GŨTUA ANDŨ ARUTWO
ITHOMO RĨA 11
Kũrutana na Njĩra Hũthũ
Ũtaaro: ‘Hũthĩra ciugo andũ megũtaũkĩrũo na njĩra hũthũ.’—1 Kor. 14:9.
Ũrĩa Jesu Eekire
1. Wĩrorere VIDEO ĩno, kana ũthome Mathayo 6:25-27. Ũcoke ũcokie ciũria ici:
Jesu aaheanire ngerekano ĩrĩkũ ya kuonania ũrĩa Jehova atũrũmbũyagia?
O na gũtuĩka Jesu nĩ ooĩ maũndũ maingĩ megiĩ nyoni-rĩ, nĩ ũndũ ũrĩkũ mũhũthũ aaririe ũhoro waguo? Ũgwĩciria ĩyo yarĩ njĩra njega ya kũrutana nĩkĩ?
Tũreruta Atĩa na Jesu?
2. Twarutana na njĩra hũthũ, andũ nĩ marĩririkanaga maũndũ marĩa twamaruta na nĩ tũkũhutia ngoro ciao.
Wĩgerekanie na Jesu
3. Ndũkarie mũno. Handũ ha gũtaarĩria maũndũ mothe marĩa ũĩ megiĩ ũndũ mũna, arĩrĩria ũhoro ũrĩa ũrĩ ibuku-inĩ rĩrĩa mũrahũthĩra kwĩruta. Thutha wa kũũria kĩũria, eterera mũrutwo waku acokie. Angĩkorũo ndaramenya macokio kana acokie macokio mataratwarana na morutani ma Bibilia, ũria ciũria ingĩ cia kũmũteithia gwĩciria nĩguo amenye macokio. Mũrutwo ataũkĩrũo nĩ ũndũ ũrĩa mũnene, thiĩi hau hangĩ.
4. Teithia mũrutwo waku kuona ũrĩa maũndũ marĩa oĩ mahutanĩtie na morutani merũ marĩa areruta. Kwa ngerekano, mũtanambĩrĩria ithomo rĩgiĩ kũriũka, no mwarĩrĩrie na njĩra nguhĩ maũndũ marĩa mũrutwo erutĩte megiĩ ũrĩa andũ akuũ mahaana.
5. Hũthĩra ngerekano wega. Ũtanahũthĩra ngerekano, wĩyũrie:
‘Hihi ngerekano ĩno nĩ hũthũ?’
‘Mũrutwo wakwa nĩ egũtaũkĩrũo nĩyo na ihenya?’
‘Nĩ ĩgũteithia mũrutwo wakwa kũririkana ũndũ ũrĩa mũnene, handũ ha ngerekano ĩyo tu?’