GĨCUNJĨ KĨA WĨRUTI KĨA 50
“Nĩ Ũgaakorũo Hamwe na Niĩ Thĩinĩ wa Paradiso”
“Ũmũthĩ ndakwĩra atĩrĩ na ma, nĩ ũgaakorũo hamwe na niĩ thĩinĩ wa Paradiso.”—LUK. 23:43.
RWĨMBO NA. 145 Kĩĩranĩro kĩa Ngai gĩa Paradiso
GĨCUNJĨ-INĨ GĨKĨa
1. Kahinda kanini Jesu atanakua-rĩ, eerire mwĩki-naĩ ũmwe wacuurĩtio hakuhĩ nake atĩa? (Luka 23:39-43)
JESU hamwe na eki-naĩ erĩ arĩa maacuurĩtio hakuhĩ nake nĩ maanyarirĩkire mũno marĩ mũtĩ-inĩ matanakua. (Luk. 23:32, 33) Eki-naĩ acio erĩ maakoretwo makĩnyũrũria Jesu, ũndũ ũrĩa wonanagia atĩ matiarĩ arũmĩrĩri ake. (Mat. 27:44; Mar. 15:32) No ũmwe wao nĩ aacenjirie mwerekera wake. Aaugire ũũ: “Jesu, ũkaandirikana rĩrĩa ũkaaingĩra thĩinĩ wa Ũthamaki waku.” Nake Jesu akĩmũcokeria: “Ũmũthĩ ndakwĩra atĩrĩ na ma, nĩ ũgaakorũo hamwe na niĩ thĩinĩ wa Paradiso.” (Thoma Luka 23:39-43.) O na gũtuĩka mwĩki-naĩ ũcio no kũhoteke nĩ aaiguĩte ũhoro wĩgiĩ “Ũthamaki wa igũrũ” ũrĩa Jesu aahunjagia hĩndĩ ya ũtungata wake, ndaatuĩkĩte mũrutwo wa Jesu. Na Jesu ndaaugire atĩ mũndũ ũcio nĩ angĩkaingĩra Ũthamaki-inĩ ũcio. (Mat. 4:17) Kwoguo Jesu aaragia ũhoro wĩgiĩ Paradiso ĩrĩa ĩngĩgaakorũo gũkũ thĩ mahinda mokĩte. Tũngiuga ũguo nĩkĩ?
Nĩ ũndũ ũrĩkũ tũngĩkinyĩrĩra gũtua wĩgiĩ mwĩki-naĩ ũrĩa waaririe na Jesu, na igũrũ rĩgiĩ maũndũ marĩa mwĩki-naĩ ũcio ooĩ? (Rora kĩbungo gĩa 2-3)
2. Nĩ maũndũ marĩkũ monanagia atĩ mwĩki-naĩ ũcio weririre aarĩ Mũyahudi?
2 No kũhoteke mwĩki-naĩ ũcio weririre aarĩ Mũyahudi. Mwĩki-naĩ ũcio eerire mwĩki-naĩ ũcio ũngĩ ũũ: “Kaĩ ũtaretigĩra Ngai o na hanini, kuona atĩ ũramũkĩra ituĩro rĩmwe na mũndũ ũyũ?” (Luk. 23:40) Ayahudi maathathayagia Ngai ũmwe, no andũ a ndũrĩrĩ meetĩkĩtie ngai nyingĩ. (Tham. 20:2, 3; 1 Kor. 8:5, 6) Korũo eki-naĩ acio maarĩ andũ a ndũrĩrĩ, no kũhoteke mwĩki-naĩ ũcio angĩoririe, “Kaĩ ũtaretigĩra ngai citũ o na hanini?” Makĩria ma ũguo, ririkana atĩ kaingĩ Jesu ndaahunjagĩria andũ matarĩ Ayahudi, tondũ ndaatũmĩtwo kũrĩ andũ a ndũrĩrĩ, no aatũmĩtwo kũrĩ “ngʼondu iria [ciorĩte] cia nyũmba ya Isiraeli.” (Mat. 15:24) Ngai nĩ aaguũrĩirie Aisiraeli atĩ nĩ angĩkaariũkia andũ arĩa makuĩte. No kũhoteke mwĩki-naĩ ũcio weririre nĩ ooĩ ũhoro ũcio, na o ta ũrĩa ciugo ciake cionanagia, nĩ eeciragĩria atĩ Jehova nĩ angĩkaariũkia Jesu nĩguo athane Ũthamaki-inĩ wa Ngai. Mũndũ ũcio ningĩ nĩ eerĩgagĩrĩra atĩ Ngai nĩ angĩamũriũkirie o nake.
