Tĩaga Wĩyathi Waku wa Gwĩthuurĩra
“Harĩa roho wa Jehova ũkoragwo, nĩ hakoragwo na wĩyathi.”—2 KOR. 3:17.
1, 2. (a) Andũ makoragwo na mawoni marĩkũ ngũrani makoniĩ wĩyathi wa gwĩthuurĩra? (b) Bibilia ĩtũrutaga ũndũ ũrĩkũ wĩgiĩ wĩyathi witũ wa gwĩthuurĩra, na nĩ ciũria irĩkũ tũgũthuthuria?
MŨTUMIA ũmwe wabataraga gũtua itua eerire mũratawe ũũ: “Tiga gũtũma ndinde ngĩciria, njĩra ũrĩa ngwĩka. Ũcio nĩguo ũndũ ũrĩa mũhũthũ.” Mũtumia ũcio eendaga kwĩrũo ũrĩa egwĩka handũ ha kũhũthĩra kĩheo kĩa goro kuuma kũrĩ Mũũmbi; kĩheo kĩa wĩyathi wa gwĩthuurĩra. Ĩ we nawe? Nĩ wendete gwĩtuĩra matua maku, kana wonaga arĩ wega rĩrĩa angĩ maagũtuĩra matua? Wonaga atĩa ũndũ ũcio wa gũkorũo tũrĩ na wĩyathi wa gwĩthuurĩra?
2 Kwa ihinda rĩa mĩaka mĩingĩ, andũ maanarĩrĩria ũndũ ũcio. Amwe moigaga atĩ gũtirĩ kĩndũ ta wĩyathi wa gwĩthuurĩra tondũ maũndũ marĩa twĩkaga makoragwo mabangĩtwo nĩ Ngai. Angĩ nao moigaga atĩ wĩyathi wa ma wa gwĩthuurĩra no wonekire tu tũngĩkorũo tũtirĩ mĩhaka tũigĩirũo. O na kũrĩ ũguo, nĩ getha tũtaũkĩrũo nĩ ũndũ ũyũ no mũhaka tũthuthurie ũrĩa Kiugo kĩa Ngai, Bibilia, kiugĩte. Nĩkĩ? Bibilia nĩ ĩguũrĩtie atĩ Jehova aatũmbire tũrĩ na wĩyathi wa gwĩthuurĩra, ũguo nĩ kuuga wĩyathi na ũhoti wa gũtua matua ma ũũgĩ. (Thoma Joshua 24:15.) Ningĩ Bibilia nĩ ĩcoketie ciũria ta: Tũbatiĩ kũhũthĩra atĩa wĩyathi witũ wa gwĩthuurĩra? Wĩyathi witũ nĩ ũrĩ mĩhaka? Ũrĩa tũrahũthĩra wĩyathi witũ wa gwĩthuurĩra kuonanagia atĩa gĩkĩro kĩrĩa twendete Jehova nakĩo? Tũngĩonania atĩa atĩ nĩ tũratĩa matua ma arĩa angĩ?
TŨNGĨĨRUTA ŨNDŨ ŨRĨKŨ KUUMANA NA JEHOVA NA JESU?
