“Ririkanagai Arĩa Matongoragia Gatagatĩ-inĩ Kanyu”

CIUGO icio cia mũtũmwo Paulo iria ciandĩkĩtwo thĩinĩ wa Ahibirania 13:7 ningĩ no itaũrũo ũũ: “Ririkanagai atongoria anyu.” Kuuma Pentekoste ya mwaka wa 33 M.M. gũthiĩ na mbere, atũmwo ehokeku a Mwathani Jesu Kristo nĩ maahingirie itemi rĩu marĩ kĩama kĩrĩa gĩatongoragia, na njĩra ya kũheana ũtongoria kũrĩ kĩũngano gĩa Gĩkristiano kĩrĩa kĩaambĩrĩirio. (Atũm. 6:2-4) Gũkinyĩria kĩndũ mwaka wa 49 M.M., kĩama kĩu gĩatongoragia nĩ kĩarĩ na andũ angĩ mataarĩ atũmwo a Jesu. Rĩrĩa ũhoro wĩgiĩ kũrua waaragĩrĩrio, andũ amwe arĩa maarĩ kĩama-inĩ kĩu nĩ ‘atũmwo na athuri thĩinĩ wa Jerusalemu.’ (Atũm. 15:1, 2) Warĩ wĩra wao kũrũmbũiya maũndũ marĩa maahutagia Akristiano kũndũ guothe. Nĩ maatũmaga marũa na matua marĩa maatuĩtwo kũrĩ ciũngano nĩguo maciĩkĩre ngoro na maciteithie gũtũũria ũrũmwe harĩ mwĩcirĩrie na ciĩko. Ciũngano icio nĩ ciaathĩkagĩra ũtongoria kuuma kũrĩ kĩama kĩu gĩatongoragia, na nĩ ũndũ ũcio nĩ ciarathimagwo nĩ Jehova na ikagaacĩra.​—Atũm. 8:1, 14, 15; 15:22-31; 16:4, 5; Ahib. 13:17.

² Thutha wa atũmwo gũkua, nĩ kwagĩire ũregenyũki. (2 Thes. 2:3-12) O ta ũrĩa Jesu aarathĩte ngerekano-inĩ ya ngano na itindiĩ, ngano (Akristiano aitĩrĩrie maguta) nĩ yahandĩrĩirũo itindiĩ (Akristiano a maheeni). Ikundi icio cierĩ nĩ cietĩkĩririo ikũranĩre hamwe nginya hĩndĩ ya magetha, hĩndĩ ya “ithirĩro rĩa mũtabarĩre wa maũndũ.” (Mat. 13:24-30, 36-43) Akristiano aitĩrĩrie maguta marĩ mũndũ ũmwe ũmwe nĩ maathiire na mbere gwĩtĩkĩrĩka nĩ Jesu, o na gũtuĩka ihinda-inĩ rĩu gũtiarĩ kĩama gĩa gũtongoria, kana njĩra yamenyekaga wega gũkũ thĩ ĩrĩa Jesu aahũthagĩra kũhe arũmĩrĩri ake ũtongoria. (Mat. 28:20) O na kũrĩ ũguo, nĩ aarathĩte atĩ nĩ kũngĩkagĩa na ũgarũrũku hĩndĩ ya magetha.

³ “Nũũ kũna ngombo ĩrĩa njĩhokeku na njũgĩ?” Thutha wa kũũria ũguo, Jesu nĩ aaheanire ngerekano, ĩrĩ gĩcunjĩ gĩa “kĩmenyithia” kĩa “ithirĩro rĩa mũtabarĩre wa maũndũ.” (Mat. 24:3, 42-47) Jesu oonanirie atĩ ngombo ĩyo njĩhokeku ĩngĩgakorũo na kĩyo ĩkĩhe andũ a Ngai irio cia kĩĩroho “ihinda rĩrĩa rĩagĩrĩire.” O ta ũrĩa Jesu aahũthĩrire gĩkundi kĩa athuri handũ ha mũndũ ũmwe gũtongoria hĩndĩ ya karine ya mbere, noguo o na mahinda-inĩ maya ma ithirĩro rĩa mũtabarĩre wa maũndũ gũkoragwo.