3. Nĩ ũndũ ũrĩkũ ũngĩkorũo wokire meciria-inĩ ma mwĩki-naĩ ũcio weririre rĩrĩa Jesu aagwetire ũhoro wa Paradiso? Taarĩria. (Kĩambĩrĩria 2:15)
3 No kũhoteke mwĩki-naĩ ũcio weririre nĩ ooĩ ũhoro wa Adamu na Hawa na Paradiso ĩrĩa Jehova aamathondekeire tondũ aarĩ Mũyahudi. Kwoguo nĩ angĩataũkĩirũo atĩ Paradiso ĩrĩa Jesu aaragia ũhoro wayo nĩ thĩ ĩthondeketwo ĩgatuĩka mũgũnda mũthaka.—Thoma Kĩambĩrĩria 2:15.
4. Ciugo iria Jesu eerire mwĩki-naĩ ũmwe ciagĩrĩire gũtũma twĩcirie igũrũ rĩgiĩ ũndũ ũrĩkũ?
4 Ciugo cia Jesu kũrĩ mwĩki-naĩ ũcio nĩ ciagĩrĩire gũtũtindĩka twĩcirie igũrũ rĩgiĩ ũrĩa ũtũũro ũgaakorũo ũhaana thĩinĩ wa Paradiso. Hatarĩ nganja no twĩrute hanini ũhoro wĩgiĩ Paradiso kuumana na wathani wa thayũ wa Mũthamaki Suleimani. Na no twĩrĩgĩrĩre atĩ Jesu, tondũ nĩ mũnene gũkĩra Suleimani, nĩ akaarutithania wĩra hamwe na arĩa magaathana nake nĩguo mathondeke thĩ ĩtuĩke Paradiso. (Mat. 12:42) Hatarĩ nganja, arĩa a “ngʼondu ingĩ” nĩ magĩrĩirũo kũmenya maũndũ marĩa marabatara gwĩka nĩguo magĩrĩre gũgaatũũra thĩinĩ wa Paradiso tene na tene.—Joh. 10:16.
ŨTŨŨRO ŨGAAKORŨO ŨHAANA ATĨA THĨINĨ WA PARADISO?
5. Wonaga ta ũtũũro thĩinĩ wa Paradiso ũgaakorũo ũhaana atĩa?
5 Nĩ ũndũ ũrĩkũ ũkaga meciria-inĩ maku weciria ũhoro wĩgiĩ ũtũũro thĩinĩ wa Paradiso? No kũhoteke nĩ ũhũũraga mbica ya kũndũ gũthaka kũhaana ta mũgũnda wa Edeni. (Kĩam. 2:7-9) No gũkorũo nĩ ũririkanaga ũrathi wa Mika ũrĩa wonanagia atĩ andũ a Ngai nĩ magaaikara “o mũndũ rungu rwa mũthabibũ wake na rungu rwa mũtĩ wake wa mũkũyũ.” (Mik. 4:3, 4) Ningĩ no kũhoteke nĩ ũririkanaga ũrĩa Bibilia yugaga atĩ nĩ gũgaakorũo na irio nyingĩ. (Thab. 72:16; Isa. 65:21, 22) Kwoguo no gũkorũo nĩ ũhũũraga mbica ũrĩ kũndũ gũthaka ũikarĩte thĩ metha-inĩ ĩiyũrĩte irio njega, ũkĩhuuhia karĩera karĩ na mũnungo mwega wa mĩmera na mahũa. Na no gũkorũo nĩ ũhũũraga mbica ũrĩ hamwe na andũ anyu a famĩlĩ na arata, o hamwe na arĩa makaariũkio, mũkĩhũthĩra mahinda hamwe mũkenete mũgĩthekaga. Icio ti iroto. No tũkorũo na ma atĩ maũndũ macio nĩ mageekĩka thĩinĩ wa thĩ. Ningĩ thĩinĩ wa Paradiso nĩ tũkaaruta wĩra wa gũcanjamũra.