3. Jehova atũigĩire kĩonereria kĩrĩkũ ũhoro-inĩ wĩgiĩ kũhũthĩra wĩyathi?
3 Jehova nowe wiki ũkoragwo na wĩyathi ũtarĩ mĩhaka, ĩndĩ nĩ atũigĩire kĩonereria kũgerera njĩra ĩrĩa ahũthagĩra wĩyathi wake. Kwa ngerekano, nĩ aathuurire rũrĩrĩ rwa Isiraeli rũtuĩke andũ metanĩtio na rĩĩtwa rĩake, “rũrĩrĩ rũĩ bata mũno.” (Gũcok. 7:6-8) Hihi rĩarĩ itua rĩtarĩ na mũthingi? Aca, Jehova aahingagia kĩĩranĩro eerĩire mũratawe Iburahimu mĩaka magana maingĩ mbere ĩyo. (Kĩam. 22:15-18) Makĩria ma ũguo, hĩndĩ ciothe Jehova ahũthagĩra wĩyathi wake agĩtongorio nĩ ngumo ya wendo na ya kĩhooto. Ũndũ ũyũ no woneke wega kũgerera ũrĩa aaherithagia Aisiraeli rĩrĩa matiganĩria ũthathaiya wa ma. Mangĩeririre kuuma ngoro, Jehova nĩ aamonagia wendo na tha eyendeire, na akoiga: “Nĩ kũhonia ngũmahonia kũrĩa macokete na thutha, na ndĩmende mũno o ndĩyendeire.” (Hos. 14:4) Jehova nĩ kĩonereria kĩega mũno harĩ kũhũthĩra wĩyathi nĩ getha agune arĩa angĩ.
4, 5. (a) Nũ warĩ wa mbere kwamũkĩra kĩheo kĩa wĩyathi wa gwĩthuurĩra, na aakĩhũthĩrire atĩa? (b) Nĩ kĩũria kĩrĩkũ o ũmwe witũ arĩ o mũhaka eyũrie?
4 Rĩrĩa Jehova aambĩrĩirie wĩra wake wa kũũmba, nĩ aatindĩkirũo nĩ wendo na agĩthuura kũhe andũ na araika wĩyathi wa gwĩthuurĩra. Mũrũ wake wa irigithathi, o we “mũhianĩre wa Ngai ũrĩa ũtonekaga,” nĩwe warĩ wa mbere kwamũkĩra kĩheo kĩu. (Kol. 1:15) O na mbere ya gũka gũkũ thĩ, Jesu nĩ aathuurire gũtũũra arĩ mwĩhokeku harĩ Ithe na akĩrega kũnyitanĩra na Shaitani ũremi-inĩ wake. Thutha ũcio Jesu arĩ gũkũ thĩ, nĩ aahũthĩrire wĩyathi wake wa gwĩthuurĩra rĩrĩa aareganire na magerio ma Thũ ĩyo nene. (Mat. 4:10) Kũgerera mahoya ma kuuma ngoro ũtukũ wa mũico mbere ya gũkua gwake, Jesu nĩ onanirie o rĩngĩ itua rĩake irũmu rĩa gwĩka wendi wa Ngai. Oigire ũũ: “Awa, angĩkorũo nĩ ũkwenda, njehereria gĩkombe gĩkĩ. O na kũrĩ ũguo, reke wendi waku wĩkĩke, no ti wakwa.” (Luk. 22:42) Rekei twĩgerekanie na Jesu na tũhũthĩre wĩyathi witũ wa gwĩthuurĩra gũtĩithia Jehova na gwĩka wendi wake! Hihi ũndũ ũcio no ũhoteke?
5 Ĩĩ, no tũhote kwĩgerekania na Jesu, nĩ gũkorũo o na ithuĩ tũmbĩtwo na mũhianĩre wa Ngai. (Kĩam. 1:26) O na kũrĩ ũguo, tũtingĩka ũguo na njĩra nginyanĩru. Ngũrani na Jehova, wĩyathi witũ nĩ ũrĩ mĩhaka. Kiugo kĩa Ngai kĩonanagia atĩ wĩyathi witũ nĩ ũrĩ mĩhaka, na atĩ no mũhaka tũrũmĩrĩre ithimi iria Jehova atũigĩire. Makĩria ma ũguo, atumia no mũhaka menyihĩrie athuri ao na ciana ciĩnyihĩrie aciari a cio. (Ef. 5:22; 6:1) Mĩhaka ĩyo tũigĩirũo ĩhutagia atĩa njĩra ĩrĩa tũhũthagĩra wĩyathi witũ wa gwĩthuurĩra? Ũtũũro witũ wa tene na tene ihinda rĩũkĩte, no ũkorũo wĩhocetie harĩ macokio ma kĩũria kĩu.
