Famĩlĩ Ya Jusufu Gũthiĩ Jerusalemu

Nĩ kĩndũ mweri wa Machi kana Ĩpuro. Nĩ ihinda rĩa famĩlĩ ya Jusufu, hamwe na arata na andũ a mbarĩ ciao gũthiĩ rũgendo rũrĩa mathiaga o mwaka Jerusalemu. Mathiaga kuo gũkũngũĩra Pasaka, ta ũrĩa Watho ugĩte. (Gũcokerithia Maathani 16:16) Kuuma Nazarethi nginya Jerusalemu nĩ rũgendo rwa kilomita ta 120. Othe marĩ na mĩhangʼo na gĩkeno kĩingĩ. Jesu, ũrĩa rĩu ũrĩ na mĩaka 12, arahĩahĩĩra gĩkũngũĩro kĩu mũno o hamwe na mweke wa gũkorũo hakuhĩ na hekarũ rĩngĩ.

Harĩ Jesu na famĩlĩ yao, Pasaka ti ya mũthenya ũmwe tu. Mũthenya ũyũ ũngĩ thutha wa Pasaka, “mũthenya wa mbere wa Mĩgate Ĩtarĩ Mĩimbie,” nĩguo kĩambĩrĩria gĩa Gĩkũngũĩro kĩa Mĩgate Ĩtarĩ Mĩimbie gĩa thikũ mũgwanja. (Mariko 14:12) Gĩkũngũĩro kĩu kĩonagwo kĩrĩ gĩcunjĩ kĩa mahinda ma Pasaka. Kuuma kwao Nazarethi, ihinda rĩrĩa megũikara Jerusalemu, na rũgendo rwa gũcoka mũciĩ nĩ ta ciumia igĩrĩ. No mwaka ũyũ, makahũthĩra ihinda inenanene, nĩ ũndũ wa ũndũ ũkonainie na Jesu. Wĩgiĩ thĩna wamenyeka marĩ rũgendo-inĩ rwa gũcoka kuuma Jerusalemu.

O marĩ rũgendo-inĩ, Jusufu na Mariamu magatua atĩ Jesu arĩ gatagatĩ-inĩ ka andũ a mbarĩ ciao na arata arĩa maratwarana nao. O na kũrĩ ũguo, matithia rũgendo gwatuka, makamwaga. Kwoguo, makambĩrĩria kũmũcaria kũrĩ andũ a mbarĩ ciao na arĩa maamenyanĩte nao, ĩndĩ ndaroneka. Mũriũ wao nĩ orĩte! Jusufu na Mariamu magacoka o Jerusalemu kũmwetha.

Magatinda makĩmwetha mũthenya mũgima na matimuone. O na mũthenya wa kerĩ makamwaga. Thutha-inĩ mũthenya wa gatatũ, makamũkora thĩinĩ wa hekarũ. Aikarĩte gatagatĩ ka arutani amwe a Kĩyahudi. Aramathikĩrĩria, akamoria ciũria, na akamagegia nĩ ũndũ wa ũũgĩ ũrĩa arĩ naguo.

Mariamu akamũũria: “Mũrũ wakwa, nĩ kĩĩ gĩtũmĩte ũtwĩke ũguo? Tũrĩ na thoguo nĩ tũtangĩkĩte mũno tũgĩgũcaria.”​—Luka 2:48.

Jesu akamaka kuona atĩ matikũmenyaga kũrĩa arĩ. Akamoria ũũ: “Mũkũnjaragia nĩkĩ? Mũtikũmenyaga atĩ njagĩrĩirũo gũkorũo thĩinĩ wa nyũmba ya Baba?”​—Luka 2:49.

Rĩu tondũ nĩ monana, Jesu agacoka mũciĩ Nazarethi hamwe na Jusufu na Mariamu, agathiĩ na mbere kũmathĩkĩra. Ningĩ agathiĩ na mbere gũkũra o na kũgĩa na ũũgĩ. O na gũtuĩka no mũnyinyi, agetĩkĩrĩka harĩ Ngai o na andũ. Kuuma arĩ o mũnyinyi gũthiĩ na mbere, Jesu akaiga kĩonereria kĩega harĩ kũiga maũndũ ma kĩĩroho mbere o hamwe na gũtĩa aciari ake.