Nĩ tũgaakorũo na wĩra wa bata wa kũruta andũ arĩa makaariũkio (Rora kĩbungo gĩa 6)
6. Tũkaaruta wĩra ũrĩkũ thĩinĩ wa Paradiso? (Rora mbica.)
6 Jehova aatũmbire ũndũ tũrĩkenagĩra wĩra witũ. (Koh. 2:24) Nĩ tũgaakorũo na wĩra mũingĩ wa kũruta hĩndĩ ya Wathani wa Mĩaka Ngiri wa Kristo. Andũ arĩa makaahonoka hĩndĩ ya thĩna ũrĩa mũnene o hamwe na andũ milioni nyingĩ arĩa makaariũkio nĩ makaabatara nguo, irio, na kũndũ gwa gũikara. Nĩ tũkaabatara kũruta wĩra mũingĩ wa gũcanjamũra nĩguo tũhingie mabataro macio. O ta ũrĩa Adamu na Hawa maarĩ marĩmage na marũmbũyagie mũgũnda wa Edeni, o na ithuĩ nĩ tũgaakorũo na mweke wa gũthondeka thĩ ĩtuĩke Paradiso. Ningĩ ta wĩcirie ũrĩa tũgaakenera kũruta andũ milioni nyingĩ arĩa makaariũkio arĩa matagaakorũo moĩ maũndũ maingĩ megiĩ Jehova na muoroto wake, na gũteithia andũ ehokeku arĩa maatũũraga ihinda iraihu mbere ya Jesu kwĩruta maũndũ makĩria!
7. Nĩ ũndũ ũrĩkũ tũngĩkorũo na ma naguo, na nĩkĩ?
7 No tũkorũo na ma atĩ thĩinĩ wa Paradiso tũgaatũũra na thayũ, tũrĩ na kĩrĩa gĩothe tũrabatara, na nĩ gũgaakorũo na mĩbango mĩega. Gĩtũmi nĩ tondũ Jehova nĩ atũheete ngerekano ya ũrĩa ũtũũro ũgaakorũo ũhaana rungu rwa wathani wa Mũrũ wake. Ngerekano ĩyo nĩ ya wathani wa Mũthamaki Suleimani.
WATHANI WA SULEIMANI NĨ NGEREKANO YA ŨRĨA PARADISO ĨGAAKORŨO ĨTARIĨ
8. Ciugo cia Thaburi 37:10, 11, 29 ciahingire atĩa thutha wa Mũthamaki Daudi gũciandĩka? (Rora “Ciũria Kuuma Kũrĩ Athomi” thĩinĩ wa ngathĩti ĩno.)