KŨHŨTHĨRA WĨYATHI WA GWĨTHUURĨRA
6. Heana ngerekano ĩronania nĩkĩ nĩ ũndũ mwagĩrĩru gũkorũo na wĩyathi ũrĩ na mĩhaka.
6 Hihi wĩyathi ũrĩ na mĩhaka no wĩyathi wa ma? Ĩĩ. Nĩkĩ kĩngĩtũma tuuge ũguo? Mĩhaka ta ĩyo no ĩkorũo ĩrĩ ũgitĩri harĩ andũ. Kwa ngerekano no tũhũthĩre wĩyathi witũ gũtua itua rĩa gũthiĩ taũni ya kũraihu na ngari. O na kũrĩ ũguo-rĩ, hihi no tũigue tũrĩ na ũgitĩri tũngĩkorũo tũragera bara ĩtarĩ na mawatho, na o mũndũ aratwarithia ngari ũrĩa ekwenda na akagera mwena ũrĩa ekwenda? Aca. Mĩhaka nĩ ya bata nĩ getha o mũndũ akenere irathimo cia gũkorũo arĩ na wĩyathi. Nĩ getha tũtaũkĩrũo makĩria nĩkĩ arĩ ũndũ wa ũũgĩ kũhũthĩra wĩyathi witũ tũkĩrũmĩrĩra mĩhaka ĩrĩa Jehova aigĩte, rekei tũthuthurie ngerekano imwe cia Bibilia.
7. (a) Gũkorũo Adamu aarĩ na wĩyathi wa gwĩthuurĩra gwatũmaga akorũo arĩ ngũrani atĩa na nyamũ? (b) Taarĩria njĩra ĩmwe ĩrĩa ĩronania ũrĩa Adamu aahũthĩrire wĩyathi wake wa gwĩthuurĩra.
7 Ngai omba mũndũ wa mbere Adamu, nĩ aamũheire kĩheo o ta kĩrĩa aaheete araika, kĩa wĩyathi wa gwĩthuurĩra. Ũndũ ũcio nĩ watũmire Adamu akorũo arĩ ngũrani na nyamũ, iria itongoragio nĩ ũũgĩ wa mũũmbĩre. Ta wĩcirie njĩra ĩmwe njega Adamu aahũthĩrire wĩyathi wake wa gwĩthuurĩra. Nyamũ ciombirũo mbere ya mũndũ. O na kũrĩ ũguo, Jehova nĩ arekire Adamu akenere mweke wa gũcihe marĩĩtwa. Ngai “agĩcoka agĩcitwara ciothe kwĩ mũndũ ũcio, nĩguo emenyere ũrĩa egũciĩta.” Thutha wa Adamu gũtuĩria o nyamũ na kũmĩhe rĩĩtwa rĩrĩa onaga rĩagĩrĩire, Jehova ndaacokaga kũgarũra itua rĩu. Ithenya rĩa ũguo, “kĩũmbe o gĩothe gĩa icio irĩ muoyo-rĩ, o rĩĩtwa rĩrĩa mũndũ ũcio aagĩtuire, rĩu rĩgĩtuĩka rĩĩtwa rĩakĩo.”—Kĩam. 2:19.