GŨKŨŨRANA “NGOMBO ĨRĨA NJĨHOKEKU NA NJŨGĨ”

⁴ Nĩa Jesu aathuurire maheage arũmĩrĩri ake irio cia kĩĩroho? Hatarĩ nganja, angĩahũthĩrire Akristiano aitĩrĩrie maguta gũkũ thĩ. Bibilia ĩmetaga “athĩnjĩri-Ngai matuĩtwo athamaki” arĩa maheetwo wĩra wa ‘kũmenyithanagia kũndũ guothe mawega ma Ũrĩa wameetire akĩmaruta nduma-inĩ akĩmarehe ũtheri-inĩ wake wa magegania.’ (1 Pet. 2:9; Mal. 2:7; Kũg. 12:17) Hihi arĩa othe aitĩrĩrie maguta thĩinĩ wa thĩ nĩo ngombo ĩrĩa njĩhokeku? Aca. Rĩrĩa Jesu aaringire kĩama akĩhe arũme ta 5,000 irio hatatarĩtwo atumia na ciana, aanengerire arutwo, nao arutwo makĩmagaĩra. (Mat. 14:19) Aahũthĩrire andũ anini kũhũnia andũ aingĩ. Ũmũthĩ aheanaga irio cia kĩĩroho na njĩra o ta ĩyo.

⁵ Kwoguo “mũramati ũrĩa mwĩhokeku na mũũgĩ,” nĩ gakundi kanini ka ariũ a Ithe witũ aitĩrĩrie maguta arĩa mahũthĩkaga ĩmwe kwa ĩmwe kũhaarĩria na kũheana irio cia kĩĩroho mahinda-inĩ maya ma gũkorũo kuo gwa Kristo. (Luk. 12:42) Ihinda-inĩ rĩothe rĩa matukũ ma kũrigĩrĩria, ariũ a Ithe witũ acio aitĩrĩrie maguta, “ngombo ĩrĩa njĩhokeku na njũgĩ,” makoretwo magĩtungata hamwe thĩinĩ wa wabici nene ya Aira a Jehova. Ũmũthĩ, ariũ a Ithe witũ acio aitĩrĩrie maguta nĩo Kĩama Kĩrĩa Gĩtongoragia kĩa Aira a Jehova.

⁶ Kristo ahũthagĩra kĩama kĩu kũheana ũhoro wĩgiĩ kũhinga kwa morathi ma Bibilia na kũheana ũtongoria wa ihinda rĩrĩa rĩagĩrĩire wĩgiĩ ũrĩa tũngĩhũthĩra motaaro ma Bibilia ũtũũro-inĩ. Irio icio cia kĩĩroho iheanagwo kũgerera ciũngano cia Aira a Jehova. (Isa. 43:10; Gal. 6:16) Mahinda-inĩ ma Bibilia, ngombo kana mũramati mwĩhokeku, nĩwe warũgamagĩrĩra mũciĩ. O nayo ngombo njĩhokeku na njũgĩ nĩ ĩheetwo wĩra wa kũrũgamĩrĩra nyũmba ya arĩa metĩkĩtie. Kwoguo, ngombo ĩyo njĩhokeku ningĩ nĩ ĩrũgamagĩrĩra indo cia gũtwarithia na mbere maũndũ ma Ũthamaki, wĩra wa kũhunjia, igomano, kwamũra arĩa mekũrũgamĩrĩra mawĩra matiganĩte ma ũtungata thĩinĩ wa ithondeka, na kũruta mabuku, mothe marĩ maũndũ ma kũguna “andũ a nyũmba.”​—Mat. 24:45.

⁷ Gũkĩrĩ ũguo-rĩ, “andũ a nyũmba” nĩa? Nĩ arĩa maheagwo irio cia kĩĩroho. Kĩambĩrĩria-inĩ, andũ a nyũmba othe maarĩ aitĩrĩrie maguta. No thutha-inĩ, arĩa a kĩrĩndĩ kĩnene kĩa “ngʼondu ingĩ” o nao nĩ maatuĩkire andũ a nyũmba. (Joh. 10:16) Ikundi icio cierĩ iheagwo irio cia kĩĩroho nĩ ngombo ĩrĩa njĩhokeku.

⁸ Hĩndĩ ya thĩna ũrĩa mũnene, rĩrĩa Jesu agooka gũtuĩra na kuoera mũtabarĩre ũyũ mũũru wa maũndũ ikinya, nĩ akaamũra ngombo ĩyo njĩhokeku “ĩrũgamĩrĩre indo ciake ciothe.” (Mat. 24:46, 47) Ngombo ĩyo njĩhokeku nĩ ĩkaaheo ngerenwa ya gũthiĩ igũrũ. Marĩ hamwe na arĩa angĩ a itari rĩa arĩa 144,000, nĩ magaathana hamwe na Kristo kũrĩa igũrũ. O na gũtuĩka gũtigaakorũo rĩngĩ na ngombo ĩrĩa njĩhokeku na njũgĩ gũkũ thĩ, Jehova na Jesu nĩ makaaheanaga ũtongoria kũrĩ arĩa magaakorũo rungu rwa Ũthamaki wa Kĩĩmesia makĩhũthĩra arĩa makaamũrũo matungatage marĩ “anene.”​—Thab. 45:16.