8 Mũthamaki Daudi nĩ aatongoririo nĩ roho kwandĩka ũhoro wĩgiĩ ũrĩa ũtũũro ũngĩgaakorũo ũhaana rĩrĩa mũthamaki mũũgĩ na mwĩhokeku angĩgaikarĩra gĩtĩ kĩa ũthamaki. (Thoma Thaburi 37:10, 11, 29.) Kaingĩ nĩ tũthomaga Thaburi 37:11 tũkĩarĩrĩria na andũ ũhoro wĩgiĩ mahinda mokĩte. Nĩ tũkoragwo na gĩtũmi kĩega gĩa gwĩka ũguo tondũ Jesu nĩ aacokerire ciugo icio hĩndĩ ya Mahunjio Make ma Kĩrĩma-inĩ, kuonania atĩ nĩ ingĩkaahinga mahinda mokĩte. (Mat. 5:5) No ciugo icio cia Daudi ningĩ nĩ ciaguũririe ũrĩa ũtũũro ũngĩgaakorũo ũhaana matukũ-inĩ ma Mũthamaki Suleimani. Rĩrĩa Suleimani aathanaga Isiraeli, andũ a Ngai nĩ maakenagĩra thayũ na ũgaacĩru marĩ bũrũri ‘waiyũire iria na ũũkĩ.’ Ngai aaugĩte ũũ: “Angĩkorũo nĩ mũrĩthiaga na mbere kũrũmĩrĩra mawatho makwa . . . , nĩ ngaatũma bũrũri ũcio ũkoragwo na thayũ, na mũgaakomaga gũtarĩ mũndũ ũngĩtũma mwĩtigĩre.” (Alaw. 20:24; 26:3, 6) Ciĩranĩro icio nĩ ciahingire hĩndĩ ya wathani wa Suleimani. (1 Maũ. 22:9; 29:26-28) Na Jehova eeranĩire atĩ andũ aganu ‘matingĩgaakorũo kuo rĩngĩ.’ (Thab. 37:10) Kwoguo ciugo iria irĩ thĩinĩ wa Thaburi 37:10, 11, 29 nĩ ciahingire mahinda-inĩ ma tene na nĩ ikaahinga mahinda mokĩte.
9. Mũtumia mũthamaki wa Sheba aaugire atĩa igũrũ rĩgiĩ wathani wa Suleimani?
9 Mũtumia mũthamaki wa Sheba nĩ aaiguire ũhoro wĩgiĩ thayũ na ũgaacĩru ũrĩa warĩ bũrũri-inĩ wa Isiraeli rĩrĩa Suleimani aathanaga arĩ mũthamaki. Mũtumia ũcio ũrĩa waikaraga bũrũri wa kũraihu nĩ aathiire Jerusalemu nĩguo akeyonere we mwene. (1 Ath. 10:1) Thutha wa kwĩyonera ũthamaki wa Suleimani aaugire ũũ: “Ndierĩtwo o na nuthu ya ũhoro ũcio. . . . Gũkena nĩ arũme aku, na gũkena nĩ ndungata ciaku iria irũgamaga mbere yaku hingo ciothe, ithikĩrĩirie ũũgĩ waku!” (1 Ath. 10:6-8) No maũndũ macio maarĩ kuo hĩndĩ ya wathani wa Suleimani maarĩ o ngerekano ya maũndũ marĩa Jehova ageekĩra andũ rungu rwa wathani wa Mũrũwe Jesu.
10. Jesu nĩ mũnene gũkĩra Suleimani na njĩra irĩkũ?
10 Jesu nĩ mũnene gũkĩra Suleimani na njĩra ciothe. Suleimani aarĩ mũndũ ũtarĩ mũkinyanĩru, ũrĩa wekire mahĩtia manene marĩa mũthia-inĩ maareheire andũ a Ngai moritũ. Ngũrani nake, Jesu nĩ Mwathani mũkinyanĩru na ndahĩtagia. (Luk. 1:32; Ahib. 4:14, 15) Rĩrĩa Jesu aageririo na njĩra nene nĩ Shaitani nĩ aahotire gũikara arĩ mwĩhokeku harĩ Ngai. Kristo nĩ onanĩtie atĩ gũtirĩ hĩndĩ akeehia kana eke ũndũ ũngĩrehera arĩa marĩ rungu rwake moritũ. Nĩ gĩtĩo kĩnene gũkorũo arĩ we Mũthamaki witũ.
11. Nĩa magaateithia Jesu gwathana?
11 Jesu agaathana hamwe na andũ 144,000, makĩrutithania wĩra hamwe nĩguo marũmbũiye andũ na mahingie muoroto wa Jehova harĩ thĩ. (Kũg. 14:1-3) Tondũ andũ acio nĩ maagereire maũndũ maingĩ maritũ marĩ gũkũ thĩ, nĩ makaahota gwathana na njĩra ya ũcayanĩri. No hihi makaaruta wĩra ũrĩkũ?
ARĨA AITĨRĨRIE MAGUTA MAKAARUTA WĨRA ŨRĨKŨ?
