Rũmagĩrĩra Kĩonereria kĩa Anabii

HIHI nĩ kũrĩ maũndũ maku mahanaine na ma anabii? Bibilia ya Gĩthũngũ ya New World Translation ya 2013 thĩinĩ wa gĩcunjĩ kĩayo kĩa “Ũthathaũri wa Ciugo cia Bibilia” ĩtaaragĩria atĩ mũnabii nĩ “Mũndũ ũrĩa ũkoragwo atũmĩtwo nĩ Ngai agatware ndũmĩrĩri yake. Anabii matiakoragwo matũmĩtwo nĩ Ngai tu makarathe, ĩndĩ nĩ nginya makarute andũ ũhoro wa Jehova, maathani make na matuĩro make ma ciira.” O na gũtuĩka ndũrathaga maũndũ o nawe waragia ũhoro umĩte kũrĩ Ngai rĩrĩa ũrahunjia maũndũ marĩa marĩ thĩinĩ wa Kiugo gĩake.​—Mat. 24:14.

Na githĩ ti gĩtĩo kĩnene mũno tũkoragwo nakĩo gĩa kũhunjĩria andũ ũhoro wa Ngai witũ Jehova na kũmaruta muoroto ũrĩa akoragwo naguo harĩ andũ! Tũrutithanagia wĩra ũcio hamwe na ‘mũraika ũrĩa ũmbũkagĩra igũrũ gatagatĩ.’ (Kũg. 14:6) Ĩndĩ no tũcemanie na moritũ mangĩtũma twage kuona ũrĩa wĩra ũcio tũheetwo ũrĩ wa bata. Nĩ moritũ ta marĩkũ? No tũigue tũnogete, tũkuĩte ngoro, kana twĩigue ta tũtagĩrĩire. O na anabii ehokeku a tene nĩ maacemanagia na moritũ ta macio no matiigana gũtiganĩria wĩra wao. Nake Jehova nĩ aamateithirie kũhingia wĩra wao. Ta rekei twarĩrĩrie amwe ao na tuone ũrĩa tũngĩrũmĩrĩra kĩonereria kĩao.

NĨ MEERUTANAGĨRIA MŨNO

Nĩ ũndũ wa mawĩra marĩa tũrutaga o mũthenya, rĩmwe na rĩmwe no tũigue tũnogete, na nĩ ũndũ ũcio tũigue tũtekwenda kũhunjia. Ũhoro wa ma nĩ atĩ, nĩ tũbataraga kũhurũka; o na atũmwo a Jesu nĩ maahurũkaga. (Mar. 6:31) No ta wĩcirie ũhoro wa Ezekieli arĩ Babuloni na wĩra ũrĩa aheetwo arĩ thĩinĩ wa Aisiraeli arĩa maarĩ ithamĩrio. Kũrĩ hĩndĩ Ngai eerire Ezekieli oe iturubarĩ akurure igũrũ rĩarĩo mũhianĩre wa itũũra rĩa Jerusalemu, acoke arĩtharĩkĩre na njĩra ya mũhaano akomete na mwena wake wa ũmotho matukũ 390 na ningĩ na mwena wake wa ũrĩo matukũ 40. Jehova eerire Ezekieli ũũ: “Na atĩrĩrĩ, nĩ kuoha ngũkuoha na mĩhĩndo ndũkegarũre na mwena ũyũ kana ũrĩa ũngĩ, o nginya hĩndĩ ĩrĩa ũkahingia matukũ maku ma gũtharĩkanĩra.” (Ezek. 4:​1-8) No mũhaka akorũo Aisiraeli arĩa maarĩ ithamĩrio nĩ meendire mũno kũmenya gĩtũmi kĩa ũndũ ũcio. Ezekieli aagĩrĩirũo nĩ gwĩka ũndũ ũcio mũritũ makĩria ma mwaka ũmwe. Mũnabii ũcio angĩahotire atĩa kũhingia wĩra ũcio?

Ezekieli nĩ aamenyaga kĩrĩa gĩatũmĩte atũmwo arĩ mũnabii. Ngai agĩtũma Ezekieli aamwĩrire ũũ: “Nacio [ciana cia Isiraeli] nĩikamenya atĩ hoima mũnabii thĩinĩ wacio, o na ingĩkũigua kana irege gũkũigua.” (Ezek. 2:5) Ezekieli nĩ aamenyaga muoroto wa wĩra ũrĩa aaheetwo. Nĩ ũndũ ũcio agĩtĩkĩra gũtharĩkĩra Jerusalemu na njĩra ya mũhaano. Akĩyonania biũ atĩ aarĩ mũnabii wa ma. Thutha ũcio marĩ na Aisiraeli arĩa maarĩ nao ithamĩrio nĩ maakinyĩirũo nĩ ũhoro makĩrũo atĩ “Itũũra nĩ ihũre.” Nĩ ũndũ ũcio Aisiraeli makĩmenya atĩ kwarĩ na mũnabii thĩinĩ wao.​—Ezek. 33:​21, 33.

