Hihi Ũtũũro nĩ Ũkoragwo na Muoroto Kũna?
“HIHI ũtũũro nĩ ũkoragwo na muoroto o wothe?” Andũ aingĩ manooria kĩũria kĩu. Ũndũ wa kĩeha nĩ atĩ, andũ aingĩ o na mageria gwĩka atĩa, matitigaga kuona ũtũũro wao “ũrĩ wa tũhũ na ũtarĩ bata,” ta ũrĩa ndagĩtarĩ ũmwe kuuma Austria wĩtagwo Viktor E. Frankl oigire.
Hihi andũ aingĩ maiguaga ũguo nĩkĩ? Ũndũ ũmwe nĩ atĩ andũ milioni nyingĩ thĩinĩ wa thĩ makoragwo na mathĩna maingĩ mũno. O mũthenya nĩ mahiũranagia na ũthĩni, mĩrimũ, ũhinya na ũhinyanĩrĩria. Ũtũũro wao ũkoragwo ‘ũiyũirũo nĩ mĩtangĩko,’ o ta ũrĩa Ayubu akĩaria ũhoro wa mĩnyamaro ya andũ. (Ayubu 14:1) Itanya rĩao rĩkoragwo rĩrĩ o ũrĩa mangĩkinyĩria mũthenya ũyũ ũngĩ.
Nao angĩ milioni nyingĩ nĩ makoragwo na indo nyingĩ cia kĩĩmwĩrĩ. Monekaga ta marĩ na kĩrĩa gĩothe kĩbataranagia nĩguo mũndũ aiganĩre ũtũũro-inĩ. O na kũrĩ ũguo aingĩ matikoragwo maiganĩire. Nĩkĩ? Nĩ ũndũ kaingĩ ‘mĩnoga na mathĩna’ ma kĩĩmbeca kana maũndũ ma kĩeha ta gũkuĩrũo nĩ mwana—nĩ maniinaga mwĩhoko na matanya mao.—Thaburi 90:10.
Nĩ harĩ ũndũ ũngĩ ũtũmaga ũtũũro woneke ũrĩ wa “tũhũ na ũtarĩ bata.” Ũndũ ũcio nĩ ũrĩkũ? Nĩ gũkuhĩha mũno kwa ũtũũro wa mũndũ. Andũ aingĩ nĩ marigagwo kĩrĩa gĩtũmaga mũndũ atũũre o tũmĩaka tũnini na nĩguo akĩheetwo ũũgĩ mũingĩ. Matihotaga gũtaũkĩrũo nĩ ũndũ ũrĩa mũũru mũno arĩ o mũhaka ithuothe tũcemanie naguo: Atĩ o na tũngĩhota gwĩthema maũndũ mooru mũno marĩa makoraga andũ, marigĩrĩrio-inĩ gĩkuũ nĩ gĩtũtigithanagia na kĩrĩa gĩothe tũrĩ nakĩo.—Kohelethu 3:19, 20.
Hihi Ũtũũro Ũgũtũũra Wonekaga ta Ũtarĩ Muoroto?
Mũthamaki Suleimani wa Isiraeli ĩrĩa ya tene nĩ aatarĩirie ũhoro ũcio na njĩra njega mũno. Nĩ eeyoneire ũrĩa andũ a hĩndĩ yake meerutanagĩria kũhũthĩra ũũgĩ na ũhoti wao kũhanda, kũrĩma, gwaka, na kũrũmbũiya mabataro ma famĩlĩ ciao, o ta ũrĩa twĩkaga ũmũthĩ. Nĩ ũndũ ũcio akĩũria ũũ: ‘Bata wa ũtũũro nĩ ũrĩkũ?’ Agĩcoka akiuga atĩ maũndũ marĩa mothe andũ mekaga ‘no tũhũ, na gwĩthĩnia gũtheri.’—Kohelethu 2:17.
No hihi Mũthamaki Suleimani eendaga kuuga atĩ maũndũ marĩa mothe andũ mekaga megũtũũra marĩ o ma ‘tũhũ na gwĩthĩnia gũtheri’? Aca. Aataaragĩria ũrĩa ũtũũro ũtariĩ thĩinĩ wa thĩ ĩno ĩtarĩ nginyanĩru. O na kũrĩ ũguo, Kiugo kĩa Ngai kĩrĩa gĩtongoretio na roho no gĩgũteithie kũgĩa na ma atĩ maũndũ matigũtũũra matariĩ ũguo!
Hihi ũngĩhota atĩa kũgĩa na ũũma ũcio? Thoma icunjĩ igĩrĩ iria ĩrũmĩrĩire. No igũteithie kũmenya kĩrĩa gĩtũmaga ũtũũro woneke ta ũtarĩ bata, kĩhonia kĩa mathĩna macio, na ũrĩa ũngĩka nĩguo ũtũũro waku ũgĩe na muoroto o na mahinda-inĩ maya.