12. Jehova akaahe arĩa 144,000 wĩra ũrĩkũ?
12 Wĩra ũrĩa ũheetwo Jesu na arĩa magaathana hamwe nake, nĩ mũnene makĩria gũkĩra ũrĩa waheetwo Suleimani. Mũthamaki ũcio aarũmbũyagia andũ milioni cigana ũna thĩinĩ wa bũrũri ũmwe tu wa Isiraeli. No arĩa magaathana Ũthamaki-inĩ wa Ngai magaakorũo makĩrũmbũiya andũ bilioni nyingĩ thĩinĩ wa thĩ yothe. Hatarĩ nganja ũcio nĩ mweke wa mwanya Jehova aheete arĩa 144,000!
13. Arĩa magaathana hamwe na Jesu magaakorũo na mweke ũrĩkũ wa mwanya?
13 O ta Jesu, arĩa 144,000 magaatungata marĩ athamaki na athĩnjĩri-Ngai. (Kũg. 5:10) Hĩndĩ ya Watho wa Musa, athĩnjĩri-Ngai nĩo maarĩ na itemi rĩa gũtigĩrĩra atĩ andũ marĩ na ũgima mwega wa mwĩrĩ na wa kĩĩroho. Watho ũcio warĩ ‘kĩĩruru kĩa maũndũ mega marĩa magooka,’ kwoguo no tuuge atĩ arĩa magaathana na Jesu nĩ magaakorũo na mweke wa mwanya wa kũrũmbũiya mabataro ma kĩĩroho na ma kĩĩmwĩrĩ ma andũ a Ngai. (Ahib. 10:1) Tũtiũĩ ũrĩa athamaki acio na athĩnjĩri-Ngai makaaranagĩria na arĩa magaakorũo rungu rwa Ũthamaki wao gũkũ thĩ, no nĩ tũkoona hĩndĩ ĩyo. Gũtekũmakania ũrĩa Jehova akaabanga maũndũ, no tũkorũo na ma atĩ thĩinĩ wa Paradiso ĩrĩa ĩroka, arĩa magaakorũo thĩinĩ wa thĩ nĩ makaaheo ũtongoria ũrĩa makaabatara.—Kũg. 21:3, 4.
ARĨA A “NGʼONDU INGĨ” MAGĨRĨIRŨO GWĨKA ATĨA NĨGUO MAGAATŨŨRA THĨINĨ WA PARADISO?
14. Nĩ ũkuruhanu ũrĩkũ ũkoragwo ho gatagatĩ-inĩ ka arĩa a “ngʼondu ingĩ” na ariũ a Ithe na Kristo?
14 Jesu eetire arĩa magaathana nake “karũũru kanini.” (Luk. 12:32) Ningĩ nĩ aaririe ũhoro wa gĩkundi kĩngĩ kĩa andũ arĩa eetire “ngʼondu ingĩ.” Ikundi icio cierĩ ikoragwo irĩ rũũru rũmwe rũrĩ na ũrũmwe. (Joh. 10:16) Ikundi icio nĩ ikoretwo ikĩrutithania wĩra hamwe, na nĩ igaathiĩ na mbere kũrutithania wĩra hamwe hĩndĩ ĩrĩa thĩ ĩgaathiĩ ĩtuĩkĩte Paradiso. Gũkinyĩria hĩndĩ ĩyo, arĩa a “karũũru kanini” magaakorũo kũrĩa igũrũ, nao arĩa a “ngʼondu ingĩ” magaakorũo na kĩĩrĩgĩrĩro gĩa gũtũũra gũkũ thĩ tene na tene. No harĩ na maũndũ arĩa a “ngʼondu ingĩ” marabatara gwĩka rĩu nĩguo makaagĩrĩra gũtũũra thĩinĩ wa Paradiso.
O na ihinda-inĩ rĩrĩ no tuonanie atĩ nĩ tũrehaarĩria gũgaatũũra thĩinĩ wa Paradiso ĩrĩa ĩroka (Rora kĩbungo gĩa 15)b
15. (a) Arĩa a ngʼondu ingĩ manyitaga mbaru atĩa ariũ a Ithe na Kristo? (b) Ũngĩĩgerekania atĩa na kĩonereria kĩa mũrũ wa Ithe witũ ũrĩa ũrĩ nduka-inĩ? (Rora mbica.)