8. Adamu aahũthĩrire ũũru wĩyathi wake wa gwĩthuurĩra na njĩra ĩrĩkũ, na moimĩrĩro maarĩ marĩkũ?
8 Ũndũ wa kĩeha nĩ atĩ, Adamu ndaiganĩire nĩ wĩra ũrĩa aahetwo nĩ Ngai wa kũrĩma na kũrũmbũiya paradiso gũkũ thĩ. Nĩ aagire kũiganĩra na wĩyathi ũrĩa aahetwo nĩguo ahingie wĩra ũrĩa eehokeirũo nĩ Ngai. Eerĩtwo ũũ: “Ciarai mũno, mũthegee, mũiyũre thĩ, na mũmĩtorie; ningĩ mwathage ciũngũyũ cia iria, na nyamũ iria irĩ njoya cia rĩera-inĩ, o na nyamũ o yothe ĩrĩa ĩthiangaga thĩ.” (Kĩam. 1:28) Handũ ha ũguo, aathuurire gũkĩrũka mĩhaka ĩrĩa aigĩirũo nĩ Ngai na akĩrĩa itunda rĩrĩa aakanĩtio. Moimĩrĩro ma kũhũthĩra ũũru wĩyathi wa gwĩthuurĩra, makoretwo marĩ ruo na mĩnyamaro ya mĩaka ngiri nyingĩ harĩ njiarũa cia Adamu. (Rom. 5:12) Kũmenya moimĩrĩro ma itua rĩũru rĩa Adamu kũbatiĩ gũtũtindĩka tũhũthĩre wĩyathi witũ na njĩra njega na tũrũmĩrĩre mĩhaka ĩrĩa ĩigĩtwo nĩ Jehova.
9. Jehova aaheire Aisiraeli mweke wa gũthuura ũndũ ũrĩkũ, na maiyũkirie ũndũ ũcio atĩa?
9 Njiarũa cia Adamu na Hawa nĩ ciagaire gĩkuũ na kwaga gũkinyanĩra kuuma kũrĩ aciari a cio aremi. O na kũrĩ ũguo, no ciathire na mbere gũkorũo na wĩyathi wa gwĩthuurĩra. Ũndũ ũcio nĩ wonekaga wega harĩ ũrĩa Ngai aahiũranagia na rũrĩrĩ rwa Isiraeli. Kũgerera Musa ndungata yake, Jehova nĩ aaheire Aisiraeli mweke wa gwĩtĩkĩra kana kũrega gĩtĩo gĩa gũtuĩka kĩndũ gĩake kĩa bata mũno. (Tham. 19:3-6) Maiyũkirie atĩa ũndũ ũcio? Nĩ meetĩkĩrire meyendeire kũhingia maũndũ marĩa mabataranagia nĩguo matuĩke andũ metanĩtio na rĩĩtwa rĩa Ngai, na makiuga ũũ na mũgambo ũmwe: “Maũndũ macio mothe Jehova oigĩte, nomo tũgwĩka.” (Tham. 19:8) Ũndũ wa kĩeha nĩ atĩ thutha wa ihinda, rũrĩrĩ rũu nĩ rwahũthĩrire ũũru wĩyathi waruo wa gwĩthuurĩra na rũkĩaga kũhingia mwĩhĩtwa ũcio. Rekei ngerekano ĩno ĩtuĩke mũkaana harĩ ithuĩ na tũtĩe kĩheo gitũ kĩa wĩyathi wa gwĩthuurĩra na njĩra ya gũthiĩ na mbere kũnyitana na Jehova na gwathĩkĩra ithimi ciake cia ũthingu.—1 Kor. 10:11.
10. Nĩ ngerekano irĩkũ cionanagia atĩ andũ matarĩ akinyanĩru no mahote kũhũthĩra wĩyathi wao wa gwĩthuurĩra na njĩra ĩgũtĩithia Ngai? (Rora mbica kĩambĩrĩria-inĩ gĩa gĩcunjĩ gĩkĩ.)
