“Ithirĩro” nĩ kĩĩ?
“ . . . na hĩndĩ ĩo nĩrĩo ithirĩro rĩgakinya.”—MATHAYO. 24:14.
IHINDA-ĨNĨ rĩrĩ nĩ gũkoretwo gũkĩario ũhoro mũingĩ wĩgiĩ ithirĩro rĩa thĩ. Mabuku, thenema, na ngathĩti, kuuma iria ciaragĩrĩria maũndũ ma mathekania nginya iria cia gĩsayansi nĩ ikoretwo ikĩgweta maũndũ ngũrani megiĩ mũthenya wa ithirĩro. Maũndũ macio nĩ ũniinani wa mbaara ya nyukiria, gũkongʼorania kwa njata, mĩrimũ mĩũru mũno, kana rĩera gũthũka biũ.
Ndini nacio ikoragwo na mawoni matiganĩte; nyingĩ irutanaga atĩ hĩndĩ ya “ithirĩro” indo ciothe irĩ muoyo gũkũ thĩ nĩ igaathira. Mũthomi ũmwe wa maũndũ ma ndini akĩarĩrĩria Mathayo 24:14, aandĩkire ciugo ici: “Ũyũ nĩ ũmwe wa mĩhari ĩrĩa ya bata mũno thĩinĩ wa Kiugo kĩa Ngai . . . Andũ a mahinda maya tũrĩ merekeire kwanangwo biũ na nĩ andũ anyinyi mageragia kũhũra mbica ũrĩa ũndũ ũcio ũgekĩka.
Kaingĩ arĩa makoragwo na mawoni macio harĩ ũndũ wa bata mariganagĩrũo: Jehova Ngai nĩwe wombire thĩ “akĩmĩrũmia wega, na ndaamĩũmbire hatarĩ ũrĩa yatariĩ, no kũũmba aamĩũmbire ĩtũũragwo nĩ andũ.” (Isaia 45:18) Kwoguo rĩrĩa Jesu aaririe ũhoro wa “ithirĩro,” ndoigire atĩ thĩ nĩ ĩkaanangwo; o na kana andũ othe maniinwo. Eendaga kuuga atĩ arĩa aganu, arĩa maregaga gũtũũra kũringana na ũtongoria ũrĩ na wendo wa Jehova nĩ makaniinwo.
Wĩcirie ũhoro wa ngerekano ĩno. Ta hũũra mbica wĩ na mũciĩ mũthaka mũno na ũgetĩkiria andũ maũikarage hatarĩ marĩhi. Amwe ao magaikaranagia wega marĩ na thayũ na makamenyagĩrĩra mũciĩ ũcio waku. Nao arĩa angĩ, no kũruta ngũĩ, kũrũa, na kũruma aikari arĩa ega. Magathũkangia indo ciaku na wageria kũmakaania makarega gũgũthikĩrĩria.
Ũngĩka atĩa nĩguo ũthondeke maũndũ? Hihi nĩ kwananga ũngĩananga mũciĩ ũcio waku? Aca. No kũhoteke nĩ kũingata ũngĩingata aikari acio oru ũcoke ũthondeke kũrĩa mathũkangĩtie.
Ũguo noguo Jehova ageeka. Aatongoririe mũtungi wa Thaburi kwandĩka ũũ: “Arĩa mekaga ũũru nĩ kũngʼũrio makangʼũrio, no andũ arĩa metagĩrĩra Jehova, nĩo makagaya thĩ. Amu-rĩ, no ihinda inyinyi, ũrĩa mwaganu acoke aagwo; ũkabara wega gĩikaro kĩu gĩake, na ndangĩkorũo ho. No rĩrĩ, andũ arĩa ahoreri nĩo makagaya thĩ, na matũũre mekenagĩra tondũ wa kũingĩhĩrũo nĩ thayũ.”—Thaburi 37:9-11.
