2 Kũnyitanĩra

ŨGUO NĨ KUUGA ATĨA?

Rĩrĩa mũthuri na mũtumia manyitanĩra kĩhiko-inĩ, makoragwo mahaana ta mũtwarithia wa ndege na mũteithĩrĩria wake makĩrutithania wĩra hamwe thabarĩ-inĩ. O na rĩrĩa mathĩna moimĩra o mũndũ eciragia ũrĩa mekũhiũrania namo marĩ hamwe, no ti arĩ wiki.

ŨTAARO WA BIBILIA: “Ti erĩ rĩngĩ, no nĩ mwĩrĩ ũmwe.”​—Mathayo 19:6.

“Ndũngĩgaacĩra kĩhiko-inĩ ũgĩka maũndũ ũrĩ wiki. No mũhaka mũthuri na mũtumia manyitanĩre nĩguo magaacĩrithie kĩhiko.”​—Christopher.

ŨNDŨ ŨCIO NĨ WA BATA NĨKĨ?

Mũthuri na mũtumia mangĩaga kũnyitanĩra, no mambĩrĩrie gwĩciria mũno nũũ ũrĩ na mahĩtia rĩrĩa kwoimĩra thĩna, handũ ha gwĩciria ũrĩa mangĩrũa na thĩna ũcio. Tũmathĩna tũnini tũrĩtuĩkaga mathĩna manene.

“Kũnyitanĩra nĩ kwa bata mũno kĩhiko-inĩ. Tũngĩaga kũnyitanĩra na mũthuri wakwa, tũngĩkorũo tũhaana ta arĩ o andũ maraikarania nyũmba ĩmwe tu no makaga kũiguithania hĩndĩ ya gũtua matua.”​—Alexandra.

ŨRĨA ŨNGĨKA

WĨTHUTHURIE

• Hihi nyonaga mbeca iria thũkũmaga irĩ o “ciakwa”?

• Hihi nĩ bataraga kweherera ũrĩa tũhikanĩtie nake nĩguo hurũke wega?

• Hihi nĩ ndĩĩthemaga andũ a famĩlĩ ya ũrĩa tũhikanĩtie nake o na gũtuĩka we nĩ akoragwo na ũrata wa hakuhĩ nao?

ARĨRĨRIAI MAŨNDŨ MAYA NA ŨRĨA MŨHIKANĨTIE NAKE

• Nĩ maũndũ-inĩ marĩkũ tũnyitanagĩra wega kĩhiko-inĩ gitũ?

• Nĩ maũndũ-inĩ marĩkũ tũngĩagagĩria?

• Nĩ makinya marĩkũ tũngĩoya nĩguo twagagĩrie ũrĩa tũnyitanagĩra maũndũ-inĩ?

GERIA ŨŨ

• Ta hũũra mbica mũkĩhũũra mũbira na ũrĩa mũhikanĩtie nake o mũndũ arĩ mwena wake. Handũ ha ũguo-rĩ, nĩ makinya marĩkũ ũngĩoya nĩguo ũnyitanĩre na ũrĩa mũhikanĩtie nake mũkorũo mwena ũmwe?

• Handũ ha gwĩciria, ‘Ingĩhootana atĩa?’ wĩcirie ‘Tũngĩhootana atĩa ithuerĩ?’

“Ndũgecirie nũũ ũrĩ na mahĩtia na nũũ ũtarĩ. Ũndũ ũcio ti wa bata ta gũkorũo na thayũ na ũrũmwe kĩhiko-inĩ.”​—Ethan.

ŨTAARO WA BIBILIA: “Mũtekũrũmbũiya o maũndũ manyu moiki, no mũkarũmbũyagia nginya maũndũ ma arĩa angĩ.”​—Afilipi 2:3, 4.