Wĩrutanĩrie Makĩria Kũhe Andũ Mũkaana

Thenema ĩmwe ĩtarĩ mĩgambo ĩtagwo A Trip Down Market Street, yonanagia ũrĩa ũtũũro watariĩ taũni-inĩ ya San Francisco, U.S.A., mĩaka-inĩ ya 1900. Arĩa mooire thenema ĩyo meekĩrĩte kamera yathiũrũrũkaga ngaari-inĩ magacoka makamĩerekeria barabara-inĩ cia taũni ĩyo. Thenema ĩyo yonanagia ngaari cia mbarathi igĩthiĩ, ngaari ingĩ cia tene, o hamwe na andũ maragũra matuka-inĩ, na endia a ngathĩti, othe marĩ mĩhangʼo-inĩ ya o mũthenya.

Ũndũ wa kĩeha nĩ atĩ no kũhoteke thenema ĩyo yooetwo mweri-inĩ wa Ĩpuro 1906, kahinda kanini mbere ya mwaki na gĩthingithia kĩnene kĩrĩa kĩahanĩkire Ĩpuro 18, gĩkĩũraga andũ ngiri cigana ũna na gĩgĩthũkia taũni ĩyo. Amwe arĩa monekaga thenema-inĩ ĩyo marĩ na gĩkeno matiamenyaga atĩ nĩ mangĩakuire o thutha wa thikũ nini tu. Scott Miles ũmwe wa famĩlĩ ya mũndũ ũmwe wa arĩa mooire thenema ĩyo oigire ũũ: “Andũ thenema-inĩ ĩyo, monekaga marĩ mĩhangʼo-inĩ yao matekũmenya kĩrĩa kĩmetereire. Ũcio ũkoragwo ũrĩ ũndũ wa kĩeha no hatirĩ ũndũ mũndũ angĩteithia.”

Ũndũ ũcio no ũtũteithie gwĩciria na njĩra ndikĩru ũhoro wa matukũ maya tũratũũra. O na ithuĩ, nĩ tũiguagĩra andũ arĩa marĩ thĩinĩ wa thĩ ĩno tha. Makoragwo mĩhangʼo-inĩ yao ya o mũthenya, matekũmenya ũgwati ũrĩa ũrĩ mbere yao wa kwanangwo kwa mũtabarĩre wa thĩ ĩno njũru. Ngũrani na ũrĩa gũtarĩ mũndũ wamenyaga ũhoro wa gĩthingithia kĩu, ithuĩ tũrĩ na kahinda kanini gatigaire ga kũhe andũ mũkaana wĩgiĩ mũthenya wa Jehova wa gũtuĩra andũ. No kũhoteke nĩ ũhunjagia nyũmba kwa nyũmba o kiumia, no hihi no wĩrutanĩrie makĩria kũhe andũ mũkaana?

JESU NDAATIGAGA KŨHUNJIA

Jesu nĩ aatũigĩire kĩonereria kĩega tondũ aahũthagĩra mĩeke yothe kũhunjia. Aahunjagĩria arĩa othe aacemanagia nao, ta mwĩtia mbia cia igooti ũrĩa aacemanĩtie nake barabara-inĩ kana mũtumia ũrĩa wamũkorire gĩthima-inĩ athiĩte kũhurũka mathaa ma mũthenya. (Luk. 19:1-5; Joh. 4:5-10, 21-24) O na rĩrĩa abangĩte kũhurũka, Jesu nĩ aabangũraga mĩbango yake nĩguo athomithie andũ. Nĩ ũndũ wa kũiguĩra andũ tha, aahunjagia na kĩyo mũno. (Mar. 6:30-34) Mahinda-inĩ maya ahunjia a Ũthamaki monanagia atĩa kĩyo ta kĩa Jesu ũtungata-inĩ?

