Rĩrĩa Ũraigua ta Ũngĩĩruta Muoyo

Adriana, kuuma Brazil ooigire ũũ: “Ndiatigaga kũigua ũguo. Kwoguo ngĩona wega nĩ kwĩyũraga.”

HIHI nĩ ũrĩ waigua ũritũhĩirũo nginya ũkĩaga bata wa gũkorũo ũrĩ muoyo? Angĩkorũo wanaigua ũguo, no ũtaũkĩrũo nĩ ũrĩa Adriana aaiguaga. Aarĩ na mĩtangĩko mĩnene, ningĩ nĩ aaiguaga ihooru na akeigua atarĩ kĩene. Adriana aarĩ na mũrimũ wa gũthuthĩka ngoro (depression).

Ningĩ ta wĩcirie ũhoro wa mũthuri ũmwe kuuma Japan wĩtagwo Kaoru, ũrĩa watungataga aciari ake arĩa maarĩ arwaru na akũrũ. Ooigire ũũ: “Ihinda-inĩ rĩu ndaahiũranagia na hatĩka nene wĩra-inĩ. Thutha wa ihinda ngĩremwo nĩ kũrĩa, na ngĩambĩrĩria kũrũo nĩ toro. Ngĩambĩrĩria kuona atĩ gũkua nĩ kũngĩaniinĩire mathĩna marĩa ndageragĩra.”

Mũthuri ũmwe kuuma Nigeria wĩtagwo Ojebode ooigire ũũ: “Hingo ciothe ndaaiguaga kĩeha nginya ngaita maithori, kwoguo ngĩambĩrĩria gwetha ũrĩa ingĩĩruta muoyo.” Ũndũ ũrĩa mwega nĩ atĩ Ojebode, Kaoru, na Adriana matieyũragire. No andũ aingĩ nĩ meyũragaga o mwaka.

ŨNGĨRUTA ŨTEITHIO KŨ?

Andũ arĩa kaingĩ meyũragaga nĩ arũme, tondũ aingĩ nĩ maiguaga thoni gwetha ũteithio. Jesu ooigire atĩ andũ arĩa arwaru nĩo mabataraga ndagĩtarĩ. (Luka 5:31) Nĩ ũndũ ũcio-rĩ, angĩkorũo ũguo nĩguo ũiguaga ndũgaconoke gũcaria ũteithio. Andũ aingĩ arĩa makoragwo na mũrimũ wa gũthuthĩka ngoro nĩ monete atĩ ũrigitani nĩ ũmateithagia gũkirĩrĩria. Ojebode, Kaoru, na Adriana rĩu nĩ maiguaga wegega tondũ othe nĩ maarigitirũo.

Mandagĩtarĩ no mahe mũndũ ũrĩ na mũrimũ wa gũthuthĩka ngoro ndawa na mamwarĩrie nĩguo marũnge mwĩcirĩrie wake kana mahũthĩre njĩra ĩmwe ya icio. Andũ a famĩlĩ na arata a mũndũ ũrĩ na mũrimũ ũcio nĩ mabataraga kũmũrũmbũiya na kũmũteithĩrĩria marĩ na wetereri. Jehova Ngai nĩwe mũrata ũrĩa mwega biũ mũndũ angĩgĩa nake, na nĩ atũteithagia na njĩra nene kũgerera Kiugo gĩake Bibilia.

RUO NĨ RŨGAATHIRA

Arĩa marĩ na mũrimũ wa gũthuthĩka ngoro no mabatare kũrigitwo ihinda iraya na mabatare kũgarũrĩra mũtũũrĩre wao. No angĩkorũo nĩ ũkoragwo na mũrimũ wa gũthuthĩka ngoro, no wĩrĩgĩrĩre ũtũũro mwega wa ihinda rĩrĩa rĩroka, o ta ũrĩa Ojebode ekaga. Ooigire ũũ: “Nĩ ndĩriragĩria kuona rĩandĩko rĩa Isaia 33:24 rĩkĩhinga rĩrĩa riugaga atĩ nĩ kũrĩ hĩndĩ thĩinĩ wa thĩ gũtagakorũo na mũndũ ũkuuga ‘Ndĩ mũrwaru.’” O ta Ojebode, reke kĩĩranĩro kĩa Ngai gĩa “thĩ njerũ” ĩrĩa ĩtagaakorũo na “ruo” gĩkũũmagĩrĩrie. (Kũguũrĩrio 21:1, 4) Kũringana na kĩĩranĩro kĩu, ruo ruothe rwa ngoro na meciria nĩ rũgaathira. Ruo o ruothe ũiguaga ndũkaarũigua rĩngĩ tene na tene. Ruo rwaku ‘rũtikaaririkanwo, o na kana rũikare ngoro-inĩ yaku.’—Isaia 65:17.

Mĩhari ya Bibilia Ĩngĩgũteithia

Ngai nĩ ataũkagĩrũo nĩ ũrĩa ũraigua.

“Niĩ Jehova Ngai waku, nĩ nyitĩte guoko gwaku kwa ũrĩo, na ngakwĩra atĩrĩ, ‘Ndũgetigĩre. Nĩ ngũgũteithia.’”—Isaia 41:13.

Jehova nĩ ataũkagĩrũo nĩ ũrĩa tũraigua gũkĩra mũndũ ũngĩ o wothe na nĩ akoragwo ehaarĩirie gũtũteithia.

Wĩcũranagie igũrũ rĩgiĩ Kiugo kĩa Ngai.

“[Elija] akĩhoya akue. Akiuga ũũ: ‘. . . Wee Jehova, rĩu nduta muoyo.’”—1 Athamaki 19:4.

Ojebode ooigire ũũ: “Gwĩcũrania igũrũ rĩgiĩ Kiugo kĩa Ngai nĩ kwandeithirie. Nĩ kwandeithirie kuona atĩ kũrĩ hĩndĩ mũnabii Elija aaiguaga o ta ũrĩa ndaaiguaga.”

Wĩrute kuumana na andũ arĩa magwetetwo Bibilia-inĩ.

Jesu eerire Petero ũũ: “Nĩ ngũthaithanĩrĩire nĩguo wĩtĩkio waku ndũkage hinya.”—Luka 22:32.

Rĩrĩa mũtũmwo Petero aakaanire Jesu maita matatũ, ũndũ ũcio nĩ wamũiguithirie ũũru na akĩrĩra arĩ na ruo rũnene. Kaoru ooigire ũũ: “Ũhoro wĩgiĩ Petero nĩ wandeithirie kuona atĩ Jehova na Jesu nĩ maarũmbũyagia ũrĩa Petero araigua. Ũndũ ũcio nĩ wanjĩkĩrire ngoro.”

Ruo rwaku ‘rũtikaaririkanwo, o na kana rũikare ngoro-inĩ yaku.’—Isaia 65:17