TWAGĨRĨIRŨO ‘KŨRIRIKANAGA ARĨA MATONGORAGIA’ NĨKĨ?

⁹ Tũrĩ na itũmi nyingĩ cia ‘kũririkanaga arĩa matongoragia’ na kuonania atĩ nĩ tũmehokete. Ũndũ ũcio ũtũgunaga atĩa? Mũtũmwo Paulo ooigire ũũ: “Maikaraga meiguĩte nĩ ũndũ wanyu tondũ nĩ makoorio ũhoro wanyu, nĩguo mekage ũguo makenete no ti magĩcayaga, tondũ ũndũ ũcio no ũkorũo na moimĩrĩro moru harĩ inyuĩ.” (Ahib. 13:17) Nĩ harĩ bata twathĩkagĩre na twĩnyihagĩrie ũtongoria ũrĩa tũheagwo nĩo tondũ maikaraga meiguĩte nĩguo matũrũmbũiye na matũgitĩre kĩĩroho.

¹⁰ Paulo ooigire ũũ thĩinĩ wa 1 Akorintho 16:14: “Maũndũ mothe marĩa mwĩkaga mekagei na wendo.” Matua marĩa matuagwo nĩ ũndũ wa andũ a Ngai matuagwo matongoretio nĩ wendo. Rĩandĩko rĩa 1 Akorintho 13:4-8 rĩkĩaria ũhoro wa wendo riugaga ũũ: “Wendo nĩ ũrĩ wetereri na ũtugi. Wendo ndũrĩ ũiru. Wendo ndwĩgaathaga, ndũrĩ mwĩtĩo, ndũrĩ mĩtugo mĩũru, ndũcaragia ũrĩa ũngĩĩguna guo mwene, ndũrakaraga na ihenya. Ndũtaraga maita marĩa ũhĩtĩirio. Ndũkenagĩra maũndũ matarĩ ma ũthingu, no ũkenaga hamwe na ũhoro wa ma. Wĩtiiragia maũndũ mothe, wĩtĩkagia maũndũ mothe, wĩrĩgagĩrĩra maũndũ mothe, ũkiragĩrĩria maũndũ mothe. Wendo ndũrĩ hĩndĩ ũthiraga.” Tondũ wendo nĩguo mũthingi wa matua mothe marĩa matuagwo nĩ ũndũ wa ndungata cia Jehova, tũtirĩ na gĩtũmi gĩa gwĩkĩrĩra nganja ũtongoria ta ũcio. Makĩria ma ũguo, ũndũ ũcio wonanagia wendo wa Jehova.

¹¹ O ta ũrĩa kwarĩ hĩndĩ ya karine ya mbere, arĩa Jehova arahũthĩra gũtongoria andũ ake ti akinyanĩru. O na mahinda-inĩ ma tene, Jehova nĩ aahũthagĩra andũ matarĩ akinyanĩru kũhingia wendi wake. Nuhu nĩ aakire thabina na akĩhunjia ũhoro wa kũniinwo gwa thĩ ya hĩndĩ ĩyo. (Kĩam. 6:13, 14, 22; 2 Pet. 2:5) Musa nĩ aamũrirũo nĩguo atongorie andũ a Jehova kuuma Misiri. (Tham. 3:10) Andũ matarĩ akinyanĩru nĩ maatongoririo nĩ roho mũtheru kwandĩka Bibilia. (2 Tim. 3:16; 2 Pet. 1:21) Gũkorũo atĩ Jehova nĩ arahũthĩra andũ matarĩ akinyanĩru ũmũthĩ nĩguo matongorie wĩra wa kũhunjia na gũtua andũ arutwo, gũtingĩtũma twage kwĩhoka ithondeka rĩake. Handũ ha ũguo, twĩkagĩrũo hinya tondũ nĩ tũmenyaga atĩ hatarĩ ũteithio wa Jehova, ithondeka rĩake rĩtingĩhingagia maũndũ marĩa rĩhingagia. O na gũtuĩka ngombo ĩrĩa njĩhokeku nĩ ĩcemanĩtie na moritũ maingĩ na ĩkeyonera maũndũ maingĩ, nĩ yonanĩtie atĩ roho wa Ngai nĩguo ũtongoragia maũndũ. Gĩcunjĩ gĩa gũkũ thĩ gĩa ithondeka rĩa Jehova nĩ kĩgĩĩte na irathimo nyingĩ. Nĩ ũndũ ũcio, tũkĩnyitaga mbaru na ngoro yothe na tũgakĩĩhoka biũ.

