Maũndũ ma Kwĩruta Kuumana na Kĩoneki kĩa Ezekieli Kĩgiĩ Hekarũ

Ũthathaiya Mũtheru Gũtũũgĩrio na Kũgitĩrũo

Hekarũ ĩrĩa yarĩ kĩoneki-inĩ yatũũgĩrĩtio igũrũ rĩa “kĩrĩma kĩraihu mũno” (1). Hihi nĩ twambararĩtie ũthathaiya mũtheru, ũgakorũo ũrĩ ũndũ ũrĩa wa bata makĩria ũtũũro-inĩ witũ?

Rũthingo rũrĩa rwathiũrũrũkĩirie (2) mwako wa hekarũ ũrĩa warĩ gatagatĩ ga gĩcigo kĩariĩ (3) rũtũririkanagia atĩ tũtiagĩrĩirũo kũreka ũndũ o wothe ũthũkie ũthathaiya witũ harĩ Jehova. Ezekieli 42:20 yugaga atĩ rũthingo rũu rwarĩ rwa kũhakania “handũ harĩa hatheru” na “harĩa hatarĩ hatheru.” Ciugo “harĩa hatarĩ hatheru” irũgamĩrĩire maũndũ ma o mũthenya matarĩ ma kĩĩroho. Angĩkorũo maũndũ ta macio nĩ magĩrĩirũo kwamũranio na ũthathaiya mũtheru-rĩ, na githĩ mũthathaiya wa Jehova ndakĩagĩrĩirũo gwĩthema biũ maũndũ matarĩ matheru kana mĩtugo ya waganu ũtũũro-inĩ wake!

Irathimo cia Tene na Tene

Karũũĩ karatherera kuuma harĩa hatheru ha hekarũ, gakaarama gagatuĩka rũũĩ rũnene na rũgatũma kũgĩe na muoyo na maciaro thĩinĩ wa bũrũri (4). Irathimo icio nĩ ciarĩrĩirio thĩinĩ wa Gĩcunjĩ gĩa 19 kĩa ibuku rĩrĩ.

Ithimi Ihaanaine Harĩ Andũ Othe

Ihingo ndũũgĩru cia nja (5) na ihingo cia thĩinĩ (9) itũririkanagia atĩ Jehova akoragwo aigĩte ithimi cia igũrũ ciĩgiĩ mĩtugo nĩ ũndũ wa arĩa othe mangĩenda kũnyitanĩra harĩ ũthathaiya mũtheru. Ririkana atĩ ihingo cia nja na cia thĩinĩ irĩ na ithimi ciganaine. Ũndũ ũcio nĩ mwagĩrĩru tondũ ithimi cia Jehova cia ũthingu nĩ ihaanaine harĩ ndungata ciake ciothe, gũtekũmakania maũndũ marĩa ciĩhokeirũo.

Kũrĩĩra Metha-inĩ ya Jehova

Rumu cia kũrĩĩra (8) itũririkanagia atĩ mahinda-inĩ ma tene, andũ nĩ mangĩarĩire indo imwe cia magongona marĩa maatwaraga hekarũ-inĩ, na njĩra ĩyo makarĩanĩra na Jehova. Ũndũ ũcio nĩ ngũrani na hekarũ ya kĩĩroho ĩrĩa Akristiano mathathayagĩria ũmũthĩ, tondũ “igongona rĩmwe” rĩa kũigana nĩ rĩarutirũo. (Ahib. 10:12) O na kũrĩ ũguo, no tũrutaga igongona ritũ rĩa kũgooca.—Ahib. 13:15.

Kũheo Ũũma nĩ Ngai

Wahota kũritũhĩrũo nĩ ithimi icio ciothe irĩ kĩoneki-inĩ kĩu. No nĩ itũrutaga ũndũ wa bata: Nĩ itũheaga ũũma atĩ no mũhaka muoroto wa Jehova wa gũcokia ũthathaiya mũtheru ũkaahinga, o ta ũrĩa ithimi icio itarĩ na mahĩtia na itangĩcenjio. O na gũtuĩka Ezekieli ndoigĩte atĩ nĩ oonire mũndũ o na ũrĩkũ kĩoneki-inĩ gĩake, nĩ andĩkĩte ũtaaro mũrũmu wa Jehova kwerekera athĩnjĩri-Ngai, atongoria, na andũ arĩa angĩ. No mũhaka ndungata ciothe cia Ngai irũmie ithimi ciake cia ũthingu.