10 Thĩinĩ wa Ahibirania mũrango wa 11, nĩ hakoragwo na marĩĩtwa 16 ma ndungata cia Ngai iria ciathuurire kũhũthĩra wĩyathi wa cio kũringana na mĩhaka ĩrĩa Jehova aigĩte. Nĩ ũndũ ũcio, ciagĩire na irathimo nyingĩ mũno na kĩĩrĩgĩrĩro kĩa ma kĩa ihinda rĩũkĩte. Kwa ngerekano, Nuhu onanirie wĩtĩkio mũnene, agĩthuura gwathĩkĩra ũtongoria wa Ngai wĩgiĩ gwaka thabina nĩguo ahonokie famĩlĩ yake na njiarũa iria cingĩokire thutha ũcio. (Ahib. 11:7) Iburahimu na Sara maarũmĩrĩire ũtongoria wa Ngai na kwĩyendera nginya bũrũri-inĩ wa kĩĩranĩro. O na marĩ rũgendo-inĩ rũu rũraihu, nĩ maarĩ na “mweke wa gũcoka” itũũra-inĩ rĩrĩa moimĩte rĩa Uru, rĩrĩa rĩarĩ na ũtonga mũingĩ. O na kũrĩ ũguo, maaigire maitho mao ma wĩtĩkio harĩ ‘kũhinga gwa ciĩranĩro cia Ngai’ iria ciarĩ mbere, kwoguo ‘magĩthingata handũ hega makĩria.’ (Ahib. 11:8, 13, 15, 16) Musa aaregire ũtonga wa Misiri, “agĩthuura kũnyariranĩrio na andũ a Ngai handũ ha gũkenera mehia gwa kahinda kanini.” (Ahib. 11:24-26) Rekei twĩgerekanie na wĩtĩkio wa ndungata icio cia tene cia Jehova na njĩra ya kuoya na ũritũ kĩheo kĩa wĩyathi wa gwĩthuurĩra na gũkĩhũthagĩra gwĩka wendi wa Ngai.
11. (a) Kĩrathimo kĩmwe kĩnene kĩa wĩyathi wa gwĩthuurĩra nĩ kĩrĩkũ? (b) Nĩ kĩĩ gĩgũtindĩkaga kũhũthĩra wĩyathi waku wa gwĩthuurĩra na njĩra ĩrĩa yagĩrĩire?
11 O na gũtuĩka no tuone arĩ ũndũ mũhũthũ harĩ ithuĩ angĩkorũo mũndũ ũngĩ nĩ egũtũtuĩra matua, gwĩka ũguo no gũtũme twage gũkenera kĩrathimo kĩmwe kĩnene kĩrĩa kiumanaga na wĩyathi wa gwĩthuurĩra. Kĩrathimo kĩu kĩonanĩtio thĩinĩ wa rĩandĩko rĩa Gũcokerithia Maathani 30:19, 20. (Thoma.) Mũhari wa 19 ũtaaragĩria mweke wa gũthuura, ũrĩa Ngai aaheire Aisiraeli. Naguo mũhari wa 20 ũtũteithagia kũmenya atĩ Jehova nĩ aamaheire mweke mwega mũno wa kũmuonia kĩrĩa kĩarĩ ngoro-inĩ ciao. O na ithuĩ no tũthuure gũtungatĩra Jehova. Muoroto witũ mũnene wagĩrĩirũo gũkorũo ũrĩ kũhũthĩra kĩheo kĩrĩa Ngai atũheete kĩa wĩyathi wa gwĩthuurĩra kuonania wendo witũ harĩ we na kũmũrehera ngumo na ũgooci.
WĨTHEME KŨHŨTHAGĨRA ŨŨRU KĨHEO KĨA WĨYATHI WA GWĨTHUURĨRA
12. Nĩ atĩa tũtagĩrĩirũo gwĩka na wĩyathi witũ wa gwĩthuurĩra?
12 Ta hũũra mbica ũheete mũrata waku kĩheo kĩa goro mũno. Na githĩ to ũigue ũũru mũno ũngĩmenya atĩ aikirie kĩheo kĩu mborera, kana agĩkĩhũthĩra gwĩka mũndũ ũngĩ ũũru! Rĩu ta wĩcirie ũrĩa Jehova aiguaga akĩĩrorera andũ aingĩ makĩhũthĩra ũũru wĩyathi wao magatua matua marĩ na moimĩrĩro moru nginya harĩ andũ angĩ. O ta ũrĩa Bibilia yarathĩte “matukũ-inĩ ma kũrigĩrĩria” andũ mangĩgakorũo “matarĩ ngatho.” (2 Timotheo 3:1, 2) Rekei tuoyage na ũritũ kĩheo kĩu kĩa goro Jehova atũheete na tũtikanakĩhũthĩre ũũru. No tũngĩĩthema atĩa kũhũthĩra ũũru kĩheo kĩa wĩyathi wa gwĩthuurĩra?
