Ithomo rĩa 12

Gũtĩa Muoyo na Thakame

Twagĩrĩirũo kuona muoyo atĩa? (1) kũruta ihu? (1)

Akristiano monanagia atĩa atĩ nĩmarũmbũyanagia na kwĩgitĩra ũgwati? (2)

Hihi nĩ mahĩtia kũũraga nyamũ? (3)

Nĩ maũndũ marĩkũ mamwe memenyeretio matonanagia gũtĩa muoyo? (4)

Watho wa Ngai nĩ ũrĩkũ igũrũ rĩa thakame? (5)

Hihi ũguo nĩũkoniĩ gwĩkĩrũo thakame mĩkiha-inĩ? (6)

1. Jehova nĩwe Kĩhumo kĩa muoyo. Indo ciothe ciĩ na thiirĩ wa muoyo wacio harĩ Ngai. (Thaburi 36:9) Muoyo nĩ mũtheru harĩ Ngai. O na muoyo wa kaana gatarĩ gaciare karĩ nda ya nyina nĩ wa goro harĩ Jehova. Kũũraga na rũtũrĩko kaana kau karakũra nĩ ĩhĩtia maitho-inĩ ma Ngai.—Thama 21:22, 23; Thaburi 127:3.

2. Akristiano a ma nĩmarũmbũyanagia na kwĩgitĩra ũgwati. O mekĩraga ma atĩ ngaari ciao na nyũmba ciao itirĩ ũgwati-inĩ. (Gũcokerithia Maathani 22:8) Ndungata cia Ngai itingĩragia muoyo wacio ũgwati-inĩ tũhũ atĩ nĩguo tu ciigue mwago kana ithithimũke. Kwoguo itigwatanagĩra mathako-inĩ marĩ na ũtoi marĩa mangĩthũkia andũ angĩ na rũtũrĩko. Nĩithemaga maũndũ ma gwĩkenia marĩa mekagĩra andũ ngoro mahũthĩre ũtoi.—Thaburi 11:5; Johana 13:35.

3. Muoyo wa nyamũ o naguo nĩ mũtheru harĩ Mũũmbi. Mũkristiano e na rũtha rwa kũũraga nyamũ nĩguo ecarĩrie irio na nguo kana nĩguo egitĩre mũrimũ na ũgwati. (Kĩambĩrĩria 3:21; 9:3; Thama 21:28) Ĩndĩ nĩ mahĩtia gwĩka nyamũ ũũru kana gũciũraga nĩguo tu wĩkenie na ũigue mwago.—Thimo 12:10.

4. Akristiano matiagĩrĩirũo nĩ kũnyua thigara, gũtanuka mĩraa, na kũhũthĩra ndawa cia kũrĩithia nĩguo maigue mwago. Maũndũ macio memenyeretio nĩ moru tondũ (1) matũtuaga ngombo ciamo, (2) nĩmathũkagia mĩĩrĩ iitũ, na (3) me gĩko. (Aroma 6:19; 12:1; 2 Akorintho 7:1) No gũkorũo arĩ ũndũ mũritũ mũno gũtiga mĩtugo ĩo. Ĩndĩ no mũhaka twĩke ũguo nĩguo tũkenie Jehova.

5. Thakame o nayo nĩ theru maitho-inĩ ma Ngai. Ngai oigaga atĩ muoyo ũrĩ thĩinĩ wa thakame. Kwoguo nĩ mahĩtia kũrĩa thakame. O na ningĩ nĩ mahĩtia kũrĩa nyama cia nyamũ ĩtaitĩtwo thakame ũrĩa kwagĩrĩire. Nyamũ ĩngĩkorũo yũragĩtwo na njĩra ya gũitwo, kana ĩgakua mũtego-inĩ, ndĩagĩrĩire kũrĩo. Ĩngĩkorũo ĩrathĩtwo na itimũ kana rithathi, no mũhaka ĩitwo thakame o narua angĩkorũo nĩ ĩkũrĩo.—Kĩambĩrĩria 9:3, 4; Maũndũ ma Alawii 17:13, 14; Atũmwo 15:28, 29.

6. Hihi nĩ mahĩtia gwĩtĩkĩra wĩkĩrũo thakame mĩkiha-inĩ? Ririkana atĩ, Jehova endaga twĩtheme thakame. Ũguo wĩ na gĩtũmi gĩa atĩ no mũhaka tũtikaingĩrie thĩinĩ wa mĩĩrĩ iitũ na njĩra o na ĩrĩkũ, thakame ya andũ angĩ o na kana thakame iitũ ithuĩ ene ĩrĩa ĩngĩkorũo ĩigĩtwo mũthithũ. (Atũmwo 21:25) Kwoguo Akristiano a ma matingĩtĩkĩra gwĩkĩrũo thakame mĩkiha-inĩ. O no metĩkĩre mĩthemba ĩngĩ o yothe ya ũthondekani, ta gwĩkĩrũo mĩkiha-inĩ indo ingĩ itathondeketwo na thakame. O nĩmendete gũtũũra muoyo, no matingĩgeria kũhonokia muoyo wao na ũndũ wa kuuna watho wa Ngai.—Mathayo 16:25.

[Pictures on page 25]

Nĩguo tũkenie Ngai, no mũhaka tũtheme gwĩkĩrũo thakame mĩkiha-inĩ, mĩtugo ĩrĩ gĩko, na kũingĩria muoyo ũgwati-inĩ tũhũ