MAHŨTHAGĨRA MĨEKE YOTHE

Kwa ngerekano, mwarĩ wa Ithe witũ Melika aikaraga nyũmba ĩikaragwo nĩ andũ aingĩ na nĩ ĩkoragwo na ũgitĩri mũnene. Andũ aingĩ arĩa maikaraga nyũmba ĩyo nĩ arutwo moimĩte mabũrũri-inĩ mangĩ. Gũtirĩ handũ Melika angĩarutire namba ciao cia thimũ. Nĩ akenagĩra kwambĩrĩria ndeereti cia maũndũ ma kĩĩroho na akombori arĩa acemanagia nao korindo-inĩ na thĩinĩ wa kirini ya kwambatia andũ ngoroba-inĩ. Oigaga ũũ: “Kĩu ndĩkĩonaga kĩrĩ gĩcigo gĩakwa gĩa kũhunjia.” Melika akuaga mabuku ma thiomi cigana ũna, na andũ aingĩ nĩ metĩkagĩra trakti na ngathĩti. Ningĩ nĩ ateithagia andũ kũmenya atĩ no mone ũhoro makĩria Intaneti-inĩ thĩinĩ wa jw.org. Rĩu nĩ areruta Bibilia na andũ maigana ũna.

Nake mwarĩ wa Ithe witũ Sonia nĩ erutanagĩria kũhunjĩria andũ aingĩ o ũrĩa angĩhota. Arutaga wĩra thĩinĩ wa kiriniki ĩmwe na nĩ akoragwo eigĩire muoroto wa kũhunjĩria arĩa othe marutaga wĩra nao. Ũndũ ũrĩa aambire gwĩka, nĩ kũmenya mabataro na maũndũ marĩa makenagia o mũndũ o mũndũ harĩ aruti acio a wĩra. Agĩcoka akĩambĩrĩria kũhũthagĩra mathaa ma ranji kwaria na mũndũ ũmwe ũmwe maũndũ ma Bibilia. Nĩ ũndũ wa gwĩka ũguo, nĩ aahotire kwambĩrĩria kwĩruta Bibilia na andũ erĩ arĩa marutithanagia wĩra nao. Ningĩ rĩu nĩ arabanga ũrĩa arĩhũthagĩra mathaa make marĩa atararuta wĩra kwaria na arwaru arĩa makoragwo metereire kũrigitwo.

HŨTHAGĨRA MĨEKE YOTHE ĨRĨA ŨRĨ NAYO

Mũndũ ũmwe wahonokire gĩthingithia kĩrĩa kĩa 1906 oigire atĩ kĩu “nĩkĩo gĩcanjama kĩrĩa kĩũru mũno kĩanakora bũrũri kana taũni.” Ica ikuhĩ icanjama ciothe igũkorũo irĩ kĩndũ hatarĩ iringithanĩtio na mũthenya wa marakara ũrĩa ũgũkora arĩa othe “matoĩ Ngai.” (2 Thes. 1:8) Wendi wa Ngai nĩ andũ magarũrĩre mwerekera wa meciria na ngoro ciao nĩguo metĩkĩre ndũmĩrĩri ya mũkaana ĩrĩa ĩraheanwo nĩ ndungata ciake.—2 Pet. 3:9; Kũg. 14:6, 7.

Twĩna mweke wa gũteithia andũ moone atĩ tũratũũra mahinda-inĩ ma ũgwati na kũmateithia matige gũthingata maũndũ ma kĩĩmwĩrĩ na ithenya rĩa ũguo macarie Jehova. (Zef. 2:2, 3) Na githĩ ti wega ũhũthagĩre mweke o wothe kũhunjĩria arĩa mũrutithanagia wĩra nao, andũ a itũũra rĩanyu, o hamwe na arĩa ũcemanagia nao ũrĩ mĩhangʼo-inĩ ya o mũthenya! Hihi nĩ ũrĩĩrutanagĩria makĩria kũhe andũ mũkaana?