Ũtũũro Ũrĩ na Muoroto Rĩu o na Tene na Tene
NO ŨGĨE na ũtũũro ũrĩ na muoroto o na ũmũthĩ. Atĩa? Na njĩra ya kũrũmĩrĩra mootaro ma ũũgĩ marĩa marĩ thĩinĩ wa Kiugo kĩa Ngai, Bibilia. Rekei tũthuthurie mamwe mamo.
ŨTAARO WA BIBILIA: Mũthamaki Suleimani aandĩkire atĩ, “Gũtirĩ ũndũ ũngĩ mwega,” mũndũ angĩĩka ũkĩrĩte “kũrĩa, o na kũnyua, o na gwĩkenia ngoro na wĩra wake.”—KOHELETHU 2:24.
Twombirũo ũndũ tũngĩhota gũkenera wĩra mwega. O na rĩrĩa maũndũ marĩ maritũ mũno, no ũhote gũkenera ũtũũro ũmũthĩ ũngĩruta wĩra na kĩyo na ũrĩ na wĩhokeku.
ŨTAARO WA BIBILIA: “Kũheana nĩkuo kũrehage gĩkeno kũrĩ kũheo.”—ATŨMWO 20:35.
Kwa ngerekano andũ aingĩ nĩ monete atĩ kũhũthĩra mahinda mao na hinya wao gũteithia andũ arĩa angĩ hĩndĩ ya mathĩna, nĩ gũtũmaga makenere irathimo nyingĩ na gũgatũma ũtũũro wao ũkorũo na muoroto. Suleimani aandĩkire ũũ: “Menya gũkaima andũ ũndũ mwega, arĩa maagĩrĩirũo nĩ gwĩkwo, guoko gwaku gwakorũo gũtaagĩte hinya wa kũwĩka.”—Thimo 3:27.
Ta wĩcirie ũhoro wa Ralph. Thutha wa gũtiga wĩra, nĩ aaingĩrire ũtungata-inĩ wa hĩndĩ ciothe wa Gĩkristiano ũrĩa mũtumia wake aakoretwo agĩtungatĩra. Mahũthagĩra mathaa maingĩ o mweri thĩinĩ wa wĩra wa kũhunjia, makeheana nĩguo marute andũ arĩa angĩ Bibilia. Ralph oigĩte ũũ: “Twakinya mũciĩ hwaĩ-inĩ, tũiguaga tũrĩ anogu, to ũndũ wa gũkũra, no nĩ ũndũ wa kwĩrutĩra na ngoro yothe tũgĩtungatĩra Ithe witũ wa igũrũ. Ĩyo nĩ mĩnoga mĩega mũno!” Marĩ na mũtumia wake nĩ makoragwo na gĩkeno tondũ thĩinĩ wa ũtũũro wao mekĩrĩire mũno kũheana.
ŨTAARO WA BIBILIA: “Mũrata wa mũndũ amwendaga o hingo ciothe; aciaragwo atuĩke mũrũ wa nyina hingo ya mĩnyamaro.” —THIMO 17:17.
Mathĩna no mahũtha-hũthe mũndũ angĩkorũo na mũndũ wa kwaria nake ũhoro wamo. Mũthomi ũmwe wĩtagwo Francis Bacon aandĩkire atĩ andũ arĩa matakoragwo na arata a ma-rĩ, harĩ o, “thĩ ĩkoragwo ĩtariĩ ta kũndũ werũ-inĩ.” Gũkorũo na arata a ma—na gũkorũo wĩ mũrata mwega—no gũtũme mũtũũrĩre waku ũhũtha-hũthe; no ũkorũo ũrĩ ũndũ mwega na ũngĩtũma ũiganĩre.
ŨTAARO WA BIBILIA: “Gũkena-rĩ, nĩ andũ arĩa maiguaga Ũhoro wa Ngai, makaũrũmagia.”—LUKA 11:28.
Nĩkĩo Jesu onanirie ũndũ wa bata ũrĩa ũngĩka angĩkorũo no wende gũkoona ciĩranĩro cia Ngai ikĩhingio—iguaga na ũrũmagie kiugo kĩa Ngai. Kũgerera Kiugo gĩake Bibilia, Jehova Ngai nĩ atũteithagia tũmenye bata na muoroto wa ũtũũro. Ũndũ ũcio nĩ ũtũrehagĩra gĩkeno. Nĩkĩ? Tondũ nĩ tũhotaga gũkũria ũkuruhanu mwega na Mũũmbi witũ Jehova, “Ngai mũkeni.”—1 Timotheo 1:11, New World Translation.
ŨTAARO WA BIBILIA: “Ririkanaga ũrĩa Mũkũũmbi . . . mũira wa matukũ ma ũũru moke, o na mĩaka ĩkuhĩhĩrie, o ĩrĩa ũkoiga atĩrĩ, Ha ũhoro wayo-rĩ, kaĩ ndikenaga-ĩ!”—KOHELETHU 12:1.