ŨRĨA TUONANAGIA ATĨ NĨ TWĨHOKETE JEHOVA NA MĨBANGO ĨRĨA AIGĨTE

¹² Arĩa mamũragwo kũruta mawĩra thĩinĩ wa kĩũngano monanagia atĩ nĩ mehokete Jehova na mĩbango ĩrĩa aigĩte na njĩra ya gwĩtĩkĩra mawĩra macio meyendeire na kũmaruta marĩ na wĩhokeku. (Atũm. 20:28) Tũrĩ ahunjia a Ũthamaki, twĩkagĩra kĩyo kũhunjia nyũmba kwa nyũmba, gũcokera andũ, na tũkeruta nao Bibilia. (Mat. 24:14; 28:19, 20) Nĩguo tũgunĩke biũ na irio nyingĩ cia kĩĩroho iria tũheagwo nĩ ngombo ĩrĩa njĩhokeku, tũhaaragĩria na tũgathiĩ mĩcemanio itũ ya Gĩkristiano o hamwe na igomano. Nĩ twĩkĩranaga ngoro mũno rĩrĩa twanyitanĩra na aarĩ na ariũ a Ithe witũ thĩinĩ wa mĩcemanio ĩyo ya Gĩkristiano.​—Ahib. 10:24, 25.

¹³ Rĩrĩa twahũthĩra indo citũ gũteithĩrĩria ithondeka rĩa Jehova, tuonanagia atĩ nĩ tũrĩĩhokete. (Thim. 3:9, 10) Rĩrĩa tuona aarĩ na ariũ a Ithe witũ marĩ na ũbataro wa indo cia kĩĩmwĩrĩ, nĩ tũmateithagia tũtekũrĩa marĩĩgu. (Gal. 6:10; 1 Tim. 6:18) Twĩkaga ũguo nĩ ũndũ wa wendo, hĩndĩ ciothe tũgĩcaragia mĩeke ya kuonania ngatho nĩ ũndũ wa wega ũrĩa tuonagio nĩ Jehova na ithondeka rĩake.​—Joh. 13:35.

¹⁴ Ningĩ tuonanagia atĩ nĩ twĩhokete ithondeka rĩu na njĩra ya kũnyita mbaru matua ma rĩo. Gwĩka ũguo nĩ hamwe na kũrũmĩrĩra twĩnyihĩtie ũtongoria ũrĩa tũheagwo nĩ arĩa mamũrĩtwo matũtongoragie, ta arori a mũthiũrũrũko na athuri a kĩũngano. Ariũ a Ithe witũ acio nĩ amwe a “arĩa matongoragia,” arĩa twagĩrĩirũo nĩ gwathĩkĩra na kũmenyihĩria. (Ahib. 13:7, 17) O na tũngĩaga gũtaũkĩrũo wega itũmi cia matua mamwe, nĩ tũmenyaga atĩ twamanyita mbaru nĩ tũkũgunĩka nginya mahinda mokĩte. Moimĩrĩro nĩ atĩ, Jehova nĩ arĩtũrathimaga nĩ ũndũ wa gwathĩkĩra Kiugo gĩake na ithondeka rĩake. Na njĩra ĩyo tũkonania wĩnyihia harĩ Mwathi witũ, Jesu Kristo.

¹⁵ Ma nĩ atĩ, tũrĩ na itũmi nyingĩ cia kwĩhoka ngombo ĩrĩa njĩhokeku na njũgĩ. Shaitani, o we ngai wa mũtabarĩre ũyũ wa maũndũ, arerutanĩria mũno gũthũkia rĩĩtwa rĩa Jehova na ithondeka rĩake. (2 Kor. 4:4) Ndũgetĩkĩre kũheeneka nĩ mawara ma Shaitani! (2 Kor. 2:11) Nĩ oĩ atĩ arĩ o na “ihinda inini” acoke aikio irima-inĩ rĩtarĩ gĩturi, kwoguo arerutanĩria biũ nĩgetha ahĩtithie andũ aingĩ o ũrĩa angĩhota nĩguo matigane na Jehova. (Kũg. 12:12) O na gũtuĩka Shaitani nĩ aratũtharĩkĩra na njĩra nene, rekei tũthiĩ na mbere gũkuhĩrĩria Jehova. Rekei tũthiĩ na mbere kwĩhoka Jehova na njĩra ĩrĩa arahũthĩra gũtongoria andũ ake ũmũthĩ. Tweka ũguo nĩ tũrĩkoragwo na ũrũmwe.