15 Mwĩki-naĩ ũrĩa weririre aakuire atagĩte na mweke wa kuonania ngatho ciake nĩ ũndũ wa maũndũ marĩa Kristo eekire. Ngũrani nake, ithuĩ a “ngʼondu ingĩ” tũrĩ na mĩeke mĩingĩ ya kuonania ngatho nĩ ũndũ wa Jesu. Kwa ngerekano, nĩ tuonanagia nĩ tũmwendete kũgerera maũndũ marĩa twĩkagĩra ariũ a Ithe arĩa aitĩrĩrie maguta. Jesu aaugire atĩ angĩgaatuĩra andũ kũringana na ũrĩa meekĩire ariũ a Ithe. (Mat. 25:31-40) No tũnyite mbaru ariũ a Ithe na Kristo na njĩra ya kũmateithĩrĩria tũrĩ na kĩyo wĩra-inĩ wa kũhunjia na gũtua andũ arutwo. (Mat. 28:18-20) Nĩguo twĩke ũguo, nĩ tũrabatara kũhũthĩra wega indo iria tũheetwo cia kũrutana, ta ibuku rĩa Kenera Ũtũũro Tene na Tene! Angĩkorũo ihinda-inĩ rĩrĩ ndũrĩ na mũrutwo wa Bibilia-rĩ, na githĩ to ũgerie kwaria na andũ aingĩ o ũrĩa wothe ũngĩhota ũrĩ na muoroto wa kwambĩrĩria wĩruti wa Bibilia?
16. Nĩ atĩa tũngĩka nĩguo twĩhaarĩrie gũtuĩka raia a Ũthamaki wa Ngai?
16 Tũtirabatara gweterera nginya rĩrĩa tũkaaingĩra thĩinĩ wa Paradiso nĩguo tũtuĩke andũ arĩa Jehova endaga matũũre kuo. Nĩ twagĩrĩirũo kwĩrutanĩria ihinda-inĩ rĩrĩ gũkorũo tũrĩ ehokeku ũhoro-inĩ wĩgiĩ mĩario na ciĩko citũ na gũkorũo na ũigananĩru ũtũũro-inĩ witũ. Ningĩ nĩ twagĩrĩirũo gũkorũo tũrĩ ehokeku harĩ Jehova, harĩ mũndũ ũrĩa tũhikanĩtie nake, na harĩ Akristiano arĩa angĩ. O ũrĩa tũrerutanĩria gũtũũra kũringana na ithimi cia Ngai thĩinĩ wa thĩ ĩno njũru, noguo ũgaakorũo ũrĩ ũndũ mũhũthũ harĩ ithuĩ gũtũũra kũringana na ithimi icio thĩinĩ wa Paradiso. Ningĩ no twĩrutanĩrie kũgĩa na ũmenyeru wa mawĩra marĩa tũkaaruta thĩinĩ wa thĩ njerũ, na gũkũria ngumo iria irabatarania nĩguo tuonanie atĩ nĩ tũrehaarĩria gũgaatũũra kuo. Rora gĩcunjĩ kĩrĩ na kĩongo, “Hihi nĩ Wĩhaarĩirie ‘Gũkaagaya Thĩ’?” thĩinĩ wa ngathĩti ĩno.
17. Hihi nĩ twagĩrĩirũo gũkua ngoro nĩ ũndũ wa mehia twekĩte tene? Taarĩria.
17 Ningĩ nĩ twagĩrĩirũo gũtiga kwĩhũũra nĩ ũndũ wa mehia maritũ marĩa tũngĩkorũo twekĩte tene. Nĩ ma, tũtingĩenda ‘kũmenyera kwĩhia tũkĩendaga’ atĩ tondũ nĩ twarutĩirũo igongona rĩa ũkũũri. (Ahib. 10:26-31) Ĩndĩ no tũkorũo na ma atĩ Jehova nĩ atuoheire na njĩra nene angĩkorũo nĩ twĩrirĩte kuuma ngoro mehia maritũ twekĩte, tũgacaria ũteithio wake na wa athuri a kĩũngano, na tũkagarũrĩra mĩthiĩre itũ. (Isa. 55:7; Atũm. 3:19) Ririkanaga ciugo ici cia Jesu iria eerire Afarisai: “Ndiokire gwĩta arĩa athingu, no ndokire gwĩta ehia.” (Mat. 9:13) Igongona rĩa ũkũũri rĩrĩ na ũhoti wa kũhumbĩra mehia maitũ mothe.
