Jesu Kũhonania Mũthenya wa Thabatũ

Afarisai nĩ maamenete Jesu mũno na nĩ meethaga njĩra ya kũmũnyitithia. Maaugaga atĩ ndaagĩrĩirũo kũhonia andũ mũthenya wa Thabatũ. Mũthenya ũmwe wa thabatũ, Jesu nĩ aakorire mũndũ ũmwe waciarĩtwo arĩ mũtumumu akĩhoyahoya. Jesu akĩra arutwo ake ũũ: ‘Ta rorai muone ũrĩa hinya wa Ngai ũgũteithia mũndũ ũyũ.’ Jesu agĩtukania mata make na tĩri, agĩthondeka ndoro, agĩcoka akĩhaka mũndũ ũcio maitho. Agĩcoka akĩmwĩra ũũ: ‘Thiĩ ũgethambe karia-inĩ ga Siloamu.’ Mũndũ ũcio nĩ eekire ũguo, na akĩambĩrĩria kuona riita rĩa mbere ũtũũro-inĩ wake.

Andũ nĩ maamakire mũno. Makiuga ũũ: ‘Na githĩ ũyũ ti mũndũ ũrĩa ũraikaraga thĩ akĩhoyahoyaga, kana nĩ mũndũ ũngĩ ũhaana take?’ Mũndũ ũcio akiuga ũũ: ‘Nĩ niĩ mũndũ ũcio waciarĩtwo arĩ mũtumumu.’ Andũ makĩmũũria: ‘Gũkĩrĩ ũguo-rĩ, maitho maku marahingũkire atĩa?’ Rĩrĩa aameerire ũrĩa gwathiĩte, makĩmũtwara kũrĩ Afarisai.

Mũndũ ũcio akĩra Afarisai ũũ: ‘Jesu arahakire ndoro maitho, na aranjĩra thiĩ ngethambe. Ndĩrathiĩ ndĩrethamba, na rĩu nĩ ndĩrona.’ Afarisai makiuga ũũ: ‘Angĩkorũo Jesu arahonania mũthenya wa thabatũ, hinya wake nduumĩte kũrĩ Ngai.’ No nao andũ angĩ makiuga: ‘Korũo hinya wake nduumĩte kũrĩ Ngai, ndangĩhota kũhonania.’

Afarisai nĩ meetire aciari a mũndũ ũcio na makĩmoria: ‘Gũthiĩte atĩa mũrũ wanyu akahota kuona?’ Aciari ake nĩ meetigagĩra tondũ Afarisai maaugĩte atĩ mũndũ o wothe ũngĩonanirie wĩtĩkio harĩ Jesu nĩ angĩaingatirũo thunagogi-inĩ. Nĩ ũndũ ũcio makĩmeera: ‘Ithuĩ tũtiũĩ. Mũũriei.’ Afarisai makĩũria mũndũ ũcio ciũria nyingĩ nginya akĩmeera: ‘Nĩ ndamwĩra ũrĩa wothe njũũĩ. Mũranjũria ciũria nyingĩ ũguo nĩkĩ?’ Afarisai makĩrakara mũno nginya makĩmũingata.

Jesu nĩ aathiire gwetha mũndũ ũcio na akĩmũũria: ‘Hihi ũrĩ na wĩtĩkio harĩ Mesia?’ Mũndũ ũcio akĩmwĩra ũũ: ‘No ngĩe naguo ingĩmũmenya.’ Nake Jesu akĩmwĩra: ‘Niĩ nĩ niĩ Mesia.’ Jesu aahonirie mũndũ ũcio, na akĩmũteithia kũgĩa na wĩtĩkio. Hatarĩ nganja, kĩu kĩarĩ gĩĩko gĩa tha Jesu eekire.