Ũhoro ũcio ningĩ nĩ waarĩrĩirio nĩ Mũtũmwo Petero. Aatongoririo nĩ roho, kwandĩka ũũ: “Nĩ ũndũ wa kiugo kĩrĩa kĩoigirũo nĩ Ngai, nĩkwagĩire kũrĩa gwĩtagwo Igũrũ, o na thĩ ĩgwatanĩtio na maĩ, ĩgaikara ĩrigicĩirio nĩ maĩ; ningĩ atĩ nĩ ũndũ wa maĩ macio, thĩ ĩrĩa yarĩ kuo hĩndĩ ĩo nĩyatomire nĩ ũndũ wa kũhumbwo nĩ maĩ.” (2 Petero 3:5, 6) Mũtũmwo ũcio aaragia igũrũ rĩa Kĩguũ kĩa hĩndĩ ya Nuhu. Andũ arĩa aganu nĩo maaninirũo, no thĩ yo nyene ndĩaninirũo. Kĩguũ kĩu gĩa thĩ yothe gĩatuĩkire gĩa “gũkaania andũ arĩa maikaraga matetigĩrĩte Ngai thutha ũcio.”—2 Petero 2:6.
Petero agĩcoka akiuga ũũ: “Igũrũ rĩrĩa rĩĩ ho rĩu, o na thĩ, nĩ kũigĩrũo ciigĩirũo mwaki.” Tũngĩthoma nginya hau twahota kũgĩa na mawoni marĩa matagĩrĩire. No tarora wone mũhari ũcio ũrathiĩ na mbere kuuga ũũ: “Na wa kũniinwo kwa andũ arĩa matetigagĩra Ngai.” Thĩ tiyo ĩkaniinwo no nĩ andũ arĩa matetigagĩra Ngai. Nĩ kĩĩ gĩkarũmĩrĩra? Petero aandĩkire ũũ: “Nĩ gũtanya tũtanyaga kuona Igũrũ rĩerũ [Ũthamaki wa Ngai wa Kĩmesiya] o na thĩ njerũ [andũ marĩ na ũthingu], o kuo kũrĩa gũtũũraga ũthingu.”—2 Petero 3:7, 13.
Ũrathi wa Bibilia ningĩ nĩ wonanagia atĩ hĩndĩ ya “ithirĩro” ĩrĩ hakuhĩ. Thoma Mathayo 24:3-14 na 2 Timotheo 3:1-5 nĩguo wone atĩ ũhoro ũcio nĩ wa ma.a
[Kohoro ka magũrũ-inĩ]
a Nĩguo wone ũhoro makĩria, thoma gĩcunjĩ gĩa 9 kĩa ibuku rĩa Bibilia Ĩrutanaga Atĩa Kũna? Rĩrĩa rĩcabĩtwo nĩ Aira a Jehova.
Na githĩ ti ũndũ wa magegania kuona atĩ andũ aingĩ nĩ mahĩngĩcagũo nĩ Mathayo 24:14, mũhari o na kaana kanini kangĩtaũkĩrũo nĩguo? Nĩ harĩ gĩtũmi. Shaitani nĩ atumumarĩtie andũ matikone ma cia goro iria irĩ thĩinĩ wa Kiugo kĩa Ngai. (2 Akorintho 4:4) Ningĩ Ngai nĩ ahithĩte arĩa egathi mĩoroto yake, akaguũrĩria andũ arĩa enyihia. Akĩarĩrĩria ũndũ ũcio Jesu oigire ũũ: “Awa, Mwathani wa Igũrũ o na wa thĩ, ndakũgatha nĩ ũndũ nĩũhithĩte andũ arĩa ogĩ na imenyi maũndũ macio, ũkamaguũrĩria tũkenge.” (Mathayo 11:25) Na githĩ ti ũndũ wa gĩtĩo gũkorũo gatagatĩ-inĩ ka andũ enyihia, arĩa mataũkĩirũo wega nĩ Ũthamaki wa Ngai, na matanyaga kuona irathimo iria ũkaarehe kũrĩ arĩa maũnyitaga mbaru!
[Mbica karatathi ka 9]
Ũthamaki ũkaarehe “ithirĩro” rĩa waganu wothe thĩinĩ wa thĩ