NO ŨTŨŨRE TENE NA TENE THĨINĨ WA PARADISO
18. Nĩ maũndũ marĩkũ ũkeenda kwarĩrĩria na mwĩki-naĩ ũrĩa wacuuririo hakuhĩ na Jesu?
18 Ta hũũra mbica ũrĩ thĩinĩ wa Paradiso ũkĩaria na mwĩki-naĩ ũrĩa maaranĩirie na Jesu. Hatarĩ nganja inyuerĩ nĩ mũgaakorũo na ngatho nĩ ũndũ wa igongona rĩa Jesu. No kũhoteke nĩ ũkaamwĩra agũtaarĩrie ũrĩa gwathiire mathaa manini Jesu atanakua, na ũrĩa aaiguire Jesu amũcokeria ihoya rĩake. O nake no kũhoteke nĩ agakũũria ũrĩa ũtũũro wahaanaga matukũ-inĩ ma kũrigĩrĩria ma thĩ ya Shaitani. Na githĩ gĩtigaakorũo kĩrĩ gĩtĩo kĩnene kwĩruta Kiugo kĩa Ngai na andũ ta acio!—Ef. 4:22-24.
Hĩndĩ ya Wathani wa Mĩaka Ngiri wa Kristo, mũrũ wa Ithe witũ agĩkenera kwagagĩria ũhoti wake ũndũ-inĩ atũũrĩte erirĩirie gwĩka (Rora kĩbungo gĩa 19)
19. Nĩkĩ tũtikaanoga gũtũũra thĩinĩ wa Paradiso? (Rora mbica ngothi-inĩ.)
19 Tũtikaanoga gũtũũra thĩinĩ wa Paradiso. Hingo ciothe nĩ tũgaakoragwo na andũ aingĩ a kũmenyana nao, na wĩra mwega wa kũruta. Na ũndũ wa bata makĩria, o mũthenya nĩ tũgaakoragwo na mweke wa kũmenya Ithe witũ wa igũrũ makĩria, na gũkenera maũndũ marĩa agaatũhee. Hingo ciothe nĩ tũgaakoragwo na maũndũ maingĩ ma kwĩruta mamwĩgiĩ, na megiĩ ũũmbi wake. O ũrĩa mĩaka ĩgaathiĩ, noguo wendo witũ harĩ Ngai ũgaathiĩ wongererekete. Nĩ tũcokagia ngatho mũno harĩ Jehova na harĩ Jesu nĩ ũndũ wa gũtũhe kĩĩranĩro kĩu gĩa gũtũũra tene na tene thĩinĩ wa Paradiso.
RWĨMBO NA. 22 Ũthamaki nĩ Ũhandĩtwo, Nĩ Ũũke!
a Hihi kaingĩ nĩ wĩciragia ũrĩa ũtũũro ũgaakorũo ũhaana thĩinĩ wa Paradiso? Gwĩka ũguo no gũgwĩkĩre ngoro. O ũrĩa tũreciria igũrũ rĩgiĩ maũndũ marĩa Jehova atwĩrĩire, noguo tũrĩcanjamũkaga tũkĩruta andũ arĩa angĩ igũrũ rĩgiĩ thĩ njerũ. Gĩcunjĩ gĩkĩ nĩ gĩgũtũteithia gwĩkĩra hinya wĩtĩkio witũ harĩ kĩĩranĩro kĩa Jesu kĩa paradiso ihinda rĩũkĩte.
b GŨTAARĨRIA MBICA: Mũrũ wa Ithe witũ wĩrĩgagĩrĩra gũkaaruta andũ arĩa makaariũkio, akĩruta andũ arĩa angĩ ũmũthĩ.