13. Njĩra ĩmwe twagĩrĩirũo gwĩthema ya kũhũthĩra ũũru wĩyathi witũ nĩ ĩrĩkũ?
13 Ithuothe nĩ tũkoragwo na wĩyathi wa gwĩthuurĩra arata, kĩrĩa tũkwĩhumba, na maũndũ ma gwĩkenia. O na kũrĩ ũguo, no tũhũthĩre wĩyathi witũ “kũhithĩrĩra mehia” tũngĩthuura gũtuĩka ngombo cia merirĩria ma mĩĩrĩ itũ, kana tũngĩrũmagĩrĩra mĩĩhumbĩre na mĩĩkĩre ya maũndũ ĩtarĩ na gĩtĩo ya thĩ ĩno. (Thoma 1 Petero 2:16.) Handũ ha kũhũthĩra wĩyathi witũ “arĩ njĩra ya gũthingata merirĩria ma mwĩrĩ,” tũkwenda gũtua itua rĩa gũtuaga matua marĩtũteithagia kũrũmagĩrĩra ũtaaro ũyũ: “Ĩkagai maũndũ mothe nĩguo mũgoocithie Ngai namo.”—Gal. 5:13; 1 Kor. 10:31.
14. Kwĩhoka Jehova kũhutanĩtie atĩa na kũhũthĩra wĩyathi witũ wa gwĩthuurĩra?
14 Njĩra ĩngĩ ya kũgitĩra kĩheo gitũ kĩa wĩyathi wa gwĩthuurĩra nĩ kwĩhoka Jehova na kũreka atũtongoragie tũtegũkĩra mĩhaka ĩrĩa atũigĩire ya gũtũgitĩra. Nowe wiki ‘ũtũrutaga maũndũ ma gũtũguna, o We ũrĩa ũtũtongoragia na njĩra ĩrĩa twagĩrĩirũo nĩ kũgera.’ (Isa. 48:17) No mũhaka twĩnyihie na twĩtĩkĩre ũũma wa ciugo ici: “Gũtirĩ mũndũ wa gũkũ thĩ ũngĩhota gwĩthondekera mĩthiĩre yake we mwene, o na kana arũngĩrĩrie makinya make njĩra-inĩ ĩrĩa yerekereire.” (Jer. 10:23) Tũtikanetĩkĩre kũgũa mũtego-inĩ wa gũthuura kwĩĩhoka ithuĩ ene, ta ũrĩa Adamu na Aisiraeli aremi mekire. Handũ ha ũguo, rekei ‘twĩhokage Jehova na ngoro itũ yothe.’—Thim. 3:5.
GŨTĨA WĨYATHI WA GWĨTHUURĨRA WA ANDŨ ARĨA ANGĨ
15. Nĩ ũndũ ũrĩkũ tũreruta kuumana na ũtaaro ũrĩa ũrĩ thĩinĩ wa Agalatia 6:5?
15 Mũhaka ũmwe twĩkĩrĩirũo wĩgiĩ wĩyathi witũ nĩ atĩ no nginya tũtĩe kĩhooto kĩa arĩa angĩ gĩa gwĩtuĩra matua mao ũtũũro-inĩ. Nĩkĩ? Tondũ ithuothe nĩ tũkoragwo na kĩheo kĩa wĩyathi wa gwĩthuurĩra, kwoguo gũtirĩ hĩndĩ Akristiano erĩ marĩtuaga matua mahaanaine. Ũndũ ũcio nĩ wonekaga nginya maũndũ-inĩ megiĩ mĩtugo na ũthathaiya. Ririkana ũtaaro ũrĩa ũkoragwo thĩinĩ wa Agalatia 6:5. (Thoma.) Tũngĩmenya atĩ o Mũkristiano no mũhaka “arĩkuuaga mũrigo wake mwene,” nĩ tũrĩtĩaga kĩhooto kĩa arĩa angĩ gĩa kũhũthĩra kĩheo kĩao kĩa wĩyathi wa gwĩthuurĩra.
