ATHOMI AITŨ MARORIA ATĨRĨ . . .

Hihi muoyo wa tene na tene thĩinĩ wa Paradiso nĩ ũkaanogia andũ?

▪ Bibilia ĩtũheaga kĩĩrĩgĩrĩro atĩ no tũtũũre tene na tene thĩinĩ wa Paradiso gũkũ thĩ. (Thaburi 37:29; Luka 23:43) Hihi gũtũũra tene na tene tũrĩ akinyanĩru nĩ gũgaatũnogia?

Kĩu nĩ kĩũria kĩega. Atuĩria a maũndũ moigaga mũndũ kũigua anogetio nĩ ũtũũro ihinda iraya no gũtũme atangĩke, akue ngoro na egere ngero. Arĩa matakoragwo na muoroto ũtũũro-inĩ kana makanogio nĩ maũndũ marĩa mekaga o mũthenya no manogio nĩ ũtũũro. Hihi ũtũũro wa arĩa magakorũo thĩinĩ wa Paradiso nĩ ũkaaga muoroto? Hihi nĩ makanogio nĩ maũndũ marĩa magakorũo magĩka?

Amba ũririkane atĩ, Jehova Ngai, Mũtungi wa Bibilia, nĩwe wĩranĩire muoyo ũcio wa tene na tene. (Johana 3:16; 2 Timotheo 3:16) Ngumo ĩrĩa nene ya Ngai nĩ wendo. (1 Johana 4:8) Jehova nĩ atwendete mũno na nĩwe ũtũheete indo ciothe njega iria tũkenagĩra ũmũthĩ.—Jakubu 1:17.

Mũũmbi witũ nĩ oĩ atĩ nĩguo tũkorũo na gĩkeno, nĩ tũbataraga wĩra ũrĩ na muoroto. (Thaburi 139:14-16; Kohelethu 3:12) Thĩinĩ wa Paradiso andũ matigakorũo matariĩ ta macini. Wĩra ũrĩa makarutaga nĩ ũkamagunaga o ene o hamwe na arĩa mendete. (Isaia 65:22-24) Hihi no ũnogio nĩ ũtũũro ũngĩkorũo na wĩra mwega, wa hĩndĩ ciothe, na ũtarĩ mũhũthũ?

Ningĩ ririkana atĩ, ti andũ othe Jehova Ngai agetĩkĩria matũũre thĩinĩ wa Paradiso. No arĩa megerekanagia na Mũriũ wake, Jesu, akaahe muoyo wa tene na tene. (Johana 17:3) Rĩrĩa aarĩ gũkũ thĩ, Jesu nĩ aakenagĩra gwĩka wendi wa Ithe. Aarutaga arũmĩrĩri ake na ciugo na ciĩko atĩ gĩkeno kĩa ma kĩumanaga na kũheana gũkĩra kũheeo. (Atũmwo 20:35) Thĩinĩ wa Paradiso ĩrĩa ĩgacokio-rĩ, andũ othe makarũmagĩrĩra maathani marĩa merĩ manene—marĩa moigĩte twendage Ngai na twendage mũndũ ũrĩa ũngĩ. (Mathayo 22:36-40) Ta hũra mbica ũgĩtũũrania na andũ matarĩ eyendi, makwendete na makenda wĩra wao! Hihi nĩ ũkuona ta ũngĩnogio nĩ ũtũũro ũgĩtũũrania na andũ ta acio?

Hihi nĩ ũndũ ũrĩkũ ũngĩ ũgakorũo thĩinĩ wa Paradiso? O mũthenya, nĩ tũkerutaga kaũndũ kerũ kegiĩ Mũũmbi witũ. Atuĩria a maũndũ nĩ marĩkĩtie kũmenya maũndũ maingĩ ma kũgegania megiĩ ũũmbi wa Jehova. (Aroma 1:20) O na kũrĩ ũguo-rĩ, gũkinyĩria rĩu tũmenyete maũndũ manini mũno megiĩ ũũmbi. Mĩaka ngiri nyingĩ mĩhĩtũku-rĩ, Ayubu ũrĩa waarĩ mwĩhokeku nĩ aagwetire maũndũ marĩa aamenyete megiĩ ũũmbi wa Ngai, na ciugo ciake nĩ cia ma nginya rĩu. Oigire ũũ: “Atĩrĩrĩi, ĩo no mĩthia ya maũndũ make [Ngai]: ĩ nĩ karũheehũ kanini atĩa tũiguaga ka ũhoro wake! ĩndĩ-rĩ, ũhoti wake aagwata kũũthungurumia, nũ ũngĩtaũkĩrũo nĩ mũthungurumĩre waguo?”—Ayubu 26:14.

O na tũngĩtũũra tene na tene, gũtirĩ hingo tũkaamenya maũndũ mothe megiĩ Jehova Ngai na mawĩra make. Bibilia yugaga atĩ Ngai nĩ eekĩrire ngoro-inĩ ciitũ merirĩria ma gũtũũra tene na tene. Ningĩ ĩcokaga ĩkoiga atĩ ‘tũtikamenya wĩra ũrĩa Ngai wa ma aanaruta kuuma o kĩambĩrĩria nginya o mũthia.’ (Kohelethu 3:10, 11, New World Traslation) Nĩ ũkuona ta kũrĩ hĩndĩ ũkaanogio nĩ kwĩruta maũndũ meerũ megiĩ Mũũmbi witũ?

O na mahinda-inĩ maya, arĩa marutaga wĩra ũraguna andũ arĩa angĩ na ũkagoocithia Ngai ti kaingĩ maiguaga makĩnogio nĩ ũtũũro. No tũkorũo na ma atĩ tũngĩkorũo tũkĩruta wĩra ta ũcio, tũtirĩ hĩndĩ tũkaanogio nĩ ũtũũro, o na twatũũra tene na tene.

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/STScI/NASA)