Ũmũthĩ nĩ tũheaga andũ mũkaana wĩgiĩ kwanangwo kwa mũtabarĩre ũyũ wa Shaitani. O na tũngĩkorũo tũrĩ anogu, nĩ tũhũthagĩra hinya witũ kũhunjia, gũcokera andũ, na kũmaruta Bibilia. O ũrĩa morathi megiĩ mũico wa mũtabarĩre ũyũ marathiĩ makĩhingaga-rĩ, nĩ tũrĩiguaga tũrĩ na gĩkeno nĩ kũmenya atĩ tũkoragwo ‘tũtũmĩtwo nĩ Ngai tũgatware ndũmĩrĩri yake.’

MATIORIRŨO NĨ HINYA BIŨ

Nĩ ũndũ wa ũteithio wa roho mũtheru wa Jehova nĩ twĩrutanagĩria mũno. No rĩmwe na rĩmwe no tũũrũo nĩ hinya nĩ ũndũ wa ũrĩa andũ maraiyũkia ndũmĩrĩri itũ. Gwĩcũrania ũhoro wa kĩonereria kĩa Jeremia no gũtũteithie mũno. Nĩ aanyũrũragio, akarumwo, na agokĩrĩrũo mũno nĩ ũndũ wa kũhunjĩria Aisiraeli ndũmĩrĩri ya Jehova. O na kũrĩ hĩndĩ Jeremia oigĩte ũũ: “Ndikamũgweta, o na kana njoke kwaria ngĩgwetaga rĩĩtwa rĩake.” Jeremia aarĩ mũndũ o ta ithuĩ. O na kũrĩ ũguo ndaigana gũtiga kũhunjia ndũmĩrĩri ya Jehova. Nĩkĩ? Aathire na mbere kuuga ũũ: “Ngoro-inĩ yakwa thĩinĩ gũgũikara ta kwĩ mwaki ũkũmĩcina, o ta arĩ mwaki ũhingĩirũo mahĩndĩ-inĩ makwa thĩinĩ; na ndĩ mũnogie nĩ gũkirĩrĩria, o na ngaremwo nĩ kwĩgirĩrĩria.”​—Jer. 20:​7-9.

O ũndũ ũmwe na ũcio, tũngĩũrũo nĩ hinya nĩ ũndũ wa ũrĩa andũ maraiyũkia ndũmĩrĩri itũ-rĩ, no tũgĩe na hinya tũngĩĩcũrania ũhoro wa ndũmĩrĩri ĩrĩa tũhunjagia. Ndũmĩrĩri ĩyo no ĩtuĩke ta ‘mwaki ũhingĩirũo mahĩndĩ-inĩ maitũ.’ Tũngĩĩmenyeria gũthoma Bibilia o mũthenya, mwaki ũcio no ũthiĩ na mbere gwakana thĩinĩ witũ.

NĨ MAAGĨIRE NA ŨMĨRĨRU

Akristiano amwe nĩ matangĩkaga mũno rĩrĩa maheo wĩra mataramenya ũrĩa mangĩũruta. No kũhoteke mũnabii Hosea nĩ aatangĩkire. Jehova aamwĩrire ũũ: “Thiĩ ũkahikie mũtumia wa maraya, na ũkagĩe na twana twa maraya.” (Hos. 1:2) Ta hũũra mbica ũrĩa ũngĩigua ũkĩenda kũhikania nake Ngai akwĩre ũhikie mũtumia mũmaraya! Hosea nĩ aathĩkĩire uuge wa Jehova. Akĩhikia Gomeri na magĩciara kahĩĩ. Thutha ũcio Gomeri agĩciara kairĩtu na kahĩĩ kangĩ. Ciana icio igĩrĩ cia thutha cioimanire na ũtharia. O na Hosea atanahikia Gomeri, Jehova nĩ aamwĩrĩte atĩ Gomeri nĩ ‘angĩkaarũmĩrĩra anyanya kana endwa ake.’ Ũngĩrora nĩ ũkuona atĩ aarĩtie ũhoro wa ‘anyanya kana endwa aingĩ.’ Thutha ũcio nĩ angĩacokire acokerere Hosea. Korũo nĩwe warĩ mũnabii ũcio-rĩ, hihi nĩ ũngĩetĩkĩrire mũcokanwo na mũtumia waku. Ũguo nĩguo Jehova eerire Hosea eke! Mũnabii ũcio o na nĩ aarutire indo nyingĩ nĩguo amũgũre rĩngĩ.​—Hos. 2:7; 3:​1-5.

