Ciana Ciagĩrĩirũo Kũrutwo Maũndũ Marĩkũ?

“Ũhoro o wothe wandĩkĩtwo Maandĩko-inĩ nĩwekĩrirũo nĩ Ngai ngoro-inĩ ya mũwandĩki, na wĩ na kĩguni ũhoro-inĩ wa kũrutana, na wa kũmenyithia andũ ũũru wao, na wa kũmakaania, o na wa kũmamenyeria mĩtũũrĩre ĩrĩa ĩringaine na ũthingu.”—2 TIMOTHEO 3:16.

CIANA nĩ ibataraga kũrutwo ma ĩkoniĩ Ngai. Cingĩĩruta ma ĩyo kuumana na kĩĩ? Nĩ kuuma thĩinĩ wa Bibilia, ibuku rĩa kĩĩndini rĩrĩa rĩkoragwo rĩheetwo gĩtĩo kũndũ kũingĩ thĩinĩ wa thĩ.

Bibilia nĩ ta marũa moimĩte kũrĩ Ngai. Marũa-inĩ macio, Ngai nĩ aguũrĩtie ngumo ciake na akahe ciana ciake ciothe iria nyinyi na iria ngũrũ ũtaaro wĩgiĩ mĩthiĩre. Ta rora morutani mamwe marĩa marĩ thĩinĩ wa Bibilia wone maũndũ marĩa o na ciana nyinyi ingĩĩruta kuumana namo.

Nĩ maũndũ marĩkũ Ngai endaga tũmenye mamwĩgiĩ?

◼ Ũrĩa Bibilia ĩrutanaga: “Wee wĩtagwo JEHOVA, nowe wiki Ũrĩa-wĩ-Igũrũ-Mũno o igũrũ rĩa thĩ yothe.”—Thaburi 83:18.

Tũreruta atĩa? Ngai arĩ kuo kũna na nĩ arĩ rĩĩtwa rĩake mwene.

◼ Ũrĩa Bibilia ĩrutanaga: “Nĩ gũkorũo Jehova atuĩragia maũndũ ma ngoro cia andũ othe, akamenya metarania mothe ma meciria mao. Ũngĩkorũo nĩũrĩmũrongoragia-rĩ, nĩarĩkwĩonithagia.”—1 Maũndũ ma Matukũ ma Tene 28:9.

Tũreruta atĩa? Jehova Ngai nĩ atũrũmbũyagia ithuothe, o hamwe na ciana nyinyi. (Thaburi 10:14; 146:9) Nĩ endaga twĩrute ũhoro ũmwĩgiĩ.

◼ Ũrĩa Bibilia ĩrutanaga: “Ndũkananyarire . . . mwana wa ngoriai. na rĩrĩ, ũngĩmanyarira na ũndũ o na ũrĩkũ, nao mangaĩre-rĩ, ndirĩ hingo itakaigua gũkaya kwao.”—Thama 22:22-24.

Tũreruta atĩa? Jehova nĩ athikagĩrĩria nginya mahoya ma ciana nyinyi. No twarie na Ngai kaingĩ tũkamũitũrũragĩra maũndũ marĩa marĩ meciria-inĩ na ngoro-inĩ ciitũ.

◼ Ũrĩa Bibilia ĩrutanaga: “No gũcoka maacokaga o kũgeria Mũrungu, o we Ũrĩa Mũtheru wa Isiraeli, magakĩmũthirĩkia.”—Thaburi 78:41.

Tũreruta atĩa? Mĩario na ciĩko ciitũ nĩ ihutagia Jehova, kwoguo nĩ twagĩrĩirũo gwĩciria mbere ya kuuga kana gwĩka ũndũ.

Twagĩrĩirũo gũkorũo na mawoni marĩkũ harĩ arĩa ngũrani na ithuĩ?

◼ Ũrĩa Bibilia ĩrutanaga: “Ngai ndatĩagĩra andũ maũthĩ: no thĩinĩ wa ndũrĩrĩ ciothe mũndũ ũrĩa ũmwĩtigagĩra na ageka maũndũ ma ũthingu nĩetĩkagĩrũo nĩwe.”—Atũmwo 10:34, 35.

