkũũra* mũgũnda ũcio naguo mũgũnda ũcio wenderio mũndũ ũngĩ-rĩ, ndũrĩ hĩndĩ ĩngĩ ũngĩkũũrũo.* 21 Rĩrĩa mũgũnda ũcio ũkaarekererio hĩndĩ ya Jubilii, ũgaatuĩka kĩndũ gĩtheru harĩ Jehova, ũrĩ mũgũnda wamũrĩtwo harĩ we. Ũgaatuĩka igai rĩa athĩnjĩri-Ngai.+

22 “‘Mũndũ angĩamũrĩra Jehova mũgũnda agũrĩte ũtarĩ gĩcunjĩ kĩa mũgũnda ũrĩa agaĩirũo,+ 23 mũthĩnjĩri-Ngai agĩrĩirũo kũmũtarĩra mũigana wa thogora wa gũkinyĩria mwaka wa Jubilii, na mũthenya o ro ũcio mũndũ ũcio aneane thogora ũrĩa ũgũtuwo.+ Kĩu nĩ kĩndũ gĩtheru harĩ Jehova. 24 Mwaka-inĩ wa Jubilii, mũgũnda ũcio ũrĩcokaga kũrĩ mũndũ ũrĩa wamwendeirie, mwene mũgũnda ũcio.+

25 “‘Thogora o wothe wagĩrĩirũo gũtuo kũringana na cekeri ĩrĩa ĩtuĩtwo ya harĩa hatheru. Cekeri yagĩrĩire gũkorũo ĩiganaine na gera* 20.

26 “‘No rĩrĩ, gũtirĩ mũndũ wagĩrĩirũo kwamũra irigithathi rĩa nyamũ, nĩ gũkorũo ĩciarĩtwo ĩrĩ irigithathi harĩ Jehova.+ Ĩrĩ ndegwa kana ngʼondu, ĩkoragwo ĩrĩ ya Jehova.+ 27 Angĩkorũo nĩ ĩmwe ya nyamũ iria irĩ thahu na amĩkũũre kũringana na thogora ũrĩa ũtuĩtwo-rĩ, agĩrĩirũo kũneana gĩcunjĩ kĩmwe harĩ ithano gĩa thogora wayo o hamwe na thogora ũcio.+ No ĩngĩaga gũkũũrũo,* yagĩrĩire kwendio kũringana na thogora ũrĩa ũtuĩtwo.

28 “‘No rĩrĩ, gũtirĩ kĩndũ kĩamũre kĩrĩa mũndũ amũrĩte biũ* gĩtuĩke kĩa Jehova kuuma kũrĩ indo ciake kĩngĩendio kana gĩkũũrũo,* kana nĩ mũndũ kana nyamũ kana mũgũnda wake. Kĩndũ gĩothe kĩamũrĩtwo nĩ kĩndũ gĩtheru mũno harĩ Jehova.+ 29 Makĩria ma ũguo, gũtirĩ mũndũ ũtuĩrĩirũo* kũũragwo wagĩrĩire gũkũũrũo.+ No mũhaka oragwo.+

30 “‘O gĩcunjĩ kĩmwe harĩ ikũmi*+ kĩa bũrũri, kuuma harĩ maciaro ma mĩgũnda kana maciaro ma mĩtĩ, nĩ kĩa Jehova. Kĩu nĩ kĩndũ gĩtheru harĩ Jehova. 31 Mũndũ angĩkenda gũkũũra* gĩcunjĩ gĩake kĩmwe harĩ ikũmi, agĩrĩirũo kũneana gĩcunjĩ kĩmwe harĩ ithano gĩa thogora wakĩo o hamwe na thogora ũcio. 32 Harĩ o gĩcunjĩ kĩmwe harĩ ikũmi kĩa rũũru rwa ngʼombe kana rũũru rwa mbũri kana ngʼondu, kĩrĩa gĩothe kĩgeragĩra rungu rwa rũthanju rwa mũrĩithi, nyamũ ya* ikũmi yagĩrĩirũo gũtuĩka kĩndũ gĩtheru harĩ Jehova. 33 Ndagĩrĩirũo kũrora kana nĩ njega kana nĩ njũru, o na kana amĩkũũranie. No angĩkaageria kũmĩkũũrania, ĩyo ya mbere na ĩyo yakũũranio nayo ciagĩrĩire gũkorũo irĩ kĩndũ gĩtheru cierĩ.+ Ndĩngĩkũũrũo.’”*

34 Macio nĩmo maathani marĩa Jehova aaheire Musa marĩ ma Aisiraeli Kĩrĩma-inĩ gĩa Sinai.+