Ithomo Rĩa 15

Arata a Ngai Mekaga Maũndũ Mega

Rĩrĩa wagĩa na mũrata mũgaathe na ũtĩĩte-rĩ, ũgeragia gũtuĩka take. “Jehova nĩ mwega, na nĩ mũrũngĩrĩru,” nĩguo Bibilia yugaga. (Thaburi 25:8) Nĩguo tũtuĩke arata a Ngai-rĩ, no mũhaka tũtuĩke ega na arũngĩrĩru. Bibilia yugaga ũũ: “Rũmanagĩriai kwĩgerekania na Ngai, ta ciana ciendetwo mũno; na mũtũũre mwendaine.” (Aefeso 5:1, 2) Haha he na njĩra imwe cia gwĩka ũguo:

Tuĩka wa gũteithia arĩa angĩ. “Nĩtwĩkage andũ othe wega.”—Agalatia 6:10.

Ruta wĩra na kĩyo. “Mũndũ ũrĩa ũiyaga nĩatige gũcoka kũiya; kaba arutage wĩra akĩĩnogagia, ekage na moko make maũndũ marĩa mega.”—Aefeso 4:28.

Ikaraga wĩtheretie kĩĩmwĩrĩ na kĩĩmĩtugo. “Nĩtwĩtheragiei tũtiganage na ũndũ o wothe ũrĩa ũthũkagia mũndũ mwĩrĩ o na kana roho, tũkĩhingagie ũhoro witũ wa gũtuĩka atheru, o tũgĩĩtigagĩra Ngai.”—2 Akorintho 7:1.

Ĩkaga andũ a famĩlĩ yaku maũndũ ma wendani na ma gĩtĩo. “O mũndũ nĩendage mũtumia wake, o ta ũrĩa eendete we mwene; o nake mũtumia ndakaage gwĩtigĩra mũthuriwe. Inyuĩ ciana-rĩ, athĩkagĩrai aciari anyu.”—Aefeso 5:33–6:1.

Onia arĩa angĩ wendo. “Nĩtwendanagei, amu kwendana nĩ kwa Ngai.”—1 Johana 4:7.

Athĩkĩra mawatho ma bũrũri. “Mũndũ o wothe nĩaiguage [thirikari] . . . Rutagĩrai andũ othe o kĩrĩa maagĩrĩirũo nĩ kũrutĩrũo: arĩa a kũrutĩrũo igoti, marutagĩrei.”—Aroma 13:1, 7.