Tũreruta atĩa? Angĩkorũo Ngai nĩ etĩkagĩra andũ a mĩhĩrĩga yothe-rĩ, tũtiagĩrĩirũo nĩ gũthutũkania andũ nĩ ũndũ wa rangi wa ngothi yao kana nĩ ũndũ maũthĩ mao nĩ ngũrani na maitũ.

◼ Ũrĩa Bibilia ĩrutanaga: “Ikaragai hĩndĩ ciothe mwĩhaarĩirie gũcokeria mũndũ o wothe ũrĩa ũngĩmũũria gĩtũmi kĩa ũhoro ũrĩa mũtũire mwĩrĩgagĩrĩra, no mũmũcokerie mũhoreire, na mwĩ na gĩtĩo.”—1 Petero 3:15.

Tũreruta atĩa? Rĩrĩa tũkwarĩrĩria maũndũ ma ndini, twagĩrĩirũo gũtaarĩria maũndũ marĩa twĩtĩkĩtie, tũrĩ na ũũmĩrĩru na tũtekũingĩrĩra andũ arĩa angĩ. Ningĩ nĩ twagĩrĩirũo gũtĩa arĩa marĩ na wĩtĩkio ngũrani na witũ.

Twagĩrĩirũo gũikarania atĩa na andũ a famĩlĩ?

◼ Ũrĩa Bibilia ĩrutanaga: “Ciana, iguagai aciari anyu maũndũ-inĩ mothe, nĩ ũndũ ũguo nĩguo ũkenagia Mwathani.”—Akolosai 3:20.

Tũreruta atĩa? Rĩrĩa ciana ciathĩka cionanagia atĩ nĩ ciendete aciari a cio na nĩ irenda gũkenia Ngai.

◼ Ũrĩa Bibilia ĩrutanaga: ‘Mũgĩkiranagĩrĩria na mũkĩohanagĩra o mũndũ na ũrĩa ũngĩ, angĩkorũo nĩharĩ mũndũ matetanĩtie na ũrĩa ũngĩ-rĩ, kĩohanagĩrei inyuene o ta ũrĩa Mwathani nake aamuoheire inyuĩ.’—Akolosai 3:13.

Tũreruta atĩa? Andũ arĩa angĩ, nginya arĩa a famĩlĩ ciitũ nĩ matũhĩtagĩria rĩmwe na rĩmwe. No tũngĩenda Ngai atuohere, no mũhaka twĩrute kuohera andũ arĩa angĩ.—Mathayo 6:14, 15.

Wagĩrĩirũo gũkorũo ũrĩ mwĩhokeku na ũrĩ mũtugi nĩkĩ?

◼ Ũrĩa Bibilia ĩrutanaga: “Eheriai maheni na mwaranagĩrie ũhoro-ũrĩa-wa-ma o mũndũ na ũrĩa ũngĩ.”—Aefeso 4:25.

Tũreruta atĩa? Rĩrĩa twaria ma, twĩgerekanagia na Ngai na ũndũ ũcio nĩ ũmũkenagia. Tũngĩĩmenyeria kwaragia maheni, tũhanaga ta thũ ya Ngai, Mũcukani, ũrĩa “ithe wamo.”—Johana 8:44; Tito 1:2.

◼ Ũrĩa Bibilia ĩrutanaga: “Maũndũ mothe marĩa mũngĩenda andũ mamwĩkage inyuĩ, mekagei o mo o nao.”—Mathayo 7:12.

Tũreruta atĩa? Nĩ twagĩrĩirũo nĩ kũrũmbũiya meciiria na mabataro ma andũ arĩa angĩ, thĩinĩ wa famĩlĩ na itũũra-inĩ. Rĩrĩa ‘twaiguanĩra tha,’ nĩ ũhũthũ andũ arĩa angĩ o nao gũtũiguĩra tha.—1 Petero 3:8; Luka 6:38.

O ta ũrĩa ngerekano icio ironania-rĩ, maũndũ marĩa Bibilia ĩrutanaga no mateithie ciana igaatuĩka andũ agima marĩ na ngatho, gĩtĩo, na aiguanĩri tha. No nũũ wagĩrĩirũo nĩ kũruta ciana maũndũ macio?