No tũtue matua maitũ tũtegũtindĩkĩrĩria arĩa angĩ marũmĩrĩre thamiri citũ (Rora kĩbungo gĩa 15)
16, 17. (a) Wĩyathi wa gwĩthuurĩra wabatarire kwarĩrĩrio nĩkĩ thĩinĩ wa Korintho? (b) Mũtũmwo Paulo aateithirie Akristiano acio na njĩra ĩrĩkũ, na ũndũ ũcio ũratũruta atĩa ũhoro-inĩ wĩgiĩ ihooto cia arĩa angĩ?
16 Ta wĩcirie ngerekano ĩrĩ Bibilia-inĩ ĩrĩa ĩronania gĩtũmi gĩa gũtĩa wĩyathi wa aarĩ na ariũ a Ithe witũ wa gwĩtuĩra matua maũndũ-inĩ megiĩ thamiri. Akristiano thĩinĩ wa Korintho maarĩ na mawoni ngũrani megiĩ kũrĩa nyama iria ciambaga kũrutĩrũo mĩhianano, igacoka igatwarũo thoko-inĩ kwendio. Amwe moigaga, ‘Tondũ mĩhianano ti kĩndũ-rĩ, mũndũ no arĩe nyama icio arĩ na thamiri theru.’ O na kũrĩ ũguo, arĩa maathathayagia mĩhianano mbere ya matuĩkĩte Akristiano, monaga kũrĩa nyama icio ta arĩ ũthathaiya. (1 Kor. 8:4, 7) Ũndũ ũcio warĩ mũritũ tondũ warĩ hakuhĩ kũgayũkania kĩũngano. Mũtũmwo Paulo aateithirie Akristiano a Korintho atĩa nĩguo magĩe na muonere ta wa Ngai ũndũ-inĩ ũcio?
17 Ũndũ wa mbere Paulo aamaririkanirie nĩ atĩ irio itingĩatũmire makuhakuhĩrĩrie Ngai. (1 Kor. 8:8) Agĩcoka akĩmaririkania matigetĩkĩrie ‘wĩyathi wao wa gũthuura’ ũtuĩke “mũhĩnga harĩ arĩa [mataarĩ] hinya.” (1 Kor. 8:9) Thutha-inĩ, agĩtaara arĩa thamiri ciao itaarĩ na hinya matigatuagĩre arĩa maathuuraga kũrĩa nyama icio. (1 Kor. 10:25, 29, 30) Kwoguo, ũndũ-inĩ ũcio wahutĩtie ũthathaiya, o Mũkristiano aabataraga gwĩtuĩra itua rĩake. Angĩkorũo o Mũkristiano nĩ abataraga gwĩtuĩra itua rĩake maũndũ-inĩ megiĩ ũthathaiya-rĩ, na githĩ tũtikĩagĩrĩirũo gũtĩaga kĩhooto kĩa aarĩ na ariũ a Ithe witũ gĩa gwĩtuagĩra matua maũndũ-inĩ mangĩ matarĩ maritũ?—1 Kor. 10:32, 33.
18. Ũkuonania atĩa atĩ nĩ ũtĩĩte kĩheo gĩaku kĩa wĩyathi wa gwĩthuurĩra?
18 Jehova nĩ atũheete kĩheo kĩa wĩyathi wa gwĩthuurĩra kĩrĩa gĩtũheaga wĩyathi wa ma. (2 Kor. 3:17) Nĩ tũtĩĩte kĩheo kĩu mũno tondũ nĩ gĩtũmaga tũhote gũtua matua monagia Jehova ũrĩa tũmwendete. Rekei tũthiĩ na mbere kuonania ngatho citũ nĩ ũndũ wa kĩheo kĩu kĩa goro kũgerera gũkĩhũthĩra na njĩra ĩratĩithia Ngai, na kũgerera gũtĩa ũrĩa andũ arĩa angĩ mathuuraga gũkĩhũthĩra.