Ũtaaro ũcio Mũthamaki Suleimani aheete andũ ethĩ, arĩa kĩambĩrĩria-inĩ mangĩaga kũmenya mogwati marĩa mangiumĩra ũtũũro-inĩ, nĩ ũtwagĩrĩire ithuothe. Igaga Mũũmbi waku mbere ũtũũro-inĩ waku. Ũndũ ũcio nĩguo ũngĩtũma ũtũũro waku ũgĩe na muoroto. Regana na mwerekera ũyũ: “Nĩtũkĩrĩeni na tũkĩnyue, nĩ ũndũ rũciũ nĩ gũkua tũgakua.” (1 Akorintho 15:32) Kohelethu 8:12 yugaga atĩ ũngĩiga Ngai mbere, ‘nĩ ũrĩonaga maũndũ mega.’
Mũirĩtu wĩtagwo Wendi nĩ eeyoneire ũũma wa ciugo icio. Rĩrĩa aarĩ mũnyinyi, marĩ na mwarĩ wa nyina nĩ meerutire rũthiomi rwa Spanish nĩguo mahote gũthamĩra thĩinĩ wa bũrũri wa Dominican Republic, kũrĩa ahunjia a ũhoro mwega wa Bibilia maabataranagia mũno. “O na gũtuĩka nĩ tweimire mũno nĩguo tũgatungatĩre kũrĩa kwarĩ na bata mũnene-rĩ, nĩ twakeneire mũno. Gũtirĩ kĩndũ o na kĩrĩkũ ingĩringithania na mĩeri ĩyo ĩtandatũ! Irathimo iria twagĩire nacio ciarĩ nyingĩ gũkĩra kwĩima kũrĩa tweimire.”
Kwĩhokeka Harĩ Ngai nĩ Gũtũmaga Ũtũũro Ũgĩe na Muoroto
Gũkũria ũkuruhanu mwega na Jehova no gũtũme ũtũũro waku ũkorũo na muoroto na njĩra ya mwanya mũno. Atĩa? Rĩrĩa Shaitani aahenirie Adamu na Hawa maremere wathani wa Ngai-rĩ, aacokire akĩonania atĩ gũtirĩ mũndũ o na ũmwe ũngĩikara arĩ mwĩhokeku harĩ Ngai angĩgerio. (Ayubu 1:9-11; 2:4) Wee no ũhote kuonania atĩ Shaitani nĩ wa maheeni! Na njĩra ĩrĩkũ? Ũngĩikara ũrĩ mwĩhokeku harĩ Ngai, na njĩra ya kũrũmia biũ mootaro make, na ningĩ kuonania atĩ nĩ wĩtĩkĩrĩte atĩ Jehova arĩ na kĩhooto gĩa gũtwamũrĩra wega na ũũru.—Kũguũrĩrio 4:11.
Angĩkorũo nĩ tũkwenda gũthingata mĩthiĩre ĩrĩa yagĩrĩire no tũbatare gũkirĩrĩria mathĩna. Hihi mathĩna macio no magirie ũtũũro witũ ũkorũo na muoroto? Ta hũra mbica thũ njũru mũno ĩgĩcambia mũrata twendete kana mũndũ wa famĩlĩ. Thũ ĩyo ĩngĩtwĩka maũndũ mooru tũkĩgitĩra mũndũ ũcio twendete-rĩ, hihi ũndũ ũcio no ũtũme ũtũũro witũ wage muoroto? Aca! No twĩtĩkĩre gũkirĩrĩria mathĩna nĩguo tũtetere rĩĩtwa rĩake. Ũguo noguo gũtariĩ harĩ gũikara tũrĩ ehokeku harĩ Ngai. Wĩhokeku witũ rungu rwa maũndũ mooru marĩa tũcemanagia namo mahinda-inĩ maya nĩ ũtũmaga tũkenie ngoro ya Ngai.—Thimo 27:11.
Ũtũũro Ũrĩ na Muoroto Tene na Tene
Kwoguo, tua itua rĩa kwĩruta maũndũ mothe marĩa ũngĩhota megiĩ Ngai na muoroto wake. Jesu Kristo we mwene oigire ũũ: “Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa warekirie, na nĩwe Jesu Kristo.” (Johana 17:3) Hĩndĩ ĩrĩa Ngai akaahingia muoroto wake wĩgiĩ thĩ ũrĩa aarĩ naguo kuuma o kĩambĩrĩria-rĩ, arĩa ehokeku nĩ magaakenera kĩrĩa Jehova aatanyĩte o kĩambĩrĩria—“muoyo wa tene na tene” thĩinĩ wa thĩ ĩtuĩtwo paradiso. Hĩndĩ ĩyo ũtũũro ũgaakorũo ũrĩ na muoroto na gĩkeno.—Thaburi 145:16.
Ũngĩruta kũ ũmenyo ũcio Jesu aaririe ũhoro waguo? Thĩinĩ wa Kiugo kĩa Ngai kĩrĩa gĩtongoretio na roho, Bibilia. Angĩkorũo no wende gũteithĩrĩrio gwĩka ũguo, no wandĩkĩre arĩa macabaga ngathĩti ĩno. Nĩ megũkenera kũbanga mũndũ agũteithie wĩrute ũrĩa Bibilia ĩrutanaga kũna.