Jesu Kũriũkia Lazaro

Jesu aarĩ na arata atatũ a hakuhĩ mũno arĩa maaikaraga Bethania. Arata acio maarĩ Lazaro, na aarĩ a nyina erĩ meetagwo Mariamu na Maritha. Mũthenya ũmwe rĩrĩa Jesu aarĩ mũrĩmo ũcio ũngĩ wa Jorodani, Mariamu na Maritha nĩ maamũtũmĩire ndũmĩrĩri ya na ihenya yaugaga ũũ: ‘Lazaro nĩ mũrũaru mũno. Twagũthaitha ũũke na ihenya!’ No Jesu ndaathiire o hĩndĩ ĩyo. Nĩ eetereire thikũ ingĩ igĩrĩ, agĩcoka akĩra arutwo ake ũũ: ‘Nĩ tũthiĩi Bethania. Lazaro nĩ akomete na nĩ ngũthiĩ kuo ngamũũkĩrie.’ Nao arutwo ake makĩmwĩra: ‘Angĩkorũo Lazaro nĩ akomete-rĩ, nĩ ekũigua wega.’ Nĩ ũndũ ũcio Jesu akĩmaumbũrĩra akĩmeera ũũ: ‘Lazaro nĩ akuĩte.’

Rĩrĩa Jesu aakinyire Bethania, aakorire Lazaro aniinĩte thikũ inya mbĩrĩra-inĩ. Andũ aingĩ nĩ maathiĩte kũũmĩrĩria Maritha na Mariamu. Rĩrĩa Maritha aaiguire atĩ Jesu nĩ akinya, nĩ aathiire kũmũtũnga. Akĩra Jesu ũũ: “Mwathani, korũo ũrarĩ gũkũ, mũrũ wa maitũ ndangĩrakuire.” Nake Jesu akĩmwĩra: ‘Mũrũ wa nyũkwa nĩ ekũriũka. Maritha, nĩ wĩtĩkĩtie ũguo?’ Maritha akĩmũcokeria ũũ: ‘Nĩ njĩtĩkĩtie atĩ nĩ akaariũka hĩndĩ ya iriũkĩro.’ Jesu akĩmwĩra ũũ: “Nĩ niĩ ũriũkio na nĩ niĩ muoyo.”

Thutha ũcio Maritha nĩ aathiire kũrĩ Mariamu akĩmwĩra: ‘Jesu nĩ oka.’ Mariamu agĩtengʼera kũrĩ Jesu, nakĩo kĩrĩndĩ gĩkĩmũrũmĩrĩra. Aathiire akĩgwa magũrũ-inĩ ma Jesu akĩrĩraga na akĩmwĩra: ‘Mwathani korũo ũrarĩ gũkũ, mũrũ wa maitũ angĩrĩ o muoyo.’ Rĩrĩa Jesu oonire Mariamu akĩrĩra, o nake akĩambĩrĩria kũrĩra. Rĩrĩa kĩrĩndĩ kĩoonire akĩrĩra, gĩkiuga ũũ: ‘Ta rora ũrĩa Jesu arendete Lazaro.’ No andũ amwe makĩambĩrĩria kũũria: ‘Aragire kũhonokia mũratawe nĩkĩ?’ Nĩ ũndũ ũrĩkũ Jesu angĩacokire gwĩka?

Jesu aathiire mbĩrĩra-inĩ, ĩrĩa yahingĩtwo na ihiga inene, na akiuga ũũ: ‘Eheriai ihiga.’ Nake Maritha akĩmwĩra: ‘Nĩ aniinĩte thikũ inya! Rĩu nĩ aranunga.’ O na kũrĩ ũguo nĩ meeheririe ihiga, na Jesu akĩhoya ũũ: ‘Awa, nĩ ndagũcokeria ngatho nĩ ũndũ wa kũnjigua. Nĩ njũĩ atĩ hĩndĩ ciothe nĩ ũnjiguaga, no ndĩranĩrĩra nĩguo andũ aya mamenye atĩ wee nĩwe wandũmire.’ Thutha ũcio, Jesu akĩanĩrĩra na mũgambo mũnene akiuga: “Lazaro, uma!” Auga ũguo, gũgĩkĩka ũndũ wa kũgegania. Lazaro aaumire mbĩrĩra-inĩ arĩ o muohe na mataama. Nake Jesu akiuga: “Muohorei na mũreke athiĩ.”

Andũ aingĩ arĩa moonire maũndũ macio nĩ meetĩkirie Jesu. No andũ amwe magĩthiĩ makĩra Afarisai ũhoro ũcio. Kuuma hĩndĩ ĩyo, Afarisai makĩambĩrĩria gũcaria ũrĩa mekũũraga Jesu na Lazaro. Ũmwe wa atũmwo arĩa 12 a Jesu wetagwo Judasi Mũisikariota, nĩ aathiire kũrĩ Afarisai na hitho akĩmoria ũũ: ‘Mũkũhe mbeca cigana ndamũteithia kũmenya kũrĩa Jesu arĩ?’ Maamwĩrire mekũmũrĩha icunjĩ 30 cia betha, na Judasi akĩambĩrĩria gwetha mweke wa kũneana Jesu harĩ Afarisai.