No kũhoteke Hosea nĩ aarigagwo gwĩka ũguo erĩtwo kũngĩarĩ na ũguni ũrĩkũ. O na kũrĩ ũguo, gwĩka ũrĩa eerĩtwo nĩ gũtũteithagia gũtaũkĩrũo nĩ ruo rũrĩa Jehova aaiguire rĩrĩa Aisiraeli maamũremeire. No ũhoro wa ma nĩ atĩ Aisiraeli amwe arĩa maarĩ na ngoro njega nĩ maacokereire Jehova.

Mahinda-inĩ maya gũtirĩ mũndũ Ngai eraga ahikie ‘mũtumia mũmaraya.’ O na kũrĩ ũguo-rĩ, hihi nĩ kũrĩ ũndũ tũngĩĩruta kuumana na gĩĩko kĩu kĩa Hosea gũkorũo eeharĩirie gwathĩkĩra uuge wa Jehova? Ũndũ ũmwe tũngĩĩruta nĩ atĩ o na angĩkorũo nĩ tũrona ũtarĩ ũndũ mũhũthũ, twagĩrĩirũo gũkorũo twĩhaarĩirie kũhunjia “mũingĩ-inĩ na nyũmba o nyũmba.” (Atũm. 20:20) No kũhoteke atĩ nĩ wonaga njĩra imwe cia kũhunjia irĩ nditũ mũno harĩ we. Andũ aingĩ arĩa merutaga na Aira a Jehova moigaga atĩ nĩ makenagĩra mũno kwĩruta Bibilia no makoiga kĩndũ matangĩka nĩ kũhunjia nyũmba kwa nyũmba. Aingĩ ao nĩ macokaga mageka ũndũ o ũrĩa moigĩte atĩ matingĩka. Hihi nĩ ũrona ũndũ ũrĩa tũreruta hau?

Nĩ harĩ ũndũ ũngĩ tũngĩĩruta kuumana na Hosea gwĩtĩkĩra gwĩka ũndũ ũcio mũritũ. Nĩ angĩarutire ciĩgwatio cia kwaga kũhikia Gomeri. Gũtirĩ mũndũ ũngĩamenyire ũhoro ũcio korũo Hosea ndaawandĩkire. O na ithuĩ no tũkorũo na mweke wa kũhunjĩria mũndũ, na no gũkorũo gũtirĩ mũndũ ũkaamenya atĩ nĩ twagĩĩte na mweke ũcio. Ũguo nĩguo gwathire harĩ Anna, mũrutwo wa sekondarĩ thĩinĩ wa United States. Mwarimũ wao aamerĩte maandĩke ũhoro mũna ũrĩa o mũndũ angĩenda gũtaarĩria kĩrathi. Ũcio warĩ mweke wa kũhunjia, no Anna aangĩendire nĩ angĩethemire kũũhũthĩra. Handũ ha ũguo, oonire ta arĩ Ngai wamũhe mweke ũcio. Nĩ ũndũ wa gwĩciria ũrĩa andũ mangĩaiyũkirie ũhoro ũcio, akĩhoya Jehova. Na nĩ ũndũ ũcio, akĩgĩa na wendi mũnene wa kũhũthĩra mweke ũcio. Akĩandĩka ũhoro warĩ na kĩongo: “Hihi Andũ Moimanire na Nũgũ?”

Hĩndĩ ĩrĩa Anna aathomeire kĩrathi ũhoro ũcio, mũirĩtu ũmwe wetĩkĩtie atĩ andũ moimanire na nũgũ nĩ aamũririe ciũria nyingĩ. Anna nĩ aahotire gũtetera wĩtĩkio wake biũ. Mwarimũ wao nĩ aakenirio mũno nĩ Anna na akĩmũhe kĩheo tondũ nĩwe waandĩkĩte ũhoro ũrĩa mwega makĩria. Kuuma hĩndĩ ĩyo Anna nĩ akoretwo akĩaria na mũirĩtu ũcio maũndũ maingĩ megiĩ ũũmbi. Nĩ ũndũ wa gwĩtĩkĩra mweke ũcio aaheirũo nĩ Jehova, Anna oigaga ũũ: “Rĩu hunjagia ũhoro ũrĩa mwega ndĩ na ũmĩrĩru.”

O na gũtuĩka ithuĩ tũtirĩ anabii ta Ezekieli, Jeremia, na Hosea-rĩ, tũngĩonania roho wa kwĩima ta ũrĩa maarĩ naguo no tũhingie maũndũ marĩa Jehova endaga ũmũthĩ. Hĩndĩ ya Ũthathaiya wa Famĩlĩ kana ya wĩruti waku, no wĩrute ũhoro wa anabii angĩ na wĩcũranie ũrĩa ũngĩrũmĩrĩra kĩonereria kĩao.